Kichik biznes korxonalarining hisobot berishini qisqartirish va tartibga solish chora-tadbirlari toʻgʻrisida (65-son)

23.02.2000

Oʻzbekiston Respublikasi Vazirlar Mahkamasining

qarori

Vazirlar Mahkamasi bir qancha vazirliklar, idoralar, mahalliy hokimiyat va boshqaruv organlari tomonidan kichik tadbirkorlik subyektlaridan soʻralayotgan qonun hujjatlarida nazarda tutilmagan hisobot va maʼlumotlarning qoʻshimcha shakllari joriy etilishi hollariga yoʻl qoʻyib boʻlmaydi deb hisoblaydi.

Turli tuzilmalar tomonidan hisobotlarning koʻplab shakllari belgilanishi, mikrofirmalar, kichik korxonalarning turli idoralarga katta hajmda axborot taqdim etishi tadbirkorlarning ancha vaqti va mablagʻi boy berilishiga olib kelmoqda, ularni asosiy faoliyatlaridan asossiz ravishda chalgʻitmoqda, tadbirkorlikning rivojlanishiga toʻsqinlik qilmoqda.

Kichik korxonalar, mikrofirmalar uchun yanada qulay shart-sharoitlar yaratish, shuningdek, ular tomonidan taqdim etilayotgan hisobot turlarini ancha soddalashtirish va qisqartirish maqsadida Vazirlar Mahkamasi qaror qiladi:

1. Belgilansinki:

kichik korxonalar, mikrofirmalar hisobotlarni faqat joylardagi davlat statistika organlariga va soliq organlariga ular tomonidan belgilangan shakllar boʻyicha taqdim etadilar;

mikrofirmalar va kichik korxonalar hisobotni yilning har choragida taqdim etadilar. Statistika hisoboti mikrofirmalar tomonidan har yili, statistika organlari tomonidan faoliyatning tegishli yoʻnalishlari va sohalari boʻyicha tanlab tekshirishlar oʻtkazgan holda taqdim etiladi. Mikrofirmalar va kichik korxonalardan har oyda hisobotlar soʻralishiga yoʻl qoʻyilmaydi.

Oʻzbekiston Respublikasi Makroiqtisodiyot va statistika vazirligi Davlat soliq qoʻmitasi, boshqa manfaatdor vazirliklar va idoralar bilan birgalikda mikrofirmalar va kichik korxonalar (shu jumladan qoʻshma korxonalar)ning amaldagi statistika hisobotini oʻn kun muddatda qayta koʻrib chiqsin hamda ular uchun joriy yilning I choragi hisobotidan boshlab mumkin qadar qisqartirilgan, soddalashtirilgan va birxillashtirilgan hisobotni, shuningdek, uni taqdim etish tartibini joriy etsin.

2. Vazirliklar va idoralarning mikrofirmalar, kichik korxonalar tomonidan qoʻshimcha hisobot turlari taqdim etilishini nazarda tutuvchi koʻrsatmalar va meʼyoriy hujjatlar chiqarishi taqiqlansin.

3. Vazirliklar va idoralar rahbarlari, Qoraqalpogʻiston Respublikasi Vazirlar Kengashining raisi, viloyatlar va Toshkent shahar hokimlari ularning kichik va oʻrta biznes korxonalari tomonidan hisobot taqdim etishning belgilangan tartibiga qatʼiy rioya qilinishi uchun shaxsan javob berishlari toʻgʻrisida ogohlantirilsinlar.

4. Oʻzbekiston Respublikasi Adliya vazirligi va Prokuraturasi oʻzboshimchalik bilan hisobot joriy etishning har bir holatini batafsil oʻrganib chiqsinlar, aybdor shaxslarni javobgarlikka tortsinlar. Vazirliklar, idoralar hamda mahalliy hokimiyat va boshqaruv organlari tomonidan oʻzboshimchalik bilan hisobot joriy etish hollariga xoʻjalik yurituvchi subyektlarni noqonuniy ravishda tekshirish sifatida qarasinlar.

5. Kichik va xususiy tadbirkorlikni rivojlantirishni ragʻbatlantirish boʻyicha respublika muvofiqlashtiruvchi kengashi kichik va oʻrta biznes subyektlari uchun hisobotlarni yuritishning belgilangan tartibiga rioya etish masalalarini oʻz majlislarida muntazam koʻrib borsin, mavjud tartibni buzishlarni bartaraf etish yuzasidan zudlik bilan choralar koʻrsin.

6. Oʻzbekiston Respublikasi Makroiqtisodiyot va statistika vazirligi, Davlat soliq qoʻmitasi, Adliya vazirligi amalga oshirilgan ishlar toʻgʻrisida joriy yilning birinchi choragi yakunlari boʻyicha Vazirlar Mahkamasiga axborot bersinlar.

7. Oʻzbekiston Respublikasi Adliya vazirligi manfaatdor vazirliklar va idoralar bilan birgalikda qonun hujjatlariga mazkur qarordan kelib chiqadigan oʻzgartirishlar va qoʻshimchalar kiritish yuzasidan bir oy muddatda Vazirlar Mahkamasiga takliflar kiritsin.

Vazirliklar va idoralar oʻzlarining idoraviy meʼyoriy hujjatlarini mazkur qarorga muvofiqlashtirsinlar.

8. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari B.S. Hamidov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2000-yil 23-fevral,

65-son