Germaniyaning “KFV” taraqqiyot bankining kredit liniyasidan foydalanish toʻgʻrisida (38-son)

28.01.1999

Oʻzbekiston Respublikasi Vazirlar Mahkamasining

qarori

Kichik va oʻrta biznes subyektlarini qoʻllab-quvvatlash davlat dasturini rivojlantirish, tijorat banklari va sarmoyalar milliy bozori tizimini rivojlantirishga koʻmaklashish maqsadida Vazirlar Mahkamasi qaror qiladi:

1. Quyidagilar:

Germaniya federal hukumati tomonidan Oʻzbekiston Respublikasi uchun uch yillik imtiyozli davrni oʻz ichiga olgan holda 10,5 yil muddatga ajratiladigan kredit liniyasini 15 million yevro (30 mln. Germaniya markasi) miqdoriga koʻpaytirish haqida qaror qabul qilinganligi;

kichik va oʻrta biznesning investitsiya loyihalarini mablagʻ bilan maqsadli taʼminlash uchun koʻrsatib oʻtilgan mablagʻlar “KfV” banki tomonidan Tashqi iqtisodiy faoliyat milliy bankiga berilishi maʼlumot uchun qabul qilinsin.

Bunda:

kredit liniyasi umumiy miqdorining 7,5 million yevro miqdoridan ortiq boʻlmagan qismi Tashqi iqtisodiy faoliyat milliy banki tomonidan bevosita kichik va oʻrta biznes loyihalarini mablagʻ bilan taʼminlashga yoʻnaltiriladi;

kredit liniyasi umumiy miqdorining kamida 7,5 million yevro miqdoridan kam boʻlmagan qismi Oʻzbekiston Respublikasi tijorat banklari keyinchalik kichik va oʻrta biznes loyihalarini mablagʻ bilan taʼminlashlari uchun Tashqi iqtisodiy faoliyat milliy banki tomonidan ushbu banklarga qayta moliyalanadi.

2. Quyidagilar:

Oʻzbekiston Respublikasi Moliya vaziri “KfV” banki tomonidan berilayotgan kredit boʻyicha Oʻzbekiston Respublikasi kafolatini berishga;

Oʻzbekiston Respublikasi Tashqi iqtisodiy faoliyat milliy banki boshqaruvi raisi Tashqi iqtisodiy faoliyat banki bilan “KfV” banki oʻrtasida tuziladigan Qarz bitimini imzolashga vakil qilinsin.

3. Oʻzbekiston Respublikasi Adliya vazirligi Oʻzbekiston Respublikasi kafolati boʻyicha “KfV” banki uchun maqbul shaklda yuridik xulosa bersin.

4. Moliya vazirligi, Markaziy bank Oʻzbekiston banklari uyushmasi va Tashqi iqtisodiy faoliyat milliy banki bilan birgalikda mazkur kredit liniyasi mablagʻlarini kichik va oʻrta biznes subyektlariga qayta moliyalash uchun tijorat banklari roʻyxatini bir oy muddatda aniqlasinlar.

5. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T. Sultonov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1999-yil 28-yanvar,

38-son