Oʻzbekiston Respublikasida suyuq xlor, xlor mahsulotlari va kaustik soda ishlab chiqarishni tashkil etish chora-tadbirlari toʻgʻrisida (14-son)

13.01.1999

Oʻzbekiston Respublikasi Vazirlar Mahkamasining

qarori

[Koʻchirma]

Respublikada import oʻrnini bosuvchi suyuq xlor, xlorid kislota va kaustik soda ishlab chiqarish quvvatlarini yaratish maqsadida va Vazirlar Mahkamasining “1998 — 2002-yillarda Oʻzbekiston kimyo sanoati korxonalarini kompleks rivojlantirish dasturi toʻgʻrisida” 1998-yil 25-martdagi 129-son qarorini bajarish yuzasidan Vazirlar Mahkamasi qaror qiladi:

1. “Oʻzkimyosanoat” uyushmasining “Navoiyazot” ishlab chiqarish birlashmasida yiliga 17 ming tonna suyuq xlor, 12,6 ming tonna xlorid kislota, 6,7 ming tonna natriy gipoxloridi va 26 ming tonna kaustik soda ishlab chiqarish quvvatlarini tashkil etish boʻyicha loyihalarni amalga oshirish toʻgʻrisidagi taklifi qabul qilinsin.

2. “Oʻzkimyosanoat” uyushmasiga texnik hujjatlarni tayyorlash, asbob-uskunalar, materiallar yetkazib berish, suyuq xlor, xlorid kislota, natriy gipoxloridi va kaustik soda ishlab chiqarish boʻyicha texnologiya asbob-uskunalarini shef-montaj qilish va foydalanishga topshirish ustidan texnik rahbarlikni amalga oshirish yuzasidan “Lurgi Anlagenbau Xemnits GmbX” (Germaniya) firmasi bilan, quvvatlarni foydalanishga topshirish muddati kontrakt kuchga kirgandan soʻng 20 oy boʻlgan, kontrakt tuzishga ruxsat berilsin.

3. Quyidagilar:

suyuq xlor, xlor mahsulotlari va kaustik soda ishlab chiqarish qurilishining bosh buyurtmachisi etib — “Navoiyazot” ishlab chiqarish birlashmasi;

mazkur ishlab chiqarish qurilishining bosh pudratchisi etib — subpudratchilarni jalb qilgan holda Navoiy qurilish boshqarmasi;

bosh loyihachisi etib — “Oʻzkimyoloyiha” ilmiy-tadqiqot instituti;

loyihalashtirish, asbob-uskunalarni yetkazib berish, obyektni montaj qilish va foydalanishga topshirish muddatlari 1-ilovaga* muvofiq belgilansin.

* Ilova berilmaydi.

4. Belgilab qoʻyilsinki, loyihaning valyuta qismini mablagʻ bilan taʼminlash:

kontrakt qiymatining 85 foizi — Berliner Bankining “Germes” jamiyati sugʻurtasi ostida Oʻzbekiston Respublikasi Tashqi iqtisodiy faoliyat milliy banki tomonidan qayta moliyalashtiriladigan, 7 yil muddatga beriladigan 43010 ming Germaniya markasi miqdoridagi kredit liniyasi doirasida;

kontrakt qiymatining 15 foizi — Berliner Bankining Oʻzbekiston Respublikasi Tashqi iqtisodiy faoliyat milliy banki tomonidan moliyalashtiriladigan, ikki yil muddatga beriladigan 7590 ming Germaniya markasi miqdoridagi kredit liniyasi doirasida amalga oshiriladi.

Kreditlar kredit bitimi bilan belgilangan muddatlarda “Navoiyazot” ishlab chiqarish birlashmasi tomonidan oʻz manbalari hisobiga qaytariladi.

7. Oʻzbekiston Respublikasi Tashqi iqtisodiy faoliyat milliy banki mazkur loyihani mablagʻ bilan taʼminlash yuzasidan ikki oy muddatda Berliner Bank bilan kredit bitimi tuzsin.

8. Moliya vaziri mazkur loyiha uchun jalb qilinayotgan valyuta va soʻmdagi kreditlar yuzasidan Berliner Bankka, Oʻzbekiston Respublikasi Tashqi iqtisodiy faoliyat milliy bankiga belgilangan tartibda Oʻzbekiston Respublikasi Hukumati kafolatlarini berishga vakil qilinsin.

9. Oʻzbekiston Respublikasi Adliya vazirligi Oʻzbekiston Respublikasi Hukumati kafolatlari boʻyicha amaldagi qonun hujjatlariga muvofiq yuridik xulosalarni rasmiylashtirsin.

10. Belgilansinki, “Navoiyazot” ishlab chiqarish birlashmasi uchun koʻrsatib oʻtilgan loyihani amalga oshirish davrida foydadan olinadigan soliqni hisoblab chiqarishda soliqqa tortiladigan baza mazkur loyiha boʻyicha olinadigan kreditni uzishga yoʻnaltiriladigan xarajatlar miqdoriga kamayadi.

11. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T. Sultonov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1999-yil 13-yanvar,

14-son