Iqtisodiy, savdo va texnikaviy hamkorlik toʻgʻrisida

17.03.2008

Oʻzbekiston Respublikasi Hukumati bilan Birlashgan Arab Amirliklari Hukumati oʻrtasida

Bitim

Oʻzbekiston Respublikasi Hukumati va Birlashgan Arab Amirliklari Hukumati, bundan keyin “Tomonlar” deb ataluvchilar,

teng huquqlilik va oʻzaro manfaatdorlik tamoyillariga asoslangan holda, ikki mamlakatda amalda boʻlgan qonunlarga muvofiq, ikki davlat oʻrtasida iqtisodiy, savdo va texnikaviy hamkorlikni rivojlantirish va kengaytirish istagida,

quyidagilar toʻgʻrisida ahdlashib oldilar:

1-modda

1. Tomonlar, ikki mamlakatda amalda boʻlgan qonunlarga asosan, oʻzaro iqtisodiy, savdo va texnikaviy hamkorlikni rivojlantirish maqsadida hamkorlik qiladilar.

2. Hamkorlik quyidagi sohalarda amalga oshiriladi:

(a) Sanoat;

(b) Qishloq xoʻjaligi;

(v) Transport;

(g) Telekommunikatsiya;

(d) Taʼlim;

(e) Ilmiy izlanishlar;

(yo) Texnologiya va innovatsion texnologiyalar;

(j) Turizm, va

(z) Investitsiyalar.

2-modda

Tomonlar, ikki davlat oʻrtasidagi savdo oqimining oʻsishini qoʻllab-quvvatlaydilar va ushbu Bitimda belgilangan sohalarda hamkorlikni taʼminlash va ularni moliyalashtirish masalalariga tegishli hukumat organlari va ishbilarmonlar doirasi vakillariga amaliy yordam koʻrsatadilar.

3-modda

Tomonlarning milliy qonunchiligiga asosan ularning xoʻjalik yurituvchi subyektlari mazkur Bitim doirasida amalga oshiradigan barcha toʻlovlar, erkin muomaladagi valyutada amalga oshiriladi.

4-modda

1. Har bir Tomon oʻz davlati hududida oʻtkaziladigan xalqaro koʻrgazmalarda, konferensiyalarda, seminarlarda, savdo koʻrgazmalarida va boshqa anjumanlarda ikkinchi Tomonning jismoniy va yuridik shaxslarining ishtirok etishini ragʻbatlantiradi.

2. Har bir Tomon ikkinchi Tomon tijorat delegatsiyalarini almashinuvini amalga oshirishda koʻmaklashadi.

5-modda

1. Tomonlar qoʻshma loyihalar orqali ikki tomonlama iqtisodiy hamkorlikni amalga oshirilishini qoʻllab-quvvatlaydilar.

2. Mazkur Bitimga asosan har bir Tomon ikki davlatning yuridik va jismoniy shaxslari oʻrtasidagi savdo va texnikaviy hamkorlikni rivojlantirish uchun barcha chora-tadbirlarni, ekspertlar, olimlar, texniklar, talabalar va shu soha mutaxassislarining oʻzaro almashinuvini amalga oshiradi, ilmiy izlanish va boshqa hamkorlik sohalarida yordam beradi.

6-modda

Tomonlar oʻzlarining amaldagi qonun va qoidalariga muvofiq, vaqtinchalik omborxonada saqlash, reeksport qilish va yuk tashish uchun qulay muhitni yaratadilar.

7-modda

1. Mazkur Bitimga asosan Tomonlar vakillaridan iborat keyinchalik “Qoʻshma qoʻmita” deb ataluvchi Iqtisodiy hamkorlik boʻyicha Qoʻshma qoʻmitasi tuziladi.

2. Qoʻshma qoʻmita faoliyatining asosiy vazifalari quyidagilardir:

(a) Ushbu Bitimda belgilangan sohalarda maʼlum natijalarga erishish.

(b) Ikki mamlakat xususiy sektorlari oʻrtasidagi hamkorlikni mustahkamlash.

(v) Ikki mamlakat oʻrtasida qoʻshma investitsion loyihalarning amalga oshirilishini ragʻbatlantirish.

(g) Tomonlar oʻrtasida savdo-iqtisodiy, sanoat va qishloq xoʻjaligi sohalaridagi hamkorlikni kengaytirish maqsadida turli metod va usullarni tatbiq qilish.

(d) Ikki mamlakatdagi tegishli idoralar oʻrtasida maʼlumotlar almashish va oʻzaro saʼy-harakatlarni muvofiqlashtirish orqali savdo, investitsiya, texnika va texnologiya sohalarida iqtisodiy hamkorlikni rivojlantirish.

(e) Ushbu Bitimning qoʻllanishi va talqin etilishi bilan bogʻliq nizolarni hal qilish.

(j) Ushbu Bitimning tatbiq qilinishi yuzasidan takliflar berish va ularni qoʻllash.

(z) Ushbu Bitimda belgilangan sohalarda yoki Tomonlar bilan kelishilgan boshqa sohalarda hamkorlikni rivojlantirish.

3. Qoʻshma qoʻmitaning yigʻilishlari navbatma-navbat Tomonlardan birining tashabbusi va ikkinchi Tomonning roziligi bilan Tomonlar hududida oʻtkaziladi.

4. Qoʻshma qoʻmita oʻzaro manfaatli sohalar boʻyicha ixtisoslashgan alohida kichik qoʻmitalarni tashkil etishi mumkin. Ushbu kichik qoʻmitalarning yigʻilishlari Qoʻshma qoʻmita tomonidan muvofiqlashtiriladi.

5. Tomonlarning roziligi bilan ularning ishbilarmonlar doirasi vakillari zarur holda Qoʻshma qoʻmitaning ish faoliyatida qatnashadilar.

6. Ushbu Bitimda belgilangan sohalardagi hamkorlikni amalga oshirish uchun Qoʻshma qoʻmitaning takliflari Tomonlarning ichki qonunchiligi va ular imzolagan xalqaro shartnomalar asosida amalga oshiriladi.

8-modda

1. Ushbu Bitimga Oʻzbekiston Respublikasi yoki Birlashgan Arab Amirliklari tomonidan uchinchi davlat, mintaqaviy yoki xalqaro iqtisodiy tashkilotlar bilan oʻzaro imzolangan memorandum, shartnoma va bitimlardan kelib chiqadigan huquq va majburiyatlar taʼsir qilmaydi.

2. Tomonlarning xoʻjalik faoliyatini yurituvchi subyektlari oʻrtasida tuzilgan shartnomalarga asosan, Tomonlar ularning xoʻjalik yurituvchi subyektlari tomonidan imzolangan shartnomalardan kelib chiqadigan majburiyatlar boʻyicha javobgar boʻlmaydilar.

9-modda

Ushbu Bitim qoidalarini talqin qilish yoki qoʻllash boʻyicha kelishmovchiliklar paydo boʻlgan holda Tomonlar ularni oʻzaro maslahatlashuv va muzokaralar yoʻli bilan hal etadilar.

10-modda

Ushbu Bitim Tomonlardan birining boshqa Tomonni ushbu Bitimning kuchga kirishi uchun zarur boʻlgan davlat ichki protseduralarni bajarganligi toʻgʻrisida diplomatik kanallar orqali soʻnggi yozma xabarnomani olgan kundan boshlab kuchga kiradi.

11-modda

1. Mazkur Bitim kuchga kirgandan soʻng besh yil davomida amal qiladi va Tomonlardan birontasi ushbu Bitimning amal qilishini toʻxtatish toʻgʻrisidagi niyati haqida boshqa Tomonni tegishli besh yillik muddat tugashidan kamida olti oy ilgari yozma ravishda diplomatik kanallar orqali xabardor qilmasa, u oʻz-oʻzidan keyingi besh yillik muddatlarga uzaytirilaveradi.

2. Mazkur Bitimning amal qilishi toʻxtatilgan holda, uning qoidalari Bitim amalda boʻlgan davrda tuzilgan shartnomalar va ularning ijrosi toʻliq bajarilgunga qadar amal qiladi.

12-modda

Ushbu Bitimga Tomonlarning oʻzaro kelishuviga muvofiq oʻzgartish va qoʻshimchalar kiritilishi mumkin, Tomonlar bir-birlariga lozim boʻlgan davlat ichki protseduralarni bajarganliklari toʻgʻrisida diplomatik kanallar orqali soʻnggi yozma xabarnomani berganlaridan soʻng oʻzgartish va qoʻshimchalar kuchga kiradi.

Ushbuni tasdiqlab, quyidagi vakillar tegishlicha oʻz hukumatlari tomonidan berilgan vakolatga ega boʻlgan holda mazkur Bitimni imzoladilar.

Abu Dabi shahrida 2008-yil 17-martda ikki asl nusxada, har biri oʻzbek, arab va ingliz tillarida tuzildi, bunda barcha matnlar bir xil kuchga ega.

Talqin qilishda kelishmovchiliklar yuzaga kelsa, ingliz tilidagi matn ustuvor kuchga ega hisoblanadi.

(imzolar)