Keksalar va mehnatga layoqatsiz fuqarolar, nogiron bolalar va bolalikdan nogironlarning dafn marosimi uchun biryoʻla beriladigan nafaqalar toʻgʻrisida (149-son)

01.05.2002

Oʻzbekiston Respublikasi Vazirlar Mahkamasining

qarori

Vazirlar Mahkamasining 2002-yil 24-yanvardagi 30-son qarori bilan tasdiqlangan “Qariyalarni qadrlash yili” davlat dasturiga muvofiq va aholining ijtimoiy nochor qatlamlarini qoʻllab-quvvatlash maqsadida Vazirlar Mahkamasi qaror qiladi:

1. Vazirlar Mahkamasining “Bolalikdan nogironlarga, qariyalarga va mehnatga layoqatsiz fuqarolarga nafaqalar tayinlash va toʻlash tartibi toʻgʻrisida” 1994-yil 24-iyundagi 319-son qaroriga muvofiq hayot chogʻida nafaqa olgan shaxslarning dafn marosimi uchun 2002-yil 1 maydan boshlab eng kam oylik ish haqining ikki baravari miqdorida bir yoʻla beriladigan nafaqa belgilansin.

2. Keksalar va mehnatga layoqsatsiz fuqarolar, nogiron bolalar va bolalikdan nogironlarning dafn marosimi uchun bir yoʻla beriladigan nafaqalar tayinlash va toʻlash tartibi toʻgʻrisidagi Nizom ilovaga muvofiq tasdiqlansin.

3. Belgilab qoʻyilsinki, keksalar va mehnatga layoqatsiz fuqarolar, nogiron bolalar va bolalikdan nogironlarning dafn marosimi uchun bir yoʻla beriladigan nafaqalarga soliq solinmaydi.

4. Oʻzbekiston Respublikasi Mehnat va aholini ijtimoiy muhofaza qilish vazirligi bir oy muddatda amaldagi idoraviy normativ hujjatlarni mazkur qarorga muvofiqlashtirsin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S.Azimov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2002-yil 1 may,

149-son

Vazirlar Mahkamasining 2002-yil 1 maydagi 149-son qaroriga ILOVA

Keksalar va mehnatga layoqatsiz fuqarolar, nogiron bolalar va bolalikdan nogironlarning dafn marosimi uchun bir yoʻla beriladigan nafaqalar tayinlash va toʻlash tartibi toʻgʻrisida

NIZOM

1. Dafn marosimi uchun bir yoʻla beriladigan nafaqani (keyingi oʻrinlarda “bir yoʻla beriladigan nafaqa” deb yuritiladi) olish huquqiga Vazirlar Mahkamasining “Bolalikdan nogironlarga, qariyalarga va mehnatga layoqatsiz fuqarolarga nafaqalar tayinlash va toʻlash tartibi toʻgʻrisida” 1994-yil 24-iyundagi 319-son qaroriga muvofiq hayot chogʻida nafaqa olgan keksalar va mehnatga layoqatsiz fuqarolar, nogiron bolalar va bolalikdan nogironlarni dafn etgan oila aʼzolaridan biri yoki jismoniy shaxs ega boʻladi.

2. Bir yoʻla beriladigan nafaqa mazkur Nizomning 1-bandida koʻrsatilgan fuqarolar vafot etgan kunda belgilangan eng kam oylik ish haqining ikki baravari miqdorida tayinlanadi va toʻlanadi.

3. Bir yoʻla beriladigan nafaqa, uni olish uchun fuqaro vafot etgan kundan boshlab 6 oydan kechikmay murojaat qilingan taqdirda tayinlanadi.

4. Bir yoʻla beriladigan nafaqani tayinlash toʻgʻrisidagi ariza vafot etgan shaxs nafaqa oluvchi sifatida hisobda turgan tuman (shahar) Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasi boʻlimiga beriladi.

5. Bir yoʻla beriladigan nafaqa tayinlash toʻgʻrisidagi arizaga quyidagi hujjatlar ilova qilinishi kerak:

a) bir yoʻla beriladigan nafaqa olish uchun fuqarolik holatlarini qayd etish organi tomonidan vafot etganlik toʻgʻrisida berilgan maʼlumotnoma (asl nusxasi);

b) fuqarolarning oʻzini oʻzi boshqarish organining dafn etishning arizachi tomonidan amalga oshirilishini tasdiqlovchi maʼlumotnomasi.

6. Bir yoʻla beriladigan nafaqa tayinlash toʻgʻrisidagi arizani qabul qilish:

a) agar vafot etgan fuqaro nafaqa oluvchi sifatida tuman (shahar) Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasi boʻlimida hisobda turmagan boʻlsa;

b) nafaqa tayinlash yuzasidan ushbu Nizomning 1-bandida koʻrsatilgan shaxslar vafot etgan kundan boshlab 6 oy oʻtgandan keyin murojaat qilinganda;

v) ushbu Nizomning 5-bandida koʻrsatilgan hujjatlardan birortasi taqdim etilmaganda rad qilinadi.

Arizachi bir yoʻla beriladigan nafaqa tayinlash toʻgʻrisidagi arizani qabul qilishning rad etilishi yuzasidan yuqori tashkilotga yoki sudga belgilangan tartibda shikoyat qilishi mumkin.

7. Bir yoʻla beriladigan nafaqa tayinlash toʻgʻrisidagi ariza tuman (shahar) Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasi boʻlimi tomonidan barcha zarur hujjatlar bilan birgalikdagi ariza tushgandan keyin 3 kundan kechikmay koʻrib chiqiladi.

Bir yoʻla beriladigan nafaqa tayinlash Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasi boʻlimi qaroriga binoan rasmiylashtiriladi.

8. Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasi boʻlimi nafaqa tayinlash toʻgʻrisida qaror chiqarilgandan keyin 3 kundan kechikmay tegishli qaror nusxasi bilan birgalikda bildirishnomani arizachining qoʻliga beradi yoki unga pochta orqali joʻnatadi.

9. Tuman (shahar) Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasi boʻlimi tayinlangan bir yoʻla beriladigan nafaqani nafaqa tayinlash toʻgʻrisida ariza berilgan oydan keyingi oydan kechikmay toʻlaydi.

Arizachining xohishiga koʻra nafaqa aloqa boʻlimi orqali pochta joʻnatmasi tarzida yoki bankdagi omonatga oʻtkazish yoʻli bilan toʻlanadi.

10. Bir yoʻla beriladigan nafaqalarni toʻlash budjetdan tashqari Pensiya jamgʻarmasi hisobidan amalga oshiriladi.

11. Bir yoʻla beriladigan nafaqa soliqqa tortilmaydi va ulardan soliq puli ushlab qolinmaydi.

12. Bir yoʻla beriladigan nafaqa toʻlash boʻyicha hisobga olish va hisobot berish tartibi Oʻzbekiston Respublikasi Moliya vazirligi tomonidan belgilanadi.