Ikkiyoqlama soliq solishning oldini olish va daromad soliqlarini toʻlashdan bosh tortishni bartaraf qilish toʻgʻrisida

23.04.1999

Oʻzbekiston Respublikasi Hukumati bilan Tailand Qirolligi Hukumati oʻrtasida

Konvensiya

Oʻzbekiston Respublikasi Hukumati bilan Tailand Qirolligi Hukumati,

ikki yoqlama soliq solishning oldini olish va daromad soliqlarini toʻlashdan bosh tortishni bartaraf qilish toʻgʻrisida Konvensiya tuzish istagida, shuningdek ikki mamlakat oʻrtasidagi iqtisodiy hamkorlikni rivojlantirish maqsadida,

quyidagilar toʻgʻrisida ahdlashib oldilar:

1-modda Qoʻllanish doirasi

Ushbu Konvensiya Ahdlashuvchi Davlatlarning biri yoki har ikkalasining rezidenti boʻlgan shaxslarga nisbatan qoʻllanadi.

2-modda Konvensiya tatbiq etiladigan soliqlar

1. Ushbu Konvensiya Ahdlashuvchi Davlatlar yoki ularning mahalliy hokimiyat organlari nomidan olinayotgan daromad soliqlariga, ularni undirish uslubidan qatʼi nazar, tatbiq etiladi.

2. Daromad soliqlariga umumiy daromaddan yoki daromadning bir qismidan, shu jumladan, koʻchar va koʻchmas mulkni begonalashtirishdan olingan daromadlardan, korxonalar tomonidan toʻlanadigan ish haqi yoki maoshning umumiy miqdoridan olinadigan soliqlar, shuningdek kapital qiymatining oʻsishidan olingan daromadlardan undiriladigan soliqlar kiradi.

3. Ushbu Konvensiya qoʻllaniladigan amaldagi soliqlar, xususan quyidagilardir:

a) Oʻzbekiston Respublikasiga nisbatan:

I) yuridik shaxslardan olinadigan daromad (foyda) soligʻi;

II) jismoniy shaxslarning daromadlariga solinadigan soliq;

(bundan keyin “Oʻzbekiston soliqlari” deb ataladi).

(b) Tailandga nisbatan:

I) daromad; va

II) neftdan olinadigan daromad soligʻi;

(bundan keyin “Tailand soliqlari” deb ataladi).

4. Ushbu Konvensiya imzolangan sanadan soʻng undiriladigan soliqlarga qoʻshimcha yoki mavjudlari oʻrniga kiritiladigan har qanday bir xil yoki mohiyatan oʻxshash soliqlarga nisbatan ham qoʻllaniladi. Ahdlashuvchi Davlatlarning vakolatli organlari oʻzlariga tegishli boʻlgan soliq qonunchiligiga kiritilgan muhim oʻzgarishlar toʻgʻrisida bir-birlariga xabar beradilar.

3-modda Umumiy taʼriflar

1. Ushbu Konvensiya maqsadlari uchun, agar matn mazmunidan oʻzga maʼno chiqmasa:

a) “Oʻzbekiston” atamasi Oʻzbekiston Respublikasini anglatadi va geografik maʼnoda ishlatilganda Oʻzbekiston Respublikasi hududini, jumladan hududiy suvlari va osmon kengliklari doirasida Oʻzbekiston Respublikasi, Oʻzbekiston Respublikasining qonunchiligi boʻyicha va xalqaro huquqqa muvofiq, oʻzining suveren huquqlari va yurisdiksiyasini, shu jumladan yer osti boyliklaridan va tabiiy resurslardan foydalanish huquqini amalga oshirishi mumkin boʻlgan hududni anglatadi;

b) “Tailand” atamasi Tailand Qirolligini anglatadi va tay qonunchiligi boʻyicha va xalqaro qonunchilikka muvofiq, aniqlangan va aniqlanishi mumkin boʻlgan hudud sifatidagi doirada Tailand Qirolligining dengiz tubi va yer osti hamda tabiiy resurslardan foydalanishi mumkin boʻlgan Tailand Qirolligining hududiy suvlariga tutashgan hududiy dengizni oʻz ichiga oladi;

c) “bir Ahdlashuvchi Davlat” va “boshqa Ahdlashuvchi Davlat” atamalari matnga qarab, Oʻzbekistonni yoki Tailandni anglatadi;

d) “shaxs” atamasi jismoniy shaxsni, kompaniyani yoki shaxslarning har qanday boshqa birlashmasini, shuningdek har qanday Ahdlashuvchi Davlatda amal qilayotgan soliq qonunchiligiga muvofiq, soliqqa tortiladigan shaxs sifatida qaraladigan har qanday tuzilmani anglatadi;

e) “kompaniya” atamasi korporativ birlashmani yoki soliqqa tortish maqsadlarida korporativ birlashma sifatida qaraladigan har qanday korporativ birlashma yoki har qanday tuzilmani anglatadi;

f) “bir Ahdlashuvchi Davlat korxonasi” va “boshqa Ahdlashuvchi Davlat korxonasi” atamalari tegishlicha Ahdlashuvchi Davlatlardan birining rezidenti boshqaruvi ostidagi korxonani va boshqa Ahdlashuvchi Davlat rezidenti boshqaruvidagi korxonani anglatadi;

g) “soliq” atamasi matnga qarab Oʻzbekiston soligʻini yoki Tailand soligʻini anglatadi;

h) “milliy shaxs” atamasi:

I) Ahdlashuvchi Davlat fuqaroligiga ega boʻlgan har qanday jismoniy shaxsni; va

II) Ahdlashuvchi Davlatning amaldagi qonunlariga muvofiq oʻz maqomini olgan har qanday yuridik shaxsni, shirkat, assotsiatsiya va har qanday boshqa tuzilmani anglatadi;

i) “xalqaro tashish” atamasi Ahdlashuvchi Davlat korxonasi tomonidan foydalaniladigan dengiz yoki havo kemasida, temir yoʻl va avtomobil transporti vositalarida har qanday tashishni anglatadi, dengiz yoki havo kemasidan, temir yoʻl yoki avtomobil transporti vositalaridan faqat boshqa Ahdlashuvchi Davlatda joylashgan punktlar oʻrtasida foydalanilishi bundan mustasno;

j) “vakolatli organ” atamasi Oʻzbekistonga nisbatan — Oʻzbekiston Respublikasi Davlat soliq qoʻmitasi Raisini yoki uning vakolatli vakilini va Tailandga nisbatan — Moliya vazirini yoki uning vakolatli vakilini anglatadi.

2. Agar matndan boshqa maʼno kelib chiqmasa, ushbu Konvensiya Davlat tomonidan qoʻllanganida unda belgilanmagan har qanday ibora, ushbu Konvensiya tatbiq etiladigan soliqlarga nisbatan ushbu Davlat qonunchiligi boʻyicha ega boʻlgan maʼnoni anglatadi. Atamaning ana shu Davlat soliq qonunchiligiga muvofiq belgilangan maʼnosi, ana shu Davlatning boshqa huquq sohalarida shu atama uchun berilgan maʼnodan ustunlik qiladi.

4-modda Rezident

1. Ushbu Konvensiya maqsadlari uchun “Ahdlashuvchi Davlat rezidenti” atamasi shu Davlat qonunlari boʻyicha oʻzining yashash joyi, doimiy boʻlish joyi, korporativ tuzilma sifatida tashkil topgan joyi, boshqaruv joyi yoki har qanday boshqa shunga oʻxshash mezonlar asosida soliqqa tortiladigan har qanday shaxsni anglatadi; va bu atama, shuningdek Davlatning oʻzini yoki uning mahalliy hokimiyat organini ham oʻz ichiga oladi. Biroq bu atama ushbu Davlatda faqat shu Davlatda joylashgan manbalardan daromad olayotgani uchun soliqqa tortiladigan har qanday shaxsni oʻz ichiga olmaydi.

2. Agar 1-band qoidalariga muvofiq, jismoniy shaxs Ahdlashuvchi Davlatlarning har ikkalasining rezidenti boʻlsa, uning maqomi quyidagi tarzda belgilanadi:

a) u qaysi Davlatda oʻzi uchun toʻsiqsiz yashashi mumkin boʻlgan doimiy uyiga ega boʻlsa, shu Davlatning rezidenti hisoblanadi; agar u har ikkala Davlatda toʻsiqsiz yashashi mumkin boʻlgan doimiy uyga ega boʻlsa, shaxsiy va iqtisodiy aloqalari yaqinroq boʻlgan (hayotiy manfaatlar markazi) Davlatning rezidenti hisoblanadi;

b) agar uning hayotiy manfaatlari markazi joylashgan Davlatni aniqlab boʻlmasa, yoki Davlatlardan hech birida toʻsiqsiz yashashi mumkin boʻlgan doimiy uyiga ega boʻlmasa, u odatda yashaydigan Davlatining rezidenti hisoblanadi;

c) agar shaxs odatda har ikkala Davlatda yashasa yoki odatda ularning hech birida yashamasa, u qaysi Davlatning milliy shaxsi boʻlsa, oʻsha Davlatning rezidenti hisoblanadi;

d) agar u har ikkala Davlatning milliy shaxsi boʻlsa, yoki ulardan hech biriniki boʻlmasa, bunda Ahdlashuvchi Davlatlarning vakolatli organlari bu masalani oʻzaro kelishuv boʻyicha hal qiladilar.

3. Agar 1-band qoidalariga muvofiq, jismoniy shaxs boʻlmagan shaxs Ahdlashuvchi Davlatlardan har ikkalasining rezidenti boʻlsa, u korporatsiya sifatida tashkil topgan oʻsha Davlatning rezidenti hisoblanadi; agar shaxs yuqorida bayon etilgan mezonlarga muvofiq, ikkala Ahdlashuvchi Davlatning rezidenti boʻlib qolaversa, unda Ahdlashuvchi Davlatlarning vakolatli organlari ushbu masalani oʻzaro kelishuv boʻyicha hal qiladilar.

5-modda Doimiy muassasa

1. Ushbu Konvensiya maqsadlari uchun “doimiy muassasa” atamasi korxona toʻliq yoki qisman tadbirkorlik faoliyatini olib boradigan doimiy faoliyatini joyini anglatadi.

2. “Doimiy muassasa” atamasi, jumladan quyidagilarni oʻz ichiga oladi:

a) boshqaruv joyi;

b) boʻlim;

c) ofis;

d) fabrika;

e) ustaxona;

f) shaxta, neft yoki gaz qudugʻini, karyer yoki tabiiy resurslar qazib oladigan har qanday boshqa joy;

g) ferma yoki plantatsiya;

h) boshqa shaxslar uchun qurilmalarni saqlashni taʼminlaydigan shaxsga nisbatan omborni.

3. “Doimiy muassasa” atamasi, shuningdek quyidagilarni anglatadi;

a) qurilish maydonchasi, qurilish, montaj yoki yigʻuv obyekti yoki ular bilan bogʻliq boʻlgan boshqaruv faoliyatni, basharti, shunday maydoncha, obyekt yoki faoliyatning davomiyligi 6 oydan koʻproq davom etsa;

b) Ahdlashuvchi Davlat rezidenti tomonidan xizmatchilar yoki boshqa personal orqali xizmat koʻrsatish, jumladan konsalting xizmati, faqat shunday holdaki, agar shu mazmundagi faoliyat, shunga oʻxshash yoki u bilan bogʻliq boʻlgan loyiha boshqa Ahdlashuvchi Davlat hududida har qanday oʻn ikki oylik davr doirasida jami 6 oydan koʻproqni tashkil etuvchi davr yoki davrlar mobaynida davom etsa.

4. Ushbu moddaning avvalgi qoidalariga qaramay, “doimiy muassasa” atamasi quyidagilarni oʻz ichiga olmaydi:

a) qurilmalardan shu korxonaga tegishli tovar yoki buyumlarni saqlash, namoyish qilish yoki yetkazib berish maqsadlaridagina foydalanish;

b) shu korxonaga tegishli tovar yoki buyumlar zaxirasini saqlash, namoyish qilish yoki yetkazib berish maqsadlaridagina ushlab turilishi;

c) shu korxonaga tegishli tovar yoki buyumlar zaxirasining boshqa korxona tomonidan faqat qayta ishlov berilishi maqsadida ushlab turilishi;

d) doimiy faoliyat joyining faqat tovar yoki buyumlar sotib olish yoki ushbu korxona uchun axborot yigʻish maqsadida ushlab turilishi;

e) doimiy faoliyat joyining ushbu korxona uchun faqat reklama, axborot tarqatish, ilmiy tadqiqot yoki shunga oʻxshash boshqa har qanday tayyorgarlik yoki yordamchi tusdagi faoliyatni amalga oshirish maqsadlarida ushlab turilishi;

f) doimiy faoliyat joyining a — e-kichik bandlarida eslatib oʻtilgan faoliyat turlarining har qanday kombinatsiyasi uchungina va bunday kombinatsiya natijasida doimiy faoliyat joyining faoliyati, tayyorgarlik hamda yordamchi tusda boʻlgan taqdirda saqlab turilishi.

5. Ushbu modda 1, 2 va 3-bandlarining qoidalarga qaramay, qachonki, ushbu moddaning 7-bandi qoʻllaniladigan mustaqil maqomli agentdan oʻzga boʻlgan shaxs Ahdlashuvchi Davlatda boshqa Ahdlashuvchi Davlat korxonasi nomidan harakat qilsa, unda bu korxona birinchi eslatib oʻtilgan Ahdlashuvchi Davlatda doimiy muassasaga ega deb qaraladi, agar bunday shaxs:

a) u birinchi eslatib oʻtilgan Davlatda ana shunday korxona nomidan shartnomalar tuzish vakolatiga ega boʻlsa va odatda bunday vakolatlardan foydalansa; shuningdek, uning faoliyati tovar yoki buyumlar sotib olish bilan cheklanmasa;

b) bunday vakolatga ega boʻlmasa, ammo odatda birinchi eslatib oʻtilgan Davlatda korxona nomidan buyurtmalarni bajaradigan yoki tovarlar yetkazib beradigan shu korxonaga taalluqli boʻlgan tovar yoki buyumlar zaxirasini saqlasa; yoki

c) vakolatga ega boʻlmasa, ammo odatda birinchi eslatib oʻtilgan Davlatda buyurtmalar bilan butunlay yoki asosan shu korxonani yoki u tomonidan boshqariladigan yoxud u boshqaruv paketiga ega boʻlgan boshqa korxonalarni taʼminlasa;

6. Ushbu moddaning avvalgi qoidalariga qaramay, Ahdlashuvchi Davlatning sugʻurta korxonasi, agar boshqa Ahdlashuvchi Davlat hududida mukofotlarini yigʻsa yoki ushbu moddaning 7-bandi taalluqli boʻlgan mustaqil maqomli agentdan boshqa shaxs orqali u yerda boʻlishi mumkin boʻlgan tavakkalchiliklarni sugʻurta qilsa, qayta sugʻurta qilish hollaridan tashqari, u ana shu boshqa Davlatda doimiy muassasaga ega, deb hisoblanadi.

7. Ahdlashuvchi Davlatning korxonasi agar boshqa Ahdlashuvchi Davlatda broker, komissioner yoki har qanday boshqa mustaqil maqomli agent orqali tadbirkorlik faoliyatini amalga oshirsa, bunda bu shaxslarning harakati oʻzlarining odatdagi faoliyati doirasida boʻlgan holdagina boshqa Ahdlashuvchi Davlatda doimiy muassasaga ega deb qaralmaydi. Biroq ana shunday agentning faoliyati toʻliq yoki asosan ana shu korxonaga yoki u tomonidan boshqariladigan yoki unda boshqaruv paketiga ega boʻlgan korxonaga yoxud boshqa korxonalarga bagʻishlangan boʻlsa, u ushbu bandning mazmuni doirasida mustaqil maqomli agent sifatida qaralmaydi.

8. Ahdlashuvchi Davlatlardan birining rezidenti boʻlgan kompaniya boshqa Ahdlashuvchi Davlatning rezidenti boʻlgan kompaniyani nazorat qilsa yoki kompaniya tomonidan nazorat qilinsa yoki ana shu boshqa Ahdlashuvchi Davlatda tijorat faoliyatini (doimiy muassasa orqali yoki boshqa tarzda) amalga oshirayotgan boʻlsa, bu hol oʻz-oʻzidan bu kompaniyalarning birini boshqasi uchun doimiy muassasaga aylantirib qoʻymaydi.

6-modda Koʻchmas mulkdan olinadigan daromadlar

1. Bir Ahdlashuvchi Davlat rezidentining boshqa Ahdlashuvchi Davlatda joylashgan koʻchmas mulkdan oladigan daromadlari (jumladan qishloq va oʻrmon xoʻjaligidan olinadigan daromadlar) ana shu boshqa Davlatda soliqqa tortilishi mumkin.

2. “Koʻchmas mulk” atamasi koʻrib chiqilayotgan mulk joylashgan Ahdlashuvchi Davlat qonunchiligi boʻyicha belgilangan maʼnoga egadir. Har qanday holda ham ushbu atama yer ustidagi mulkchilikka taalluqli boʻlgan umumiy qonunchilik qoidalari bilan huquqi belgilab berilgan koʻchmas mulkka tegishli boʻlgan mulkni, qishloq va oʻrmon xoʻjaligida ishlatiladigan chorva va vositalarni hamda koʻchmas mulk uzufruktini, minerallar, manbalar va boshqa tabiiy resurslarning qatlamalarini qazish uchun tovon sifatida toʻlanadigan oʻzgaruvchan yoki qayd etilgan toʻlovlar huquqini, yoki minerallar, manbalar va boshqa tabiiy resurslar qatlamlarini qazish huquqini oʻz ichiga oladi; kemalar, qayiqlar va havo kemalari koʻchmas mulk sifatida qaralmaydi.

3. 1-band qoidalari koʻchmas mulkdan toʻgʻridan toʻgʻri foydalanish, ijaraga berish yoki boshqa har qanday shaklda foydalanishdan olinadigan daromadga nisbatan qoʻllaniladi.

4. 1 va 3-band qoidalari korxonaning koʻchmas mulkidan olgan daromadlariga va mustaqil shaxsiy xizmatlarni amalga oshirish uchun foydalanadigan koʻchmas mulkdan olgan ham qoʻllanadi.

7-modda Tadbirkorlik faoliyatidan olinadigan foyda

1. Ahdlashuvchi Davlatlardan biri korxonasining daromadi yoki foydasi agar korxona oʻzining tadbirkorlik faoliyatini boshqa Ahdlashuvchi Davlatda joylashgan doimiy muassasa orqali amalga oshirmayotgan boʻlsa, faqat shu Ahdlashuvchi Davlatda soliqqa tortiladi. Agar korxona oʻz faoliyatini yuqorida aytilganidek amalga oshirayotgan boʻlsa, korxonaning daromadi yoki foydasi boshqa Ahdlashuvchi Davlatda soliqqa tortilishi mumkin, ammo, faqat quyidagilarga tegishli boʻlgan qismigina soliqqa tortiladi:

a) ana shu doimiy muassasa faoliyatiga;

b) ana shu boshqa Davlatda shu doimiy muassasa orqali sotiladigan shunday yoki shunga oʻxshash tovar va buyumlarning turlarini sotishga; yoki

c) ana shu boshqa Ahdlashuvchi Davlatda shu doimiy muassasa orqali amalga oshirilgan faoliyatga oʻxshash yoki xuddi shunday amalga oshiriladigan boshqa tadbirkorlik faoliyat turlariga.

2. 3-band qoidalariga muvofiq, agar bir Ahdlashuvchi Davlatning korxonasi boshqa Ahdlashuvchi Davlatda joylashgan doimiy muassasa orqali tadbirkorlik faoliyatini amalga oshirayotgan boʻlsa, har bir Ahdlashuvchi Davlatda bunday doimiy muassasaga hisoblanadigan foyda u alohida va mustaqil korxona sifatida xuddi shunday yoki shunga oʻxshash faoliyatni xuddi shunday yoki shunga oʻxshash shartlar asosida amalga oshirib doimiy muassasa hisoblangan korxonadan mutlaqo mustaqil ravishda ish koʻrib olishi mumkin boʻlgan foyda kabi oʻtkaziladi.

3. Doimiy muassasa foydasini aniqlashda ana shu doimiy muassasa faoliyati maqsadlari uchun sarflangan xarajatlarni, jumladan doimiy muassasa joylashgan Davlatda hamda uning hududidan tashqarida sarflangan boshqaruv va umummaʼmuriy xarajatlarni chegirib tashlashga yoʻl qoʻyiladi.

Doimiy muassasa tomonidan yoki uning har qanday boʻlinmalaridan korxonaga patentlardan yoki boshqa huquqlardan foydalanganlik uchun har xil toʻlovlar koʻrinishidagi, yoki xizmat koʻrsatganlik uchun yoxud menejmentlik uchun komission taqdirlashlar koʻrinishidagi, yoki bank muassasasidan tashqari, doimiy muassasaga taqdim etilgan zayomlar uchun foizlar koʻrinishidagi toʻlanayotgan summalarga nisbatan (amaldagi xarajatlarni qoplashlardan tashqari), agar ular boʻlsa, hech qanday chegirib tashlashga yoʻl qoʻyilmaydi.

4. Ahdlashuvchi Davlatda doimiy muassasaga tegishli boʻladigan foydani korxona yoki doimiy muassasa umumiy tushumlarining belgilangan foizi yoki korxona foydasining umumiy miqdorini uning turli boʻlinmalariga mutanosib taqsimlash asosida belgilash oddiy amaliyot ekanligiga qaramasdan, 2-banddagi hech bir narsa ushbu Ahdlashuvchi Davlatga soliqqa tortiladigan foydani amaliyot taqozo qilganidek, ana shunday taqsimot vositasida belgilashiga toʻsqinlik qilmaydi; biroq tanlangan taqsimot usuli shunday boʻlishi kerakki, natija ushbu moddadagi mavjud tamoyillarga muvofiq boʻlishi lozim.

5. Agar Ahdlashuvchi Davlatning soliq organiga maʼlum boʻlgan axborot korxonaning doimiy muassasasiga taalluqli boʻlgan foydani aniqlashga muvofiq kelmasa, ushbu moddadagi hech bir narsa, ana shu Davlatning soliq javobgarligini aniqlashga taalluqli boʻlgan har qanday qonunchilik aktini, shu akt soliq organiga maʼlum boʻlgan axborotning ushbu modda tamoyillariga muvofiq kelishi sharti bilan, qoʻllanishiga daxl qilmaydi.

6. Doimiy muassasa tomonidan korxona uchun tovar yoki buyumlarning xarid qilinishigagina asoslanib, ushbu doimiy muassasaga biron-bir foyda hisoblanmaydi.

7. Avvalgi bandlar maqsadlari uchun doimiy muassasaga mansub boʻlgan daromad yoki foyda, agar oʻzgartirish uchun salmoqli va yetarli sabablar boʻlmasa, har yili bir xil metod bilan aniqlanadi.

8. Agar daromad yoki foyda, ushbu Konvensiyaning boshqa moddalarida alohida aytib oʻtilgan daromad turlarini qamrab oladigan boʻlsa, mazkur moddalarning qoidalariga ushbu modda qoidalari taʼsir etmaydi.

8-modda Xalqaro transport

1. Ahdlashuvchi Davlatlardan biri korxonasining xalqaro tashishlarda havo kemalari, temir yoʻl yoki avtomobil transporti vositalaridan foydalanishdan olgan daromad yoki foydalari faqat shu Ahdlashuvchi Davlatda soliqqa tortiladi.

2. Ahdlashuvchi Davlat korxonasining xalqaro tashishlarda dengiz kemalaridan foydalanishdan olgan daromad yoki foydalari boshqa Ahdlashuvchi Davlatda soliqqa tortilishi mumkin, ammo ana shu boshqa Davlatda olinadigan soliq 50 foizga kamaytiriladi.

3. 1 va 2-band qoidalari, shuningdek pulda, qoʻshma faoliyatda, xalqaro tashkilotda transport vositalarini ekspluatatsiya qilish boʻyicha ishtirok etishdan olgan daromad yoki foydalariga nisbatan ham qoʻllaniladi.

9-modda Birlashgan korxonalar

1. Agar:

a) Ahdlashuvchi Davlatlardan birining korxonasi boshqa Ahdlashuvchi Davlat korxonasini boshqarishda, nazorat qilishda yoki uning kapitalida bevosita yoki bilvosita qatnashsa, yoki

b) oʻsha shaxslar Ahdlashuvchi Davlatlardan birining korxonasini va boshqa Ahdlashuvchi Davlat korxonasini boshqarishda, nazorat qilishda yoki kapitalida bevosita yoxud bilvosita qatnashsa va har qanday holatda ikki korxona oʻrtasida ularning tijorat va moliyaviy munosabatlarida mustaqil korxonalar oʻrtasida yaratiladigandan farqli sharoitlar vujudga keltirilsa yoki belgilansa, bunda ulardan biriga hisoblanishi mumkin boʻlgan, ammo shunday sharoitlar natijasida unga hisoblanmagan har qanday daromad yoki foyda ana shu korxonaning daromadi yoki foydasiga hisoblanishi va muvofiq ravishda soliqqa tortilishi mumkin.

2. Qachonki, Ahdlashuvchi Davlat shu Davlat korxonasi foydasiga boshqa Ahdlashuvchi Davlat korxonasi boʻyicha ana shu boshqa Davlatda soliqqa tortilgan foydani kiritsa va muvofiq ravishda soliqqa tortsa va shu tariqa kiritilgan foyda birinchi eslatilgan Davlat korxonasiga, agar ikkala korxona oʻrtasida vujudga keltirilgan munosabatlar ikki mustaqil korxona oʻrtasidagi munosabatlar kabi boʻlganda hisoblanadigan foyda boʻlsa, u holda ana shu boshqa Davlat foydadan oʻzida olingan soliq miqdoriga tegishli zarur tuzatishlarni shu boshqa Davlat soliq qonunchiligiga asosan kiritadi. Bunday tuzatishlarni aniqlashda ushbu Konvensiyaning boshqa qoidalariga tegishlicha eʼtibor qaratish kerak va zarur boʻlsa, Ahdlashuvchi Davlatlarning vakolatli organlari oʻzaro maslahatlashishlari mumkin.

10-modda Dividendlar

1. Bir Ahdlashuvchi Davlat rezidenti boʻlgan kompaniya tomonidan boshqa Ahdlashuvchi Davlat rezidentiga toʻlanadigan dividendlar ana shu boshqa Davlatda soliqqa tortilishi mumkin.

2. Biroq bunday dividendlar, shuningdek dividendlarni toʻlayotgan kompaniya rezidenti boʻlgan oʻsha Ahdlashuvchi Davlatda, ana shu Davlatning qonunlariga binoan ham soliqqa tortilishi mumkin, agar dividendlarning haqiqiy egasi boshqa Ahdlashuvchi Davlatning rezidenti boʻlsa, unda shu tarzda olingan soliqning miqdori dividendlar umumiy miqdorining 10 foizidan oshmasligi kerak.

Ahdlashuvchi Davlatlarning vakolatli organlari oʻzaro kelishuvga binoan ana shu cheklashlarning qoʻllanish metodini belgilaydilar.

Bu band kompaniyaning dividendlar toʻlanadigan foydasi yuzasidan soliqqa tortilishiga taalluqli emas.

3. “Dividendlar” iborasi ushbu moddada qoʻllanganda, aksiyalardan togʻ-kon sanoati aksiyalaridan yoki qarz talablari hisoblanmagan, foydada ishtirok etish huquqni beruvchi taʼsischilar aksiyalari va boshqa huquqlardan olinadigan daromadni, shuningdek foydani taqsimlovchi kompaniya rezidenti boʻlgan Davlatning qonunlariga muvofiq, aksiyalardan olinadigan daromad kabi xuddi shunday soliqlar orqali tartibga solinadigan boshqa korporativ huquqlardan olinadigan daromadni anglatadi.

4. Agar dividendlarning haqiqiy egasi Ahdlashuvchi Davlatlardan birining rezidenti boʻlgan holda, ana shu dividendlarni toʻlayotgan kompaniya rezident boʻlgan boshqa Ahdlashuvchi Davlatda oʻz faoliyatini u yerda joylashgan doimiy muassasa orqali amalga oshirsa yoki ushbu boshqa Davlatda mustaqil shaxsiy xizmatlarni u yerda joylashgan doimiy bazadan koʻrsatsa va dividendlar toʻlanadigan xolding aslida shu doimiy muassasa yoki doimiy baza bilan boʻlsa, 1 va 2-band qoidalari qoʻllanilmaydi. Bunday holda, vaziyatga qarab, 7-modda yoki 14-moddaning qoidalari qoʻllaniladi.

5. Agar Ahdlashuvchi Davlatlardan birining rezidenti boʻlgan kompaniya boshqa Ahdlashuvchi Davlatdan foyda yoki daromad olayotgan boʻlsa, ana shu boshqa Ahdlashuvchi Davlat kompaniya toʻlayotgan dividendlardan soliq olishi mumkin emas, bunda dividendlar ana shu boshqa Davlat rezidentiga toʻlanadigan yoki dividendlar toʻlanadigan xolding shu boshqa Davlatda joylashgan doimiy muassasa yoki doimiy baza bilan bogʻliq boʻlgan hollar bundan mustasno, shuningdek kompaniyaning taqsimlanmagan foydasidan soliqlar olmaydi, kompaniyaning taqsimlanmagan foydasi hatto toʻlanayotgan dividendlar yoki taqsimlanmagan foyda ana shu boshqa Davlatda toʻla yoki qisman hosil boʻlgan foyda yoki daromaddan tashkil topgan boʻlsa ham.

Ushbu banddagi hech bir narsa, Ahdlashuvchi Davlatga, shu Davlatning qonunlariga muvofiq, daromaddan soliq olishga, unda joylashgan doimiy muassasalar foydasini oʻtkazishga toʻsqinlik qilmaydi.

11-modda Foizlar

1. Ahdlashuvchi Davlatlarning birida hosil boʻlgan va boshqa Ahdlashuvchi Davlat rezidentiga toʻlanadigan foizlar ana shu boshqa Davlatda soliqqa tortilishi mumkin.

2. Biroq bunday foizlar, shuningdek ular hosil boʻlgan Ahdlashuvchi Davlatda, shu Davlatning qonunlariga binoan ham soliqqa tortilishi mumkin, ammo foizlarning haqiqiy egasi boshqa Ahdlashuvchi Davlatning rezidenti boʻlsa, bunday holda soliqning miqdori quyidagilardan oshmasligi kerak:

a) foizlar yalpi miqdorining 10 foizidan, agar ular moliya muassasalaridan (jumladan sugʻurta kompaniyasi) olingan boʻlsa;

b) boshqa barcha hollarda foizlar yalpi 15 foizidan.

Ahdlashuvchi Davlatlarning vakolatli organlari oʻzaro kelishuvga binoan bunday cheklashlarni qoʻllash metodini belgilaydilar.

3. 1 va 2-band qoidalariga qaramay, Ahdlashuvchi Davlatda paydo boʻladigan va boshqa Ahdlashuvchi Davlatning Hukumatiga toʻlanadigan foizlar birinchi eslatib oʻtilgan Davlatda soliqdan ozod etiladi.

Ushbu bandning maqsadlari uchun “Hukumat” atamasi,

a) Oʻzbekistonga nisbatan Oʻzbekiston Respublikasi Hukumatini va quyidagilarni oʻz ichiga oladi:

I) Markaziy bank;

II) Oʻzbekiston Respublikasi Tashqi iqtisodiy faoliyatini milliy banki;

III) mahalliy hokimiyat organlari; va

IV) Ahdlashuvchi Davlatlarning vakolatli organlari kelishib belgilaydigan boshqa har qanday hukumat muassasalari;

b) Tailandga nisbatan Tailand Qirolligi Hukumatini anglatadi va quyidagilarni oʻz ichiga oladi:

I) Tailand banki;

II) Tailand eksport-import banki;

III) mahalliy hokimiyat organlari; va

IV) Ikki Ahdlashuvchi Davlatning vakolatli organlari oʻrtasida vaqti-vaqti bilan kelishiladigan, kapitali toʻliq Tailand Qirolligiga yoki har qanday mahalliy hokimiyat organlariga tegishli tashkilotlar.

4. Ushbu Konvensiyaning 7-moddasi qoidalariga qaramay, Ahdlashuvchi Davlatlarning birida paydo boʻlgan va boshqa Ahdlashuvchi Davlat rezidentiga tegishli foizlar birinchi eslatib oʻtilgan Davlatda ozod etiladi, agar ular kafolatlangan, qilingan zayomga nisbatan yoki Ahdlashuvchi Davlat nomidan uning vakolatli organi tomonidan kafolatlangan yoki qilingan har qanday qarz talabi yoki kreditga nisbatan toʻlangan boʻlsa.

5. “Foizlar” atamasi ushbu moddada qoʻllanganida ipoteka taʼminotidan va qarzdorning foydasida ishtirok etishdan qatʼi nazar, va xususan, hukumat qimmatbaho qogʻozlaridan olinadigan daromad va obligatsiya yoki qarz majburiyatlaridan olinadigan daromad, shu jumladan ushbu qimmatbaho qogʻozlar, obligatsiyalar va qarz majburiyatlari boʻyicha olinadigan mukofot va yutuqlarda qatnashish huquqidan qatʼi nazar, har qanday turdagi qarz talablaridan olinadigan daromadni, shuningdek foizlar vujudga keladigan Ahdlashuvchi Davlatning soliq qonunchiligi boʻyicha qarz vositalaridan olinadigan daromadga oʻxshash daromadlarni anglatadi.

Toʻlov muddati choʻzib yuborilganligi uchun jarimalar ushbu modda maqsadlari uchun foizlar sifatida koʻrib chiqilmaydi.

6. Agar foizlarning haqiqiy egasi Ahdlashuvchi Davlatlardan birining rezidenti boʻla turib, foizlar hosil boʻlayotgan boshqa Ahdlashuvchi Davlatda tijorat faoliyatini u yerda joylashgan doimiy muassasa orqali olib borayotgan boʻlsa, yoki ushbu boshqa Davlatda joylashgan doimiy baza orqali mustaqil shaxsiy xizmatlar koʻrsatayotgan boʻlsa va foizlar toʻlanayotgan qarz talabnomalari shunday doimiy muassasa yoki doimiy baza bilan ham bogʻliq boʻlsa, 1 va 2-band qoidalari qoʻllanmaydi. Bunday holda, vaziyatga qarab, ushbu Konvensiyaning 7-modda yoki 14-moddasi qoidalari qoʻllanadi.

7. Foizlar Ahdlashuvchi Davlatda hosil boʻlgan, deb hisoblanadi, qachonki, foizlarni toʻlovchi Davlatning oʻzi, ushbu Davlatning mahalliy hokimiyati yoki rezidenti boʻlsa. Biroq foizlarni toʻlovchi shaxs Ahdlashuvchi Davlatning rezidenti boʻlish yoki boʻlmasligidan qatʼi nazar, Ahdlashuvchi Davlatda doimiy muassasaga yoki doimiy bazaga ega boʻlsa, shu tufayli qarz majburiyatidan foizlar toʻlash majburiyati vujudga kelgan boʻlsa va shunday foizlar toʻlashni doimiy muassasa yoki doimiy baza amalga oshirsa, bunda foizlar doimiy muassasa yoki doimiy baza joylashgan oʻsha Ahdlashuvchi Davlatda vujudga kelgan, deb hisoblanadi.

8. Agar toʻlovchi bilan foizlar olish huquqiga ega boʻlgan shaxs oʻrtasidagi yoki ular ikkalasi va har qanday boshqa shaxs oʻrtasidagi alohida munosabatlar oqibatida foizlar toʻlovchi bilan amalda foizlar olish huquqiga ega boʻlgan shaxs oʻrtasida kelishilishi mumkin boʻlgan miqdordan ortiq boʻlsa, bunday munosabatlar yoʻq boʻlgan taqdirda ushbu modda qoidalari faqat oxirgi eslatilgan miqdorga nisbatan qoʻllanadi. Bunday holda, toʻlovning ortiqcha qismidan ushbu Konvensiyaning boshqa qoidalarini inobatga olgan holda, har bir Ahdlashuvchi Davlat qonunchiligiga muvofiq, soliqqa tortiladi.

12-modda Royalti

1. Ahdlashuvchi Davlatlarning birida hosil boʻladigan va boshqa Ahdlashuvchi Davlatning rezidentiga toʻlanadigan royaltilar ana shu boshqa Davlatda soliqqa tortiladi.

2. Biroq bu royaltilar, shuningdek ular hosil boʻladigan Ahdlashuvchi Davlatda, ana shu Davlatning qonunlariga muvofiq soliqqa tortilishi mumkin, ammo, agar royaltilarning amaldagi egasi boshqa Ahdlashuvchi Davlatning rezidenti boʻlsa, bunday holda, shunday tarzda undiriladigan soliq royaltilar umumiy miqdorining 15 foizidan oshmasligi lozim.

Ahdlashuvchi Davlatlarning vakolatli organlari oʻzaro kelishuvga muvofiq bunday cheklashlarni qoʻllash metodlarini belgilaydilar.

3. “Royalti” iborasi ushbu moddada qoʻllanganida har qanday adabiy, sanʼat va ilmiy asarlarini, shu jumladan kinofilmlar hamda radio va televideniye uchun yozuvlar, kassetalar, har qanday patent, tovar belgisi, chizma yoki modellar, reja, maxfiy formula yoxud jarayonlar uchun mualliflik huquqidan foydalanganlik yoinki shu huquqdan foydalanish huquqi uchun, yoki sanoat, tijorat, ilmiy asbob-uskunalardan foydalanish huquqidan foydalanganlik yo foydalanish huquqi uchun yoki sanoat, tijorat yoxud ilmiy tajribaga mansub axborot uchun mukofot tarzida olinadigan har qanday koʻrinishdagi toʻlovlarni bildiradi.

4. Agar royaltilarning benefitsiari Ahdlashuvchi Davlatlardan birining rezidenti boʻlib, royalti hosil boʻlayotgan boshqa Ahdlashuvchi Davlatda u yerda joylashgan doimiy muassasa orqali tijorat faoliyatini amalga oshirayotgan boʻlsa, yoki ushbu boshqa Davlatda u yerda joylashgan doimiy baza orqali mustaqil shaxsiy xizmatlarni amalga oshirayotgan boʻlsa va royalti toʻlanayotgan huquq yoki mulk shunday doimiy muassasa yoki doimiy baza bilan haqiqatda bogʻliq boʻlsa, 1 va 2-bandlarning qoidalari qoʻllanmaydi. Bunday holda, 7-modda yoki 14-moddaning qoidalari vaziyatga qarab qoʻllaniladi.

5. Agar toʻlovchi Ahdlashuvchi Davlatning rezidenti boʻlsa, royalti shu Davlatda hosil boʻlgan, deb hisoblanadi. Biroq, royaltini toʻlovchi shaxs Ahdlashuvchi Davlatning rezidenti boʻlishi yoki boʻlmasligidan qatʼi nazar, Ahdlashuvchi Davlatda royaltini toʻlash majburiyati kelib chiqishi bilan boʻlgan doimiy muassasaga yoki doimiy bazaga ega boʻlsa va bu doimiy muassasa yoki baza shu royaltilarni toʻlashni amalga oshirsa, bunday royaltilar doimiy muassasa yoki doimiy baza joylashgan shu Ahdlashuvchi Davlatda hosil boʻlgan, deb hisoblanadi.

6. Agar toʻlovchi bilan royalti huquqiga ega shaxs oʻrtasidagi, yoki ularning ikkalasi va boshqa biron bir shaxs oʻrtasidagi alohida munosabatlar oqibatida royaltidan foydalanishga, huquqqa yoki axborot uchun toʻlanadigan royaltining toʻlovchi va shu daromadlar huquqiga ega shaxs oʻrtasida kelishilishi mumkin boʻlgan miqdordan oshiq boʻlsa, bunday munosabatlar yoʻq boʻlgan taqdirda, ushbu modda qoidalari faqat oxirgi eslatilgan nisbatan qoʻllanadi. Bunday holda, toʻlovning ortiqcha qismi ushbu Konvensiyaning boshqa qoidalarini inobatga olgan holda, har bir Ahdlashuvchi Davlat qonunchiligiga muvofiq soliqqa tortiladi.

13-modda Kapital qiymatining oʻsishidan olinadigan daromadlar

1. Bir Ahdlashuvchi Davlat rezidentining 6-moddaga taalluqli boʻlgan va boshqa Ahdlashuvchi Davlatda joylashgan koʻchmas mulkni begonalashtirishdan oladigan daromadlar oʻsha boshqa Davlatda soliqqa tortilishi mumkin.

2. Bir Ahdlashuvchi Davlat korxonasining boshqa Ahdlashuvchi Davlatdagi doimiy muassasasi tijorat mulkining bir qismini tashkil etuvchi koʻchar mulkni begonalashtirishdan olgan yoki bir Ahdlashuvchi Davlat rezidentining boshqa Ahdlashuvchi Davlatda mustaqil shaxsiy xizmatlarni amalga oshirishida foydalanishi mumkin boʻlgan doimiy bazasiga taalluqli koʻchar mulkni begonalashtirishdan olgan daromadlariga, jumladan ana shunday doimiy muassasani (alohida yoki korxona bilan birgalikda) yoki shunday doimiy bazani begonalashtirishdan olgan daromadlari ana shu boshqa Davlatda soliqqa tortilishi mumkin.

3. Ahdlashuvchi Davlat korxonasining xalqaro tashishlarda foydalaniladigan dengiz, havo kemalarini va temir yoʻl yoki avtomobil transporti vositalarini begonalashtirish yoki shunday dengiz, havo va temir yoʻl yoki avtomobil transporti vositalaridan foydalanishga taalluqli boʻlgan koʻchar mulkni begonalashtirishdan oladigan daromadlari faqat shu Davlatda soliqqa tortiladi.

4. Ushbu moddaning l, 2 va 3-bandlarida va 12-moddaning 3-bandida sanab oʻtilmagan har qanday mulkni begonalashtirishdan olinadigan daromad faqat mulkni begonalashtiruvchi shaxs rezidenti boʻlgan Ahdlashuvchi Davlatdagina soliqqa tortiladi. Ushbu bandning hech bir qoidasi har qanday Ahdlashuvchi Davlatga kapital qiymatining oʻsishidan olinadigan daromadlarni yoki aksiyalarni sotishdan yoki oʻtkazishdan olinadigan daromadlarni, boshqa Ahdlashuvchi Davlat hududida joylashgan, mulki asosan bevosita yoki bilvosita koʻchmas mulkdan tashkil topgan kompaniya aksionerlik kapitalini yoki boshqa qimmatbaho qogʻozlarni soliqqa tortishga toʻsqinlik qilmaydi.

14-modda Mustaqil shaxsiy xizmatlar

1. Ahdlashuvchi Davlatlardan biri rezidentining kasbiy xizmatlarni koʻrsatish yoki mustaqil tusdagi boshqa faoliyatdan olgan daromadlari faqat ana shu Davlatda soliqqa tortiladi, bunday daromadlar, shuningdek quyidagi hollarda, istisno tariqasida boshqa Ahdlashuvchi Davlatda ham soliqqa tortilishi mumkin:

a) agar u oʻz faoliyatini amalga oshirish maqsadlari uchun boshqa Ahdlashuvchi Davlatda oʻzi uchun muntazam tegishli boʻlgan doimiy bazaga ega boʻlsa; bunday hollarda daromadning faqat shunday doimiy bazaga taalluqli boʻlgan qismigina ushbu boshqa Davlatda soliqqa tortilishi mumkin; yoki

b) agar uning boshqa Ahdlashuvchi Davlatda boʻlishi koʻrib chiqilayotgan har qanday 12 oylik davr mobaynida jami 90 kunni tashkil etuvchi yoki oshuvchi davr yoki davrlar doirasida davom etsa.

2. “Kasbiy xizmatlar” atamasi, xususan mustaqil ilmiy, adabiy, badiiy, sanʼat, maʼrifiy va oʻqituvchilik faoliyatlarini, shuningdek vrachlar, yuristlar, muhandislar, meʼmorlar, stomatologlar va buxgaltyerlarning mustaqil faoliyatini qamrab oladi.

15-modda Yollanma shaxsiy xizmatlar

1. 16, 18 va 19-moddalarning qoidalarini inobatga olgan holda, Ahdlashuvchi Davlatlardan biri rezidentining yollanma xizmat uchun oladigan maoshi, ish haqi va shunga oʻxshash boshqa taqdirlash haqlari, agar yollash boʻyicha xizmat boshqa Ahdlashuvchi Davlatda amalga oshirilmayotgan boʻlsa, faqat ana shu Davlatda soliqqa tortiladi. Agar yollanish boʻyicha xizmat shunday amalga oshiriladigan boʻlsa, unda shu munosabat bilan olingan taqdirlash haqlariga ana shu boshqa Davlatda soliqqa tortilishi mumkin.

2. 1-band qoidalariga qaramay, Ahdlashuvchi Davlatlardan biri rezidentining boshqa Ahdlashuvchi Davlatda amalga oshiradigan yollanma xizmat uchun oladigan taqdirlash haqlari faqat birinchi eslatilgan Davlatda soliqqa tortiladi, agar:

a) oluvchi boshqa Ahdlashuvchi Davlatda istalgan koʻrib chiqilayotgan taqvimiy yilda boshlanadigan yoki tugaydigan har qanday 12 oylik davr mobaynida jami 183 kundan oshmaydigan davr yoki davrlar mobaynida boʻlib tursa; va

b) taqdirlash haqlari boshqa Davlat rezidenti boʻlmagan yollovchi tomonidan yoki yollovchi nomidan toʻlanadigan boʻlsa; va

c) taqdirlash haqlari boʻyicha xarajatlarni yollovchi boshqa Davlatda ega boʻlgan doimiy muassasa yoki doimiy baza oʻz zimmasiga olmasa.

3. Ushbu moddaning yuqoridagi qoidalariga qaramay, Ahdlashuvchi Davlat korxonasi tomonidan xalqaro tashishlarda foydalanadigan dengiz, havo kemalari bortida yoki temir yoʻl va avtomobil transporti vositalarida amalga oshiriladigan yollanish boʻyicha oladigan taqdirlash haqlari ana shu Davlatda soliqqa tortiladi.

16-modda Direktorlarning gonorarlari

Ahdlashuvchi Davlatlardan biri rezidentining boshqa Ahdlashuvchi Davlat rezidenti boʻlgan kompaniya Direktorlar Kengashining yoki har qanday boshqa shunga oʻxshash organning aʼzosi sifatida yoki uning nomidan oladigan direktorlarning gonorarlari va shunga oʻxshash boshqa toʻlovlar, ana shu boshqa Davlatda soliqqa tortilishi mumkin.

17-modda Sanʼat xodimlari va sportchilar

1. 14 va 15-moddalarning qoidalariga qaramay, Ahdlashuvchi Davlatlardan biri rezidentining teatr, kino, radio yoki televideniye artisti yoki musiqachi kabi sanʼat xodimi sifatida yoki sportchi sifatida boshqa Ahdlashuvchi Davlatda amalga oshirayotgan shaxsiy faoliyatidan oladigan daromadlari ana shu boshqa Davlatda soliqqa tortilishi mumkin.

2. Basharti, sanʼat xodimi yoki sportchi amalga oshirgan shaxsiy faoliyatidan olinadigan daromad sanʼat xodimi yoki sportchining oʻziga emas, balki boshqa shaxsga yozilsa, bu daromad 7, 14 va 15-moddalarning qoidalariga qaramay, sanʼat xodimi yoki sportchi faoliyat koʻrsatayotgan Ahdlashuvchi Davlatda soliqqa tortiladi.

3. Ushbu moddaning 1 va 2-bandi qoidalari Ahdlashuvchi Davlatda sanʼat xodimi yoki sportchining amalga oshirgan yoki Ahdlashuvchi Davlat korxonasi taʼminlagan faoliyatidan olinayotgan daromadlariga, agar ana shu Ahdlashuvchi Davlatga yoki vaziyatga bogʻliq ravishda korxonaga tashrif buyurish asosan boshqa Ahdlashuvchi Davlatning ijtimoiy jamgʻarmalari, jumladan uning har qanday mahalliy hokimiyat organi tomonidan mablagʻ bilan taʼminlansa, taalluqli emas.

18-modda Pensiyalar

19-moddaning 2-bandi qoidalarini hisobga olib, Ahdlashuvchi Davlat rezidentiga avvalgi yollash boʻyicha toʻlanadigan pensiya va boshqa shunga oʻxshash taqdirlash haqlari faqat ana shu Davlatda soliqqa tortiladi.

19-modda Hukumat xizmati

1. a) Ahdlashuvchi Davlat yoki uning mahalliy hokimiyat organlari tomonidan shu Davlatga yoki uning mahalliy hokimiyat organlariga koʻrsatgan xizmatlariga nisbatan jismoniy shaxsga, pensiyadan tashqari, toʻlanadigan ish haqi, maosh va shunga oʻxshash taqdirlash haqlari faqat ana shu Davlatda soliqqa tortiladi;

b) Bunday ish haqi, maosh va shunga oʻxshash taqdirlash haqlari faqat ana shu boshqa Ahdlashuvchi Davlatda ham soliqqa tortilishi mumkin, agar xizmatlar ana shu Davlatda amalga oshirilsa va jismoniy shaxs shu Davlatning rezidenti:

I) ana shu Davlatning milliy shaxsi boʻlsa; yoki

II) faqat xizmat koʻrsatish uchungina shu Davlatning rezidenti boʻlgan boʻlmasa.

2. a) Ahdlashuvchi Davlat yoki mahalliy hokimiyat organlari, yoki ular tomonidan tuzilgan jamgʻarmalar tomonidan jismoniy shaxsga shu Davlat yoki uning mahalliy hokimiyat organi uchun amalga oshirgan xizmatlariga nisbatan toʻlanadigan har qanday pensiya faqat ana shu Davlatda soliqqa tortiladi.

b) Agar jismoniy shaxs boshqa Davlatning rezidenti va milliy shaxsi boʻlsa, bunday pensiya faqat ana shu boshqa Davlatda soliqqa tortiladi.

3. 15, 16 va 18-moddalarning qoidalari Ahdlashuvchi Davlat yoki uning mahalliy hokimiyat organlari tomonidan amalga oshirilgan tadbirkorlik faoliyati munosabati bilan koʻrsatilgan xizmatlarga nisbatan toʻlanadigan maosh, ish haqi va shunga oʻxshash taqdirlash haqlari va pensiyalarga nisbatan qoʻllaniladi.

20-modda Talabalar

Jismoniy shaxs Ahdlashuvchi Davlatga kelish arafasida yoki undan oldin boshqa Ahdlashuvchi Davlat rezidenti boʻlgan va birinchi eslatilgan Davlatda uning tashrifi faqat quyidagi maqsadlarda boʻlsa:

a) universitetda yoki boshqa tan olingan maʼrifiy muassasalarda taʼlim olish; yoki

b) kasbni amalda qoʻllash maqsadida malaka oshirish; yoki

c) hukumat, diniy, xayriya, ilmiy, adabiy yoki maʼrifiy tashkilotlardan stipendiya, pullik dotatsiyalar yoki taqdirlash haqlari oluvchi sifatida oʻqish yoki ilmiy tadqiqotni amalga oshirish,

birinchi eslatib oʻtilgan Davlatda quyidagi soliqlardan ozod etiladi:

I) chet eldan oʻzining yashashi, maʼlumot olishi, oʻqishi, ilmiy va amaliy faoliyati uchun oʻtkaziladigan pullar;

II) stipendiyalar, dotatsiya yoki taqdirlash.

21-modda Professorlar, oʻqituvchilar va ilmiy xodimlar

1. Jismoniy shaxs Ahdlashuvchi Davlatga kelish arafasida yoki undan oldin boshqa Ahdlashuvchi Davlat rezidenti boʻlgan va birinchi eslatib oʻtilgan Ahdlashuvchi Davlatning vakolatli organi tomonidan tan olingan har qanday universitet, kollej, maktab yoki boshqa shunga oʻxshash maʼrifiy muassasaning taklifi boʻyicha, birinchi eslatib oʻtilgan Davlatga faqatgina oʻqish va/yoki ana shu maʼrifiy muassasalarda ilmiy tadqiqot maqsadida ikki yildan oshmaydigan davr mobaynida tashrif buyurgan shaxs, ana shunday oʻqish yoki ilmiy tadqiqotlardan olinadigan har qanday taqdirlash haqlariga nisbatan soliqlardan ozod etiladi.

2. Agar shaxs tomonidan amalga oshirilayotgan ayni tadqiqot alohida shaxs yoki shaxslarning foydasi uchun boʻlsa, 1-band qoidalari shu ilmiy tadqiqotlardan olinadigan daromadlarga nisbatan qoʻllanilmaydi.

22-modda Boshqa daromadlar

1. Ahdlashuvchi Davlat rezidentining ushbu Konvensiyaning oldingi moddalarida aytilmagan daromad turlari, daromadning qayerda paydo boʻlishidan qatʼi nazar, faqat shu Davlatda soliqqa tortiladi.

2. 1-bandning qoidalari 6-moddaning 2-bandida koʻrsatilgan koʻchmas mulkdan olingan daromaddan tashqari daromadlarga nisbatan, agarda bunday daromad egasi Ahdlashuvchi Davlatlardan birining rezidenti boʻla turib boshqa Ahdlashuvchi Davlatda u yerda joylashgan doimiy muassasa orqali oʻz faoliyatini amalga oshirsa yoki u yerda joylashgan doimiy baza orqali mustaqil shaxsiy xizmatlarni amalga oshirsa va daromad toʻlanadigan huquq yoki mulk haqiqatan ham bunday doimiy muassasa yoki baza bilan bogʻlangan boʻlsa, qoʻllanilmaydi. Bunday holatda, vaziyatga qarab, 7-modda yoki 14-moddaning qoidalari qoʻllaniladi.

23-modda Ikkiyoqlama soliqqa tortishni bartaraf etish

1. Ahdlashuvchi Davlatlardan birining rezidenti ushbu Konvensiyaning qoidalariga muvofiq, boshqa Ahdlashuvchi Davlatda soliqqa tortilishi mumkin boʻlgan daromad olsa, bunda birinchi eslatib oʻtilgan Davlat shu rezidentning daromad soligʻidan ana shu boshqa Davlatda toʻlangan daromad soligʻiga teng miqdorni chegirib tashlashga ruxsat berishi kerak.

Har qanday holatda bunday chegirmalar, vaziyatga bogʻliq ravishda ana shu boshqa Davlatda soliqqa tortilishi mumkin boʻlgan daromadga tegishli chegirmadan oldin hisoblab chiqilgan daromad soligʻi qismidan oshib ketmasligi kerak.

2. Ushbu moddaning 1-bandi maqsadi uchun Ahdlashuvchi Davlatlardan biri rezidentining ushbu Konvensiya qoidalariga muvofiq, boshqa Ahdlashuvchi Davlatda soliqqa tortilishi mumkin boʻlgan daromadi, ana shu boshqa Davlatdagi manbalardan olingan, deb hisoblanadi.

3. Qachonki, Ahdlashuvchi Davlatning ichki qonunchiligiga koʻra taqdim etiladigan belgilangan maxsus imtiyozli tadbirlarga muvofiq, soliq miqdori ozod etilsa yoki kamaytirilsa, u Ahdlashuvchi Davlatda toʻlangan deb hisoblanadi, shu bilan birga u boshqa Ahdlashuvchi Davlat soligʻidan chegirib tashlanadi.

24-modda Kamsitmaslik

1. Ahdlashuvchi Davlatlardan birining milliy shaxslari boshqa Ahdlashuvchi Davlatda shu boshqa Davlatning milliy shaxslariga oʻxshash sharoitlarda solinadigan yoki solinishi mumkin boʻlgan soliqlardan yoki unga aloqador majburiyatlarga, boshqa yoki mushkulroq har qanday soliq solishlarga yoki unga aloqador majburiyatlarga, duchor qilinmaydilar.

2. Ahdlashuvchi Davlatlardan biri korxonasining boshqa Ahdlashuvchi Davlatda ega boʻlgan doimiy muassasasini soliqqa tortish ana shu boshqa Davlatda ushbu boshqa Davlatning aynan shunday faoliyatni amalga oshiruvchi korxonalarini soliqqa tortishdan koʻra yomonroq boʻlmaydi.

3. Ahdlashuvchi Davlatlarning rezidentlari hisoblanadigan, fuqaroligi boʻlmagan shaxslar hech bir Ahdlashuvchi Davlatda shu Davlatlarning milliy shaxslariga oʻxshash sharoitlarda solinadigan yoki solinishi mumkin boʻlgan soliqlardan yoki unga aloqador majburiyatlardan boshqa yoki mushkulroq har qanday soliqqa tortishlarga yoki unga aloqador majburiyatlarga duchor qilinmaydilar.

4. 9-modda, 11-moddaning 8-bandi yoki 12-moddaning 6-bandi qoidalari qoʻllanishidan tashqari hollarda bir Ahdlashuvchi Davlat korxonasining boshqa Ahdlashuvchi Davlat rezidentiga toʻlaydigan foizlari, royaltilari va boshqa toʻlovlari shunday korxonaning soliqqa tortiladigan foydasini aniqlash maqsadida birinchi eslatilgan Davlat rezidentiga toʻlanganida qoʻllaniladigan bir xil shartlar asosida chegirib tashlanadi.

5. Kapitali toʻliq yoki qisman boshqa Ahdlashuvchi Davlatning bir yoki bir necha rezidentlariga tegishli boʻlgan yoki ular tomonidan bevosita yoki bilvosita nazorat qilinayotgan Ahdlashuvchi Davlat korxonasi shu Davlatda, shu Davlatning shunday korxonalari duchor boʻlgan yoki duchor boʻlishi mumkin boʻladigan har qanday soliqqa tortish yoki unga aloqador majburiyatlarga, boshqa yoki soliqqa tortishdan koʻra mushkulroq va u bilan bogʻliq boʻlgan majburiyatlarga duchor qilinmaydi.

6. Ushbu modda qoidalari Ahdlashuvchi Davlatni boshqa Ahdlashuvchi Davlat rezidentiga, oʻz shaxsiy rezidentlarining fuqarolik maqomi yoki oilaviy mansubligi hisobiga beriladigan soliqqa tortish boʻyicha qandaydir shaxsiy imtiyozlar, ozod etish va skidkalar berishga majburlovchi, deb hisoblanmaydi.

7. Ushbu modda qoidalari faqatgina ushbu Konvensiyada aytib oʻtilgan soliqlarga nisbatan qoʻllaniladi.

25-modda Oʻzaro kelishuv tartiblari

1. Agar Ahdlashuvchi Davlatlardan birining rezidenti bir yoki ikkala Ahdlashuvchi Davlatning harakati unga ushbu Konvensiya qoidalariga muvofiq kelmaydigan soliqqa tortishlarga olib keladi yoki olib kelishi mumkin, deb hisoblasa, u ushbu Davlatlarning ichki qonunchiligida nazarda tutilgan himoya vositalaridan qatʼi nazar, oʻz arizasini oʻzi rezident boʻlgan Ahdlashuvchi Davlatning vakolatli organiga taqdim etishi mumkin. Ariza ushbu Konvensiya qoidalariga nomuvofiq soliqqa tortishga olib keluvchi birinchi bildirishnoma vaqtidan boshlab uch yil mobaynida berilishi kerak.

2. Vakolatli organ, agar eʼtirozni asosli deb topsa va oʻzi eʼtirozni qoniqtiradigan qarorga kela olmasa, masalani ushbu Konvensiyaga muvofiq kelmaydigan soliqqa tortishdan qochish maqsadida boshqa Ahdlashuvchi Davlatning vakolatli organi bilan oʻzaro kelishib hal etishga harakat qiladi.

3. Ahdlashuvchi Davlatlarning vakolatli organlari ushbu Konvensiyani talqin qilish yoki qoʻllashda yuzaga keladigan har qanday qiyinchilik va ikkilanishlarni oʻzaro kelishuv boʻyicha hal etishga harakat qiladilar. Ular, shuningdek Konvensiyada koʻzda tutilmagan hollarda ikki tomonlama soliqqa tortishni bartaraf etish uchun bir-birlari bilan maslahatlashishlari mumkin.

4. Ahdlashuvchi Davlatlarning vakolatli organlari oldingi bandlar maʼnolarini tushunishida hamfikrlikka erishish maqsadida bir-birlari bilan toʻgʻridan toʻgʻri yoki ularning oʻzlari yoki ularning vakillari qatnashadigan qoʻshma komissiya doirasida aloqada boʻlib turishlari mumkin.

26-modda Axborot almashish

1. Ahdlashuvchi Davlatlarning vakolatli organlari ushbu Konvensiya qoidalarini amalga oshirish uchun yoki Ahdlashuvchi Davlatlarning soliqqa tortishga tegishli ichki qonunchiligidan ushbu Konvensiyaga zid tushmaydigan darajada foydalanish maqsadida zarur axborotlarni almashib turadilar. Ahdlashuvchi Davlat tomonidan olingan har qanday axborot, ushbu Davlatning ichki qonunlariga muvofiq, maxfiy hisoblanadi va faqat aniqlash yoki undirish, majburiy undirish yoki sud orqali taʼqib etish bilan bogʻliq yoki soliqlarga nisbatan apellatsiyalarni koʻrib chiqishga bogʻliq shaxslar yoki organlargagina (jumladang sudlar va maʼmuriy organlarga ham) ochiladi. Bunday shaxs yoki organlar axborotdan faqat shunday maqsadlar uchun foydalanadilar. Ular ushbu axborotni ochiq sud majlisida yoki yuridik qarorlar qabul qilish chogʻida ochishlari mumkin.

2. Hech qanday holatda ushbu moddaning 1-bandi qoidalari Ahdlashuvchi Davlatlardan birini quyidagilarga majburlovchi tarzda talqin qilinmaydi:

a) u yoki bu Ahdlashuvchi Davlatlar qonunchiligi yoki maʼmuriy amaliyotiga zid maʼmuriy choralar oʻtkazishga;

b) u yoki bu Ahdlashuvchi Davlat qonunchiligiga yoki odatdagi maʼmuriy amaliyotga muvofiq olinishi mumkin boʻlmagan axborotni taqdim etishga;

c) har qanday savdo, tadbirkorlik, sanoat, tijorat yoki kasb siri yoki savdo jarayonini ochib tashlovchi yoxud ochilishi Davlat siyosatiga (jamoat tartibiga) zid keluvchi axborotni taqdim etishga.

27-modda Diplomatik vakolatxona xodimlari va konsullik muassasalari xizmatchilari

Ushbu Konvensiyaning hech bir qoidasi diplomatik vakolatxona xodimlari va konsullik muassasalari xodimlarining xalqaro huquq umumiy normalariga yoki maxsus bitimlarning qoidalariga muvofiq belgilab qoʻyilgan soliq imtiyozlariga daxl qilmaydi.

28-modda Kuchga kirishi

Ahdlashuvchi Davlatlardan har biri ushbu Konvensiyaning kuchga kirishi uchun ichki qonunlariga muvofiq talab qilinadigan protseduralarning tugaganligi toʻgʻrisida bir-birlarini diplomatik kanallar orqali xabardor qiladilar. Ushbu Konvensiya shunday xabarnoma olingan kundan keyin quyidagidek amal qila boshlaydi:

a) Oʻzbekistonga nisbatan:

I) Konvensiya kuchga kiradigan yildan bevosita keyingi taqvimiy yilning birinchi yanvaridan boshlab yoki shu sanadan keyin olinadigan daromad manbaidan undiriladigan soliqlarga nisbatan;

II) Konvensiya kuchga kiradigan yildan bevosita keyingi taqvimiy yilning birinchi yanvaridan boshlab yoki shu sanadan keyin har bir soliq yili uchun undiriladigan boshqa soliqlarga nisbatan;

b) Tailandga nisbatan:

I) Konvensiya kuchga kiradigan yildan keyingi birinchi yanvardan yoki shu sanadan keyin toʻlanadigan yoki oʻtkaziladigan summalar uchun manbadan olinadigan soliqlarga nisbatan;

II) Konvensiya kuchga kiradigan yildan keyingi yilning birinchi yanvardan boshlab yoki shu sanadan keyingi soliqqa tortiladigan yillar yoki hisobot davrlari uchun boshqa daromad soliqlariga nisbatan.

29-modda Amal qilishini toʻxtatish

Ushbu Konvensiya uning amal qilishini Ahdlashuvchi Davlatlardan biri toʻxtatmaguncha oʻz kuchida qoladi. Har bir Ahdlashuvchi Davlat Konvensiyaning amal qilishini Konvensiya kuchga kirgan kundan keyin besh yil oʻtgach boshlanadigan har qanday taqvimiy yilning tugashiga kamida olti oy qolguniga qadar diplomatik kanallar orqali amal qilishini toʻxtatish xabarnoma berish yoʻli bilan Konvensiyaning amal qilishini toʻxtatishi mumkin.

Bunday holatda Konvensiyaning amal qilishi:

a) Oʻzbekistonga nisbatan:

I) amal qilishini toʻxtatish toʻgʻrisida xabarnoma berilgan yildan bevosita keyin keladigan taqvimiy yilning birinchi yanvaridan boshlab olinadigan daromad manbaidan undiriladigan soliqlarga nisbatan;

II) denonsatsiya haqida xabardor qilingan yildan bevosita keyin keladigan taqvimiy yilning birinchi yanvaridan yoki shu sanadan keyin boshlanadigan har qanday soliqqa tortish yillari uchun olinadigan boshqa soliqlarga nisbatan toʻxtatiladi;

b) Tailandga nisbatan:

I) amal qilishni toʻxtatish toʻgʻrisida xabarnoma berilgandan keyin keladigan yilning birinchi yanvaridan boshlab yoki shu sanadan keyin toʻlanadigan yoki oʻtkaziladigan daromad manbaidan olinadigan soliqlarga nisbatan;

II) soliq yillari yoki amal qilishni toʻxtatish xabarnoma berilgan yildan keyingi yilning birinchi yanvaridan boshlab yoki shu sanadan keyingi davrlarni tashkil etuvchi boshqa daromad soliqlariga nisbatan toʻxtatiladi.

Tegishli tartibda vakolat berilgan quyidagi imzo chekuvchilar shunga guvohlik berib, ushbu Konvensiyani imzoladilar.

Bangkok shahrida 1999-yil 23-aprelda ikki nusxada, har biri oʻzbek, tay va ingliz tillarida tuzildi, barcha matnlar bir xil kuchga ega. Talqin qilishda kelishmovchilikar vujudga kelsa, ingliz tilidagi matn asos qilib olinadi.

(imzolar)