Iqtisodiy hamkorlik toʻgʻrisida

24.11.1993

Oʻzbekiston Respublikasi Hukumati bilan Buyuk Britaniya va Shimoliy Irlandiya Birlashgan Qirolligi Hukumati oʻrtasida

Bitim

Oʻzbekiston Respublikasi Hukumati bilan Buyuk Britaniya va Shimoliy Irlandiya Birlashgan Qirolligi Hukumati (quyida birgalikda “Tomonlar” va alohida “Tomon” deb atalib),

iqtisodiy aloqalar ikki tomonlama munosabatlarni mustahkamlashning muhim va zarur sharti ekanligini taʼkidlab,

ikki tomonlama iqtisodiy hamkorlik har bir mamlakatda xalqlar farovonligini oshirish uchun koʻmaklashishiga ishonch hosil qilib,

Tomonlar va shu mamlakatlarning xalqlari oʻrtasidagi iqtisodiy hamkorlikni kengaytirish shu jumladan, Oʻzbekiston tashkilotlari, shirkatlari va fuqarolari bilan Britaniya tashkilotlari, shirkatlari va fuqarolari oʻrtasidagi ( kelajakda “jismoniy” va “yuridik” shaxslar deb ataluvchi) bevosita aloqalar Oʻzbekiston Respublikasining jahon iqtisodiy tizimiga kirishida muhim qadam ekanligiga amin boʻlib,

ikki mamlakat oʻrtasida iqtisodiy hamkorlik uchun asos yaratishga intilib,

iqtisodiy hamkorlikni Xelsinki Yakunlovchi akti (1975-yil, avgust), Yangi Yevropa uchun Parij xartiyasi (1990-yil, noyabr), 1992-yilgi Xelsinki hujjati, va Yevropada xavfsizlik va hamkorlik boʻyicha Kengashining boshqa hujjatlari va Yevropada iqtisodiy hamkorlik boʻyicha Bonn konferensiyasi Hujjati (1990-yil, mart-aprel) va Yevropa energetika xartiyasi (1991-yil, dekabr) prinsip va qoidalariga muvofiq rivojlantirishga oʻz xohishlarini tasdiqlab,

quyidagilar toʻgʻrisida kelishib oldilar:

1-modda

Tomonlar ikkala mamlakatda uzoq muddatga moʻljallangan iqtisodiy hamkorlikni rivojlantiradilar va sarmoyalarni joylashtirishni takomillashtirish uchun qulay shart-sharoitlar yaratishga intilib,jumladan ragʻbatlantiruvchi choralarni qoʻllaydilar:

a) oʻzaro tadbirkorlik, sarmoya joylashtirish va qoʻshma korxonalarning hamkorligini qoʻllash maqsadida mavjud moliya vositalaridan foydalanish;

b) oʻz mamlakatida sarmoyalarni joylashtirishga boshqa mamlakat sarmoyadorlarini jalb qiladigan qulay zamin yaratish;

v) Yevropada umum tan olingan standartlarga muvofiq keladigan intellektual mulkni himoyalash tizimlarni yaratish va saqlash;

g) iqtisodiy va tadbirkorlik aloqalarini rivojlantirishga koʻmaklashadigan tadbirlarni amalga oshirish, jumladan, yarmarkalar, koʻrgazmalar, seminarlar, ishbilarmon kishilarning borib kelishi bilan almashish.

2-modda

Har bir Tomon boshqa Tomonning iltimosiga binoan uz ixtiyoridagi bozor ahvoli haqidagi maʼlumotni, agar bu maʼlumot konfidensial xarakterda boʻlmasa va uni berish Tomonning milliy qonunchiligiga zid kelmasa boshqa davlatning qiziqqan jismoniy va yuridik shaxslariga bu maʼlumotni berishi mumkin.

3-modda

Tomonlar moliyaviy taʼminlashning, xususan, oʻrta va uzoq muddatga beriladigan kreditlarning mustahkam va samarali iqtisodiy hamkorlikdagi ahamiyatini tan oladilar.

Tomonlar milliy qoidalar va xalqaro tartib doirasida maqbul va qulay shart-sharoitlarda eksport kreditlarini berishga harakat qiladilar.

4-modda

Tomonlar xalqaro moliya institutlari doirasida hamkorlik qilishga oʻzlarining rozi ekanliklarini tasdiqlaydilar.

5-modda

Har bir Tomon oʻzlarida harakatda boʻlgan qonun va qoidalar asosida oʻz davlati hududidan olib oʻtilayotgan va kelib chiqishi boshqa tomon boʻlgan tovarlar erkin tranziti prinsipining muhim ahamiyatini tasdiqlaydilar.

6-modda

Tomonlar infrastruktura rivojlantirilishida, yaʼni milliy va xalqaro darajadagi aloqa va transport sohalarida iqtisodiy hamkorlikning muhim ekanligini tan oladilar. Tomonlar, shuningdek, muhim shirkatlar va tashkilotlarning infrastrukturani rivojlantirish loyihalarida ishtirok etishni qoʻllab-quvvatlaydilar, jumladan, ushbu maqsadlarda xalqaro tashkilotlardan mablagʻ olishlardagi hamkorlikni qoʻllab-quvvatlaydilar.

7-modda

Tomonlar bilimlarni, menedjer va mutaxassislarning bilim va tajribalarini sanoat va qishloq xoʻjaligidagi barcha sohalarda va moliyani boshqarish, moliyaviy xizmatlar koʻrsatish sohalarida tartib etish maqsadida xodimlarni tayyorlash va boshqa texnik yordamlar orqali hamkorlikni qoʻllab-quvvatlaydilar va davom ettiradilar.

8-modda

Har bir Tomon 1993-yil 24-noyabrda “Sarmoyalarni oʻzaro ragʻbatlantirish va himoyalash toʻgʻrisidagi Bitim” yoki kelajakda imzolanishi mumkin boʻlgan sarmoyalarni ragʻbatlantirish va himoyalash kabi har qanday boshqa bitimlarga asoslangan holda boshqa Tomonning jismoniy va yuridik shaxslarining sarmoyalarini qonuniy himoyalashini tasdiqlaydi.

9-modda

Tomonlar oʻzaro manfaat asosida fan-texnika sohalarida hamkorlik qilish muhimligini, va bunday hamkorlikka koʻmaklashishni kelishib oladilar. Bunday hamkorlik oʻz ichiga, xususan, tegishli maʼlumot, olimlar va mutaxassislar bilan almashishni olib, bu bilan cheklanmaydi.

10-modda

Har bir mamlakatning jismoniy va yuridik shaxslariga boshqa mamlakatning barcha sud va maʼmuriy idoralarida savdo bitimlaridan kelib chiquvchi daʼvogar, javobgar sifatida yoxud boshqa sifatida ishlarni hal etishda ishtirok etish uchun milliy tartibotni joriy etadilar.

11-modda

Har bir Tomon boshqa Tomonning iltimosiga binoan, ushbu Bitim ijrosi bilan bogʻliq boʻlgan, muammolar soʻrov bergan Tomonning fikriga koʻra uning iqtisodiyotiga, moliyaviy ahvoli, milliy sanoat va qishloq xoʻjaligiga zarar keltirmaslik maqsadida zarur maslahatlashuvni oʻtkazishga rozilik beradi. Ushbu Bitimda koʻzda tutilgan maqsadlarga erishishda, Tomonlar yuqorida keltirilgan muammolarni echishda bu Bitimning maqsadlariga erishishga nisbatan kam salbiy taʼsir etadigan choralarga ahamiyat beradilar.

12-modda

Bitimga har qanday qoʻshimchalar va oʻzgartirishlar kiritish Tomonlarning yozma kelishuvi orqali amalga oshiriladi.

13-modda

Ushbu Bitim Tomonlarning amaldagi xalqaro tashkilotlarda ishtiroki yoki mavjud ikki yoqlama va koʻp yoqlama bitimlaridagi majburiyatlari va huquqlarini kamsitmaydi, va ushbu Bitimni talqin qilinishida boshqa bitimlarning huquqlari cheklanilmaydi, boshqa bir davlat yoki guruh davlatlar manfaatlariga zarar yetkazishni uz maqsadi deb bilmasligini Tomonlar maʼlum qiladilar.

14-modda

Ushbu Bitim imzolangan kundan boshlab kuchga kiradi. Tomonlardan biri ushbu Bitimning amalda boʻlishini bekor qilish niyati toʻgʻrisidagi yozma xabar qilgan muddatidan boshlab Bitim olti oy mobaynida uz kuchini saqlab qoladi.

Quyidagilarni tasdiqlab, oʻz hukumatlaridan tegishlicha vakolatlanganlar ushbu Bitimni imzoladilar.

London shahrida, 1993-yil 24-noyabrda ikki asl nusxada, har biri oʻzbek va ingliz tillarida tuzildi, bunda har ikkala matn ham bir xil kuchga ega.

(imzolar)