Oʻzbekiston Respublikasi Oliy Kengashining hamda Oʻzbekiston Respublikasi Prezidenti huzuridagi Vazirlar Mahkamasining roʻznomalarini taʼsis etish toʻgʻrisida (547-XII-son)

06.03.1992

OʻZBEKISTON RESPUBLIKASI OLIY KENGAShI RAYoSATI VA OʻZBEKISTON RESPUBLIKASI PREZIDENTINING HUZURIDAGI VAZIRLAR MAHKAMASINING

Qarori

Oʻzbekiston Respublikasi Oliy Kengashi Raisining shu masalaga doir xatini muhokama etib, Oʻzbekiston Respublikasi Oliy Kengashining Rayosati hamda Oʻzbekiston Respublikasi Prezidenti huzuridagi Vazirlar Mahkamasi qaror qiladilar:

1. Oʻzbekiston Respublikasi Oliy Kengashining hamda Oʻzbekiston Respublikasi Prezidenti huzuridagi Vazirlar Mahkamasining roʻznomalari taʼsis etilib, “Xalq soʻzi”—“Narodnoye slovo” roʻznomalari tugatilsin. Yangi roʻznomalarning nomiga doir masala hal etilgunga qadar ular Oliy Kengash matbaa nashrining avvalgi nomi bilan chiqarib turilsin.

Yangi roʻznomalarni nashr etishning davriyligi haftasiga beshta son deb belgilansin va Oʻzbekiston Respublikasi Oliy Kengashining hamda Oʻzbekiston Respublikasi Prezidenti huzuridagi Vazirlar Mahkamasining asosan rasmiy materiallarini eʼlon qilish uchun haftalik Ilovalar chiqarish koʻzda tutilsin.

2. Oʻzbekiston Respublikasi Oliy Kengashi hamda Oʻzbekiston Respublikasi Prezidenti huzuridagi Vazirlar Mahkamasi roʻznomalari bosh muharririning vazifalarini ijro etuvchi qilib Oʻzbekiston Respublikasi xalq deputati Rasul Rahmonovich Rahmonov tayinlansin.

3. Yangi roʻznomalar bosh muharririning vazifalarini ijro qiluvchi oʻrtoq R.R. Rahmonov, Oʻzbekiston Respublikasi Oliy Kengashi Kotibiyatining Matbuot va axborot boʻlimi hamda Oʻzbekiston Respublikasi Prezidenti huzuridagi Vazirlar Mahkamasining Madaniyat, ommaviy axborot vositalari va turizm boʻlimi Oliy Kengashning Oshkoralik masalalari qoʻmitasi bilan hamkorlikda ikki hafta muddat ichida yangi roʻznomalarning tuzilishi, shtatlari, xarajatlari smetasi, tahrir hayʼati toʻgʻrisidagi takliflarni, shuningdek Ustavlari loyihalarini Oʻzbekiston Respublikasi Oliy Kengashining Rayosati hamda Oʻzbekiston Respublikasi Prezidenti huzuridagi Vazirlar Mahkamasining tasdigʻiga kiritsin.

4. Oʻzbekiston Respublikasi Oliy Kengashi Raisining oʻrinbosari oʻrtoq B.I. Bugrov hamda Oʻzbekiston Respublikasi Bosh Vazirining oʻrinbosari oʻrtoq E.S. Samandarov tugatilayotgan muharririyatlarning mol-mulkini muharririyatlarga oʻtkazish boʻyicha komissiya tuzsinlar.

5. Oʻzbekiston Respublikasi Prezidenti huzuridagi Vazirlar Mahkamasi (oʻrtoq E.S. Samandarov) yangi roʻznomalarning moddiy-texnika taʼminoti va xonalarini jihozlash, xodimlariga transport xizmati koʻrsatish masalalarini hal etsin.

6. Ushbu masala Oʻzbekiston Respublikasi Oliy Kengashining navbatdagi sessiyasi muhokamasiga kiritilsin.

Oʻzbekiston Respublikasi Oliy Kengashining Raisi Sh. YOʻLDOShEV Oʻzbekiston Respublikasi Bosh vaziri A. MUTALOV

Toshkent sh.,

1992-yil 6-mart,

547-XII-son