Oʻzbekiston Respublikasining mahalliy hokimiyat idoralarini qayta tashkil etish toʻgʻrisida (496-XII-son)

04.01.1992

Hujjat kuchini yo‘qotgan 08.12.1992

Oʻzbekiston Respublikasining qonuni

Iqtisodiyotni bozor munosabatlariga oʻtkazish sharoitida ijroiya hokimiyatini mustahkamlash zarurligi munosabati bilan Oʻzbekiston Respublikasi Oliy Kengashi qaror qiladi:

1. Oʻzbekiston Respublikasining viloyatlari, nohiyalari va shaharlarida vakillik hokimiyatiga hamda ijroiya-boshqaruv hokimiyatiga boshchilik qiladigan hokimlar lavozimi taʼsis etilsin.

2. Belgilab qoʻyilsinki,

viloyatlarning hokimlari Oʻzbekiston Respublikasining Prezidentiga va xalq deputatlari tegishli Kengashlariga hisob beradilar, Prezidentning joylardagi rasmiy vakillari boʻladilar, Oʻzbekiston Respublikasining Prezidenti tomonidan tayinlanadilar va lavozimdan ozod qilinadilar hamda shundan soʻng xalq deputatlari tegishli viloyat Kengashlari tomonidan tasdiqlanadilar;

nohiyalar va shaharlarning (Toshkent shahri bundan mustasno) hokimlari tegishli viloyat hokimi tomonidan tayinlanib, xalq deputatlari tegishli nohiya, shahar Kengashi tomonidan tasdiqlanadilar;

shaharlardagi nohiyalarning hokimlari tegishli shahar hokimi tomonidan tayinlanib, xalq deputatlari tegishli shahardagi nohiya Kengashi tomonidan tasdiqlanadilar;

nohiya va shaharlarning hokimlari oʻzlaridan yuqori turuvchi hokimlarga va tegishli xalq deputatlari Kengashlariga hisob beradilar.

3. Oʻzbekiston Respublikasining qonunlariga muvofiq hokimlar boshchiligidagi xalq deputatlari viloyat, nohiya va shahar Kengashlari mahalliy ahamiyatga molik barcha masalalarni umumdavlat manfaatlari hamda Kengash hududida yashayottan fuqarolarning manfaatlaridan kelib chiqqan holda hal etadilar, Oʻzbekiston Respublikasining qonunlarini, Prezident farmonlarini yuqori davlat idoralarining qarorlarini amalga oshiradilar, xalq deputatlari quyi Kengashlarining faoliyatiga rahbarlik qiladilar, respublika va mahalliy ahamiyatga molik masalalarni muhokama qilishda qatnashadilar.

4. Hokim ijroiya apparatiga ega boʻlib, bu apparat hozir amal qilib turgan Kengash va ijroiya qoʻmitasining vazifalarini bajaradi. Apparatning tuzilishini va shtatlarini hokim belgilaydi hamda xalq deputatlari Kengashi tasdiqlaydi.

5. Hokimning oʻrinbosarlarini, apparat boʻlimlari va boshqarmalari, boshqa boʻlinmalarining rahbarlarini hokimning taqdimiga muvofiq xalq deputatlari tegishli Kengashlari tasdiqlaydi.

6. Hokim Oʻzbekiston Respublikasi qonunlarida oʻziga berib qoʻyilgan vakolatlar doirasida qarorlar va farmoyishlar chiqaradi. Hokimning qarorlari va farmoyishlari Kengash hududidagi barcha korxonalar, muassasalar, tashkilotlar, jamiyat va birlashmalar uchun, shuningdek mansabdor shaxslar va fuqarolar uchun majburiydir.

7. Xalq deputatlari mahalliy Kengashlarining sessiyalari hokimlar tomonidan zaruratga qarab, lekin bir yilda kamida ikki marta chaqiriladi.

8. Oʻzbekiston Respublikasi Konstitutsiyasiga ushbu Qonundan kelib chiqadigan oʻzgartishlar kiritilsin.

9. Qoraqalpogʻiston Respublikasida mahalliy xokimiyat idoralarini tuzish masalalari Qoraqalpogʻiston Respublikasining Qonunlari bilan ushbu Qonunga mos tarzda belgilanadi.

10. Ushbu Qonun matbuotda eʼlon qilingan paytlan boshlab kuchga kiradi va Oʻzbekiston Respublikasining yangi Konstitutsiyasi qabul qilingunga qadar amalda boʻladi.

Oʻzbekiston Respublikasining Prezidenti I. KARIMOV

Toshkent sh.,

1992-yil 4-yanvar,

496-XII-son