Bojxona qonunlarini buzishga qarshi kurashda hamkorlik toʻgʻrisida

07.06.1995

Oʻzbekiston Respublikasi Hukumati bilan Litva Respublikasi Hukumati oʻrtasida

Bitim

Quyida “Ahdlashuvchi Tomonlar” deb ataluvchi Oʻzbekiston Respublikasi Hukumati va Litva Respublikasi Hukumati,

narkotiklar va psixotrop moddalarning qonunsiz oboroti jamiyat sogʻligʻi uchun xavf tugʻdirishini nazarda tutib, bojxona qonunlarini buzish ularning mamlakatlarining iqtisodiy, bojxona va jamoat manfaatlariga putur yetkazishini tan olib,

tovarlarni olib kirish, olib chiqish va tranzitida bojxona bojlari, yigʻimlari va boshqa toʻlovlarni toʻgʻri qoʻllash, shuningdek taqiq, cheklash va nazoratga taalluqli boʻlgan qoidalarga aniq rioya qilishning zaruratini tan olib,

bojxona qonunlariga rioya qilish va bojxona bojlari, yigʻimlari va boshqa toʻlovlarni undirish bojxona maʼmuriyatlarining yaqin hamkorligida yanada samarali boʻlishiga ishonib,

Birlashgan Millatlar Tashkiloti homiyligida ishlab chiqilgan 1953-yil 5-dekabrdagi Maʼmuriy oʻzaro yordam toʻgʻrisida Bojxona hamkorligi kengashining tavsiyasini, Narkotik vositalar toʻgʻrisida BMT Yagona Konvensiyasi (Nʼyu-York, 1961-yil 30-mart, 1972-yil 25-martdagi unga Protokolga muvofiq oʻzgartirilgan tahrirda), Psixotrop moddalar toʻgʻrisida konvensiya (Vena, 1971-yil 21-fevral) va Narkotik vositalar va psixotrop moddalarning qonunsiz oborotiga qarshi kurash toʻgʻrisida konvensiya (Vena, 1988-yil 19-dekabr) qoidalarini eʼtiborga olib,

quyidagilar toʻgʻrisida kelishib oldilar:

I. Taʼriflar 1-modda

Ushbu Bitim maqsadlari uchun qoʻllaniladigan atamalar quyidagilarni anglatadi:

a) “bojxona qonunlari” — tovarlarni olib kirish, olib chiqish va tranziti va bojxona bojlari, yigʻimlari va bojxona toʻlovlarini undirish tartibini, shuningdek taʼqiq, cheklash va nazorat tartiblarini yoʻlga qoʻyuvchi,bojxona maʼmuriyatlarini qoʻllaydigan qonun-qoidalar toʻplami;

b) “bojxona maʼmuriyati” — Oʻzbekiston Respublikasida — Oʻzbekiston Respublikasi Davlat soliq qoʻmitasi Bojxona bosh boshqarmasi, Litva Respublikasida — Litva Respublikasi Moliya vazirligi qoshidagi Bojxona departamenti;

v) “bojxona qonunlarini buzish” — bojxona qonunlarini har qanday buzish, shuningdek bu qonunlarni buzishga har qanday harakat qilish;

g) “hudud” — bojxona ishlari xususida tanho davlat yurisdiksiyaga ega boʻlgan davlat hududi;

d) “nazorat qilinadigan yetkazib berishlar” — narkotiklar va psixotrop moddalarning qonunsiz oborotida ishtirok etuvchi shaxslarni aniqlash maqsadida Tomonlarning vakolatli organlari bilgan holda va ular nazorati ostida qonunsiz oborotga kiritilgan yoki bunda gumon qilinayotgan narkotiklar, psixotrop moddalar yoki ularning oʻrnini bosadigan moddalarni Tomonlar hududlariga olib kirish, ularning hududlaridan olib chiqish yoki ularning hududlari orqali tranzitiga yoʻl qoʻyish metodi.

II. Koʻllash sohasi 2-modda

1. Tomonlar ushbu Bitim asosida va bojxona maʼmuriyatlari orqali:

a) bojxona qonunlariga aniq rioya qilish maqsadida;

b) bojxona qonunlarini buzishlarning oldini olish, tekshirish va ularga barham berish sohasida;

v) bojxona qonunlarini tatbiq etishga tegishli boʻlgan hujjatlar toʻgʻrisida xabardor qilish borasida bir-birlariga yordam beradilar.

2. Ushbu Shartnoma koʻzda tutgan yordam soʻralayotgan davlat hududida amal qiluvchi qonunlar va koʻrsatmalarga muvofiq soʻralayotgan bojxona maʼmuriyatining vakolati va imkoniyatlari doirasida koʻrsatiladi.

3. Ushbu Bitim toʻlanmagan bojxona bojlari, yigʻimlari va boshqa toʻlovlarning kompensatsiyasini koʻzda tutmaydi.

III. Shaxslar, tovarlar va transport vositalarini kuzatish 3-modda

1. Tomonlarning bojxona maʼmuriyatlari oʻz tashabbusiga koʻra yoki boshqa Tomon bojxona maʼmuriyatining soʻrovi boʻyicha:

a) boshqa Tomonning bojxona qonunlarini buzgani maʼlum boʻlgan yoki bunda gumon qilinayotgan shaxslar;

b) Tomonlardan birining bojxona maʼmuriyati boshqa Tomonning bojxona maʼmuriyatiga shu Tomon hududida katta miqyosli oborotda ishtirok etayotgani toʻgʻrisida maʼlum qilgan tovarlar yoki toʻlov vositalarining koʻchirilishi;

v) boshqa Tomonning bojxona qonunlarini buzish maqsadida ishlatilayotganligi maʼlum boʻlgan yoki bunda gumon qilingan har qanday transport vositalari;

g) boshqa Tomon hududida katta miqyosli nolegal oborot uchun moʻljallangan tovarlarni saqlash uchun ishlatiladigan joylar ustidan alohida kuzatishni amalga oshiradilar.

2. Oʻz vakolatlari doirasida Tomonlarning bojxona maʼmuriyatlari:

a) Tomonlar davlatlarining hududlari oʻrtasidagi qonuniy savdo oborotidan oʻzga maqsadlarda boshqa Tomon hududiga olib chiqilayotgani toʻgʻrisida maʼlum boʻlgan yoki buni taxmin qilishga yetarli asoslar boʻlgan tovarlarni olib chiqishga;

b) boshqa Tomon davlatining hududiga olib kirish taqiqlangan tovarlarni olib chiqishga ruxsat bermaydilar.

IV. Nazorat qilinadigan yetkazib berishlari 4-modda

1. Tomonlar oʻz imkoniyatlari doirasida narkotiklar va psixotrop moddalarning qonunsiz oborotida ishtirok etuvchi shaxslarni aniqlash va ularga nisbatan huquqni muhofaza qilish choralarini koʻrish maqsadida oʻzaro muvofiqlashtirilgan kelishuvlar asosida nazorat qilinadigan xalqaro darajadagi yetkazib berishlarni tegishlicha tatbiq etishga ruxsat beruvchi zarur choralarni, agar ular milliy qonunlarga zid boʻlmasa, koʻradilar.

2. Har bir konkret hol toʻgʻrisida nazorat qilinadigan yetkazib berishlarni tatbiq etish boʻyicha alohida qarorlar qabul qilinadi. Ular zarurat boʻlganida va bu milliy qonunlarga zid kelmasa, oʻzaro muvofiqlashtirilgan moliyaviy kelishuvlarni hisobga olgan holda qabul qilinishi mumkin.

3. Nazorat qilinadigan yetkazib berishlari vakolatli organlarning oʻzaro kelishuvi boʻyicha amalga oshiriladigan qonunsiz joʻnatishlar, ularda narkotiklar va psixotrop moddalar boʻlganida, shuningdek bu moddalarni toʻliq yoki qisman olib qoʻyish yoki almashtirish bilan ushlab qolinishi yoki harakatni davom ettirishga ruxsat berilishi mumkin.

V. Axborot almashish 5-modda

1. Tomonlarning maʼmuriyatlari oʻz tashabbusiga koʻra yoki boshqa Tomon bojxona maʼmuriyatining soʻroviga binoan:

a) bojxona bojlari va boshqa import va eksport yigʻim va toʻlovlarning va ayniqsa, bojxona maqsadlarida tovarlar bahosi va ularning tarif klassifikatsiyasi toʻgʻriligini aniqlashga imkon beruvchi axborotning;

b) olib kirish,olib chiqish va tranzitga taqiq va cheklashlarni tatbiq etishning;

v) agar bu boshqa bitimlar bilan koʻzda tutilmagan boʻlsa, tovarlarning kelib chiqishini aniqlash qoidalarini ishlatishning toʻgʻriligini aniqlash uchun zarur boʻlgan barcha axborotni bir-birlariga havola etadilar.

2. Soʻralayotgan bojxona maʼmuriyati talab qilinayotgan axborotga ega boʻlmagan holda, u oʻz ixtiyoricha milliy qonunlarning normalariga muvofiq vakolatli organlarga murojaat qilishi mumkin.

6-modda

Bir Tomonning bojxona maʼmuriyati boshqa Tomonning bojxona maʼmuriyatining soʻroviga binoan:

soʻrayotgan Tomon davlatining hududiga olib kirilayotgan tovarlar soʻralayotgan Tomon davlatining hududidan qonuniy olib chiqilayotgani haqidagi,

soʻrayotgan Tomon davlatining hududidan olib chiqilayotgan tovarlar soʻralayotgan Tomon davlatining hududiga qonuniy olib kirilayotgani haqida va bu tovarlar qanday bojxona protseduralaridan oʻtganligi haqidagi axborotni havola etadi.

7-modda

Bir Tomonning bojxona maʼmuriyati oʻz tashabbusiga koʻra yoki boshqa Tomonning bojxona maʼmuriyatining soʻroviga binoan u bojxona qonunlarini buzishlarni tekshirishida ishlatilishi mumkin boʻlgan, ayniqsa:

a) boshqa Tomonning bojxona qonunlarini buzgani maʼlum boʻlgan yoki bunda gumon qilinayotgan jismoniy yoki yuridik shaxslar,

b) qonunsiz oborotda ishlatilayotganligi maʼlum boʻlgan yoki shunday deb faraz qilishga asoslar boʻlgan tovarlar;

v) Tomonlarning bojxona qonunlarini buzishda ishlatilayotganligi maʼlum boʻlgan yoki shunday deb faraz qilishga asoslar boʻlgan transport vositalari;

g) Tomonlarning bojxona qonunlarini buzishda tatbiq etilayotganligi maʼlum boʻlgan yoki shunday deb faraz qilishga asoslar boʻlgan usul va vositalar haqidagi barcha axborotni havola etadi.

8-modda

Bir Tomonning bojxona maʼmuriyati oʻz tashabbusiga koʻra yoki boshqa Tomonning bojxona maʼmuriyatining soʻroviga binoan unga boshqa Tomonning bojxona qonunlariga zid keladigan yoki zid kelishi mumkin boʻlgan, aniqlangan yoki rejalashtirilayotgan harakatlar toʻgʻrisidagi ularning ixtiyorida boʻlgan barcha axborotni oʻz ichiga olgan aktlar, protokollar, yozma dalillar yoki hujjatlarning tasdiqlangan nusxalarini havola etadi.

9-modda

Ushbu Bitim koʻzda tutgan hujjatlar har qanday shaklga ega boʻlgan va oʻsha maqsadlarga xizmat qiladigan kompyuter axboroti bilan almashtirilishi mumkin.

Ushbu materialni talqin etish va tatbiq etish boʻyicha barcha zarur axborot bir vaqtda havola etilishi kerak.

10-modda

1. Tasdiqlangan nusxalar yetarli boʻlmagan hollardagina hujjatlarning asl nusxalarini havola etishni soʻrash mumkin.

2. Boshqa Tomonning bojxona maʼmuriyatidan olingan hujjatlarning asl nusxalarini birinchi imkoniyatdayoq qaytarib beriladi.

VI. Tergov 11-modda

1. Bir Tomonning bojxona maʼmuriyatining iltimosiga koʻra boshqa Tomonning bojxona maʼmuriyati bojxona qonunlariga zid keladigan yoki zid kelishi mumkin boʻlgan harakatlarni qilish yoki harakatlarni qilishga urinish fakti boʻyicha rasmiy tergovni boshlashi mumkin. Bunday tergov natijalari soʻrovchi bojxona maʼmuriyatiga bildiriladi.

2. Bunday tergov soʻralayotgan Tomonning qonunlari va koʻrsatmalariga, shuningdek Tomonlar oʻrtasidagi boshqa bitimlarga muvofiq oʻtkaziladi.

3. Bir Tomonning bojxona maʼmuriyatining mansabdor shaxslari alohida hollarda boshqa Tomonning bojxona maʼmuriyatining roziligi bilan uning hududida soʻrovchi Tomonning bojxona qonunlarini buzishni tergov qilishda ishtirok etishlari mumkin.

VII. Ekspertlar va guvohlar 12-modda

Bir Tomonning sudlari yoki vakolatli idoralarining ular koʻrib chiqayotgan bojxona qonunlarini buzishga tegishli soʻrovi boʻyicha boshqa Tomonning bojxona maʼmuriyati oʻzining mansabdor shaxslariga bu sudlar yoki vakolatli idoralarda guvohlar yoki ekspertlar sifatida chiqish vakolatini berishi mumkin. Soʻrovda ishning mohiyati va mansabdor shaxs kim sifatida chiqishi toʻgʻrisida aniq maʼlumotlar boʻlishi kerak.

VIII. Mansabdor shaxslarning boʻlish shartlari 13-modda

Bir Tomonning mansabdor shaxslari boshqa Tomonning davlati hududida boʻlish davrida ushbu Bitim koʻzda tutgan hollarda oʻz rasmiy vakolatlarining hujjatli tasdigʻiga ega boʻlishlari, forma kiyimida yurmasliklari va qurolga ega boʻlmasliklari kerak.

IX. Olingan maʼlumot va hujjatlardan foydalanish 14-modda

1. Soʻrov boʻyicha havola etilgan maʼlumot, xabar va hujjatlar faqatgina ushbu Bitimni bajarish maqsadlaridagina ishlatiladi va ularni havola etgan bojxona maʼmuriyatining roziligisiz kimga boʻlmasin berilishi yoki boshqa maqsadlarda ishlatilishi mumkin emas.

2. Ushbu modda 1-bandining qoidalari narkotiklar va psixotrop moddalarning qonunsiz oboroti bilan bogʻliq boʻlgan buzishlar toʻgʻrisidagi materiallarga tegishli boʻlmaydi. Bunday axborot narkotiklarning qonunsiz oboroti bilan bevosita shugʻullanuvchi organlarga berilishi mumkin.

3. Tomonlar ushbu Bitimga koʻra olingan soʻrov, axborot, ekspertiza aktlari va boshqa maʼlumotlarga, shuningdek shu xildagi materiallarga milliy qonunlarga muvofiq xuddi shunday himoyani havola etadilar.

15-modda

1. Tomonlarning bojxona maʼmuriyatlari ushbu Bitimga muvofiq va uning doiralarida olingan yozma tushuntirishlarni, guvohlik koʻrsatmalarini, maʼlumotlar va boshqa materiallarni tergov va sud muhokamalarini oʻtkazishda dalil sifatida ishlatishlari mumkin.

2. Bu maʼlumot va hujjatlarning dalillik kuchi, shuningdek ularning sudlarda ishlatilishi ularni olgan Tomonning milliy qonunlari bilan aniqlanadi.

X. Oʻzaro yordam boʻyicha majburiyatlardan istisnolar 16-modda

1. Agar soʻralayotgan bojxona maʼmuriyati soʻrovni bajarish oʻz davlatining suvereniteti, xavfsizligi, jamoat tartibi yoxud boshqa muhim manfaatlariga putur yetkazadi yoki davlat, sanoat yoki tijorat sirini ochishga olib keladi deb hisoblasa, u yordam berishdan toʻliq yoki qisman voz kechishi yoxud soʻrovni bajarishni maʼlum bir shartlarni bajarishga bogʻliq qilib qoʻyishi mumkin.

2. Yordam berishdan voz kechilgan holda bu toʻgʻridagi qaror voz kechishning sabablarini koʻrsatish bilan soʻrayotgan bojxona maʼmuriyatiga zudlik bilan maʼlum qilinadi.

3. Agar soʻrayotgan bojxona maʼmuriyati unga shunga oʻxshash soʻrov berilgan holda bajara olmaydigan yordam toʻgʻrisidagi soʻrov yuborilsa, unda soʻrovda bu toʻgʻrida koʻrsatish lozim. Bunday soʻrovni bajarish toʻgʻrisidagi qaror soʻralayotgan bojxona maʼmuriyati tomonidan qabul qilinadi.

XI. Hujjatlar toʻgʻrisida bildirish 17-modda

1. Bir Tomonning bojxona maʼmuriyatining iltimosiga koʻra ikkinchi Tomonning bojxona maʼmuriyati uning davlati hududida boʻlgan manfaatdor yuridik va jismoniy shaxslarga bojxona qonunlarini tatbiq etish munosabati bilan qabul qilingan tadbir va qarorlarni aks ettiruvchi hujjatlar toʻgʻrisida bildiradi.

2. Hujjatlar toʻgʻrisida bildirish ushbu Bitimga binoan soʻralayotgan Tomonning qonunlari va amaliyotiga muvofiq bajariladi.

3. Soʻrayotgan Tomonning istagiga koʻra bildirish alohida usul bilan, agar bu usul soʻrovchi Tomonning qonunlariga zid kelmasa, bajarilishi mumkin.

4. Bildirish toʻgʻrisidagi tasdiq soʻralayotgan Tomonning vakolatli organining sana va manfaatdor shaxsning imzosidek yoki bildirish sanasi va usuli koʻrsatilgan guvohnomadek rekvizitlar bilan taʼminlangan guvohnoma sifatida rasmiylashtirilishi kerak.

XII. Yordam bilan almashish 18-modda

1. Ushbu Bitim koʻzda tutgan yordam bilan almashish bevosita Tomonlarning bojxona maʼmuriyatlari tomonidan amalga oshiriladi.

2. Tomonlarning bojxona maʼmuriyatlari ularning markaziy va mahalliy tergov va nazorat xizmatlari oʻrtasida bevosita aloqani tashkil etishlari mumkin.

XIII. Xarajatlar 19-modda

Tomonlarning bojxona maʼmuriyatlari 11-moddaga muvofiq guvohlar va ekspertlarni chaqirish boʻyicha xarajatlardan tashqari ushbu Bitimni bajarish bilan bogʻliq boʻlgan xarajatlarni qoplash boʻyicha daʼvolarni qabul qilmaydilar.

XIV. Hududiy tatbiq etish, bajarish va talqin etish 20-modda

1. Ushbu Bitim Oʻzbekiston Respublikasi hududida va Litva Respublikasi hududida amal qiladi.

2. Ushbu Bitimni talqin va tatbiq etishda yuzaga keladigan bahslar muzokaralar yoʻli bilan yoki Tomonlar uchun maqbul boʻlgan boshqa usul bilan hal etiladi.

XV. Kuchga kirishi va amal qilish muddati 21-modda

Ushbu Bitim uning kuchga kirishi uchun Tomonlardan har birining milliy qonunlari koʻzda tutgan davlat ichki protsedurlari bajarilganligi toʻgʻrisidagi oxirgi bildirish diplomatik kanallar orqali olingan sanadan 30 kun oʻtgach kuchga kiradi.

Ushbu Bitim besh yil muddatga tuziladi. Agar Tomonlardan hech biri boshqa Tomonni ushbu Bitimning denonsatsiyasi toʻgʻrisida notifikatsiya yoʻli bilan tegishli muddat tugashidan olti oy ilgari xabardor qilmasa, uning amal qilishi har safar keyingi besh yillik davrlarga oʻz-oʻzidan uzaytiriladi.

Vilnyus shahrida 1995-yil 7-iyunda oʻzbek, litva va rus tillarida ikki nusxada tuzildi, barcha matnlar bir xil kuchga ega.

Ushbu Bitim qoidalarini talqin etishda kelishmovchiliklar yuzaga kelgan taqdirda Tomonlar rus tilidagi matnga amal qiladilar.

(imzolar)