Taʼlim, fan va texnologiya sohasida hamkorlik toʻgʻrisida

07.06.1995

Oʻzbekiston Respublikasi Hukumati va Litva Respublikasi Hukumati oʻrtasida

Bitim

Oʻzbekiston Respublikasi Hukumati va Litva Respublikasi Hukumati, bundan keyin “Tomonlar” deb ataluvchilar,

Ikkala mamlakat va ularning xalqlari oʻrtasida doʻstona munosabatlarni mustahkamlashga intilib,

Insonparvarlik va demokratiya asosida milliy taʼlim tizimlari mazmunini yangilashni istagan holda,

Ikkala mamlakat iqtisodiyotini rivojlantirish uchun fan va texnologiya sohasidagi hamkorlikning foydali ekanligini tan olgan holda,

Quyidagilar toʻgʻrisida kelishib oldilar:

1-modda

Tomonlar ahdlashuvchi Tomonlarning qonun va qoidalariga muvofiq taʼlim, fan va texnologiya sohasida teng huquqli va foydali hamkorlikka koʻmaklashadilar va rivojlantiradilar.

2-modda

Tomonlar doimiy yashovchi boshqa mamlakat fuqarolariga, ularning millatidan qatʼi nazar, bu mamlakatda amalda boʻlgan qonun va qoidalarga muvofiq oʻrta va oliy taʼlimga boʻlgan huquqni kafolatlaydilar.

3-modda

Tomonlar boshqa mamlakatdagi taʼlim toʻgʻrisida koʻproq bilimga ega boʻlish istagida, taʼlim sohasida hamkorlik qiladilar. Tomonlar oʻz ehtiyojlariga muvofiq pedagogika sohasida oʻqituvchi va olimlarning borish-kelishi va stajirovkalarini tashkil qiladilar, ikkala mamlakatda oʻtkaziladigan ilmiy konferensiyalarda olimlar va mutaxassislarning ishtirokini ragʻbatlantiradilar.

Tomonlar maktablar oʻrtasida aloqalar oʻrnatishga koʻmaklashadilar.

4-modda

Tomonlar boshqa mamlakat tilini oʻrganishga, uning adabiyoti, tarixi, madaniyati bilan tanishishga koʻmaklashadilar, shuningdek, boshqa mamlakatning tili, adabiyoti, tarixi va madaniyatini oʻrganish uchun kurslar va leksiyalar uyushtiradilar.

5-modda

Tomonlar taʼlim toʻgʻrisidagi hujjatlarni tan olish va teng ekanligiga yondashuvlarni ishlab chiqish maqsadida qoʻshma maslahatlashuvlar oʻtkazish toʻgʻrisida kelishib oldilar.

6-modda

Tomonlar fan va oliy taʼlim muassasalari oʻrtasida bevosita aloqalar oʻrnatishni ragʻbatlantiradilar.

Tomonlar olimlar oʻrtasidagi hamkorlikni ragʻbatlantiradilar va oʻz imkoniyatlariga muvofiq oʻz mamlakatlari universitetlari va boshqa oliy maktablarida oʻqish uchun joylar, shuningdek, oʻzaro kelishilgan sohalarda stajirovka va doktoranturalar uchun joylar va stipendiyalar ajratadilar.

7-modda

Tomonlar ilmiy hamkorlikning quyidagi shakllarini belgilaydilar:

a) umumiy ilmiy-texnikaviy loyihalar, ularning natijalari bilan almashuv, bu loyihalarni bajaruvchi olimlar, mutaxassislar va texnik xodimlar bilan almashuv,

b) umumiy ilmiy konferensiyalar, simpoziumlar, seminarlar, koʻrgazmalar va boshqa uchrashuvlar,

v) ilmiy va texnologik axborot, shuningdek, tadqiqot maʼlumotlari bilan almashuv,

g) kelishuvga binoan ilmiy va texnologik hamkorlikning boshqa shakllari.

8-modda

1. Tomonlar ikkala mamlakatning ilmiy davlat tashkilotlari, fan va oliy taʼlim muassasalari, ilmiy markazlari va korxonalari oʻrtasidagi bevosita aloqalarni ragʻbatlantiradilar.

2. Tomonlar yoki ularning ilmiy davlat tashkilotlari ushbu Bitimni amalga oshirish uchun zarur boʻlgan hamkorlikning tafsilot va protseduralarini oʻzida ifoda etgan uzoq muddatga moʻljallangan bitimlarni imzolaydilar.

3. Ikkala mamlakatning fan va oliy taʼlim muassasalari, ilmiy markazlari va korxonalari fan va texnologiya sohasida hamkorlik toʻgʻrisidagi oʻzaro foydali bitimni imzolaydilar.

9-modda

8-moddada qayd etilgan bitimlarda:

a) hamkorlikning obyekti va maqsadlari,

b) umumiy tadqiqotlarning natijalaridan foydalanish,

v) birgalikdagi ishlarni moliyaviy taʼminlash belgilanadi.

10-modda

Tomonlarning har biri amaldagi qonunlarga muvofiq oʻz hududida aqliy mulkni himoya qilishni kafolatlaydi.

11-modda

Ekspertlar, olimlar va boshqa mutaxassislarning xizmat safarlari boʻyicha xarajatlari quyidagi tartibda toʻlanadi: yuboruvchi Tomon boshqa mamlakatning poytaxtigacha va orqaga qaytish boʻyicha yoʻl xarajatlarini toʻlaydi, qabul qiluvchi Tomon esa mamlakat ichkarisidagi safarlari boʻyicha va boshqa barcha xarajatlarni, agar ular 9-moddada qayd etilgan bitimlarga zid boʻlmasa, toʻlaydi.

12-modda

Tomonlar ushbu Bitimni bajarishda ishtirok etuvchi shaxslarga hududga tez va toʻsiqlarsiz kirish va undan tashqariga chiqishlarini, shuningdek, ilmiy jihozlar va asbob-uskunalarni olib kirish va olib ketishlarini kafolatlaydi.

13-modda

1. Ushbu Bitimni bajarish maqsadida Tomonlar Qoʻshma Oʻzbek-Litva komissiyasini tashkil qiladilar, uning faoliyati ustidan rahbarlik qilish Oʻzbekiston Respublikasi Oliy va oʻrta maxsus taʼlim vazirligi, Oʻzbekiston Respublikasi Xalq taʼlimi vazirligi, Oʻzbekiston Respublikasi Fan va texnika boʻyicha davlat qoʻmitasi va Litva Respublikasi Taʼlim va fan vazirligi rahbarlariga yuklatiladi. Qoʻshma Komissiya navbatma-navbat Toshkentda va Vilnyusda yigʻilib turadi.

2. Qoʻshma Komissiya quyidagi vazifalarni bajaradi:

a) ushbu Bitimning bajarilishi uchun qulay sharoitlar yaratadi,

b) umumiy dastur va loyihalarni bajarishga yordam beradi,

v) taʼlim va fan sohasida hamkorlikning kelajagi toʻgʻrisida axborot va fikrlar bilan almashadi va uni takomillashtirish boʻyicha takliflarni koʻrib chiqadi.

14-modda

Ushbu Bitim Tomonlar oʻrtasidagi boshqa bitimlarga, shuningdek, ular aʼzo boʻlgan xalqaro shartnomalarga zid kelmaydi.

15-modda

1. Ushbu Bitim Tomonlar bir-birlarini yozma ravishda diplomatik yoʻllar orqali Bitimning kuchga kirishi uchun zarur boʻlgan barcha huquqiy protseduralar bajarilgani toʻgʻrisida bildirishnoma yuborgan kundan boshlab kuchga kiradi. Oxirgi bildirishnoma sanasi kuchga kirish sanasi hisoblanadi.

2. Bitim besh yillik muddatda amalda boʻladi va Tomonlardan hech biri boshqa Tomonga uning amalini toʻxtatish toʻgʻrisidagi niyatini tegishli muddat tugashidan olti oy ilgari bildirmasa, uning amali keyingi besh yillik muddatlarga oʻz-oʻzidan uzayadi.

3. Bitim qoidalari Tomonlarning oʻzaro yozma kelishuviga binoan oʻzgartirilishi mumkin.

4. Ushbu Bitimning oʻzgartirilishi yoki toʻxtatilishi uning asosida boshlangan loyihalarga, ularning bajarilishi oxiriga yetkazilgunga qadar, taʼsir qilmaydi.

Vilnyus shahrida, 1995-yil 7-iyunda ikki nusxada, har biri oʻzbek, litva va rus tillarida tuzildi, bunda barcha matnlar bir xil huquqiy kuchga ega. Ushbu Bitim qoidalarini talqin qilishda tafovutlar boʻlsa, Tomonlar rus tilidagi matnga amal qiladilar.

(imzolar)