Fuqarolarga ijtimoiy ahamiyatli savdodan tashqari toʻlovlar boʻyicha pul mablagʻlari joʻnatish tartibi toʻgʻrisida

16.01.1996

Oʻzbekiston Respublikasi Hukumati bilan Turkmaniston Hukumati oʻrtasida

Bitim

Oʻzbekiston Respublikasi Hukumati va Turkmaniston Hukumati keyingi oʻrinlarda “Tomonlar” deb ataluvchilar,

fuqarolarga ijtimoiy ahamiyatli savdodan tashqari toʻlovlar boʻyicha pul mablagʻlari erkin joʻnatilishining muhimligini tan olib, quyidagilar toʻgʻrisida ahdlashdilar:

1-modda

Tomonlar fuqarolarga ijtimoiy ahamiyatli savdodan tashqari toʻlovlarning quyidagi turlari boʻyicha pul mablagʻlari banklar va pochta aloqasi muassasalari orqali erkin joʻnatilishi va toʻlanishini taʼminlaydilar:

pensiyalar, alimentlar, davlat nafaqalari, toʻlovlar va kompensatsiyalar, shu jumladan xodimlarga mayib boʻlish, kasb kasalligi yoxud ular tomonidan mehnat vazifalari bajarilishi bilan bogʻliq ularning salomatligiga boshqa shikast yetkazilishi tufayli kelib chiqqan ziyonning oʻrnini qoplashga doir toʻlovlar joʻnatmalari;

sud va tergov organlarining hukmlari, qarorlari, ajrimlari asosida toʻlanadigan summalar;

fuqarolarning vafot etishi bilan bogʻliq toʻlovlar (transport xarajatlari va dafn marosimi xarajatlari);

sud, tergov organlarining, hakamlik, notarial idora va boshqa huquqni muhofaza qiluvchi organlarning sarf-xarajatlarini undirish boʻyicha toʻlovlar, shuningdek ushbu organlar koʻrib chiqadigan ishlar boʻyicha davlat boji;

siyosiy qatagʻonlar qurbonlariga, ularning oila aʼzolariga va merosxoʻrlariga pul kompensatsiyalari joʻnatish.

2-modda

Ijtimoiy ahamiyatli toʻlovlar boʻyicha joʻnatuvchilardan pul mablagʻlarini qabul qilib olish va ularni oluvchilarga toʻlash tegishli Tomonlarning milliy valyutalarida amalga oshiriladi.

Tomonlar ushbu maqsadlar uchun oʻz milliy valyutalarini Turkmaniston va Oʻzbekiston Respublikasi Milliy banklari tomonidan belgilanadigan tartibda toʻliq va oʻz vaqtida oʻzaro ayirboshlashni taʼminlaydilar.

3-modda

Tomonlar oʻz davlatlarining Aloqa vazirliklariga Oʻzbekiston Respublikasi Moliya vazirligi va Markaziy banki hamda Turkmaniston Iqtisodiyot vazirligi va Markaziy banki bilan kelishuv boʻyicha vakolat berilgan banklar orqali hisob-kitob qilgan holda ijtimoiy ahamiyatli savdodan tashqari toʻlovlar boʻyicha pul mablagʻlarini joʻnatish mexanizmi va shartlari toʻgʻrisida alohida bitim tuzish vakolatini beradilar.

4-modda

Tomonlar fuqarolarning jamgʻarma omonatlarini erkin tasarruf etish huquqi amalga oshirilishining ijtimoiy ahamiyatini, shu jumladan bu omonatlarning Oʻzbekiston Respublikasidan Turkmanistonga va Turkmanistondan Oʻzbekiston Respublikasiga joʻnatilishini tasdiqlaydilar.

Tomonlar oʻz davlatlarining jamgʻarma va boshqa banklariga milliy qonunchilikni hisobga olgan holda aholi omonatlarini joʻnatish tartibi toʻgʻrisida bitim imzolashni tavsiya qiladilar.

5-modda

Mazkur Bitimga Tomonlarning oʻzaro kelishuvi boʻyicha oʻzgartirish va qoʻshimchalar kiritilishi mumkin, bu oʻzgartirish va qoʻshimchalar alohida protokol bilan rasmiylashtiriladi. Koʻrsatib oʻtilgan protokollar ushbu Bitimning ajralmas qismi hisoblanadi.

6-modda

Mazkur Bitimni bajarish va talqin qilish bilan bogʻliq barcha nizoli masalalar muzokaralar olib borish yoʻli bilan hal etiladi.

7-modda

Mazkur Bitim imzolangan kundan boshlab kuchga kiradi va Tomonlardan biri uning amal qilishini toʻxtatish haqidagi oʻz niyatini diplomatiya yoʻli bilan ikkinchi Tomonga yozma ravishda maʼlum qilguniga qadar amal qiladi. Bunday holda Bitim Tomonlardan biri bunday bildirishnomani olgan sanadan boshlab uch oy oʻtgach oʻz kuchini yoʻqotadi.

1996-yil 16-yanvarda Chorjoʻy shahrida har biri oʻzbek, turkman va rus tillarida boʻlgan ikki asl nusxada tuzildi, barcha matnlar bir xil kuchga egadir.

Mazkur Bitim qoidalarini talqin qilishda kelishmovchiliklar kelib chiqqan taqdirda rus tilidagi matn asos qilib olinadi.

(imzolar)