Xalqaro temir yoʻl aloqasi sohasidagi oʻzaro munosabatlar toʻgʻrisida

16.01.1996

Oʻzbekiston Respublikasi Hukumati bilan Turkmaniston Hukumati oʻrtasida

Bitim

Oʻzbekiston Respublikasi Hukumati va Turkmaniston Hukumati, keyingi oʻrinlarda “Ahdlashuvchi Tomonlar” deb ataladi, ikki mamlakat oʻrtasidagi temir yoʻl aloqasini hamda ularning hududlari boʻyicha uchinchi davlatga tranzit qatnovni amalga oshirishni osonlashtirishga intilib,

ikki davlat temir yoʻl transportini muvofiqlashtirishga va ularning birgalikdagi faoliyatiga muhim ahamiyat berib,

oʻz munosabatlarini oʻzaro yordam va oʻzaro manfaat ruhida rivojlantirishni istab,

quyidagilar toʻgʻrisida ahdlashdilar:

1-modda

1. Ahdlashuvchi Tomonlar davlatlararo va xalqaro aloqalarda Hamdoʻstlikka aʼzo boʻlgan davlatlar temir yoʻl maʼmuriyatlari boshliqlarining Kengashida qabul qilingan muvofiqlashtirilgan tarif siyosatini amalga oshirish zarurligini tan oldilar.

2. Ahdlashuvchi Tomonlar oʻz mamlakatlari oʻrtasidagi temir yoʻllarda yuklar va yoʻlovchilar tashishni mazkur Bitimni imzolash paytida amalda boʻlgan normativ hujjatlar asosida amalga oshirishga kelishdilar.

3. Ahdlashuvchi Tomonlar zarur hollarda tegishli bitim tuzgan holda ushbu yoʻnalishlarda qoʻshimcha tranzit yuk oqimlarini jalb etish maqsadida, Oʻzbekiston Respublikasidan Turkmaniston hududi boʻylab va Turkmanistondan Oʻzbekiston Respublikasi hududi boʻylab temir yoʻl transporti orqali yuk va yoʻlovchilarni tranzit tashishda tarif siyosatini ishlab chiqishda oʻz harakatlarini muvofiqlashtirishga kelishdilar.

2-modda

Ahdlashuvchi Tomonlar tashilgan yuklar uchun toʻlovni quyidagicha amalga oshirishga kelishib oldilar:

Oʻzbekiston Respublikasidan Turkmaniston orqali Oʻzbekistonga yuboriladigan tranzit yuklar uchun yuk joʻnatuvchi “Oʻzbekiston temir yoʻllari” DATK bilan tuzilgan shartnomaga ega boʻlgan ekspeditor orqali;

Turkmanistondan Oʻzbekiston Respublikasi orqali Turkmanistonga yuboriladigan yuklar uchun — yuk oʻtadigan butun masofa uchun Turkmaniston Davlat temir yoʻllari orqali.

3-modda

Ahdlashuvchi Tomonlar yangi bitimlar va shartnomalar tuzilgunga qadar yoʻlovchilar va yuklarni temir yoʻl transportida xalqaro tashish toʻgʻrisidagi Bitimda va mazkur Bitimni imzolash davrida amalda boʻlgan boshqa shartnomalarda oʻz ishtirokini saqlab qoladilar.

4-modda

Ahdlashuvchi Tomonlar ularning ichki qonunlariga muvofiq berilgan harakatdagi sostav va lokomotivlarni boshqarish toʻgʻrisidagi guvohnomalarni va boshqa hujjatlarni, yuk tashish va transport-ekspeditsiya faoliyatining boshqa turlarini amalga oshirish uchun litsenziyalarni oʻz hududlarida oʻzaro tan oladilar.

5-modda

Ahdlashuvchi Tomonlar:

oʻz hududlarida mavjud temir yoʻllar Ustavi, temir yoʻl transporti ishini tartibga soluvchi qoidalar, nizomlar, yoʻriqnomalar, standartlar, texnikaviy shartlar va boshqa normativ hujjatlar amal qilishiga;

temir yoʻl transporti boshqaruvining tegishli organlariga hamkorlik qilish, ilmiy-texnikaviy axborotni va hamkorlikni yanada rivojlantirishga yordam beruvchi boshqa axborotni ayirboshlash boʻyicha muzokaralar olib borish huquqini berishga;

oʻzaro asosda tomonlar manfaatiga tegishli boʻlgan va temir yoʻl transporti ishini tartibga soluvchi amaldagi normativ hujjatlarni oʻzgartirishga va yangilarini joriy etishga kelishdilar.

6-modda

Ahdlashuvchi Tomonlar oziq-ovqat mahsulotlari, don, neft mahsulotlari va boshqa yuklar uzluksiz keltirilishi va olib chiqib ketilishi maqsadida Oʻzbekiston Respublikasiga va Turkmanistonga tegishli boʻlgan oʻz vagonlari va ijaraga olingan vagonlar oʻz vaqtida qaytarilishini taʼminlaydilar.

7-modda

Ahdlashuvchi Tomonlar temir yoʻl xodimlariga ikkinchi davlat hududida boʻlgan paytlarida oʻz xizmat vazifalarini bajarishda yordam berish, toʻsatdan kasal boʻlgan yoki jarohat olganlari taqdirda tekin tibbiy yordam koʻrsatish majburiyatini oʻz zimmalariga oladilar.

8-modda

Mazkur Bitimning alohida moddalarini talqin qilish va bajarish bilan bogʻliq holda paydo boʻlishi mumkin boʻlgan barcha nizoli masalalar muzokaralar olib borish va maslahatlashish yoʻli bilan hal etiladi.

9-modda

Ahdlashuvchi Tomonlarning mazkur Bitim bajarilishi uchun javob beruvchi vakolatli organlari quyidagilar hisoblanadi:

Oʻzbekiston Respublikasidan — “Oʻzbekiston temir yoʻllari” davlat-aksionerlik kompaniyasi.

Turkmanistondan — Turkmaniston davlat temir yoʻli.

10-modda

Mazkur Bitim noaniq muddatga tuzilgan va imzolangan kundan boshlab kuchga kiradi.

Ahdlashuvchi Tomonlarning istalgan biri Bitimning amal qilishini toʻxtatish yoki uni rad etish moʻljallangan sanadan kamida uch oy oldin bu haqda ikkinchi Ahdlashuvchi Tomonni yozma ravishda xabardor qilgan holda mazkur Bitimning amal qilishini toʻxtatishga yoki uni rad etishga haqlidir.

1996-yil 16-yanvarda, Chorjoʻy shahrida, oʻzbek, turkman va rus tillarida ikki nusxada tuzildi. Matnlarda farqlar kelib chiqqan taqdirda rus tilidagi matn asos qilib olinadi.

(imzolar)