Oʻzbekiston Respublikasi Oliy xoʻjalik sudi qoshidagi Ilmiy-maslahat kengashi toʻgʻrisidagi Nizomni tasdiqlash haqida (48-son)

01.03.1996

Oliy xoʻjalik sudi plenumining

Qarori

Oʻzbekiston Respublikasi Oliy xoʻjalik sudi Plenumi Oʻzbekiston Respublikasi Oliy xoʻjalik sudi qoshidagi Ilmiy-maslahat kengashi toʻgʻrisidagi Nizomni koʻrib chiqib va muhokama qilib, qaror qiladi:

Oʻzbekiston Respublikasi Oliy xoʻjalik sudi qoshidagi Ilmiy-maslahat kengashi toʻgʻrisidagi Nizom tasdiqlansin.

Toshkent sh.,

1996-yil 1-mart,

48-son

OʻZBEKISTON RESPUBLIKASI OLIY XOʻJALIK SUDI QOShIDAGI ILMIY-MASLAHAT KENGAShI TOʻGʻRISIDA

NIZOM

1. Oʻzbekiston Respublikasi “Sudlar toʻgʻrisida”gi Qonunining 81-moddasiga binoan Oʻzbekiston Respublikasi Oliy xoʻjalik sudi qoshidagi Ilmiy-maslahat kengashi maslahat beruvchi organ hisoblanib, jamoatchilik asosida faoliyat yuritadi.

Ilmiy-maslahat kengashining tarkibi Oʻzbekiston Respublikasi Oliy xoʻjalik sudi raisining taqdimnomasi boʻyicha Oʻzbekiston Respublikasi Oliy xoʻjalik sudi Plenumi tomonidan tasdiqlanadi.

Kengashga Oʻzbekiston Respublikasi Oliy xoʻjalik sudi raisi boshchilik qiladi. Uning tarkibidan Plenum kengash raisining oʻrinbosarini va ilmiy kotibini tayinlaydi.

Kengashning yalpi yigʻilishlari kengash raisi tomonidan zaruriyat tugʻilganda chaqiriladi.

2. Ilmiy-maslahat kengashining vazifalari:

2.1. Ilmiy maslahat kengashi quyidagi masalalarga oid nizolarni hal qiluvchi organlarga ilmiy asoslantirilgan tavsiyalar tayyorlaydi:

sud amaliyotini tashkillashtirish;

qonunchilikni takomillashtirish toʻgʻrisida takliflar ishlab chiqish va axborotlar tayyorlash;

xoʻjalik nizolarini hal etishda yuzaga kelgan huquqbuzarliklarning oldini olish va ogohlantirish.

2.2. Xoʻjalik nizolarini koʻrib chiqadigan Oʻzbekiston Respublikasi xoʻjalik sudlari oldiga qoʻyilgan vazifalarni hal etish boʻyicha ilmiy yondashuvlar ishlab chiqish va sud amaliyotini nazariy jihatdan umumlashtirish.

2.3. Xoʻjalik sudlari fan taraqqiyotidan birmuncha toʻliqroq foydalanishi uchun respublikadagi ilmiy-huquqiy va boshqa xil muassasalar bilan hamkorlikni mustahkamlashga koʻmaklashish.

Ilmiy-maslahat kengashi oʻz faoliyatini xoʻjalik sudlari ishiga muvofiqlashtiradi.

3. Ushbu vazifalarni hal etish uchun Ilmiy-maslahat kengashi aʼzolari quyidagi huquqlarga ega:

3.1. Sud amaliyotini oʻrganish va umumlashtirishda Oʻzbekiston Respublikasi Oliy xoʻjalik sudining sudlov hayʼatlari, boshqarmalari va boʻlimlari tomonidan tayyorlangan sud amaliyotiga oid tafsilotlar loyihalarini muhokama qilishda ishtirok etish.

3.2. Oʻzbekiston Respublikasi Oliy xoʻjalik sudi Plenumi sud sharhi tartibida beradigan Oʻzbekiston Respublikasi qonunlarini tatbiq etish masalalari boʻyicha tushuntirish xatlarining loyihalarini ishlab chiqishda qatnashish.

3.3. Ilmiy-maslahat kengashi tavsiyalarini amalga oshirishda ishtirok etish.

3.4. Oʻzbekiston Respublikasi Oliy xoʻjalik sudi materiallari bilan tanishish.

3.5. Oʻzbekiston Respublikasi Oliy xoʻjalik sudining Plenumi ishida va yigʻilishlarida qatnashish.

4. Ilmiy-maslahat kengashi aʼzolari kengash raisining yoki oʻrinbosarining topshirigʻi boʻyicha:

4.1. Oʻzbekiston Respublikasi Oliy xoʻjalik sudi sud hokimiyatini amalga oshirishda vujudga kelgan nizoli masalalar boʻyicha xulosalar tayyorlaydilar.

4.2. Huquqni, xoʻjalik qonunchiligini rivojlantirishning dolzarb muammolari va xoʻjalik sudlari faoliyatini takomillashtirish bilan bogʻliq boshqa masalalar boʻyicha Oʻzbekiston Respublikasi Oliy xoʻjalik sudining xodimlari huzurida maʼruzalar oʻqiydilar, axborot beradilar.

5. Ilmiy-maslahat kengashining raisi kengashning ishini tashkil qiladi, kengash yigʻilishida koʻrib chiqiladigan masalalarni belgilaydi, kengash yigʻilishida rahbarlik qiladi. Kengash raisi boʻlmagan paytda uning vazifasini rais oʻrinbosari bajaradi.

6. Ilmiy-maslahat kengashining ilmiy kotibi kengash yigʻilishida koʻriladigan masalalarni tayyorlaydi, yigʻilishga kelgan kengash aʼzolarini roʻyxatga oladi, yigʻilish bayonnomasini yuritadi, kengashning ish rejasi loyihasini tayyorlaydi. Kengash topshiriqlarining bajarilishini nazorat qilib boradi, kengashning ishi toʻgʻrisida yillik hisobot tuzadi.

7. Xoʻjalik sudlari faoliyatiga oid alohida muammolarni oʻrganish, shuningdek, Ilmiy-maslahat kengashi tarkibida ilmiy asoslantirilgan tavsiyalar tayyorlash uchun quyidagi boʻlimlar tashkil qilinadi:

sud jarayoni boʻyicha;

xoʻjalik nizolarini hal etishda fuqarolik qonunchiligini tatbiq etish boʻyicha;

Oʻzbekiston Respublikasida iqtisodiy munosabatlarni tartibga soluvchi qonunchilik boʻyicha.

Kengashning raisi sud amaliyotiga oid boshqa xil muammolar boʻyicha ham boʻlimlar tuzishi mumkin.

8. Boʻlimning tarkibi Ilmiy-maslahat kengashi aʼzolaridan tuziladi. Boʻlimning rahbari va kotibini kengash raisi tayinlaydi.

Oʻzbekiston Respublikasi Oliy xoʻjalik sudining sudyalari va mutaxassislari, respublikadagi boshqa xil tashkilotlarning mutaxassislari va ilmiy xodimlari ular rahbarlarining roziligi bilan boʻlimning ishida qatnashishi mumkin.

9. Boʻlim yigʻilishi uning rahbari tomonidan zaruriyat boʻlganda oʻtkaziladi. Boʻlimning tavsiyasi Ilmiy-maslahat kengashi raisiga koʻrib chiqish uchun taqdim qilinadi. Zarur hollarda kengash raisi boʻlimning tavsiyasini kengash yigʻilishiga kiritishi mumkin.

10. Ilmiy-maslahat kengashi yigʻilishiga va boʻlimiga materiallar kengash aʼzolari tomonidan tayyorlanadi.

11. Ilmiy-maslahat kengashi yigʻilishiga Oʻzbekiston Respublikasi Oliy xoʻjalik sudining sudyalari va mutaxassislari taklif qilinadi. Yigʻilishda kengash raisining taklifiga koʻra Qoraqalpogʻiston Respublikasi, viloyatlar va Toshkent shahar xoʻjalik sudlari raislari, boshqa xodimlari, shuningdek, korxona, muassasa, tashkilotlarning rahbarlari, ilmiy xodimlari, boshqa shaxslar ishtirok etishi mumkin.

12. Kengash yigʻilishi ijodiy bahslar, fikrni erkin bildirish muhitida oʻtkaziladi. Har bir kengash aʼzosi va yigʻilish ishtirokchisi muhokama qilinayotgan masalalar boʻyicha oʻz fikrini aytishi va taklifini bildirishi mumkin.

13. Muhokama qilingan masalalarning natijasi boʻyicha tavsiyalarni Ilmiy-maslahat kengashi koʻpchilik ovoz bilan qabul qiladi. Kengash aʼzosi kengash qaroriga oʻzining alohida fikrini qoʻshib qoʻyish huquqiga ega.

14. Ilmiy-maslahat kengashi ishini texnik jihatdan taʼminlash Oʻzbekiston Respublikasi Oliy xoʻjalik sudi Plenumining kotibiyati tomonidan amalga oshiriladi.

15. Ilmiy-maslahat kengashining va boʻlimining umumiy yigʻilishi yakunlari boʻyicha bayonnoma yozib boriladi. Kengash yigʻilishining bayonnomasini kengash raisi va kotibi, boʻlim yigʻilishi bayonnomasini esa boʻlim rahbari va boʻlim kotibi imzolaydi.