Davlatlar ichida erkin harakat qilish toʻgʻrisida

20.06.1995

Oʻzbekiston Respublikasi bilan Amerika Qoʻshma Shtatlari oʻrtasida

Hamjihatlik Memorandumi

Oʻzbekiston Respublikasi va Amerika Qoʻshma Shtatlari, bundan keyin “Tomonlar” deb ataluvchilar;

ikkala mamlakatda diplomatik va konsullik vakolatxonalarning mavjudligi ikki xalq oʻrtasida aloqalarni kengaytirishga xizmat qilishi va oʻzaro almashuvga koʻmaklashishini tan olgan xolda;

cheklanmagan harakat qilish ikkala mamlakat diplomatik va konsullik vakolatxonalarining muvaffaqiyatli ishlashi uchun zarurligini hisobga olib;

va Oʻzbekiston Respublikasi bilan Amerika Qoʻshma Shtatlari oʻrtasidagi yaqin va oʻzaro diplomatik munosabatlarning xarakterini taʼkidlash istagida;

ularning 1961-yil 18-apreldagi diplomatik aloqalar toʻgʻrisidagi Vena Konvensiyasi qoidalariga qatʼiy amal qilishga sodiqliklarini tasdiqlab;

Yevropada Hamkorlik va Xavfsizlik Tashkiloti doirasida Tomonlarning erkin harakat qilish borasida zimmalariga olgan majburiyatlarini hayotga tatbiq qilishga intilib;

kuyidagi prinsiplarga amal qilish toʻgʻrisidagi umumiy istaklarini bildiradilar:

1. Oʻzaro asosda Boshqa Tomonning diplomatik va konsullik xodimlarining harakati uchun vakolatxona joylashgan mamlakat hududida yopiq rayonlar boʻlmaydi.

Tomonlar bundan keyin ham harbiy bazalar, strategik obyektlar va keng ommaning bemalol kirishi uchun yopiq boʻlgan joylarga tegishli ruxsatnomasiz kirishni taqiqlashi mumkin.

Bundan tashqari, Tomonlarning hech biri tegishli ruxsatnomasiz xususiy mulkchilik doirasiga bostirib kirishga haqqi yoʻq.

2. Oʻzaro asosda ikkala Tomonning diplomatik va konsullik xodimlarining harakati uchun vakolatxona joylashgan mamlakat hukumatining ruxsatini olish, shuningdek, uni oldindan xabardor qilish talab qilinmaydi.

Bundan tashqari, bunday shaxslar vakolatxona joylashgan mamlakat fuqarolari uchun tegishli xizmatlarni koʻrsatuvchi tashkilotlar orqali va oʻsha asosda bevosita oʻz safarlarini oʻzlari uyushtirishlari mumkin.

3. Diplomatik aloqalar toʻgʻrisidagi Vena Konvensiyasining 11-bandiga qaramasdan Oʻzbekiston Respublikasi Hukumati Amerika Qoʻshma Shtatlarining Oʻzbekiston Respublikasidagi diplomatik missiyalari xodimlari sonini asossiz ravishda cheklamaydi, Amerika Qoʻshma Shtatlari Hukumati esa Oʻzbekiston Respublikasining Amerika Qoʻshma Shtatlaridagi diplomatik missiyalari xodimlari sonini asossiz ravishda cheklamaydi.

4. 1 va 2-paragraflarning diplomatik missiyalar aʼzolarining cheklanmagan erkin harakat qilishi toʻgʻrisidagi qoida Oʻzbekiston Respublikasi va Amerika Qoʻshma Shtatlarining boshqa hamma fuqarolariga taalluqli boʻladi.

5. Memorandumdagi hech bir narsa Tomonlardan hech birining oʻz hududiga kirish uchun viza tartibini oʻrnatish huquqini cheklamaydi.

6. Ushbu Memorandum qoidalari hech bir holda Tomonlardan birortasining uchinchi davlatlarga nisbatan olgan majburiyatlariga taʼsir qilmaydi va ulardan birortasiga qarshi qaratilmaydi.

7. Ushbu Memorandum imzolangan vaqtdan 1994-yil 1-martda imzolangan Oʻzbekiston Respublikasi Hukumati bilan Amerika Qoʻshma Shtatlari Hukumati oʻrtasida diplomatik va konsullik xodimlarining cheklanmagan harakat qilishi toʻgʻrisidagi hamjihatlik Memorandumi oʻz kuchini yoʻqotadi.

8. Mamlakatlardan birortasi ushbu hamjihatlik Memorandumini toʻxtatish istagida boʻlsa, bu mamlakat boshqa Tomonni xabardor qilgandan soʻng ikki oydan keyin Memorandumning amal qilishini toʻxtatishi mumkin.

Vashington shahrida 1995-yil 20-iyunda oʻzbek va ingliz tillarida imzolandi.

(imzolar)