Oʻzbekiston Respublikasi Oliy Kengashining 1991-yil 30-sentabrdagi “SSSR Oliy Kengashi palatalari tarkibiga Oʻzbekiston Respublikasidan vakil qilinayotgan SSSR xalq deputatlari va Oʻzbekiston Respublikasi xalq deputatlarining nomzodlari toʻgʻrisida”gi qarorini bekor qilish hamda Oʻzbekiston Respublikasidan saylangan SSSR xalq deputatlarining vakolatlarini toʻxtatish haqida (498-XII-son)

04.01.1992

Oʻzbekiston Respublikasi Oliy Kengashining

Qarori

Mustaqil Davlatlar Hamdoʻstligi tuzilishi, Sovet Sotsialistik Respublikalari Ittifoqining amal qilishi toʻxtatilishi munosabati bilan hamda “Oʻzbekiston Respublikasi davlat mustaqilligining asoslari toʻgʻrisida”gi Oʻzbekiston Respublikasi Qonunining 3 va 5-moddalariga asosan Oʻzbekiston Respublikasi Oliy Kengashi qaror qiladi:

1. Oʻzbekiston Respublikasi Oliy Kengashining 1991-yil 30-sentabrdagi SSSR Oliy Kengashi palatalari tarkibiga Oʻzbekiston Respublikasidan SSSR xalq deputatlari va Oʻzbekiston Respublikasi xalq deputatlarini vakil qilish toʻgʻrisidagi qarori oʻz kuchini yoʻqotgan deb hisoblansin.

2. Oʻzbekiston Respublikasining milliy-hududiy va hududiy okruglaridan hamda jamoat tashkilotlaridan saylangan 108 nafar SSSR xalq deputatining vakolatlari toʻxtatilgan deb hisoblansin.

Oʻzbekiston Respublikasi Oliy Kengashining Raisi Sh. YOʻLDOShEV

Toshkent sh.,

1992-yil 4-yanvar,

498-XII-son