Jismoniy tarbiya va sport mutaxassislarini qayta tayyorlash va ularning malakasini oshirish tartibi toʻgʻrisidagi Nizomni tasdiqlash haqida (347-son)

18.12.2014

Oʻzbekiston Respublikasi Vazirlar Mahkamasining

qarori

“Jismoniy tarbiya va sport toʻgʻrisida”gi Oʻzbekiston Respublikasining Qonunida va Kadrlar tayyorlash milliy dasturida belgilangan vazifalarga muvofiq hamda Oʻzbekiston Respublikasi Prezidentining “Qonunlarning havolaki normalarini amalga oshirishga qaratilgan normativ-huquqiy va boshqa hujjatlarni ishlab chiqish rejalarini tasdiqlash toʻgʻrisida” 2013-yil 15-iyuldagi PQ-2003-son qarorini bajarish yuzasidan Vazirlar Mahkamasi qaror qiladi:

1. Jismoniy tarbiya va sport mutaxassislarini qayta tayyorlash va ularning malakasini oshirish tartibi toʻgʻrisidagi Nizom ilovaga muvofiq tasdiqlansin.

2. Vazirliklar va idoralar oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.

3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.I. Ikramov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2014-yil 18-dekabr,

347-son

Vazirlar Mahkamasining 2014-yil 18-dekabrdagi 347-son qaroriga ILOVA

Jismoniy tarbiya va sport mutaxassislarini qayta tayyorlash va ularning malakasini oshirish tartibi toʻgʻrisida

NIZOM

I. Umumiy qoidalar

1. Mazkur Nizom “Taʼlim toʻgʻrisida”, “Jismoniy tarbiya va sport toʻgʻrisida”gi Oʻzbekiston Respublikasi qonunlariga hamda Kadrlar tayyorlash milliy dasturida belgilangan vazifalarga muvofiq olimpiya zaxiralari kollejlarining, sport maktablarining rahbar kadrlari, instruktor-metodistlari hamda trener-oʻqituvchilari, shuningdek oliy taʼlim muassasalarining jismoniy tarbiya va sport faoliyati boʻyicha pedagog kadrlarini (keyingi oʻrinlarda jismoniy tarbiya va sport mutaxassislari deb ataladi) qayta tayyorlash va ularning malakasini oshirish tartibini belgilaydi.

2. Nodavlat tashkilotlar va jismoniy shaxslar buyurtmalariga binoan jismoniy tarbiya va sport mutaxassislarini qayta tayyorlash va ularning malakasini oshirish ixtiyoriy ravishda, belgilangan tartibda tuzilgan shartnoma asosida mazkur Nizomda belgilangan tartibda amalga oshiriladi.

3. Mutaxassislarni qayta tayyorlash va ularning malakasini oshirish ishlarini tashkil etish Oʻzbekiston Respublikasi Jismoniy tarbiya va sport davlat qoʻmitasi (keyingi oʻrinlarda vakolatli davlat organi deb ataladi) tomonidan manfaatdor vazirliklar va idoralar bilan birgalikda amalga oshiriladi.

4. Xorijiy davlatlarda taʼlim muassasalarini tamomlagan jismoniy tarbiya va sport mutaxassislari qayta tayyorlash va malaka oshirish tizimida oʻqishga bazaviy maʼlumoti toʻgʻrisidagi hujjati nostrifikatsiyadan oʻtgandan keyin qoʻyiladi.

5. Jismoniy tarbiya va sport mutaxassislarini qayta tayyorlash va ularning malakasini oshirish tizimining tuzilmasi va uni boshqarish quyidagi tamoyillar asosida tashkil etiladi:

a) jismoniy tarbiya va sport mutaxassislarining kasbiy mahorati darajasini lavozim malaka tavsiflariga muvofiqligini aniqlash;

b) yoshlarda milliy gʻoyaga sadoqat, vatanparvarlik, maʼnaviy va jismoniy yetuklik, keng dunyoqarashga va mustaqil fikrlashga layoqatlilikni hamda tashabbuskorlikni tarbiyalash;

v) oʻquv hamda sportchilar tayyorlash jarayoniga zamonaviy pedagogik va axborot texnologiyalarini joriy etish darajasi monitoringini olib borish;

g) kadrlar salohiyatidan hamda mavjud moddiy-texnika bazasidan foydalanish imkoniyatlarini kengaytirish.

6. Vakolatli davlat organi jismoniy tarbiya va sport mutaxassislarini qayta tayyorlash va ularning malakasini oshirish sohasida:

jismoniy tarbiya va sport mutaxassislarini qayta tayyorlash va ularning malakasini oshirish ishlarini takomillashtirishga doir maqsad va vazifalarni belgilaydi;

oʻquv reja va dasturlarini tasdiqlaydi;

jismoniy tarbiya va sport mutaxassislarini qayta tayyorlash va ularning malakasini oshirishni takomillashtirish mexanizmi va usullarini, taʼlim mazmuni va sifatiga qoʻyiladigan davlat talablarini, qayta tayyorlash va ularning malakasini oshirish tizimini takomillashtirish jarayoni samaradorligini aniqlaydigan dinamik koʻrsatkichlarni hamda tinglovchilarning prognoz kontingentini belgilaydi;

Markazning moddiy-texnika bazasini, dinamik koʻrsatkichini va prognoz kontingentini mustahkamlash chora-tadbirlarini koʻradi.

7. Jismoniy tarbiya va sport mutaxassislarini qayta tayyorlash va ularning malakasini oshirishga Qoraqalpogʻiston Respublikasi Jismoniy tarbiya va sport davlat qoʻmitasi, viloyatlar va Toshkent shahar jismoniy tarbiya va sport boshqarmalari (keyingi oʻrinlarda hududiy boshqaruv organlari deb yuritiladi), tasarrufida oliy taʼlim muassasalari mavjud boʻlgan vazirliklar va idoralar, nodavlat tashkilotlari va jismoniy shaxslar buyurtmachi hisoblanadi.

II. Jismoniy tarbiya va sport mutaxassislarini qayta tayyorlash va ularning malakasini oshirishni tashkil etish

8. Jismoniy tarbiya va sport mutaxassislari malakasini oshirish ularning bilim va mahoratini yanada takomillashtirish uchun tashkil etiladi.

9. Jismoniy tarbiya va sport mutaxassislarini qayta tayyorlash va ularning malakasini oshirish Oʻzbekiston davlat jismoniy tarbiya instituti huzuridagi Jismoniy tarbiya va sport boʻyicha mutaxassislarni ilmiy-metodik taʼminlash, qayta tayyorlash va ularning malakasini oshirish markazida (keyingi oʻrinlarda Markaz deb ataladi) amalga oshiriladi.

10. Malaka oshirish va qayta tayyorlash jarayoni belgilangan tartibda tasdiqlangan davlat talablari, oʻquv reja va dasturlari asosida amalga oshiriladi.

11. Buyurtmachilarning navbatdagi kalendar yilda jismoniy tarbiya va sport mutaxassislari malakasini oshirish va ularni qayta tayyorlash boʻyicha buyurtmalari mutaxassislarining familiyasi, ismi va otasining ismi, qachon va qaysi taʼlim muassasasini bitirganligi, diplom boʻyicha mutaxassisligi, ish joyi va staji, lavozimi, oxirgi malaka oshirgan vaqti koʻrsatilgan holda Markazga taqdim etiladi.

12. Markaz tomonidan umumlashtirilgan buyurtmalar asosida malaka oshirish va qayta tayyorlash kurslarini tashkil etish boʻyicha yillik reja vakolatli davlat organi tomonidan belgilangan tartibda tasdiqlangandan soʻng buyurtmachilarga yetkaziladi.

13. Buyurtmachilar mazkur reja asosida jismoniy tarbiya va sport mutaxassislarining Markazga oʻqishga yetib borishlarini taʼminlaydilar.

14. Malaka oshirish yoki qayta tayyorlashga yuborilgan jismoniy tarbiya va sport mutaxassislari Markaz rahbarining buyrugʻi bilan tinglovchilar safiga qabul qilinadi. Tinglovchilar guruhini shakllantirishda, kursning oʻquv reja va dasturlarini tayyorlashda bazaviy maʼlumot, mutaxassislik, toifa va egallab turgan lavozimi, shuningdek buyurtmachining talablari hisobga olinadi.

15. Qayta tayyorlash va malaka oshirish kurslaridagi oʻquv jarayoni oliy taʼlim muassasalaridan taqdim etilgan yillik buyurtmanomalar boʻyicha guruhlarning toʻldirilishiga bogʻliq holda tinglovchilar soni, qoidaga koʻra, kamida 15 — 20 kishini tashkil etgan akademik guruhlarda tashkil etiladi.

Istisno tariqasida, tinglovchilar kontingenti yetarli boʻlmagan yoʻnalishlarda, jumladan rus tilida dars olib boriladigan guruhlarda, tinglovchilar kontingenti bir guruh meʼyorida yigʻilmaydigan kam sonli alohida taʼlim yoʻnalishlarida oʻquv jarayonini tashkillashtirishda bir guruhdagi tinglovchilar soni kamida 5 nafar etib belgilanishi mumkin.

16. Malaka oshirish va qayta tayyorlash kurslaridagi oʻquv mashgʻulotlari maʼruza, amaliy mashgʻulot, seminar, tajriba almashish darsi, trening, interfaol mashgʻulotlar va boshqa shakllarda olib boriladi.

17. Ayrim oʻquv mashgʻulotlari ilgʻor taʼlim muassasalari, sport majmualari va boshqa tashkilotlar negizida tashkil etilishi mumkin.

18. Malaka oshirish va qayta tayyorlash kurslarini tashkil etish, ularni talab darajasida oʻtkazish, taʼlim samaradorligini taʼminlash uchun sharoitlar yaratish masʼuliyati Markaz rahbari zimmasiga yuklanadi.

19. Tinglovchi quyidagi sabablarga koʻra tinglovchilar safidan chetlashtiriladi:

oʻz xohishiga binoan;

salomatligi tufayli (tibbiy komissiya maʼlumotnomasi asosida);

oʻquv intizomini va taʼlim muassasasining ichki tartib-qoidalarini muntazam ravishda yoki bir marotaba qoʻpol ravishda buzganligi uchun;

taʼlim dasturlarini oʻzlashtirmagani (nazorat turlari boʻyicha testlarni topshira olmagani) uchun;

malaka oshirish (18 soatdan ortiq) yoki qayta tayyorlash (36 soatdan ortiq) kursidagi dars mashgʻulotlarini uzrli sabablarsiz qoldirgani uchun;

shartnoma asosida oʻqitish bilan bogʻliq majburiyatlarni bajarmagani uchun (shartnoma asosida oʻqiyotgan tinglovchilar uchun);

tinglovchi sud tomonidan ozodlikdan mahrum etilganligi sababli;

vafot etganligi sababli.

20. Tinglovchilar malaka oshirish yoki qayta tayyorlash kursidan chetlatilganda unga sabablari koʻrsatilgan holda maʼlumotnoma beriladi, shuningdek bu haqda buyurtmachiga maʼlum qilinadi.

Malaka oshirish kursidan chetlatilgan yoki yakuniy nazoratdan oʻta olmagan tinglovchi bir yil mobaynida buyurtmachi tashkilot tomonidan, unga ish haqi saqlanmagan holda, taʼtil berish tartibida malaka oshirishga qayta yuboriladi.

21. Uzoq hududlardan kelgan tinglovchilar shartnoma majburiyatlariga binoan oʻqish davrida taʼlim muassasasi imkoniyatlariga koʻra vaqtincha turar joy bilan taʼminlanishi mumkin.

III. Jismoniy tarbiya va sport mutaxassislarining malakasini oshirish

22. Jismoniy tarbiya va sport mutaxassislarining malakasini oshirish har besh yilda kamida bir marta amalga oshiriladi.

23. Jismoniy tarbiya va sport mutaxassislarining malakasini oshirish shakllari quyidagilardan iborat:

toʻgʻridan toʻgʻri malaka oshirish (taʼlim dasturlari boʻyicha oʻqitish):

malaka oshirish boʻyicha ixtisoslashtirilgan taʼlim muassasasida (akademiya, institut, markaz, fakultet va kurslarda) oʻqitish;

bazaviy taʼlim muassasasida oʻqitish;

“Ustoz-shogird” metodi boʻyicha taʼlim muassasasida oʻqitish;

tajriba orttirish (ishlab chiqarishda, ilmiy-tadqiqot muassasasida, xorijda);

masofaviy malaka oshirish;

mustaqil oʻqib bilim orttirish;

bilvosita malaka orttirish (taʼlim dasturlarisiz oʻqitish):

ilmiy (ilmiy-pedagogik) Kengashning qarori boʻyicha ijodiy taʼtil;

ochiq oʻquv mashgʻulotlari;

ilmiy, ilmiy-metodik va ilmiy-amaliy seminarlar, konferensiyalar va shu kabi tashkiliy tadbirlarda maʼruzalar bilan qatnashish.

24. Markazda jismoniy tarbiya va sport mutaxassislarining malakasini oshirish kasbiy faoliyat, umumtaʼlim, umumkasbiy va maxsus fanlar boʻyicha Davlat talablariga, tegishli ixtisoslikning sport sohasi kadrlariga qoʻyiladigan malaka va mehnat bozori talablariga muvofiq tinglovchilarning kasbiy bilimlari, malaka va koʻnikmalarini chuqurlashtirishga moʻljallangan taʼlim dasturlaridan iborat boʻladi.

25. Malaka oshirish muddati 4 hafta (144 soat)dan kam boʻlmagan hajmda belgilanib, asosiy ish joyidan toʻliq ajralgan va qisman ajralgan holda, 2+2 yoki 3+1 sxemalari boʻyicha (tegishli ravishda 50 yoki 75 foiz — yashash joyi boʻyicha mustaqil ravishda bilim orttirish, 50 yoki 25 foiz — bevosita taʼlim muassasasida oʻqitish) amalga oshirilishi mumkin.

Bunda oʻquv yuklamasining eng koʻp hajmi har haftada 36 soatni (54 akademik soatni), auditoriya mashgʻulotlarining eng koʻp hajmi har haftada 24 soatni (36 akademik soatni) tashkil qiladi.

Ayrim hollarda rahbar kadrlar malakasini oshirish toʻgʻridan toʻgʻri shakllarining umumiy davom etish muddati, asosiy ishdan ajralgan holda oʻqitishda, kamida 3 hafta (144 soat), auditoriya mashgʻulotlarining va mustaqil ishlarning eng yuqori hajmi haftasiga 48 soat etib belgilanishi mumkin.

Oʻqitishning bunday shakllari axborot uzatishning zamonaviy axborot-kommunikatsiya vositalari va malaka oshirish boʻyicha maxsus kurslar mavjud boʻlgan va zarur moddiy-texnik baza bilan jihozlangan, yetarli ilmiy-metodik va intellektual salohiyatga ega boʻlgan taʼlim muassasalarida amalga oshiriladi.

26. Auditoriya mashgʻulotlarining barcha turlari uchun 80 daqiqa davom etadigan dars juftligi belgilanadi.

27. “Ustoz-shogird” metodi boʻyicha taʼlim muassasasida malaka oshirish dasturlari taʼlim muassasasining oʻzida, biriktirilgan oliy taʼlim muassasalarida yoki sport sohasidagi muassasalarda yuksak kasbiy mahoratga ega boʻlgan yuqori malakali ustozlar rahbarligida, attestatsiya-baholash sinovlari oʻtkazish yoʻli bilan sertifikatsiyalash orqali amalga oshiriladi.

Malaka oshirishning “Ustoz-shogird” shakli asosiy ishdan ajralmagan holda amalga oshiriladi. Malaka oshirish taʼlim dasturining tuzilmasi, oʻtkazilish tartibi va baholash metodlari Markaz tomonidan ishlab chiqiladi va vakolatli davlat organi tomonidan tasdiqlanadi. Mazkur shakldagi taʼlim dasturining davomiyligi tasdiqlangan taʼlim dasturidagi meʼyoriy hujjatlar bilan belgilanadi.

28. Tajriba orttirish (ishlab chiqarishda, ilmiy-tadqiqot muassasasida, xorijda) — jismoniy tarbiya va sport sohasining tegishli tarmoqlarida fan-texnika taraqqiyotining eng yangi yutuqlari, zamonaviy texnika va texnologiyalar bilan tanishtirish, amaliy bilimlar, koʻnikma va malakalarni chuqurlashtirish maqsadida yetakchi taʼlim muassasalari, ilmiy-tadqiqot muassasalari va xorijiy davlatlarda amalga oshiriladi.

Tajriba orttirishning davomiyligi ehtiyojdan kelib chiqqan holda belgilanadi hamda asosiy ishdan ajralgan va ajralmagan holda amalga oshiriladi. Tajriba orttirish rejasi taʼlim muassasasi va tajriba orttirishga yuborayotgan tashkilot bilan birgalikda tuziladi.

29. Jismoniy tarbiya va sport mutaxassislarining xorijda tajriba orttirishi Jismoniy tarbiya va sport davlat qoʻmitasi, xorijiy mamlakatlar va xalqaro sport tashkilotlari tomonidan mamlakatda jismoniy tarbiya va sport tizimini rivojlantirish va takomillashtirishga koʻmaklashish uchun ajratilgan grantlarga muvofiq amalga oshiriladi.

30. Masofaviy malaka oshirish — soha kadrlarining kasbiy ehtiyojlaridan kelib chiqqan holda ishlab chiqilgan va masofadan oʻqitishni amalga oshirishga moʻljallangan maxsus taʼlim dasturidir.

31. Jismoniy tarbiya va sport mutaxassislarining masofaviy malaka oshirish taʼlim dasturlari Markaz tomonidan ishlab chiqiladi va vakolatli davlat organi tomonidan tasdiqlanadi.

32. Masofaviy malaka oshirish kurslari axborot uzatishning zamonaviy axborot-kommunikatsiya vositalari, malaka oshirish boʻyicha maxsus virtual kurslar mavjud boʻlgan va zarur moddiy-texnik baza bilan jihozlangan, yetarli ilmiy-metodik va intellektual salohiyatga ega boʻlgan, malaka oshirish boʻyicha ixtisoslashtirilgan taʼlim muassasalarida tashkil etiladi.

33. Masofaviy malaka oshirishni joriy etishda barcha taʼlim jarayonlarining asosiy komponentlari, oʻqitishning ilgʻor usullariga asoslangan, taʼlim oluvchi hamda taʼlim beruvchi oʻrtasidagi oʻzaro munosabatlar tartibi aniqlangan boʻlishi va taʼminlanishi zarur.

34. Masofaviy malaka oshirish shakli yuqori salohiyatga ega boʻlgan, zamonaviy axborot texnologiyalari bilan ishlashning amaliy koʻnikmalarini egallagan, oʻzini oʻzi kamol toptirish jarayoniga tanqidiy va ijodiy yondashishga qodir boʻlgan soha kadrlari uchun tashkil etiladi.

35. Masofaviy malaka oshirish kurslarida elektron multimediali qoʻllanmalar, virtual kutubxonalar, videokonferensiyalar, Internet yordamida muloqot va axborot olish imkoniyatlaridan foydalaniladi. Masofaviy taʼlim oluvchilar taʼlim sifatining nazorati uch turda (boshlangʻich, oraliq, yakuniy) amalga oshiriladi.

36. Masofaviy malaka oshirish kurslari tinglovchisi Internet tarmogʻi orqali malaka oshirish va qayta tayyorlash muassasalari veb-saytlarining elektron roʻyxatidan oʻtishi uchun oʻz anketa maʼlumotlarini kiritadi. Roʻyxatdan oʻtgan tinglovchiga boshlangʻich test sinovlaridan oʻtish vazifasi topshiriladi. Boshlangʻich test sinovlarini topshirgan tinglovchiga kurs modullarini oʻzlashtirishga ruxsat beriladi.

37. Tinglovchilar masofaviy malaka oshirish kursining oʻquv jadvali boʻyicha modullarni veb-sahifada taqdim etilgan oʻquv-uslubiy materiallar asosida mustaqil ravishda oʻzlashtiradilar. Oʻquv modullarini oʻzlashtirish jarayonida reja asosida oʻtkaziladigan oraliq sinov topshiriqlari (test, referat, ishlanmalar, yozma ish va h.k.)ni biriktirib qoʻyilgan tyutorga elektron pochta orqali yuboradilar. Tinglovchilar mustaqil oʻzlashtirish jarayonida yuzaga keladigan qiyinchiliklar va muammolarni hal etish uchun tyutorga elektron pochta, telefon, chat va elektron forumlar orqali murojaat etishlari mumkin. Tyutor tomonidan baholangan topshiriqlar natijalari asosida (oʻzlashtirish koʻrsatkichi 75 foizdan yuqori boʻlgan) tinglovchilarga yakuniy nazoratni topshirishga ruxsat beriladi.

38. Tinglovchilar malaka oshirish kursini muvaffaqiyatli oʻzlashtirib boʻlgandan soʻng, malaka oshirish muassasasi tomonidan yakuniy nazorat oʻtkaziladi.

Yakuniy nazorat test savollari va ilmiy-amaliy loyiha ishi himoyasidan iborat boʻladi.

Yakuniy nazorat uchun Davlat attestatsiya komissiyasi tuziladi, tinglovchilar “yuzma-yuz” shaklida yakuniy test topshiradilar va ilmiy-amaliy loyiha ishlarini himoya qiladilar.

39. Mustaqil oʻqib bilim orttirish — taʼlim darajasi va sifatiga qoʻyilgan Davlat talablariga muvofiq oʻqitiladigan fan va kasbiy faoliyat boʻyicha yangi bilimlar, malaka va koʻnikmalarning soha kadrlari tomonidan mustaqil oʻzlashtirilishidan iborat.

Mustaqil oʻqib bilim orttirish shakli barqaror yuqori professional reytingga ega boʻlgan, zamonaviy axborot texnologiyalari bilan ishlashning amaliy koʻnikmalarini egallagan, oʻzini oʻzi kamol toptirish jarayoniga tanqidiy va ijodiy yondashishga qodir boʻlgan soha mutaxassislari uchun tavsiya etiladi.

40. Bilvosita malaka orttirish (taʼlim dasturlarisiz oʻqitish) yuqori professional reytingga, zamonaviy axborot texnologiyalari bilan ishlashning amaliy koʻnikmalariga ega, oʻzini oʻzi kamol toptirish jarayoniga tanqidiy va ijodiy yondashuvchi, mustaqil oʻqib bilim orttirish shaklida malaka oshirish salohiyatiga ega boʻlgan soha mutaxassislari taʼlim muassasasi ilmiy (pedagogik) Kengashning qarori boʻyicha ijodiy taʼtil berish orqali amalga oshiriladi. Ijodiy taʼtil muddati qonunchilik doirasida belgilanadi.

IV. Jismoniy tarbiya va sport mutaxassislarini qayta tayyorlashni tashkil etish

41. Jismoniy tarbiya va sport mutaxassislarini qayta tayyorlash faqat asosiy ishdan ajralgan holda bevosita Markaz tomonidan kunduzgi shaklda amalga oshiriladi.

42. Qayta tayyorlash dasturlarini oʻzlashtirish muddati 16 hafta (576 soat)dan kam boʻlmagan hajmda belgilanadi. Oʻquv yuklamasining eng yuqori hajmi haftasiga 36 soatni, shundan auditoriya mashgʻulotlarining eng yuqori hajmi haftasiga 24 soatni tashkil etadi.

43. Qayta tayyorlash boʻyicha Markazda oʻqitish buyurtmachining yakka tartibdagi topshirigʻi yoki aniq yoʻnaltirilgan dasturi asosida, Davlat talablariga, shuningdek taʼlimni boshqarish boʻyicha vakolatli davlat organi talablariga muvofiq ishlab chiqilgan dasturlar boʻyicha amalga oshiriladi.

44. Qayta tayyorlash boʻyicha Markazda oʻqitish 2 + 2 yoki 3 + 1 sxemalari boʻyicha (tegishli ravishda 50 yoki 75 foiz — yashash joyi boʻyicha mustaqil ravishda bilim orttirish, 50 yoki 25 foiz — bevosita taʼlim muassasasida) oʻqitish shakllarida ham tashkil etilishi mumkin.

45. Jismoniy tarbiya va sport mutaxassislarini qayta tayyorlash dasturlari xodimning bazaviy oliy taʼlim boʻyicha mutaxassisligiga kirgan umumkasbiy va maxsus fanlar hajmi qayta tayyorlanishga moʻljallangan fan yoki mutaxassislik uchun berilgan fanlar hajmining 60 foizidan ortigʻi mos kelgan taqdirda, yetishmaydigan fanlar hajmini taʼlim dasturlariga kiritish mumkin boʻlgan hollarda amalga oshiriladi.

46. Tinglovchilar oraliq nazorat topshiriqlarini muvaffaqiyatli bajarib, kursni toʻliq oʻzlashtirib boʻlgandan soʻng, Markaz tomonidan yakuniy attestatsiyadan oʻtishga ruxsat beriladi. Yakuniy attestatsiyani oʻtkazish uchun Davlat attestatsiya komissiyasi tuziladi.

Yakuniy attestatsiya test savollari va bitiruv malakaviy ish (yoki ilmiy-amaliy loyiha ishi) himoyasidan iborat boʻladi.

V. Qayta tayyorlash va malaka oshirish kurslarini tamomlaganlik toʻgʻrisida davlat namunasidagi hujjatlar

47. Qayta tayyorlash va malaka oshirish boʻyicha taʼlim dasturlari talablarini muvaffaqiyatli bajargan jismoniy tarbiya va sport mutaxassislariga tegishli ravishda davlat namunasidagi quyidagi hujjatlar beriladi:

a) mazkur Nizomga 1-ilovaga muvofiq malaka oshirish haqida sertifikat — kamida 4 hafta (144 soat) hajmida taʼlim dasturlaridan oʻtgan jismoniy tarbiya va sport mutaxassislari uchun va kamida 3 hafta (144 soat) hajmida taʼlim dasturlaridan muvaffaqiyatli oʻtgan rahbar kadrlar uchun;

b) mazkur Nizomga 2-ilovaga muvofiq qayta tayyorlash haqida diplom — jismoniy tarbiya va sport mutaxassislari uchun kamida 16 hafta (576 soat) hajmida taʼlim dasturlaridan muvaffaqiyatli oʻtgandan soʻng, yakuniy attestatsiya natijasiga koʻra beriladi.

48. Yakuniy attestatsiya natijasida oʻqitish dasturini oʻzlashtirish yuzasidan qoniqarsiz baho olgan tinglovchilarga oʻquv kursini tamomlaganlik toʻgʻrisidagi maʼlumotnoma beriladi.

Qayta tayyorlash va malaka oshirish oʻquv dasturini oʻzlashtirganlik toʻgʻrisidagi diplom va sertifikat belgilangan tartibda rasmiylashtiriladi.

VI. Jismoniy tarbiya va sport mutaxassislarini qayta tayyorlash va ularning malakasini oshirishni moliyalashtirish

49. Jismoniy tarbiya va sport mutaxassislarini qayta tayyorlash va ularning malakasini oshirish tadbirlarini moliyalashtirish qonun hujjatlarida belgilangan tartibda quyidagilar hisobiga amalga oshiriladi:

ushbu maqsadlar uchun har yili Oʻzbekiston Respublikasi Davlat budjeti parametrlarida nazarda tutiladigan mablagʻlar;

malaka oshirish tizimida taʼlim muassasalarining jismoniy tarbiya va sport mutaxassislarini oʻqitish uchun buyurtmachilarning mablagʻlari;

yuridik va jismoniy shaxslarning kadrlarni qayta tayyorlash va ularning malakasini oshirish uchun maqsadli badallari;

jismoniy tarbiya va sport mutaxassislarini qayta tayyorlash va ularning malakasini oshirish uchun jalb etiladigan grantlar hamda xorijiy kreditlar mablagʻlari;

taʼlim xizmatlarini koʻrsatish, ilmiy-pedagogik, ishlab chiqarish va boshqa faoliyat turlaridan olingan daromadlar;

yuridik va jismoniy shaxslarning homiylik xayriyalari;

qonun hujjatlarida taqiqlanmagan boshqa manbalar.

50. Jismoniy tarbiya va sport mutaxassislarining malakasini oshirish uchun Markazga ishdan ajralgan holda oʻqishga yuborilgan tinglovchilarning oʻqishi davrida asosiy ish joyi boʻyicha lavozimi saqlanib qoladi va ularga oʻrnatilgan tartibda kafolatli toʻlovlar toʻlanadi.

Ishdan ajralgan holda jismoniy tarbiya va sport mutaxassislarining malakasini oshirish uchun Markazga oʻqish uchun boshqa joylardan yuborilgan tinglovchilarga qonun hujjatlarida belgilangan tartibda oʻqishga borish va undan qaytish boʻyicha bir martalik yoʻl haqi xarajatlari ularni yuborgan tomon hisobidan qoplanadi.

51. Shartnoma asosida qayta tayyorlash kurslari uchun oʻzini oʻzi mablagʻ bilan taʼminlash tamoyillari asosida sarf-xarajatlar smetasi Markaz tomonidan tuziladi va uning rahbari tomonidan tasdiqlanadi.

Smetada kursning oʻquv dasturi va rejasida nazarda tutilgan barcha dars mashgʻulotlari uchun toʻlanadigan soatbay haq, kursning moddiy-texnika taʼminoti, kursni tashkil etish va oʻtkazishga jalb etilgan (rahbar, pedagog va texnik) xodimlarga toʻlanadigan ish haqi, ularni ragʻbatlantirish, shuningdek toʻlanadigan soliqlar uchun mablagʻlar nazarda tutiladi. Bunda qayta tayyorlash kurslarida oʻqish uchun tinglovchi tomonidan toʻlanadigan mablagʻ mazkur kurslarni oʻtkazish uchun sarflanadigan xarajatlar hajmidan kelib chiqqan holda (smetadagi jami xarajatlarni tinglovchilar soniga boʻlish orqali) hisoblab chiqiladi.

52. Jismoniy tarbiya va sport mutaxassislari malakasini oshirish va ularni attestatsiyadan oʻtkazish boʻyicha moliyaviy hisobotlar qonun hujjatlari asosida olib boriladi.

VII. Yakunlovchi qoida

53. Jismoniy tarbiya va sport mutaxassislarini qayta tayyorlash va ularning malakasini oshirish boʻyicha nizolar qonun hujjatlarida belgilangan tartibda hal etiladi.

Jismoniy tarbiya va sport mutaxassislarini qayta tayyorlash va ularning malakasini oshirish tartibi toʻgʻrisidagi Nizomga 1-ILOVA

Malaka oshirish haqida davlat namunasidagi

SERTIFIKAT

(tavsifi)

Malaka oshirish toʻgʻrisidagi sertifikat A4 formatli oq qogʻozda ofset usulida besh xil rangdan foydalangan holda: matn uchun — qora rangda, rasmlar tasviri uchun — yashil, koʻk, qizil ranglarda, fon uchun — och kul rangda bosib chiqariladi.

Varaqning chap qismida chetidan 10 mm chekingan holda eni 32 mm boʻlgan Oʻzbekiston Respublikasi Davlat bayrogʻi tasvirlangan tasma joylashtiriladi. Tasmaning yuqori qismida diametri 30 mm boʻlgan Oʻzbekiston Respublikasi Davlat gerbining tasviri, past qismida esa — 35 mm oʻlchamli ikkita kvadrat qoʻshilishidan hosil boʻlgan sakkiz qirrali yulduz, yulduzning oʻrtasida muhr uchun 25 mm diametrli oq aylana joylashgan.

Varaqning qolgan qismida yuqorida lotin yozuvi bilan davlat tilida “O`ZBEKISTON RESPUBLIKASI. Malaka oshirish haqida SERTIFIKAT” soʻzlari bosiladi. Sertifikat ikki lotin harfi — MO va olti raqamli sondan iborat tartib raqami bilan taʼminlangan. Barcha matn naqshli rastrdan iborat och kul rang fonda bosib chiqariladi.

Sertifikat:

bosib chiqarishning ikki usuli — ofset va yuqori usuli;

yorugʻlik vositasida nusxa koʻchirishni qiyinlashtirish uchun ochiq ranglar;

naqshli rastr;

har xil rangli rastrlardan foydalanish yoʻli bilan turli ranglarni tashkil etish;

maxsus qogʻozlar;

oʻzgaradigan raqamlardan iborat tartib raqami qoʻllangan holda oltita himoyaga ega.

Jismoniy tarbiya va sport mutaxassislarini qayta tayyorlash va ularning malakasini oshirish tartibi toʻgʻrisidagi Nizomga 2-ILOVA

Qayta tayyorlash haqida davlat namunasidagi

DIPLOM

(tavsifi)

Qayta tayyorlash toʻgʻrisidagi diplom A4 formatli oq qogʻozda ofset usulida besh xil rangdan foydalangan holda: matn uchun — qora rangda, rasmlar tasviri uchun — yashil, koʻk, qizil ranglarda, fon uchun — och pushti rangda bosib chiqariladi.

Varaqning chap qismida chetidan 10 mm chekingan holda eni 32 mm boʻlgan Oʻzbekiston Respublikasi Davlat bayrogʻi tasvirlangan tasma joylashtiriladi. Tasmaning yuqori qismida diametri 30 mm boʻlgan Oʻzbekiston Respublikasi Davlat gerbining tasviri, past qismida esa — 35 mm oʻlchamli ikkita kvadrat qoʻshilishidan hosil boʻlgan sakkiz qirrali yulduz, yulduzning oʻrtasida muhr uchun 25 mm diametrli oq aylana joylashgan.

Varaqning qolgan qismida yuqorida lotin yozuvi bilan davlat tilida “O`ZBEKISTON RESPUBLIKASI. Qayta tayyorlash haqida DIPLOM” soʻzlari bosiladi. Diplom ikki lotin harfi — QT va olti raqamli sondan iborat tartib raqami bilan taʼminlangan. Barcha matn naqshli rastrdan iborat och pushti rang fonda bosib chiqariladi.

Diplom:

bosib chiqarishning ikki usuli — ofset va yuqori usuli;

yorugʻlik vositasida nusxa koʻchirishni qiyinlashtirish uchun ochiq ranglar;

naqshli rastr;

har xil rangli rastrlardan foydalanish yoʻli bilan turli ranglarni tashkil etish;

maxsus qogʻozlar;

oʻzgaradigan raqamlardan iborat tartib raqami qoʻllangan holda oltita himoyaga ega.

(Oʻzbekiston Respublikasi qonun hujjatlari toʻplami, 2014-y., 51-son, 609-modda; 2017-y., 20-son, 367-modda, 22-son, 433-modda)