Koreys madaniyati va sanʼati uyini tashkil qilish toʻgʻrisida

17.06.2014

Oʻzbekiston Respublikasi Tashqi ishlar vazirligi bilan Koreya Respublikasi Tashqi ishlar vazirligi oʻrtasida

oʻzaro anglashuv Memorandumi

Oʻzbekiston Respublikasi Tashqi ishlar vazirligi va Koreya Respublikasi Tashqi ishlar vazirligi, keyingi oʻrinlarda “Tomonlar” deb ataluvchilar,

Oʻzbekiston Respublikasi Prezidenti Islom Karimovga uning Oʻzbekiston Respublikasidagi koreys diasporasining madaniy oʻzligi, tili va urf-odatlarining saqlanishi va rivojlanishi boʻyicha ulkan gʻamxoʻrligi uchun chuqur minnatdorchilik bildirib,

“Yevroosiyo tashabbusi”, xususan uning madaniyat sohasida muvaffaqiyatli amalga oshirilishini taʼkidlab,

Tomonlar davlatlari oʻrtasidagi strategik sherikchilikni yanada chuqurlashtirishni qayd etib,

ikki davlat oʻrtasidagi doʻstlik aloqalari, oʻzaro ishonch, uzoq muddatli hamkorlik va madaniy boyitishni mustahkamlash muhimligini inobatga olgan holda,

ikki davlat oʻrtasidagi hamjihatlikni mustahkamlash uchun madaniy-gumanitar almashinuvlarni yanada rivojlantirish lozimligini taʼkidlab, hamda

Oʻzbekiston Respublikasida koreys diasporasining urf-odatlarini asrash zarurligi va ularning madaniy ehtiyojlari taʼminlanishini anglagan holda,

quyidagilar toʻgʻrisida oʻzaro anglashuvga erishdilar:

1-band

Ushbu Oʻzaro Anglashuv Memorandumining (Memorandum) maqsadi Oʻzbekiston Respublikasidagi koreys diasporasi uchun Koreys madaniyati va sanʼati uyini (keyingi oʻrinlarda “Koreys madaniyati va sanʼati uyi” deb ataluvchi) tashkil qilinishi va faoliyat koʻrsatishiga koʻmaklashish hisoblanadi.

2-band

Tomonlar Koreys madaniyati va sanʼati uyi qurilishining muvaffaqiyatli amalga oshirilishi uchun zaruriy yordam koʻrsatadilar.

3-band

Oʻzbek tomoni Koreys madaniyati va sanʼati uyining qurilishi uchun yer uchastkasini bepul taqdim etadi.

4-band

Koreys tomoni Koreys madaniyati va sanʼati uyining qurilishi va jihozlanishida ishtirok etishga tayyor ekanligini bildiradi.

5-band

Tomonlar Koreys madaniyati va sanʼati uyining faoliyatida quyidagi sohalarda hamkorlik qiladilar:

a) Koreys madaniyati va sanʼati uyida Koreya Respublikasi badiiy guruhlarining chiqishlarini tashkillashtirish;

b) koreys madaniyati, tarixi va sanʼatiga bagʻishlangan mavzuli qoʻshma tadbirlarni oʻtkazish;

c) Oʻzbekiston Respublikasidagi koreys diasporasining maʼnaviyatini yuksaltirish va urf-odatlarini boyitishga yoʻnaltirilgan turli xil trening-kurslar oʻtkazish uchun Koreya Respublikasining madaniyat va sanʼat namoyandalarini taklif qilish;

d) oʻzbek va koreys vakillari ishtirokida taʼlimga oid, madaniy va gumanitar qoʻshma tadbirlarni oʻtkazish;

e) koreys milliy taomlarini tayyorlash texnologiyasi boʻyicha festival va master-klasslar uyushtirish;

f) Tomonlar birgalikda hal qilishi mumkin boʻlgan boshqa har qanday sohalar.

6-band

Koreys madaniyati va sanʼati uyini tashkil qilish bilan bogʻliq boshqa holat va shartlar Tomonlar oʻrtasida oʻzaro kelishuv asosida muhokamalar orqali hal qilinadi.

7-band

Tomonlar ushbu Memorandumga ikki tomonlama kelishuv asosida uning ajralmas qismi hisoblanuvchi alohida protokollar shaklida oʻzgartish kiritishlari mumkin.

8-band

Ushbu Memorandumni qoʻllash va amalga oshirishda yuzaga keladigan har qanday nizolar Tomonlar oʻrtasida maslahatlashuv va muzokaralar orqali hal qilinadi.

9-band

1. Ushbu Memorandum imzolangan vaqtdan boshlab kuchga kiradi.

2. Mazkur Memorandum besh yil davomida amalda boʻladi, shundan keyin Tomonlardan biri ushbu Memorandumning amal qilish muddati tugashidan uch oy oldin boshqa Tomonni uni uzaytirmaslik niyati toʻgʻrisida yozma tarzda xabardor qilmasa, u oʻz-oʻzidan keyingi besh yillik muddatlarga uzayaveradi.

3. Har bir Tomon ushbu Memorandumni uning amal qilishini tugatish niyati toʻgʻrisida kamida 3 oy oldin ikkinchi Tomonni xabardor etish orqali bekor qilishi mumkin.

Toshkent shahrida 2014-yil 17-iyunda ikki asl nusxada, har biri oʻzbek, koreys va ingliz tillarida tuzildi, bunda barcha matnlar bir xil kuchga ega. Talqin qilishda tafovutlar yuzaga kelganda, ingliz tilidagi matn ustuvor hisoblanadi.

(imzolar)