Ijtimoiy muhofazaga muhtoj va ish topishda qiynalayotgan shaxslarni ishga joylashtirish maqsadida 2014-yil uchun ish oʻrinlarini band qilib qoʻyish toʻgʻrisida (X-650/09-son)

16.09.2014

Qashqadaryo viloyati Dehqonobod tumani hokimining

Qarori

Oʻzbekiston Respublikasi “Aholini ish bilan taʼminlash toʻgʻrisida”gi Qonuni (Oʻzbekiston Respublikasi Oliy Majlisining Axborotnomasi, 1998-y., 5-6-son, 97-modda) va Oʻzbekiston Respublikasi Vazirlar Mahkamasining 2008-yil 20-avgustdagi 186-son qarori bilan tasdiqlangan “Ijtimoiy muhofazaga muhtoj va ish topishda qiynalayotgan shaxslarni ishga joylashtirish uchun ish oʻrinlarini band qilib qoʻyish tartibi toʻgʻrisida”gi nizom (Oʻzbekiston Respublikasi qonun hujjatlari toʻplami, 2008-y., 34-son, 333-modda)da belgilangan vazifalar ijrosini taʼminlash Oʻzbekiston Respublikasining 2013-yil 7-oktabrdagi OʻRQ-355-sonli “Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish, shuningdek ayrim qonun hujjatlarini oʻz kuchini yoʻqotgan deb topish toʻgʻrisida”gi Qonuni (Oʻzbekiston Respublikasi qonun hujjatlari toʻplami, 2013-y., 41-son, 543-modda) hamda viloyat adliya boshqarmasining 2014-yil 19-avgustdagi xatini inobatga olib, Oʻzbekiston Respublikasi “Mahalliy davlat hokimiyati toʻgʻrisida”gi Qonunining (Oʻzbekiston Respublikasi Oliy Kengashining Axborotnomasi, 1993-y., 9-son, 320-modda) 6-moddasiga asosan qaror qilaman:

1. Ijtimoiy muhofazaga muhtoj va ish topishda qiynaladigan shaxslarni ishga joylashtirish uchun ish oʻrinlarini band qilib qoʻyish xodimlarining roʻyxat boʻyicha oʻrtacha soni yigirma nafardan koʻpni tashkil etadigan korxona, tashkilot, muassasalar uchun xodimlarning roʻyxat boʻyicha oʻrtacha sonidan 89 kishini tashkil etadigan 7 foiz miqdorida, shu jumladan:

oʻn toʻrt yoshgacha bolalari va nogiron bolalari boʻlgan yolgʻiz ota, yolgʻiz ona va koʻp bolali ota-onalar uchun 17,9 foiz (16 kishi);

oʻrta maxsus, kasb-hunar taʼlimi muassasalarini tamomlagan yoshlarga, shuningdek oliy oʻquv yurtlarining davlat grantlari asosida taʼlim olgan bitiruvchilar uchun 35,9 foiz (32 kishi);

Oʻzbekiston Respublikasi Qurolli Kuchlaridan muddatli harbiy xizmatdan boʻshatilganlar uchun 8,9 foiz (8 kishi);

nogironlar uchun 4,4 foiz (4 kishi);

pensiya yoshiga yaqinlashib qolgan shaxslar uchun 10,2 foiz (9 kishi);

jazoni ijro etish muassasalaridan ozod qilingan yoki sud qaroriga kura tibbiy yoʻsindagi majburlov choralariga tortilgan shaxslar uchun 3,3 foiz (3 kishi);

odam savdosidan jabrlanganlar uchun 4,4 foiz (4 kishi);

boshqa toifalar uchun 15,0 foiz (13 kishi) miqdorida ish oʻrinlari zaxirasi belgilansin.

2. Ijtimoiy muhofazaga muhtoj va ish topishda qiynalayotgan shaxslarni ishga joylashtirish uchun ish oʻrinlarini korxona, muassasa, tashkilotlarda 2014-yilda band qilinishi kerak boʻlgan ish oʻrinlari sonini va ularga qoʻyiladigan talablarni belgilash maqsadida maxsus ishchi guruhi 1-ilovaga, 2014-yil uchun band qilib qoʻyish lozim boʻlgan korxona, muassasa, tashkilotlarda band qilingan ish oʻrinlari roʻyxati 2-ilovaga*, korxona, muassasa va tashkilotlar har chorakda tuman Bandlikka koʻmaklashish va aholini ijtimoiy muhofaza qilish markaziga berib boradigan axborot shakli 3-ilovaga muvofiq tasdiqlansin.

* 2-ilova berilmaydi.

3. Ish beruvchilar ushbu toifa shaxslar uchun ish oʻrinlari xodimlar tomonidan oʻzlarining mehnat majburiyatlarini toʻsiqlarsiz bajarishini taʼminlaydigan sanitariya-gigiyena normalariga va mehnat sharoitlariga muvofiq boʻlishini taʼminlasin.

4. Ushbu qarorni bajarmagan tashkilotga “Ijtimoiy muhofazaga muhtoj va ish topishda qiynalayotgan shaxslarni ishga joylashtirish uchun ish oʻrinlarini band qilib qoʻyish tartibi toʻgʻrisida”gi nizomning 15-bandiga muvofiq jarima solinadi.

5. Oʻzbekiston Respublikasi Vazirlar Mahkamasining 2008-yil 20-avgustdagi 186-sonli qarori bilan tasdiqlangan “Ijtimoiy muhofazaga muhtoj va ish topishda qiynalayotgan shaxslarni ishga joylashtirish uchun ish oʻrinlarini band qilib qoʻyish tartibi toʻgʻrisida”gi nizomga asosan ijtimoiy muhofazaga muhtoj va ish qidirishda qiynalayotgan shaxslar uchun band qilib qoʻyiladigan ish oʻrinlarini tuman hokimi tomonidan belgilangan miqdordan ortiqcha tashkil etgan korxona, tashkilot va muassasalar ushbu ish oʻrinlarini tashkil etishga sarflangan mablagʻlarining bir qismini tuman Bandlikka koʻmaklashish va aholini ijtimoiy muhofaza qilish markazi bilan tuzilgan shartnoma asosida Bandlikka koʻmaklashish va aholini ijtimoiy muhofaza qilish jamgʻarmasi mablagʻlari hisobidan qoplash huquqiga ega ekanliklari inobatga olinsin.

6. Dehqonobod tuman hokimining 2013-yil 24-oktabrdagi “Ijtimoiy muhofazaga muhtoj va ish topishda qiynalayotgan shaxslarni ishga joylashtirish uchun ish oʻrinlarini 2014-yil uchun band qilib qoʻyish toʻgʻrisida”gi X-674/10-sonli qarori oʻz kuchini yoʻqotgan deb hisoblansin.

7. Tuman Bandlikka koʻmaklashish va aholini ijtimoiy muhofaza qilish markazi direktori A. Xolovga ikki kun muddatda mazkur qarorni tegishli korxona, muassasa va tashkilotlar rahbarlari eʼtiboriga yetkazsin hamda uning bajarilishi ustidan qatʼiy nazoratni taʼminlasin.

8. Mazkur qarorning ijrosini nazorat qilish tuman hokimining oʻrinbosari K. Xoliqov zimmasiga yuklatilsin.

9. Mazkur qaror rasman eʼlon qilingan kundan eʼtiboran kuchga kiradi.

Hokim A. OMONOV

Dehqonobod t.,

2014-yil 16-sentabr,

X-650/09-son

Tuman hokimining 2014-yil 16-sentabrdagi X-650/09-sonli qaroriga 1-ILOVA

Dehqonobod tuman boʻyicha ijtimoiy muhofazaga muhtoj va ish topishda qiynalayotgan shaxslarni ishga joylashtirish maqsadida 2014-yil uchun ish oʻrinlarini band qilib qoʻyish toʻgʻrisida

MAXSUS IShChI KOMISSIYA TARKIBI

Tuman hokimining 2014-yil 16-sentabrdagi X-650/09-sonli qaroriga 2-ILOVA

Dehqonobod tumani boʻyicha Ijtimoiy muhofazaga muhtoj, ish topishda qiynalayotgan va mehnat bozorida teng sharoitlarda raqobatlashishga qodir boʻlmagan shaxslar uchun eng kam ish joylari belgilangan korxonalar

Roʻyxati

Tuman hokimining 2014-yil 16-sentabrdagi X-650/09-sonli qaroriga 3-ILOVA