Sogʻliqni saqlash sohasida hamkorlik qilish toʻgʻrisida

27.05.1996

Oʻzbekiston Respublikasi Hukumati bilan Ozarboyjon Respublikasi Hukumati oʻrtasida

Bitim

Oʻzbekiston Respublikasi Hukumati va Ozarboyjon Respublikasi Hukumati, keyingi oʻrinlarda Tomonlar deb ataladi,

har ikkala davlat xalqlari oʻrtasidagi anʼanaviy munosabatlarni hisobga olib,

Tomonlarning sogʻliqni saqlash sohasidagi oʻzaro foydali va teng huquqli hamkorlikdan manfaatdorligini eʼtiborga olib,

quyidagilar toʻgʻrisida ahdlashdilar:

1-modda

Tomonlar sogʻliqni saqlash va tibbiyot sanoati sohasidagi hamkorlikni rivojlantirish va kengaytirishga koʻmaklashadilar.

2-modda

Tomonlar quyidagi sohalarda oʻzaro foydali hamkorlikni rivojlantiradilar:

birinchi va ixtisoslashtirilgan tibbiy yordam koʻrsatish;

ona va bola salomatligini muhofaza qilish;

profilaktik tibbiyot va atrof muhit muhofazasi;

farmatsiya va tibbiyot texnikasi;

favqulodda vaziyatlarda paydo boʻladigan tibbiy-sanitariya oqibatlari oldini olish va tugatish;

operativ axborot ayirboshlash;

Tomonlar hududida oʻta xavfli yuqumli kasalliklar tarqalishiga qarshi epidemiologik nazorat oʻtkazish.

3-modda

Tomonlar bemorlarning ahvoli ogʻir boʻlgan hollarda — tekin, bemorlarni rejali usul bilan davolashda tijorat asosida tibbiy yordam koʻrsatadilar.

4-modda

Tomonlardan har biri sogʻliqni saqlash tizimini takomillashtirishda, tibbiyot organlari va muassasalari oʻrtasida toʻgʻridan toʻgʻri aloqalarni tashkil etishda, shuningdek mutaxassislar ayirboshlashda, konferensiyalar, simpoziumlar va seminarlar oʻtkazishda oʻzaro yordam koʻrsatadilar.

5-modda

Tomonlar dorivor vositalar, tibbiyot jihozlari va texnikasi ishlab chiqaruvchi qoʻshma korxonalar tashkil etilishiga, shuningdek ularning roʻyxatdan oʻtkazilishiga va oʻzaro yetkazib berilishiga koʻmaklashadilar.

6-modda

Tomonlar favqulodda vaziyatlarda shoshilinch tekin davolash-maslahat yordami koʻrsatadilar.

7-modda

Sogʻliqni saqlash sohasidagi hamkorlikning aniq shakllari va shartlari Tomonlar davlat boshqaruvining tegishli organlari oʻrtasida tuziladigan alohida bitimlar bilan tartibga solinadi.

8-modda

Tomonlar zaruriyat boʻlsa mazkur Bitimni amalga oshirish va oʻzaro hamkorlik toʻgʻrisida tavsiyalar tayyorlash uchun qoʻshma komissiya tashkil etishlari mumkin.

9-modda

Mazkur Bitim imzolangan kundan boshlab kuchga kiradi, besh yil davomida amal qiladi va, agar Tomonlardan hech biri tegishli muddat tamom boʻlguniga qadar uning amal qilishini toʻxtatish haqidagi oʻz niyati haqida kamida olti oy oldin ikkinchi Tomonni yozma ravishda xabardor qilmasa, keyingi besh yillik davrlarga oʻz-oʻzidan uzaytiriladi.

1996-yil 27-mayda Baku shahrida har biri oʻzbek, ozarboyjon va rus tillarida boʻlgan ikki nusxada tuzildi, barcha matnlar bir xil kuchga egadir.

Mazkur Bitimning qoidalarini talqin qilish maqsadida rus tilidagi matndan foydalaniladi.

(imzolar)