Fan va texnika sohasida hamkorlik toʻgʻrisida

22.05.1995

Oʻzbekiston Respublikasi Hukumati bilan Pokiston Islom Respublikasi hukumati oʻrtasida

Bitim

Oʻzbekiston Respublikasi Hukumati va Pokiston Islom Respublikasi Hukumati, quyida “Ahdlashuvchi Tomonlar” deb ataluvchilar,

1992-yil 27-iyunda Oʻzbekiston Respublikasi Hukumati va Pokiston Islom Respublikasi Hukumati oʻrtasida imzolangan madaniyat, sogʻliqni saqlash, fan, texnika, kadrlar tayyorlash, turizm, sport va ommaviy axborot sohasida hamkorlik toʻgʻrisidagi Bitimni eʼtiborga olgan holda,

bevosita ilmiy-texnik aloqalar shaklidagi hamkorlikni mustahkamlashga va tarixan tarkib topgan aloqalarni rivojlantirishga intilib,

bunday hamkorlik xalq turmush darajasini oshirish, materiallar, kishilar mehnati va atrof-muhitdan samarali foydalanish, har ikki mamlakat xalqlarining yuqori sifatli mahsulotlarga boʻlgan ehtiyojini qondirish uchun ilmiy yutuqlar va yangi texnologiyalarni qoʻllashga yordam berishini nazarda tutib,

quyidagilar haqida kelishib oldilar:

1-modda

Ahdlashuvchi Tomonlar huquqlarning tengligi, doʻstlik va oʻzaro manfaat asosida ushbu Bitimning shartlarini hamda har ikki mamlakatdagi amaldagi qonun-qoidalarni eʼtiborga olgan holda har ikki mamlakatning olimlari va mutaxassislari orttirgan tajribani va ikki mamlakat oʻrtasida mavjud imkoniyatlarni hisobga olib, oʻzaro manfaatdorlik doirasida hamkorlikni rivojlantirishga koʻmaklashadilar.

2-modda

Ahdlashuvchi Tomonlar mahalliy qonunlar va cheklanishlar doirasida mustahkam va uzoq muddatli hamkorlik natijalaridan foydalanib, mutaxassislar, axborot, ilmiy va texnik mahsulotlar namunalari bilan oʻzaro almashish borasidagi hamkorlik uchun qulay sharoitlar yaratish choralarini koʻradilar.

3-modda

Yuqorida qayd qilinganlarga muvofiq, Ahdlashuvchi Tomonlar Oʻzbekiston va Pokiston hukumat strukturalari, ilmiy va texnik ilmgohlari, dorilfununlar va tashkilotlar oʻrtasidagi mavjud shartnomalarni rivojlantiradilar va yangi shartnomalar tuzishga koʻmaklashadilar, zaruriyat tugʻilganda, ushbu Bitim doirasida protokollar yoki shartnomalar tuzadilar.

Bunday protokollar yoki shartnomalar, zaruriyat tugʻilganida moliyaviy munosabatlarda mahsulot ishlab chiqarish va tayyor mollarni sotishni, nazorat qilishga yordam beradi. Ahdlashuvchi Tomonlar ilmiy-texnik hamkorlikning quyidagi samarali shakllarini amalga oshirishni maqsadga muvofiqroq deb hisoblaydi:

a) har ikki mamlakatning yetakchi ilmiy-tadqiqot ilmgohlari yoki tashkilotlarida ikki tomonlama ilmiy-tadqiqot markazlarini tashkil qilish;

b) ilmiy-tadqiqot ilmgohlari hamda tashkilotlarda fundamental va amaliy fanlar boʻyicha tajribaviy va amaliy muhandislik sohasidagi hamkorlik boʻyicha qoʻshma tadqiqotlar olib borish, patentlar, litsenziyalar va “nou-xau”ga tegishli ilmiy-texnik axborot va raqamli maʼlumotlar, shuningdek fan va texnika mahsulotlari namunalari bilan almashish;

v) har ikki mamlakatni qiziqtiruvchi muammolar boʻyicha fan va texnologiya sohasida ikki tomonlama ilmiy-texnik seminarlar, simpoziumlar, koʻrgazmalar va maslahatlar oʻtkazish;

g) ilmiy delegatsiyalar, olimlar va mutaxassislar bilan almashish;

d) Ahdlashuvchi Tomonlarning oʻzaro kelishuvi asosida ilmiy-texnik hamkorlikning boshqa shakllarini amalga oshirish.

4-modda

Ushbu Bitim doirasida har ikki mamlakatning amaldagi qonunlariga muvofiq bevosita aloqalar oʻrnatish va qoʻshma korxonalarning faoliyatini amalga oshirishda masʼul tashkilotlarga zarur iqtisodiy qonunlar yaratish, tashkil etish, materiallar, moliyaviy resurslar va lozim axborotlar bilan koʻmaklashish orqali yordam beriladi.

5-modda

Bevosita ilmiy aloqalarni amalga oshirish bilan bogʻliq muammolarni hal qilish uchun masʼul tashkilotlarning mutaxassislarini tezda xizmat safariga yuborishni taʼminlash boʻyicha zarur choralarni koʻradilar va ularning tashriflari oʻzaro kelishib olingan umumiy va moliyaviy munosabatlar asosida tartibga solinadi.

6-modda

Ushbu Bitimning amal qilish muddati mobaynida tashkilotlar tomonidan olinadigan muhim loyihalar va boshqa ilmiy-texnik hujjatlar, ularni taqdim etgan tashkilotning ruxsatisiz boshqa jismoniy va/yoki yuridik shaxslarga berilishi mumkin emas.

7-modda

Ahdlashuvchi Tomonlar ilmiy-texnik hamkorlik boʻyicha Qoʻshma Komissiya (bundan keyin u “Qoʻshma komissiya” deb ataladi) tashkil etadilar. Bu komissiya ilmiy-texnik hamkorlikni rejalashtirish va muvofiqlashtirish hamda bu hamkorlikning rivojlanishini koʻrib chiqish maqsadida har ikki Ahdlashuvchi Tomonning vakillari va ekspertlaridan iborat boʻladi. Qoʻshma komissiya hamkorlik dasturini, bajarilishini belgilaydi, shuningdek zaruriyat tugʻilgan hollarda, hamkorlikning natijalarini sanoatda amalga oshirish uchun konkret tadbirlarni taklif etadi.

Muvofiqlashtiruvchi agentliklarni Ahdlashuvchi Tomonlar Hamkorlik dasturida tayinlaydilar. Qoʻshma Komissiya yigʻilishlari yilda bir marta yoki Tomonlardan birining iltimosiga koʻra Toshkent yoki Islomobodda oʻtkazib turiladi.

8-modda

Ushbu Bitimning maqsadlari vaqti-vaqti bilan kelishib olinadigan, hamkorlik dasturlarini bajarish vositasida amalga oshiriladi. Bu dasturlar hamkorlikning mavzusi va shakllarini, shuningdek moliyaviy muddatlari va shartlarini belgilaydi.

9-modda

Ushbu Bitim imzolangan kundan boshlab kuchga kiradi va dastlab besh yil mobaynida amal qiladi, Tomonlardan har biri boshqa Tomonga yozma ravishda ushbu Bitim muddatining tugashidan olti oy ilgari uning amal qilishini toʻxtatish haqidagi niyati toʻgʻrisida yozma tarzda bildirmasa, u navbatdagi besh yil muddatga uzaytiriladi.

Ushbu Bitimning tugatilishi amalga oshirilayotgan biron-bir loyiha yoki dasturning bitkazilishiga taʼsir qilmaydi.

10-modda

Ushbu Bitimning bajarilishi va muvofiqlashtirilishi hamda nazorat qilinishi uchun masʼuliyat Oʻzbekiston Respublikasi Fan va texnika davlat qoʻmitasi va Pokiston Islom Respublikasining Fan va texnika vazirligi zimmasiga yuklanadi.

Yuqorida koʻrsatilganlarni tasdiqlab, Hukumatlarning vakolatli namoyondalari ushbu Bitimni imzoladilar.

Ushbu Bitim Toshkent shahrida 1995-yil 22-mayda oʻzbek va ingliz tillarida har biri ikki nusxada tuzildi, bunda barcha matnlar mazmuni jihatidan bir xil va teng kuchga ega.

(imzolar)