Tumandagi yuridik va jismoniy shaxslardan qattiq maishiy chiqindilarni olib ketish bilan bogʻliq xizmatlar tarifi toʻgʻrisida (747-son)

13.09.2014

Xorazm viloyati Yangibozor tumani hokimining

Qarori

“Mahalliy davlat hokimiyati toʻgʻrisida”gi, “Chiqindilar toʻgʻrisida”gi, “Fuqarolarning oʻzini oʻzi boshqarish organlari toʻgʻrisida”gi Oʻzbekiston Respublikasi qonunlariga hamda Oʻzbekiston Respublikasi Vazirlar Mahkamasining 2013-yil 10-yanvardagi “Respublika aholi punktlarini obodonlashtirish ishlarini tashkil etishni takomillashtirish chora-tadbirlari toʻgʻrisida”gi 4-sonli, 2010-yil 28-oktabrdagi “Tovarlar (ishlar, xizmatlar)ga tartibga solinadigan narxlar (tariflar)ni deklaratsiya qilish (tasdiqlash) va belgilash tartibini yanada takomillashtirish chora-tadbirlari toʻgʻrisida”gi 239-son qarorlariga asosan, chiqindilarni fuqarolar hayoti va sogʻligʻiga, atrof-muhitga zararli taʼsirini oldini olish, chiqindilar hosil boʻlishini kamaytirish, tuman hududini ekologik hamda sanitariya holatini, tozaligini amalga oshirish maqsadida qaror qilaman:

1. Oʻzbekiston Respublikasi Vazirlar Mahkamasining 2013-yil 3-dekabrdagi “Respublika aholi punktlarida sanitariya jihatdan tozalash tizimini rivojlantirish va takomillashtirish chora-tadbirlari toʻgʻrisida”gi 315-sonli qaroriga asosan, tumanda qattiq maishiy chiqindilarni tashib olib ketish xizmatlari tuman obodonlashtirish boshqarmasi tomonidan amalga oshirilishi belgilansin.

2. Yangibozor tumanida yuridik va jismoniy shaxslardan qattiq maishiy chiqindilarni olib ketish uchun har oyga belgilangan toʻlov miqdorlari ilovaga* muvofiq tasdiqlansin.

* Ilova berilmaydi.

3. Tuman obodonlashtirish boshqarmasi (I. Alimov), tuman aholisi, korxona va tashkilotlar bilan chiqindilarni olib ketish yuzasidan shartnomalarini tuzish hamda shartnoma asosida maishiy chiqindilarni oʻz vaqtida olib ketish va ularni belgilangan tartibda joylashtirib borsin.

4. Tumandagi qishloq, shaharcha va mahalla fuqarolar yigʻinlari raislariga:

hududlarda maishiy chiqindilarni samarali va oʻz vaqtida olib chiqib ketishni tashkil etish hamda hududlar doirasida obodonlashtirishga, koʻkalamzorlashtirishga va sanitariya holatini yaxshilashga qaratilgan tadbirlar rejalarini tasdiqlash;

tuman obodonlashtirish boshqarmasiga aholidan chiqadigan maishiy chiqindilarni olib chiqib ketishni oʻz vaqtida tashkil etish va xizmatlar uchun toʻlov hamda qarzdorliklarni oʻz vaqtida undirilishiga obodonlashtirish boshqarmasiga amaliy yordam berib borish tavsiya etilsin.

5. Mazkur qaror “Yangibozor koʻzgusi” gazetasida eʼlon qilinsin.

6. Ushbu qarorning bajarilishini nazorat qilishni oʻz zimmada qoldiraman.

Hokim O. MADRAXIMOV

Yangibozor t.,

2014-yil 13-sentabr,

747-son