Toshkent davlat stomatologiya instituti faoliyatini tashkil etish va uning moddiy-texnika bazasini shakllantirish, shuningdek tibbiyot oliy taʼlim muassasalari stomatologiya fakultetlarining klinik bazalarini belgilash chora-tadbirlari toʻgʻrisida (287-son)

14.10.2014

Oʻzbekiston Respublikasi Vazirlar Mahkamasining

Qarori

Oʻzbekiston Respublikasi Prezidentining “Toshkent davlat stomatologiya institutini tashkil etish toʻgʻrisida” 2014-yil 22-iyuldagi PQ-2215-son qarorini ijro etish yuzasidan, shuningdek stomatologiya sohasida yuqori malakali tibbiyot kadrlari tayyorlash tizimini yanada takomillashtirish, Toshkent davlat stomatologiya instituti va uning filiallarining moddiy-texnika bazasini tashkil etish maqsadida Vazirlar Mahkamasi qaror qiladi:

1. Toshkent davlat stomatologiya instituti va uning filiallarining faoliyatini tashkil etish va moddiy-texnika bazasini, kadrlar va ilmiy-texnik salohiyatini mustahkamlash boʻyicha qoʻshimcha chora-tadbirlar rejasi 1-ilovaga* muvofiq tasdiqlansin.

* 1-ilova rus tilidagi matnda berilgan.

2. Oʻzbekiston Respublikasi Sogʻliqni saqlash vazirligining viloyat va shahar stomatologiya poliklinikalarini 2-ilovaga muvofiq Andijon, Buxoro va Samarqand tibbiyot institutlari hamda Toshkent pediatriya tibbiyot instituti Nukus filiali stomatologiya fakultetlarining klinik bazalari sifatida belgilash toʻgʻrisidagi taklifiga rozilik berilsin.

3. Belgilansinki, Toshkent davlat stomatologiya institutining klinikasi Toshkent tibbiyot akademiyasi 3-klinikasining ixtisosli boʻlinmalari, talabalar poliklinikasi va stomatologiya poliklinikalari negizida tashkil etiladi.

4. Quyidagilar:

Toshkent davlat stomatologiya instituti faoliyatini moliyalashtirish manbalari etib — Oʻzbekiston Respublikasi Davlat budjetidan ajratiladigan mablagʻlar, pulli-kontrakt asosida oʻqitishdan tushadigan mablagʻlar va qonun hujjatlarida taqiqlanmagan boshqa manbalar;

Toshkent davlat stomatologiya instituti huzuridagi Stomatologiya va yuz-jagʻ jarrohligi ilmiy-amaliy markazi faoliyatini moliyalashtirish manbalari etib — Oʻzbekiston Respublikasi Davlat budjetidan ajratiladigan mablagʻlar, shu jumladan ilmiy-texnik loyihalarni amalga oshirish uchun grantlar boʻyicha ajratiladigan mablagʻlar, xalqaro moliya institutlari, xorijiy hukumat va donor tashkilotlarning grantlari, shuningdek qonun hujjatlarida taqiqlanmagan boshqa manbalar;

Toshkent davlat stomatologiya instituti klinikasi faoliyatini moliyalashtirish manbalari etib — Oʻzbekiston Respublikasi Davlat budjetidan ajratiladigan mablagʻlar, pulli tibbiy xizmatlar koʻrsatishdan tushadigan budjetdan tashqari mablagʻlar va qonun hujjatlarida taqiqlanmagan boshqa manbalar belgilansin.

5. Oʻzbekiston Respublikasining Xususiylashtirish, monopoliyadan chiqarish va raqobatni rivojlantirish davlat qoʻmitasi Qoraqalpogʻiston Respublikasi Vazirlar Kengashi, Andijon, Buxoro va Samarqand viloyatlari hokimliklari bilan birgalikda ikki hafta muddatda Toshkent davlat stomatologiya instituti filiallari va talabalar yashash joylari uchun foydalanilmayotgan yoki boshqa maqsadlarda foydalanilayotgan binolarni aniqlasin va ajratsin.

6. Toshkent davlat stomatologiya instituti obyektlarini qurish va rekonstruksiya qilish boʻyicha:

buyurtmachi etib — Oʻzbekiston Respublikasi Sogʻliqni saqlash vazirligining Birlashgan qurilish direksiyasi;

bosh loyihalash tashkiloti etib — “OʻzshaharsozlikLITI” DUK;

bosh pudratchi tashkilot etib — tanlov savdolari asosidagi tashkilot belgilansin.

7. Oʻzbekiston Respublikasi Sogʻliqni saqlash vazirligi loyihalash tashkiloti bilan birgalikda 2014-yil 1-dekabrgacha boʻlgan muddatda Toshkent davlat stomatologiya instituti yangi binolari majmuini qurish boʻyicha loyiha-smeta hujjatlari ishlab chiqilishini taʼminlasin.

8. Oʻzbekiston Respublikasi Davlat arxitektura va qurilish qoʻmitasi loyiha-smeta hujjatlari ekspertizadan oʻtkazilishini va qurilish-montaj ishlarini bajarish sifati ustidan davlat arxitektura-qurilish nazorati oʻrnatilishini belgilangan tartibda taʼminlasin.

9. Oʻzbekiston Respublikasi Iqtisodiyot vazirligi va Moliya vazirligi Sogʻliqni saqlash vazirligining asoslangan hisob-kitoblari boʻyicha:

Oʻzbekiston Respublikasi Vazirlar Mahkamasi huzuridagi Xalqaro moliyaviy institutlar, tashkilotlar va donor mamlakatlar bilan hamkorlik qilish, yirik va strategik muhim investitsiya loyihalarini amalga oshirish masalalari boʻyicha idoralararo kengashning koʻrib chiqishi uchun Oʻzbekiston Respublikasi Moliya vazirligi huzuridagi Oliy taʼlim muassasalarining moddiy-texnika bazasini rivojlantirish jamgʻarmasining mablagʻlari hisobiga Toshkent davlat stomatologiya institutining yangi binolari majmuini qurish boʻyicha loyiha-smeta hujjatlarini ishlab chiqishga joriy yilda mablagʻ ajratish toʻgʻrisida taklif kiritsinlar;

Oʻzbekiston Respublikasi Moliya vazirligi huzuridagi Taʼlim va tibbiyot muassasalarini moddiy-texnika bazasini rivojlantirish jamgʻarmasining 2015-yilga va keyingi yillarga parametrlarini shakllantirishda Toshkent davlat stomatologiya institutining oʻquv binolarini va talabalar yashash joylarini qurish, rekonstruksiya qilish, mukammal taʼmirlash va jihozlash uchun zarur mablagʻlar kiritilishini nazarda tutsinlar.

10. Oʻzbekiston Respublikasi Iqtisodiyot vazirligi, “Oʻzqurilishmateriallari” AK, “Oʻzmetkombinat” OAJ buyurtmachi va loyiha tashkilotining asoslangan hisob-kitoblari boʻyicha toʻgʻridan-toʻgʻri shartnomalar asosida, tartibga solinadigan narxlar boʻyicha Toshkent davlat stomatologiya instituti obyektlarini qurish va rekonstruksiya qilish uchun sement va metall prokati ajratilishini taʼminlasinlar.

11. Oʻzbekiston Respublikasi Sogʻliqni saqlash vazirligi 2014-yil 1-dekabrgacha boʻlgan muddatda:

stomatologik kasalliklar diagnostikasi, profilaktikasi va ularni davolash boʻyicha ilgʻor xorijiy tajribani joriy etishni hisobga olgan holda stomatologiya sohasidagi amaldagi standartlar va klinik protokollarni tanqidiy tahlil qilsin va qayta koʻrib chiqsin;

manfaatdor vazirliklar va idoralar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda stomatologik asbob-uskunalar va jihozlar, yordamchi materiallar, butlovchi buyumlar ishlab chiqarishni keyinchalik respublikada mahalliylashtirgan holda tashkil etish boʻyicha Oʻzbekiston Respublikasi Vazirlar Mahkamasiga taklif kiritsin.

12. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov va Bosh vazirning oʻrinbosari A.I. Ikramov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2014-yil 14-oktabr,

287-son

Oʻzbekiston Respublikasi Vazirlar Mahkamasining 2014-yil 14-oktabrdagi 287-sonli qaroriga 2-ILOVA

Andijon, Buxoro, Samarqand tibbiyot institutlari va Toshkent pediatriya tibbiyot instituti Nukus filiali stomatologiya fakultetlariga klinik bazalar sifatida belgilanayotgan stomatologik poliklinikalar

ROʻYXATI

/r Fakultet nomi Fakultetlarga klinik bazalar sifatida belgilanayotgan stomatologiya poliklinikalari nomi Poliklinikalar manzili 1. Toshkent pediatriya tibbiyot instituti Nukus filiali stomatologiya fakulteti Respublika bolalar stomatologiya poliklinikasi Nukus shahri, Shamuratov koʻchasi, 88-uy Respublika stomatologiya poliklinikasi Nukus shahri, K. Ayimbetov koʻchasi, 33-uy 2. Andijon tibbiyot instituti stomatologiya fakulteti Viloyat stomatologiya poliklinikasi Andijon shahri, Bobur shoh koʻchasi, 87-uy Shahar bolalar stomatologiya poliklinikasi Andijon shahri, Baynalminal koʻchasi, 1-uy 3. Buxoro tibbiyot instituti stomatologiya fakulteti Buxoro tibbiyot instituti huzuridagi stomatologiya ilmiy-amaliy oʻquv markazi Buxoro shahri, Koʻksaroy koʻchasi, 7-uy 2-son viloyat stomatologiya poliklinikasi Buxoro shahri, Piridastgir koʻchasi, 18-uy Shahar bolalar stomatologiya poliklinikasi Buxoro shahri, Mustaqillik koʻchasi, 17/1-uy 4. Samarqand tibbiyot instituti stomatologiya fakulteti Viloyat stomatologiya poliklinikasi Samarqand shahri, Ozod Sharq koʻchasi, 10-uy Shahar bolalar stomatologiya poliklinikasi Samarqand shahri, Nodirabegim koʻchasi, 5/4-uy