Oliy taʼlim sohasida hamkorlik qilish toʻgʻrisida

27.07.1995

Oʻzbekiston Respublikasi Hukumati bilan Rossiya Federatsiyasi Hukumati oʻrtasida

Bitim

Oʻzbekiston Respublikasi Hukumati va Rossiya Federatsiyasi Hukumati, keyingi oʻrinlarda “Tomonlar” deb ataladi,

Oʻzbekiston Respublikasi Hukumati bilan Rossiya Federatsiyasi Hukumati oʻrtasida 1993-yil 19-martda tuzilgan madaniyat,fan va texnika, taʼlim, sogʻliqni saqlash, axborot, sport va turizm sohasida hamkorlik qilish toʻgʻrisidagi Bitimga, 1993-yil 13-martda Moskva shahrida imzolangan ilmiy va ilmiy-pedagogik kadrlarni tayyorlash sohasida hamkorlik qilish hamda ularning malakalari haqidagi hujjatlarni Mustaqil Davlatlar Hamdoʻstligi doirasida tenglashtirish toʻgʻrisidagi Bitimga amal qilib,

oliy taʼlim sohasida teng huquqli hamkorlikni rivojlantirishdagi oʻzaro manfaatdorlikni hisobga olib,

insonparvarlik va muloqot madaniyati asosida taʼlimning milliy tizimlari mazmunini yangilashga intilib,

oʻzaro munosabatlarda Inson huquqlari umumjahon deklaratsiyasida qayd etilgan umuminsoniy qadriyatlar ustuvorligidan kelib chiqib,

quyidagilar haqida kelishib oldilar:

1-modda

Tomonlar oʻzaro kelishuvga binoan belgilab olingan yoʻnalishlar boʻyicha oliy taʼlim sohasidagi hamkorlikni sherikchilik tamoyillarida rivojlantiradilar. Ular bu hamkorlik uzoq muddatli va konstruktiv xarakter kasb etish uchun kuch-gʻayrat sarflaydilar.

2-modda

Tomonlar quyidagi yoʻnalishlarni hamkorlikning ustuvor yoʻnalishlari deb biladilar:

universitetlar, institutlar va oʻrta oʻquv yurtlari oʻrtasida bevosita aloqalarni rivojlantirish;

ijtimoiy, tabiiy-ilmiy va texnik taʼlimni rivojlantirishga yordam beradigan oʻquv va ilmiy dasturlar hamda loyihalarni birgalikda tayyorlashni tashkil etish;

yosh olimlar va professor-oʻqituvchi kadrlar almashish yoʻli bilan ilmiy salohiyatni kengaytirish;

taʼlim tizimida litsenziyalash va akkreditatsiyalashning qiyosiy tahlilini amalga oshirish;

axborot tarmoqlari va matbuot banklarini vujudga keltirish, mavjud materiallarni almashish va distansion taʼlim boʻyicha yangi texnologiyalar ishlab chiqish;

sherik-mamlakat tilini va madaniyatini oʻrganish.

3-modda

Tomonlar mavjud va kelgusida tuziladigan hamda xalqaro hujjatlarning bir qismi boʻlib qoladigan qoʻshma dastur va loyihalar ishlab chiqishga koʻmaklashadilar, ularni amalga oshirishda ikkala mamlakat olimlari va mutaxassislari faol jalb etishiga yordam beradilar.

Ular xalqaro dasturlar va loyihalar doirasida oliy taʼlim mazmunini takomillashtirish, fundamental taʼlimni rivojlantirish, oʻquv fanlari va oʻquv-metodik materiallarning yangi kurslarini vujudga keltirishni koʻzda tutuvchi ishlarning bajarilishiga koʻmaklashishni niyat qiladilar.

4-modda

Tomonlar til va adabiyotlar sohasida bilimning boshqa sohalarida Tomonlarning talabnomalari boʻyicha mutaxassislar almashadilar.

5-modda

Tomonlar oʻz davlatining fuqarolarini boshqa davlatning davlat taʼlimi muassasalariga yuborilishiga koʻmaklashadilar.

Ular oʻzaro maqbullik prinsipi asosida Rossiya Federatsiyasi va Oʻzbekiston Respublikasi fuqarolarini kelishib olingan mutaxassisliklar boʻyicha Rossiya Federatsiyasining Oliy taʼlim Davlat qoʻmitasi va Oʻzbekiston Respublikasining Oliy va oʻrta maxsus taʼlim vazirligiga qarashli oliy oʻquv yurtlarida oʻqishga qabul qilish uchun ekvivalent kvotalarini belgilaydilar.

Oʻqitishga nomzodlarning tayyorgarlik darajasi Tomonlardan har birining qabul qiluvchi oliy oʻquv yurtlari talablariga mos boʻlishi kerak.

6-modda

Ushbu Bitimning 5-moddasiga asosan oʻqitishga tanlab olingan nomzodlar oliy oʻquv yurtlariga qabul qilayotgan Tomonning oliy oʻquv yurtlarida qabul qilish qoidalariga muvofiq kiradilar.

7-modda

Tomonlar belgilangan muddatlarda ushbu bitimning 5-moddasiga muvofiq navbatdagi oʻquv yilida oʻqishga kirishni xohlagan nomzodlar roʻyxatlarini, ularning boʻlajak ixtisosi va tanlagan oliy oʻquv yurtini koʻrsatgan holda, oʻzaro almashib turadilar.

Tomonlar oʻqishga kirishni xohlagan nomzodlarni qabul qilish imkoniyatlari haqida har yili 15-iyunga qadar bir-birlarini xabardor qiladilar.

8-modda

Joʻnatayotgan Tomon oʻqitishga kelishilgan har bir nomzodning:

tugʻilganlik toʻgʻrisidagi guvohnomasining notarius tomonidan tasdiqlangan nusxasini;

oʻrta maʼlumot toʻgʻrisidagi guvohnomasining (aspirantlar uchun oliy maʼlumot haqidagi diplom va unga ilovaning) notarius tomonidan tasdiqlangan nusxasini;

qabul qilayotgan Tomon oliy oʻquv yurtida oʻqishga noloyiq salbiy koʻrsatgichlari boʻlmagan va OITS yuzasidan tekshiruv natijalari albatta qayd etilgan tibbiy maʼlumotnomani;

4 x 6 sm hajmdagi oltita fotosuratni;

nomzodning maʼlumot olganini tasdiqlovchi boshqa hujjatlarni taqdim etadi.

9-modda

Ushbu Bitimning 5-moddasida koʻrsatilgan kvotalardan tashqari Tomonlar sherik mamlakat fuqarolarini, ularni oʻqitish uchun xarajatlarni toʻliq qoplash sharti bilan, qabul qilishlari mumkin.

Bunday oʻqitishning moliyaviy va boshqa shartlari Tomonlar alohida tuzgan bitimlar bilan belgilanadi.

10-modda

Tomonlar oʻz oliy oʻquv yurtlariga sherik mamlakat fuqarolarini oʻqishga shartnoma asosida yakka tartibda qabul qilishga koʻmaklashadilar.

11-modda

Joʻnatayotgan tomon 9-moddaga muvofiq oʻqitish sarf-xarajatlarini toʻliq qoplash sharti bilan qabul qilingan oʻz fuqarolarini oʻqitilganlik uchun har yili qabul qilayotgan oliy oʻquv yurtining bankdagi hisob-kitob schyotiga oʻqitish pulining umumiy summasini oʻtkazishni taʼminlaydi.

Keyinchalik Rossiya oliy oʻquv yurtlarida taʼlim olish qiymati rubl kursining oʻzgarishiga qarab indeksatsiya qilinishi kerak.

12-modda

Sherik mamlakat fuqarolarini oʻqishga qabul qilgan ikkala Tomon oliy oʻquv yurtlari quyidagi hollarda ularni muddatidan oldin oʻqishdan chiqarib yuborish huquqini oʻzlarida saqlab qoladilar:

oʻqishni oʻzlashtirolmaganda;

sogʻliqni saqlash organlarining oʻqishni davom ettirishi mumkin emasligi haqidagi rasmiy xulosasi boʻlganda sogʻligʻiga koʻra;

oliy oʻquv yurtlarida oʻzini tutish qoidalarini va hududida oʻzlari oʻqiyotgan davlat qonunlarini qoʻpol ravishda buzganda.

Talaba (aspirant) muddatidan oldin oʻqishdan chiqarib yuborilganda u foydalanmagan vaqt uchun qolgan mablagʻ oʻqitayotgan oliy oʻquv yurti tomonidan joʻnatgan Tomon bilan oʻzaro hisob-kitob qilish uchun oʻz mamlakatining oliy oʻquv yurtlari masalalari bilan shugʻullanadigan davlat organiga qaytariladi.

13-modda

Ushbu Bitimning 5-moddasi doirasida oʻqishga qabul qilingan sherik mamlakat fuqarolariga qabul qiluvchi Tomon oʻz davlati fuqarolari uchun teng miqdorda stipendiya toʻlashni, oʻz davlati fuqarolari uchun belgilangan shartlarda yotoqxona, oʻquv auditoriyalari, kutubxonalar, laboratoriyalar va oliy oʻquv yurtining sport-sogʻlomlashtirish komplekslaridan foydalanish huquqini berishni kafolatlaydi.

14-modda

Ushbu Bitim doirasida oʻqishga qabul qilingan sherik mamlakat fuqarolari oʻqitayotgan mamlakat fuqarolari uchun yaratilgan shart-sharoitlarda tibbiy yordam va xizmat koʻrsatish bilan taʼminlanadilar.

15-modda

Joʻnatayotgan Tomon oʻz davlati fuqarolariga oʻqish joyiga borish va u yerdan qaytish, jumladan, taʼtilga kelib-ketish va ushbu Bitimning 12-moddasida koʻrsatib oʻtilgan muddatidan oldin oʻqishdan chiqarib yuborilganligi sababli kelishi, shuningdek uchinchi mamlakatga borishi uchun yoʻl xarajatlarini toʻlaydi.

Oʻqish jarayoni bilan bogʻliq safarlar yoʻl xarajatini qabul qiluvchi Tomon toʻlaydi.

16-modda

Tomonlar taʼlim toʻgʻrisida, ilmiy daraja va unvonlar toʻgʻrisidagi hujjatlarni ekvivalentlash haqida protokol tayyorlash va imzolash boʻyicha ish olib boradilar.

17-modda

Tomonlar qoʻshma ikki tomonlama va xalqaro tematik konferensiyalar, kengashlar, seminarlar va koʻrgazmalar oʻtkazishni, oliy taʼlim muammolari boʻyicha ilmiy-metodik, axborot va maʼlumotnoma materiallarini oʻzaro almashib turishni ragʻbatlantiradilar.

18-modda

Ushbu Bitimni bajarish va talqin qilish bilan bogʻliq barcha masalalar maslahatlashuv va muzokaralar yoʻli bilan hal etiladi.

19-modda

Ushbu Bitim imzolangan kundan boshlab kuchga kiradi.

20-modda

Ushbu Bitim besh yillik muddatga tuzilgan va Tomonlardan biri Bitim kuchini yoʻqotishdan olti oy oldin ikkinchi Tomonga ushbu Bitimdan chiqish haqida xabar bermasa, uning kuchi keyingi besh yillik davrga ham oʻz-oʻzidan uzayaveradi.

1995-yil 27-iyulda Toshkent shahrida ikki nusxada, oʻzbek va rus tillarida tuzildi, ikkala matn ham bir xil kuchga egadir.

(imzolar)