Sanoat mulkini muhofaza qilish sohasidagi hamkorlik toʻgʻrisida

27.07.1995

Oʻzbekiston Respublikasi Hukumati bilan Rossiya Federatsiyasi Hukumati oʻrtasida

Bitim

Oʻzbekiston Respublikasi Hukumati va Rossiya Federatsiyasi Hukumati, bundan buyon “Tomonlar” deb ataluvchilar,

ikkala davlat oʻrtasidagi tarixan tarkib topgan munosabatlarni eʼtiborga olib,

savdo-iqtisodiy va ilmiy-texnikaviy hamkorlikni rivojlantirish istagida,

sanoat mulkini samarali va monand muhofaza qilish bunday hamkorlikni rivojlantirishning zaruriy sharti ekanligini eʼtirof etib,

sanoat mulki mualliflari va egalarining huquqlarini muhofaza qilish uchun oʻzaro qulay shart-sharoit yaratish zarurligini anglagan holda,

quyidagilar haqida kelishib oldilar:

1-modda

Tomonlar ixtirolar, sanoat namunalari, mahsulot belgilari va boshqa sanoat mulki obyektlariga boʻlgan huquqlarni muhofaza qilish hamda ulardan foydalanish sohasidagi hamkorlikni ushbu Bitimga va boshqa oʻzlari ishtirokchi boʻlgan yoki boʻladigan xalqaro shartnomalarga muvofiq oʻzaro manfaatdorlik hamda tenglik asosida amalga oshiradilar va rivojlantiradilar.

2-modda

Tomonlarning hamkorligi:

sanoat mulki obyektlariga boʻlgan huquqlarni muhofaza qilish va ulardan foydalanish bilan bogʻliq masalalarni tartibga solishga;

sanoat mulkini muhofaza qilish sohasidagi milliy huquqiy hujjatlarni muvofiqlashtirishga;

Oʻzbekiston Respublikasi talabnoma beruvchilari uchun Rossiya Federatsiyasida va Rossiya Federatsiyasi talabnoma beruvchilari uchun Oʻzbekiston Respublikasida muhofaza hujjatlari berish soʻralgan talabnomalarni topshirish va ularni koʻrib chiqish tartibini oʻzaro soddalashtirishga;

sanoat mulkini muhofaza qilish sohasida axborot, normativ va boshqa hujjatlar, shuningdek tajriba va mutaxassislar almashinuviga yoʻnaltiriladi.

3-modda

Sanoat mulkini muhofaza qilish sohasida bir davlatning jismoniy va yuridik shaxslari ikkinchi davlat hududida shu ikkinchi davlatning huquqiy hujjatlari bilan uning oʻz jismoniy va yuridik shaxslari uchun hozirgi vaqtda berilgan yoki keyinchalik beriladigan huquq va imtiyozlardan, shuningdek oʻz jismoniy va yuridik shaxslari bilan bir xil asoslar hamda hajmlarda huquqiy muhofaza vositalaridan foydalanadilar.

Bunda ushbu Bitim bilan tartibga solinmagan masalalar boʻyicha Tomonlar 1967-yil 14-iyulda qayta koʻrib chiqilgan Sanoat mulkini muhofaza qilish toʻgʻrisidagi Parij Konvensiyasi qoidalarini qoʻllaydilar.

4-modda

Tomonlarning har bir sanoat mulki obyektlari uchun ilgari berilgan muhofaza hujjatlarining amal qilishi har bir davlat hududida muhofaza qilinayotgan obyektning ushbu obyekt uchun talabnoma berilgan vaqtda amal qilayotgan qonun hujjatlarida nazarda tutilgan muhofazaga layoqatlilik shartlariga nomuvofiqligi vajidan toʻxtatilishi mumkin boʻlgan qoidalarni davlatlardan har birining tegishli huquqiy hujjatlariga kiritish maqsadida zarur choralarni koʻradi.

5-modda

Oʻzbekiston Respublikasi yoki Rossiya Federatsiyasining har qanday jismoniy yoki yuridik shaxsi litsenziya shartnomasi tuzmasdan ixtiro yoki sanoat namunasidan foydalanish huquqini, basharti ushbu ixtiro yoki sanoat namunasidan foydalanish boshqa shaxslar tomonidan avval SSSR mualliflik guvohnomasi yoki SSSR guvohnomasi berish uchun talabnoma ilgari berilgan ixtiro yoki sanoat namunasiga milliy patent berish soʻralgan iltimosnoma topshirilgan sanadan oldin qonuniy ravishda boshlangan boʻlsa, saqlab qoladi.

Bunda mukofot pulini toʻlash koʻrsatilgan ixtiro yoki sanoat namunasi qaysi davlat hududida foydalanilayotgan boʻlsa, oʻsha davlatning huquqiy hujjatlarida belgilangan tartibda amalga oshiriladi.

6-modda

Rossiya Federatsiyasining Patentlar va mahsulot belgilari komiteti Oʻzbekiston Respublikasi Davlat Patent idorasining buyurtmasiga koʻra, olinadigan materiallar, talabnomalarning maxfiyligini taʼminlagan holda, Oʻzbekiston Respublikasining patentlarini berish soʻralgan talabnomalar boʻyicha texnika darajasini aniqlash uchun axborot qidiruvini oʻtkazadi yoxud ekspertiza oʻtkazadi va ushbu talabnomalar boʻyicha patentlar berish mumkinligi haqida xulosalar tayyorlaydi.

Koʻrsatib oʻtilgan ishlar shartnoma asosida tegishli xarajatlarni Oʻzbekiston Respublikasi Davlat Patent idorasi tomonidan mablagʻ bilan taʼminlash asosida amalga oshiriladi.

7-modda

Tomonlar iqtisodiy, sanoat, fan va texnika sohasidagi hamkorlik toʻgʻrisidagi ikki tomonlama bitimlarga sanoat mulki obyektlarining muhofaza qilinishini taʼminlashga doir qoidalarni kiritish majburiyatini zimmalariga oladilar.

8-modda

Muhofaza hujjatlarini berish soʻralgan talabnomalarni topshirish, muhofaza hujjatlarini qabul qilib olish va ularni oʻz kuchida saqlab turishda ikkala davlatning patent vakillari oʻzaro hamjihatlilik prinsipi asosida bevosita shu davlatlarning patent idoralari bilan ish olib borishlari mumkin boʻlib, bunda faqat milliy talabnoma beruvchilarning manfaatlarini ifodalaydilar.

Bir davlatning milliy talabnoma beruvchilariga, shuningdek uning huquqiy hujjatlari bilan belgilangan tartibda oʻzaro hamjihatlilik prinsipi asosida muhofaza hujjatlarini olish va ularni oʻz kuchida saqlab turish borasida bevosita boshqa davlatning patent idorasi bilan ish olib borish huquqi beriladi.

9-modda

Talabnomalar topshirganlik, muhofaza hujjatlari berganlik, ularni oʻz kuchida saqlab turganlik va sanoat mulkini muhofaza qilish bilan bogʻliq boshqa yuridik jihatdan ahamiyatli amallarni bajarganlik uchun bojlarni toʻlash, shuningdek, qidiruv oʻtkazganlik va boshqa xizmatlar koʻrsatganlik uchun toʻlovlar qilish milliy talabnoma beruvchilar bojlarni toʻlashi va toʻlovlar qilishi uchun Oʻzbekiston Respublikasi va Rossiya Federatsiyasining huquqiy hujjatlarida nazarda tutilgan valyutada hamda miqdorlarda Oʻzbekiston Respublikasi va Rossiya Federatsiyasining vakolatli organlari tomonidan kelishilgan kurs boʻyicha amalga oshiriladi.

10-modda

Tomonlarning ushbu Bitimni amalga oshirish davomida bir-birlariga yoʻllaydigan barcha hujjatlari rus tilida taqdim etiladi.

11-modda

Kuyidagi patent idoralari ushbu Bitimni amalga oshirish uchun vakolatli organlar hisoblanadi:

Oʻzbekiston Respublikasida — Oʻzbekiston Respublikasining Davlat Patent idorasi,

Rossiya Federatsiyasida — Rossiya Federatsiyasining Patentlar va mahsulot belgilari komiteti.

Vakolatli organlarning hamkorlik qilish tartibi va shartlari ular oʻrtasidagi maxsus bitimlar bilan aniqlanadi.

12-modda

Ushbu Bitimdan kelib chiqadigan yoki uning bajarilishi bilan bogʻliq masalalar yuzasidan kelishmovchiliklar paydo boʻlgan taqdirda Tomonlarning vakillari tegishlicha maslahatlashuvlar oʻtkazadilar va ushbu kelishmovchiliklarni bartaraf etishga erishish uchun kuch-gʻayrat sarflaydilar.

13-modda

Ushbu Bitim Tomonlarning boshqa davlatlar bilan sanoat mulkini muhofaza qilish sohasida ikki tomonlama va koʻp tomonlama hamkorlikda ishtirok etishiga toʻsqinlik qilmaydi.

14-modda

Ushbu Bitim imzolangan kundan boshlab kuchga kiradi va besh yil mobaynida amal qiladi hamda, basharti Tomonlardan biri uning navbatdagi amal qilish davri tugashiga kamida olti oy qolganida Bitimning amal qilishini toʻxtatish niyati toʻgʻrisida ikkinchi Tomonni yozma ravishda xabardor qilmasa, yana keyingi besh yillik davrlariga avtomatik ravishda uzaytirilaveradi.

Ushbu Bitim amal qilishining toʻxtatilishi ikkala davlat jismoniy va yuridik shaxslariga berilgan yoki berilishi mumkin boʻlgan muhofaza hujjatlarining amal qilishiga taʼsir etmaydi.

1995-yil 27-iyulda Toshkent shahrida ikki asl nusxada, har biri oʻzbek va rus tillarida tuzildi, ikkala matn ham bir xil kuchga ega.

(imzolar)