Xorijiy investitsiyalar ishtirokidagi korxonalarga paxta tolasini sotish mexanizmi toʻgʻrisida (447-son)

16.10.2003

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Vazirlar Mahkamasining 2003-yil 3-iyundagi 240-son qaroriga muvofiq va respublika hududida joylashgan xorijiy investitsiyalar ishtirokidagi korxonalarga sotiladigan paxta tolasi uchun hisob-kitob qilish mexanizmini takomillashtirish maqsadida Vazirlar Mahkamasi qaror qiladi:

1. Vazirlar Mahkamasining “Ishlab chiqarilgan va sotilgan paxta tolasi uchun hisob-kitob qilish mexanizmini takomillashtirish toʻgʻrisida” 2003-yil 3-iyundagi 240-son qaroriga muvofiq xorijiy investitsiyalar ishtirokidagi korxonalarga paxta tolasi tuzilgan shartnomalar asosida tashqi savdo kompaniyalari tomonidan faqat mintaqaviy ixtisoslashtirilgan paxta terminallaridan erkin muomaladagi valyutaga sotilishi maʼlumot uchun qabul qilinsin.

2. Xorijiy investitsiyalar ishtirokidagi korxonalarga paxta tolasini sotishning quyidagi tartibi belgilansin:

paxta tolasi respublika hududida joylashgan xorijiy investitsiyalar ishtirokidagi korxonalarga ularning buyurtmanomalariga muvofiq cheklanmagan hajmlarda sotiladi;

xorijiy investitsiyalar ishtirokidagi korxona tegishli tashqi savdo kompaniyalariga hajmi, navi, tiplari va boshqa sifat koʻrsatkichlarini koʻrsatgan holda paxta tolasini joriy yilning sentyabr—dekabr oylarida xarid qilish uchun 1-iyulgacha va paxta tolasini keyingi yilning yanvar—avgust oylarida xarid qilish uchun 1-dekabrgacha paxta tolasini xarid qilish yuzasidan har yili buyurtmanoma taqdim etadi;

tashqi savdo kompaniyalari “Paxtasanoat” hududiy aksiyadorlik birlashmalari bilan tuziladigan bosh bitimda xorijiy investitsiyalar ishtirokidagi korxonalar buyurtmanomalarini toʻliq hajmda hisobga oladilar;

tashqi savdo kompaniyalari bosh bitimga muvofiq, xorijiy investitsiyalar ishtirokidagi korxonalar bilan paxta tolasi yetkazib berish yuzasidan sentyabr—dekabr va yanvar—avgust oylari davri uchun alohida-alohida shartnoma tuzadilar;

paxta tolasi tashqi savdo kompaniyasi bilan xorijiy investitsiyalar ishtirokidagi korxona oʻrtasida imzolangan shartnomalarga qatʼiy muvofiq, yuklab joʻnatish sanasida “Kotton Outlok”da eʼlon qilinadigan “A” indeksi va uning Oʻzbekistondagi komponenti kotirovkaga koʻra shakllanadigan jahon narxlari boʻyicha 15 foiz miqdoridagi chegirma bilan yetkazib beriladi;

3. Tashqi savdo kompaniyalari tomonidan paxta tolasi erkin muomaladagi valyutaga sotiladigan xorijiy investitsiyalar ishtirokidagi korxonalar roʻyxati ilovaga muvofiq tasdiqlansin.

Paxta tolasini sotishning koʻrsatib oʻtilgan tartibi yangidan tashkil etilayotgan xorijiy investitsiyalar ishtirokidagi barcha korxonalarga tatbiq etilishi belgilab qoʻyilsin.

4. Belgilansinki, xorijiy investitsiyalar ishtirokidagi korxonalar tomonidan tashqi savdo kompaniyalaridan chegirma bilan sotib olingan paxta tolasidan faqat ishlab chiqarish maqsadlarida foydalaniladi va ular qayta sotilmaydi.

Oʻzbekiston Respublikasi Davlat soliq qoʻmitasi, Davlat bojxona qoʻmitasi xorijiy investitsiyalar ishtirokidagi korxonalar tomonidan tashqi savdo kompaniyalaridan sotib olingan paxta tolasidan maqsadli foydalanilishi ustidan qatʼiy nazorat oʻrnatsinlar.

5. Oʻzbekiston Respublikasi Adliya vazirligi "Oʻzbekyengilsanoat" davlat-aksiyadorlik kompaniyasi va boshqa manfaatdor idoralar bilan birgalikda bir oy muddatda Vazirlar Mahkamasiga amaldagi qonun hujjatlariga ushbu qarordan kelib chiquvchi oʻzgartirish va qoʻshimchalar toʻgʻrisida takliflar kiritsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari R.S. Azimov va E.M. Gʻaniyev zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2003-yil 16-oktabr,

447-son

Vazirlar Mahkamasining 2003-yil 16-oktabrdagi 447-son qaroriga ILOVA

Tashqi savdo kompaniyalari tomonidan paxta tolasi erkin muomaladagi valyutaga sotiladigan xorijiy investitsiyalar ishtirokidagi korxonalar

ROʻYXATI

"Oʻzbekyengilsanoat" davlat-aksiyadorlik kompaniyasi korxonalari

1. “Qabul-Oʻzbek Ko” qoʻshma korxonasi

2. “Qabul-Fargʻona Ko” qoʻshma korxonasi

3. “Chinoz toʻqimachi” qoʻshma korxonasi

4. “Oq saroy toʻqimachi” qoʻshma korxonasi

5. “Olotteks” qoʻshma korxonasi

6. “Asnamtekstil” qoʻshma korxonasi

7. “Papfen” qoʻshma korxonasi

8. “Karakulteks” qoʻshma korxonasi

9. “Midateks” qoʻshma korxonasi

10. “Unixo” qoʻshma korxonasi

11. “Baliqchi” AJ bazasidagi qoʻshma korxona

12. “Iskovut” qoʻshma korxonasi

13. “Xonteks” qoʻshma korxonasi

14. “Barakat-Alfa” qoʻshma korxonasi

15. “Beshteks” qoʻshma korxonasi

Paxtani qayta ishlaydigan boshqa korxonalar

1. “DEU Tekstaylz Ko” xorijiy korxonasi

2. “Oyimtekstil” qoʻshma korxonasi

3. “Le-Uat-De-Buxoro” qoʻshma korxonasi

4. “Sarbonteks” qoʻshma korxonasi

5. “Samjinteks” qoʻshma korxonasi

6. “Shonali Tekstil LTD” qoʻshma korxonasi

7. “Xorazm-Nurton” qoʻshma korxonasi

8. “Oʻzmedkotton” qoʻshma korxonasi