Oʻzbekiston Respublikasi hukumatining ayrim qarorlariga oʻzgartirishlar kiritish va baʼzi qarorlarini oʻz kuchini yoʻqotgan deb hisoblash toʻgʻrisida (414-son)

29.09.2003

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Vazirlar Mahkamasining “Ishlab chiqarilgan va sotiladigan paxta tolasi uchun hisob-kitob qilish mexanizmini takomillashtirish toʻgʻrisida” 2003-yil 3-iyundagi 240-son qarorining 11-bandini bajarish yuzasidan Vazirlar Mahkamasi qaror qiladi:

1. Oʻzbekiston Respublikasi Vazirlar Mahkamasining “Respublika paxta tozalash sanoatini boshqarish tizimini takomillashtirish toʻgʻrisida” 2001-yil 12-iyundagi 252-son qarori (Oʻzbekiston Respublikasi QT, 2001-y., 6-son, 29-modda) bilan tasdiqlangan “Paxtasanoat” hududiy aksiyadorlik birlashmasining Paxta va paxta mahsulotlari kontraktatsiyasi va hisob-kitobi markazi toʻgʻrisidagi Namunaviy nizomga 1-ilovaga muvofiq oʻzgartirishlar kiritilsin.

2. Oʻzbekiston Respublikasi Hukumatining 2-ilovaga muvofiq baʼzi qarorlari oʻz kuchini yoʻqotgan deb hisoblansin.

Oʻzbekiston Respublikasining Bosh vaziri Oʻ. SULTONOV

Toshkent sh.,

2003-yil 29-sentabr,

414-son

Vazirlar Mahkamasining 2003-yil 29-sentabrdagi 414-son qaroriga 1-ILOVA

Oʻzbekiston Respublikasi Vazirlar Mahkamasining 2001-yil 12-iyundagi 252-son qarori bilan tasdiqlangan “Paxtasanoat” hududiy aksiyadorlik birlashmasining Paxta va paxta mahsulotlari kontraktatsiyasi va hisob-kitobi markazi toʻgʻrisidagi Namunaviy nizomga kiritilayotgan oʻzgartirishlar

1. 4-bandning beshinchi xatboshidagi “eksportga va respublikadagi isteʼmolchilarga” soʻzlari chiqarib tashlansin;

2. 5-bandda:

sakkizinchi xatboshidagi “eksportga va mahalliy isteʼmolchilarga” soʻzlari chiqarib tashlansin;

oʻn toʻrtinchi va oʻn toʻqqizinchi xatboshidagi “eksportga va” soʻzlari “tashqi savdo kompaniyalariga va” soʻzlari bilan almashtirilsin;

yigirma birinchi xatboshidagi “eksportga” soʻzi “tashqi savdo kompaniyalariga” soʻzlari bilan almashtirilsin, “eksport” soʻzi chiqarib tashlansin;

yigirma ikkinchi xatboshidagi “belgilangan kvotalar va joʻnatish hujjatlari (raznaryadkalar)ga muvofiq holda” soʻzlari chiqarib tashlansin, “eksportga” soʻzi “tashqi savdo kompaniyalariga” soʻzlari bilan almashtirilsin;

oxirgi xatboshidagi “Oʻzpaxtasanoat” uyushmasi” soʻzlari “Oʻzbekiston Respublikasi Moliya vazirligi” soʻzlari bilan almashtirilsin.

Vazirlar Mahkamasining 2003-yil 29-sentabrdagi 414-son qaroriga 2-ILOVA

Oʻzbekiston Respublikasi Hukumatining oʻz kuchini yoʻqotgan qarorlari

roʻyxati

1. Vazirlar Mahkamasining “Paxta mahsulotini sotish narxlari va budjet bilan oʻzaro hisob-kitoblar toʻgʻrisida” 1995-yil 25-sentabrdagi 373-son qarori.

2. Oʻzbekiston Respublikasi Vazirlar Mahkamasining “1999-yilda tovarlar (ishlar, xizmatlar) eksporti prognozi toʻgʻrisida” 1999-yil 15-yanvardagi 23-4-son qarori 2-bandining ikkinchi xatboshi va ushbu qarorga 4-ilova.

3. Oʻzbekiston Respublikasi Vazirlar Mahkamasining “2000-yilda tovarlar (ishlar, xizmatlar) eksporti prognozi toʻgʻrisida” 2000-yil 4-apreldagi 124-24-son qarori 2-bandining ikkinchi xatboshi.

4. Vazirlar Mahkamasining “Paxta tolasini markazlashtirilgan eksport qilishni tashkil etish tartibi toʻgʻrisidagi nizomni tasdiqlash haqida” 2001-yil 18-sentabrdagi 377-son qarori (Oʻzbekiston Respublikasi QT, 2001-y., 9-son, 54-modda).

5. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish va ayrimlarini oʻz kuchini yoʻqotgan deb hisoblash toʻgʻrisida” 2003-yil 14-yanvardagi 17-son qaroriga 1-ilovaning 32-bandi (Oʻzbekiston Respublikasi QT, 2003-y., 1-son, 7-modda).