Qurilish sohasidagi menejerlarni qayta tayyorlash va ularning malakasini oshirish markazini tashkil etish toʻgʻrisida (408-son)

22.09.2003

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Kapital qurilishda iqtisodiy islohotlarni yanada chuqurlashtirishning asosiy yoʻnalishlari toʻgʻrisida” 2003-yil 6-maydagi PF-3240-son Farmonini bajarish yuzasidan hamda qurilish sohasidagi rahbar kadrlarni (menejerlarni) qayta tayyorlash va ularning malakasini oshirish tizimini takomillashtirish maqsadida Vazirlar Mahkamasi qaror qiladi:

1. Oʻzbekiston Respublikasi Oliy va oʻrta maxsus taʼlim vazirligining Toshkent arxitektura-qurilish instituti huzurida yuridik shaxs huquqiga ega boʻlgan Qurilish sohasidagi menejerlarni qayta tayyorlash va ularning malakasini oshirish markazi (keyingi oʻrinlarda Markaz deb ataladi) tashkil etilsin.

2. Quyidagilar Markazning asosiy vazifalari etib belgilansin:

bozor sharoitlarida qurilish jarayonini boshqarish talablarini, obyektlarni qurishda ishlarni bajarishni tashkil etish va uning texnologiyasida xalqaro va Vatanimizda toʻplangan tajribani hisobga olgan holda qurilish sohasidagi menejerlarni qayta tayyorlash va ularning malakasini oshirish;

oʻquv-metodik materiallarni ishlab chiqish, qurilish sohasidagi menejerlarni qayta tayyorlash va ularning malakasini oshirish oʻquv jarayonining metodik va axborot bazasini yangilash va takomillashtirish;

oʻqitishni menejment va marketingning zamonaviy metodlari bilan, respublika vazirliklari va idoralarining, shuningdek chet mamlakatlarning yuqori malakali mutaxassislarini jalb etgan holda tashkil qilish asosida oʻqitish metodlari va usullarini muntazam ravishda takomillashtirish;

qurilish sohasida tadqiqot va tajriba — eksperiment ishlarini bajarish, menejerlardan foydalanish monitoringini olib borish, qonunchilikka muvofiq maslahat xizmatlari koʻrsatish.

3. Belgilab qoʻyilsinki:

qurilish sohasida oʻqitishning kunduzgi shakli boʻyicha menejerlarni qayta tayyorlash pudrat qurilish tashkilotlarining va qurilish industriyasi korxonalarining oliy maʼlumotga hamda mutaxassisligi boʻyicha kamida 3 yil ish stajiga ega boʻlgan rahbarlarini olti oy muddat bilan oʻqitgan va belgilangan namunadagi tegishli sertifikat bergan holda amalga oshiriladi;

qurilish sohasida boshqaruvning barcha darajalaridagi menejerlar malakasini oshirish sertifikat bergan holda uch oygacha muddatda amalga oshiriladi;

taʼlim oluvchilarni Markazga qabul qilish qurilish tashkilotlari va korxonalari buyurtmanomalariga binoan, shuningdek jismoniy shaxslarning arizalari boʻyicha, suhbat oʻtkazish natijalari asosida amalga oshiriladi;

shartnoma asosida oʻqitish uchun olingan va qonunchilikda taqiqlanmagan boshqa manbalardan tushadigan mablagʻlar Markaz faoliyatini moliyalashtirish manbalari hisoblanadi.

4. Oʻzbekiston Respublikasi Oliy va oʻrta maxsus taʼlim vazirligi:

bir oy muddatda Oʻzbekiston Respublikasi Davlat arxitektura va qurilish qoʻmitasi bilan kelishgan holda Qurilish sohasidagi menejerlarni qayta tayyorlash va ularning malakasini oshirish markazi toʻgʻrisidagi nizomni tasdiqlasin;

bir oy muddatda Oʻzbekiston Respublikasi Davlat arxitektura va qurilish qoʻmitasi bilan birgalikda, mamlakatimiz va chet el oʻquv yurtlari taʼlim tizimidagi zamonaviy yutuqlarni hisobga olgan holda oʻquv rejalarini ishlab chiqsin va tasdiqlasin;

Toshkent arxitektura-qurilish institutini 2004-yilda taʼminlash xarajatlari smetasi tarkibida Markazni asoslangan hujjatlar asosida zarur oʻquv va laboratoriya mol-mulki bilan jihozlash uchun mablagʻlarni nazarda tutsin.

5. Toshkent shahar hokimligi Markazni joylashtirish yuzasidan bir oy muddatda Vazirlar Mahkamasiga taklif kiritsin.

6. Markazning Homiylik kengashi tarkibi ilovaga* muvofiq tasdiqlansin.

* Ilova berilmaydi.

7. Oʻzbekiston Respublikasi Prezidentining “Isteʼdod” jamgʻarmasiga professor-oʻqituvchilar tarkibi vakillarini hamda Markazning isteʼdodli tinglovchilarini malaka oshirish va tajriba orttirish uchun yetakchi xorijiy taʼlim, ilmiy va oʻquv markazlariga yuborishda amaliy yordam berish va koʻmaklashish tavsiya etilsin.

8. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari K. N. Toʻlaganov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2003-yil 22-sentabr,

408-son