Erkin harakat qilish toʻgʻrisida

06.06.1994

Oʻzbekiston Respublikasi bilan Koreya Respublikasi oʻrtasida

oʻzaro tushunish Memorandumi

Quyida “Ahdlashuvchi Tomonlar” deb ataluvchi Oʻzbekiston Respublikasi bilan Koreya Respublikasi.

Oʻzbekiston Respublikasi bilan Koreya Respublikasi oʻrtasida diplomatik munosabatlar oʻrnatilishi ular oʻrtasidagi hamkorlikning yoʻlga qoʻyilishiga koʻmaklashishini taʼkidlab,

bir davlatda ikkinchi davlat diplomatik vakillarining boʻlishi bu davlatlarning xalqlari oʻrtasida oʻzaro tushunishga koʻmaklashishini tan olib,

diplomatik aloqalar toʻgʻrisidagi 1961-yilning 18-aprelidagi Vena Konvensiyasining qoidalariga qatʼiy amal qilishga sodiqliklarini tasdiqlab,

Ahdlashuvchi Tomonlar erkin harakat xususida zimmalariga olgan majburiyatlarni amalga oshirishga intilib,

quyidagini tushunishga erishdilar:

1. a) Har bir Ahdlashuvchi Tomon diplomatik aloqalar toʻgʻrisidagi Vena Konvensiyasining 26-moddasiga muvofiq boshqa Tomonning diplomatik missiyalarining barcha aʼzolariga oʻz hududida cheklanmagan erkin harakat qilishiga kafillik beradi.

b) Diplomatik missiyalar aʼzolari oʻz safarlari haqida oldindan ruxsat yoki xabarnoma olishlari lozim boʻlmaydi.

2. Kirishni cheklash yoki taqiqlash faqat maxsus obyektlarga yoki harbiy bazalarga, hamda bemalol kirish uchun yopiq boʻlgan boshqa obyektlarga taalluqli boʻladi.

3. Diplomatik missiyalar aʼzolarining cheklanmagan erkin harakatiga tegishli 1 va 2-bandlarning qoidalari Oʻzbekiston Respublikasi va Koreya Respublikasining boshqa Tomon hududida doimiy istiqomat qiluvchi yoki u yerda vaqtincha boʻlgan boshqa fuqarolariga ham qoʻllanishi mumkin.

4. Ahdlashuvchi Tomonlar, ayrim hollarda, jamoat tartibi va xavfsizligi sabablariga koʻra, boshqa Ahdlashuvchi Tomon fuqarolarining, diplomatik va konsullik vakillaridan tashqari erkin harakatini cheklashlari mumkin.

5. Ushbu Memorandumdagi hech narsa Tomonlardan birining oʻz hududiga kirish uchun viza tartibini oʻrnatish huquqlarini cheklamaydi.

6. Ushbu Memorandumning qoidalari Tomonlardan birining uchinchi davlatlarga nisbatan qabul qilgan majburiyatlariga taʼsir qilmaydi va ulardan birontasiga qarshi qaratilmaydi.

7. Ushbu Memorandumning amal qilishi Ahdlashuvchi Tomonlardan biri boshqa Tomonni ushbu Memorandum harakati tugatilganligi haqidagi qarori qabul qilinishidan uch oy oldin yozma ravishda ogohlantirgandan soʻng tugatilishi mumkin.

8. Ushbu Memorandum imzolanishi bilanoq kuchga kiradi.

Toshkent shahrida, 1994-yil 6-iyunda, ikki nusxada, har biri oʻzbek, koreys va ingliz tillarida imzolandi, har ikki matn ham bir xil kuchga ega. Talqin etishda kelishmovchiliklar boʻlgan holda ingliz tilidagi matn ustuvorlik qiladi.

(imzolar)