Baliqchilik tarmogʻida monopoliyadan chiqarish va xususiylashtirishni chuqurlashtirish chora-tadbirlari toʻgʻrisida (350-son)

13.08.2003

Oʻzbekiston Respublikasi Vazirlar Mahkamasining

qarori

Baliqchilik tarmogʻida xususiylashtirish va xususiy mulkchilikni rivojlantirish jarayonlarini chuqurlashtirish, baliq ovlash va baliqchilik korxonalari faoliyatini tashkil etishga bozor prinsiplari va mexanizmlarini joriy etish, tarmoqni yanada monopoliyadan chiqarish hamda raqobat muhitini shakllantirish, shuningdek baliq ovlashni, baliq va baliq mahsulotlarini sotishni tartibga solish maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “Oʻzbaliq” aksiyadorlik kompaniyasining faoliyati tashkil etilishini tekshirish boʻyicha 2003-yil 18-martdagi F-1728-son farmoyishi bilan tashkil etilgan Maxsus komissiyaning:

“Oʻzbaliq” aksiyadorlik kompaniyasini va “Qoraqalpoqbaliq” uyushmasini tugatish;

tugatilayotgan “Oʻzbaliq” aksiyadorlik kompaniyasi tarkibiga kiruvchi baliqchilik tarmogʻining baliq ovlash va baliqchilik korxonalarini toʻliq xususiylashtirish va asosan xususiy mulkchilikka aylantirish toʻgʻrisidagi takliflariga rozilik berilsin.

2. Oʻzbekiston Respublikasi Qishloq va suv xoʻjaligi vazirligi markaziy apparati tarkibida Chorvachilik, parrandachilik va baliqchilikni rivojlantirish bosh boshqarmasi, viloyatlar qishloq va suv xoʻjaligi boshqarmalarida esa — chorvachilik, parrandachilik va baliqchilikni rivojlantirish boʻlimlari tashkil etilganligi, ularga baliqchilik xoʻjaligini rivojlantirish funksiyalari yuklanganligi maʼlumot uchun qabul qilinsin.

3. “Oʻzbaliq” aksiyadorlik kompaniyasining faoliyati tashkil etilishini tekshirish boʻyicha Maxsus komissiya Oʻzbekiston Respublikasi Davlat mulki qoʻmitasi hamda manfaatdor vazirliklar va idoralar bilan birgalikda bir oy muddatda “Oʻzbaliq” aksiyadorlik kompaniyasi, baliqchilik tarmogʻining 1-ilovaga muvofiq xususiylashtirilgan korxonalari ustav jamgʻarmalaridagi davlat ulushlari va aksiyalar paketlarini birja va birjadan tashqari bozorlarda asosan jismoniy shaxslarga va xorijiy investorlarga sotishni nazarda tutgan holda, belgilangan tartibda tugatilishini taʼminlasin.

5. Quyidagi tartib belgilansin, unga koʻra:

tabiiy baliqchilik xoʻjaligi havzalari baliq ovlash korxonalariga tanlov asosida ijara shartlarida kamida 10 yil muddatga biriktirib qoʻyiladi;

tabiiy suv havzalari uchastkalaridan foydalanish huquqini beruvchi ijara shartnomasi Qoraqalpogʻiston Respublikasi Vazirlar Kengashi, viloyatlar hokimliklari va tanlov gʻolibi boʻlgan baliq ovlash korxonasi oʻrtasida tuziladi;

ijara shartnomasi tuzgan baliq ovlash korxonalari tomonidan tabiiy suv havzalarida baliq ovlash mavjud biologik resurslardan va vujudga kelayotgan talabdan hamda mahsuldorlikni saqlab qolish va baliq resurslarini zarur darajada koʻpaytirishdan kelib chiqqan holda kvotasiz asosda amalga oshiriladi;

tabiiy suv havzalari uchastkalarini ijaraga oluvchi baliq ovlash korxonalari tabiatni muhofaza qilishga oid qonun hujjatlariga, respublika hududida baliq ovlashning belgilangan qoidalariga qatʼiy rioya qilishlari, har yili baliqlarni oʻstirishga qoʻyib yuborish va baliq resurslari saqlanishini va koʻpaytirilishini taʼminlash boʻyicha boshqa chora-tadbirlarni amalga oshirishlari shart.

Ijarachi baliq ovlovchi korxonalar tomonidan tabiatni muhofaza qilishga doir belgilangan qonun hujjatlari, baliq ovlash qoidalari va ijara shartnomasi shartlari qoʻpol ravishda va muntazam buzilgan taqdirda ijara shartnomasi Qoraqalpogʻiston Respublikasi Vazirlar Kengashi va viloyatlar hokimliklari qaroriga koʻra muddatidan oldin, belgilangan tartibda bekor qilinishi mumkin.

6. Respublika baliqchilik xoʻjaligi tabiiy suv havzalarini biriktirib qoʻyish va ulardan foydalanish tartibi toʻgʻrisidagi nizom 2-ilovaga muvofiq tasdiqlansin.

7. Baliqchilikni rivojlantirish ilmiy-tadqiqot markazi huzurida ilmiy-tadqiqot va seleksiya-naslchilik ishlarini, ozuqalarning zamonaviy retseptlarini ishlab chiqishni va baliqchilik tarmogʻida zamonaviy texnologiyalarni joriy etishga, baliqlar kasalliklarining oldini olish va davolashga, tarmoqni rivojlantirish boʻyicha investitsiya dasturlarini shakllantirishga koʻmaklashishni moliyalashtirish uchun budjetdan tashqari Baliqchilikni rivojlantirish jamgʻarmasi tashkil etilsin.

Oʻzbekiston Respublikasi Moliya vazirligi Qishloq va suv xoʻjaligi vazirligi bilan birgalikda Baliqchilikni rivojlantirish ilmiy-tadqiqot markazi huzuridagi Baliqchilikni rivojlantirish jamgʻarmasi mablagʻlarini shakllantirish va ulardan foydalanish tartibi toʻgʻrisidagi nizomni bir oy muddatda ishlab chiqsin va belgilangan tartibda tasdiqlasin.

9. Oʻzbekiston Respublikasi Moliya vazirligi Qishloq va suv xoʻjaligi vazirligi, Davlat tabiatni muhofaza qilish qoʻmitasi, Qoraqalpogʻiston Respublikasi Vazirlar Kengashi, viloyatlar hokimliklari bilan birgalikda respublika baliqchilik xoʻjaligi tabiiy suv havzalarining baliq ovlash korxonalariga ijara shartnomasi shartlarida biriktirib qoʻyilgan uchastkalaridan foydalanganlik uchun ijara haqini undirish tartibi va miqdorlari toʻgʻrisidagi nizomni bir oy muddatda ishlab chiqsin va belgilangan tartibda tasdiqlasin.

Belgilab qoʻyilsinki, respublika baliqchilik xoʻjaligi tabiiy suv havzalarini ijaraga olishdan tushadigan mablagʻlarning:

68 foizi — tegishli tumanlar va shaharlar budjetlariga;

20 foizi — Baliqchilikni rivojlantirish ilmiy-tadqiqot markazi huzuridagi Baliqchilikni rivojlantirish jamgʻarmasiga;

12 foizi — mablagʻlarni baliq resurslarini muhofaza qilish va ulardan oqilona foydalanish tadbirlariga maqsadli yoʻnaltirish uchun Oʻzbekiston Respublikasi Davlat tabiatni muhofaza qilish qoʻmitasiga yoʻnaltiriladi.

10. Oʻzbekiston Respublikasi Qishloq va suv xoʻjaligi vazirligi Iqtisodiyot vazirligi, Davlat tabiatni muhofaza qilish qoʻmitasi va “Oʻzdonmahsulot” davlat-aksiyadorlik korporatsiyasi bilan birgalikda 2004—2006-yillarda baliqchilik tarmogʻini va uning ozuqa bazasini rivojlantirish kompleks dasturini ikki oy muddatda ishlab chiqsin va Vazirlar Mahkamasiga kiritsin.

11. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:

Oʻzbekiston Respublikasi Qishloq va suv xoʻjaligi vazirligi, baliq ovlash va baliqchilik korxonalari bilan birgalikda baliq va baliq mahsulotlarini sotish boʻyicha chakana savdo shoxobchalarini rivojlantirish uchun zarur shart-sharoitlar yaratsinlar;

Oʻzbekiston Respublikasi Qishloq va suv xoʻjaligi vazirligi, “Oʻzdonmahsulot” davlat-aksiyadorlik korporatsiyasi hamda boshqa manfaatdor idoralar bilan birgalikda baliqchilik va baliq ovlash korxonalariga seleksiya-naslchilik materiali, ozuqa va boshqa resurslar bilan taʼminlashda koʻmaklashsinlar;

Oʻzbekiston Respublikasi Er resurslari davlat qoʻmitasi bilan birgalikda baliqchilik faoliyatini yuritish uchun ajratilgan koʻllar va boshqa yer maydonlaridan maqsadli foydalanilishi ustidan qattiq nazorat oʻrnatsinlar.

12. Oʻzbekiston Respublikasi Davlat tabiatni muhofaza qilish qoʻmitasi, Ichki ishlar vazirligi, Davlat soliq qoʻmitasi tabiiy suv havzalarida baliq resurslari muhofaza qilinishi va ulardan oqilona foydalanilishi, gʻayriqonuniy ov qilishga hamda baliq va baliq mahsulotlarining noqonuniy sotilishiga qarshi kurash ustidan qattiq nazorat oʻrnatsinlar. Amalga oshirilayotgan ishlar toʻgʻrisida har chorakda Oʻzbekiston Respublikasi Vazirlar Mahkamasiga axborot berilsin.

13. Quyidagilar:

Vazirlar Mahkamasining “Baliqchilik tarmogʻini boshqarish tizimini takomillashtirish toʻgʻrisida” 2001-yil 6-iyuldagi 289-son qarori, 9-banddan tashqari;

Vazirlar Mahkamasining “Respublika baliqchilik tabiiy suv havzalaridan foydalanishni yaxshilash va baliq resurslari muhofazasini kuchaytirish chora-tadbirlari toʻgʻrisida” 1998-yil 11 maydagi 198-son qarori, 6-banddan tashqari;

Vazirlar Mahkamasining “Respublika baliqchilik tabiiy suv havzalarini biriktirib qoʻyish va ulardan foydalanish tartibini tasdiqlash toʻgʻrisida” 1998-yil 2-iyuldagi 277-son qarori oʻz kuchini yoʻqotgan deb hisoblansin.

14. Oʻzbekiston Respublikasi Adliya vazirligi Qishloq va suv xoʻjaligi vazirligi, Oʻzbekiston Respublikasi Davlat tabiatni muhofaza qilish qoʻmitasi, boshqa manfaatdor vazirliklar va idoralar bilan birgalikda amaldagi qonun hujjatlariga mazkur qarordan kelib chiquvchi oʻzgartirish va qoʻshimchalar toʻgʻrisida bir oy muddatda Vazirlar Mahkamasiga takliflar kiritsin.

15. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2003-yil 13-avgust,

350-son

Vazirlar Mahkamasining 2003-yil 13-avgustdagi 350-son qaroriga 1-ILOVA

Tugatilayotgan “Oʻzbaliq” aksiyadorlik kompaniyasining ulushlari va aksiyalar paketlari birja va birjadan tashqari bozorlarda asosan xususiy mulk qilib sotiladigan korxonalari

roʻyxati

Vazirlar Mahkamasining 2003-yil 13-avgustdagi 350-son qaroriga 2-ILOVA

Respublika baliqchilik xoʻjaligi tabiiy suv havzalarini biriktirib qoʻyish va ulardan foydalanish tartibi toʻgʻrisida

Nizom

I. Umumiy qoidalar

1. Mazkur Nizom respublika baliqchilik xoʻjaligi tabiiy suv havzalarini ijaraga berish va ulardan foydalanish tartibini belgilaydi.

2. Baliq va boshqa suv jonivorlarini ovlash yoki ularni koʻpaytirish uchun foydalanilayotgan yoki foydalanilishi mumkin boʻlgan barcha tabiiy suv havzalari (dengiz, daryolar, suv omborlari, koʻllar va ularga yondosh suv havzalari — koʻl xoʻjaliklari va baliq pitomniklaridan tashqari) baliqchilik xoʻjaligi suv havzalari hisoblanadi.

Baliq ovlanayotgan va ovlanishi mumkin boʻlgan baliqchilik xoʻjaligi tabiiy suv havzalari ov qilinadigan suv havzalari hisoblanadi. Baliqchilik xoʻjaligi suv havzalari sport – ishqivozlik turidagi baliq ovlash uchun ham foydalanilishi mumkin.

3. Mazkur Nizomga muvofiq ijara shartnomasi tuzgan yuridik va jismoniy shaxslar (keyingi oʻrinlarda baliq ovlash korxonalari deb ataladi) tabiiy suv havzalarida baliq ovlash huquqiga ega boʻladilar.

II. Tabiiy suv havzalarini baliq ovlash korxonalariga ijaraga berish va biriktirib qoʻyish tartibi

4. Baliqchilik tabiiy suv havzalari ijaraga, qoidaga koʻra, xususiy mulkchilikka asoslangan baliq ovlash korxonalariga tanlov asosida ijara shartnomasida belgilangan, lekin kamida 10 yil muddatga Qoraqalpogʻiston Respublikasi Vazirlar Kengashi, viloyatlar hokimliklari tomonidan beriladi.

5. Baliqchilik tabiiy suv havzalarini baliq ovlash korxonalariga ijaraga berish masalalarini koʻrib chiqish uchun Qoraqalpogʻiston Respublikasi Vazirlar Kengashi, viloyatlar hokimliklari huzurida tegishli ravishda Qoraqalpogʻiston Respublikasi Vazirlar Kengashi Raisining, viloyatlar hokimlarining birinchi oʻrinbosarlari boshchilik qiladigan maxsus tanlov komissiyalari tuziladi. Komissiya tarkibiga “Davlatbionazorat” inspeksiyasi, hududiy moliya va soliq organlari, viloyatlar qishloq va suv xoʻjaligi boshqarmalari, adliya va ichki ishlar organlari va boshqa manfaatdor tuzilmalar vakillari kiritiladi.

6. Baliqchilik xoʻjaligi tabiiy suv havzalarini yoki ularning uchastkalarini tanlovda gʻolib chiqqan baliq ovlash korxonalariga biriktirib qoʻyish Qoraqalpogʻiston Respublikasi Vazirlar Kengashi, viloyatlar hokimliklari (ijaraga beruvchilar) va baliq ovlash korxonalari (ijarachilar) oʻrtasida ijara shartnomasi tuzish asosida amalga oshiriladi.

Ijara shartnomasiga baliqchilik xoʻjaligi tabiiy suv havzasi yoki uning uchastkasi pasporti ilova qilinadi, unda suv havzasining nomi, joylashgan joyi, suv havzasining oʻlchamlari va yerdan foydalanuvchilar chegaralari koʻrsatilgan xarita-sxema ilova qilingan chegaralari, boshqa zarur maʼlumotlar koʻrsatiladi.

7. Baliqchilik xoʻjaligi tabiiy suv havzasi yoki uning uchastkasini ijaraga olish maqsadida tanlovda qatnashish uchun Qoraqalpogʻiston Respublikasi Vazirlar Kengashiga va viloyatlar hokimliklariga quyidagi hujjatlar taqdim etiladi:

ariza;

baliq ovlash korxonasining yuridik shaxs sifatida yoki yuridik shaxs boʻlmagan yakka tartibdagi tadbirkorning davlat roʻyxatidan oʻtkazilganligi toʻgʻrisidagi guvohnomaning nusxasi;

baliq ovlash uchun zarur moddiy-texnika resurslarining mavjudligi toʻgʻrisidagi maʼlumotlar.

8. Qoraqalpogʻiston Respublikasi Vazirlar Kengashi va viloyatlar hokimliklari arizachilar tomonidan hujjatlar berilgan vaqtdan boshlab bir oy muddatda ularni koʻrib chiqadilar, tanlov komissiyasining yigʻilishini oʻtkazadilar va tanlov gʻoliblariga baliqchilik xoʻjaligi tabiiy suv havzasi yoki uning uchastkasini ijaraga berish toʻgʻrisida qaror qabul qiladilar.

Qaror qabul qilingandan keyin 10 kun mobaynida tanlov gʻolibi bilan ijara shartnomasi tuziladi va ov faoliyati uchun guvohnoma (ov bileti) beriladi.

9. Tanlov natijalariga koʻra tabiiy suv havzasini ijaraga berish rad etilgan ariza beruvchilar tanlov komissiyasi qarori yuzasidan qonun hujjatlarida belgilangan tartibda shikoyat qilishga haqlidirlar.

10. Baliqchilik xoʻjaligi tabiiy suv havzasi yoki ularning uchastkalaridan foydalanish huquqi uchun ijara shartnomasi tuzgan baliq ovlash korxonalari qonun hujjatlarida belgilangan miqdorda va tartibda ijara haqi toʻlaydilar.

11. Baliqchilik xoʻjaligi tabiiy suv havzasi yoki uning uchastkasini ijaraga olish shartnomasi baliq ovlash korxonasining oʻz xohishiga koʻra yoki baliq ovlash korxonasi tomonidan baliq ovlashning belgilangan qoidalari qoʻpol ravishda va muntazam buzilishi, baliq resurslarini saqlash va koʻpaytirish boʻyicha oʻz zimmasiga olingan majburiyatlarga rioya qilinmasligi natijasida muddatidan oldin bekor qilinishi mumkin.

III. Ijaraga beruvchining huquq va majburiyatlari

12. Ijaraga beruvchi sifatida Qoraqalpogʻiston Respublikasi Vazirlar Kengashi va viloyatlar hokimliklari quyidagilarga haqlidir:

amaldagi qonun hujjatlari, shartnoma shartlari, ayniqsa har yili baliqlarni oʻstirishga qoʻyib yuborishni, baliqchilik resurslarini saqlash va koʻpaytirishni taʼminlash boʻyicha shartlari buzilishi aniqlanganda baliq, boshqa suv jonivorlarini ovlashni va oʻsimliklar tayyorlashni toʻxtatib qoʻyish;

baliq ovlovchi korxona — ijarachi tomonidan tabiatni muhofaza qilish qonunchiligining, belgilangan baliq ovlash qoidalarining muntazam va qoʻpol ravishda buzilishi aniqlanganda tuzilgan shartnomani tabiatni muhofaza qilish organlarining taqdimnomasiga koʻra qonun hujjatlarida belgilangan tartibda muddatidan oldin bekor qilish.

13. Ijaraga beruvchi quyidagilarga majbur:

tabiiy baliqchilik xoʻjaligi suv havzasini yoki uning uchastkasini ijaraga olish uchun tanlovda qatnashish istagini bildirgan yuridik va jismoniy shaxslardan ariza hamda boshqa hujjatlarni koʻrib chiqish uchun bepul asosda qabul qilish;

berilgan arizalarni koʻrib chiqish va tanlovni oʻtkazishni oʻz vaqtida, qatʼiy belgilangan muddatlarda amalga oshirish;

tanlov qatnashchilarini uning natijalaridan oʻz vaqtida xabardor qilish;

tanlov yakunlari boʻyicha 10 kun mobaynida gʻolib bilan tabiiy baliqchilik xoʻjaligi suv havzasidan yoki uning uchastkasidan foydalanish huquqini beruvchi ijara shartnomasi tuzish va baliq ovlash faoliyati bilan shugʻullanishga guvohnoma berish.

IV. Ijarachining huquq va majburiyatlari

14. Baliq ovlovchi korxona — ijarachi quyidagi huquqlarga ega:

ajratilgan tabiiy baliqchilik xoʻjaligi suv havzasi yoki uning uchastkasidan tuzilgan ijara shartnomasiga muvofiq foydalanish;

kvotasiz miqdorda baliq ovlash va mahsulotni ixtiyoriy ravishda sotish;

ozuqa va asosiy faoliyat bilan bogʻliq boʻlgan boshqa mahsulotlar, shuningdek baliqchilik mahsulotlari etishtirish uchun suvni muhofaza qilish hududi tashqarisida yordamchi xoʻjaliklar tashkil qilish;

oʻz ovchilik-baliqchilik xoʻjaligini tashkil etish;

qonun hujjatlariga muvofiq boshqa huquqlarni amalga oshirish.

15. Baliq ovlovchi korxona – ijarachi quyidagilarga majbur:

qonun hujjatlarida belgilangan tartibga muvofiq baliq ovlash va tabiatni muhofaza qilish qonun hujjatlari buzilishiga yoʻl qoʻymaslik;

birkitilgan suv havzasini subijaraga bermaslik;

har yili baliqlarni oʻstirishga qoʻyib yuborish, baliqchilik melioratsiyasi, baliqlarning ovlanadigan turlari nasllarini saqlab qolish ishlarini hamda baliqchilik resurslarini saqlash va koʻpaytirish boʻyicha boshqa chora-tadbirlarni amalga oshirish;

har yili dekabr oyida Oʻzbekiston Respublikasi Davlat tabiatni muhofaza qilish qoʻmitasiga va Baliqchilikni rivojlantirish ilmiy-tadqiqot markaziga tabiiy suv havzalaridagi baliq zaxiralarining ahvoli va ularni koʻpaytirish boʻyicha zarur chora-tadbirlar toʻgʻrisida axborot taqdim etish;

ovlangan baliqlarning hammasini namunaviy ov daftarida qayd etish;

baliqlarning tovar-transport xati boʻyicha tashilishini amalga oshirish;

baliq ovlash vositalarini belgilangan tartibda roʻyxatdan oʻtkazish va baliq ovlashda xavfsizlik texnikasiga rioya qilish;

tasdiqlangan shakl boʻyicha statistik hisobot taqdim etish;

tabiiy suv havzasi ijara toʻlovini oʻz vaqtida amalga oshirish.

16. Baliq va boshqa suv jonivorlarini ovlash faqat ijara shartnomasiga ilova qilinadigan biriktirilgan tabiiy baliqchilik xoʻjaligi suv havzasi yoki uning uchastkasi pasportida koʻrsatilgan tabiiy suv havzalari yoki ularning uchastkalari doirasida amalga oshirilishi mumkin.

17. Baliq ovlovchi korxona – ijarachi tomonidan tabiatni muhofaza qilish boʻyicha qonun hujjatlari, baliq ovlash qoidalari va ijara shartnomasi shartlari qoʻpol ravishda va muntazam buzilgan taqdirda ijara shartnomasi Qoraqalpogʻiston Respublikasi Vazirlar Kengashi va viloyatlar hokimliklari tomonidan muddatidan oldin bekor qilinishi mumkin.

18. Ijara shartnomasi shartlari ijaraga beruvchilar va ijarachilar tomonidan buzilganda tomonlar qonun hujjatlarida belgilangan tartibda javob beradilar.

19. Yuridik va jismoniy shaxslar tomonidan baliq, baliq mahsulotlari, boshqa suv jonivorlarini sotish faqat belgilangan tartibda shahar va tumanlar hokimliklari tomonidan belgilangan joylarda, mahsulotning qonuniy ovlanganligini yoki olinganligini tasdiqlovchi hujjatlar hamda mahsulot uchun sifat sertifikati mavjud boʻlgan taqdirda amalga oshiriladi.