Oʻzbekiston bolalar sportini rivojlantirish jamgʻarmasining mintaqaviy filiallari tuzilmasini takomillashtirish toʻgʻrisida (335-son)

01.08.2003

Oʻzbekiston Respublikasi Vazirlar Mahkamasining

qarori

Oʻzbekiston Bolalar sportini rivojlantirish jamgʻarmasi faoliyati samaradorligini oshirish, uning mintaqaviy filiallariga yuklangan vazifalarni muvaffaqiyatli amalga oshirish maqsadida Vazirlar Mahkamasi qaror qiladi:

1. 2003-yil 1-iyuldan boshlab shaharlar va tumanlar hokimliklaridagi bolalar sportining sport bazasi shakllantirilishi va rivojlantirilishi uchun javob beradigan yetakchi mutaxassis lavozimi tugatilsin.

2. Oʻzbekiston Bolalar sportini rivojlantirish jamgʻarmasining 2003-yil 1-iyuldan boshlab Jamgʻarmaning mintaqaviy filiallari shtatlariga vakil lavozimini (har bir tuman, viloyatga boʻysunuvchi shahar, Toshkent shahridagi tuman uchun bir nafardan) kiritish toʻgʻrisidagi taklifiga rozilik berilsin.

Yangidan kiritilayotgan shtat birliklarini mablagʻ bilan taʼminlash:

2003-yilda — shaharlar va tumanlar hokimliklari budjetida bolalar sportining sport bazasi shakllantirilishi va rivojlantirilishi uchun javob beradigan yetakchi mutaxassis lavozimini mablagʻ bilan taʼminlash uchun nazarda tutilgan mablagʻlar hisobiga, ularni Jamgʻarmaning mintaqaviy filiallariga berish yoʻli bilan;

2004-yildan boshlab — Jamgʻarma mablagʻlari hisobiga belgilangan tartibda amalga oshirilishi maʼlumot uchun qabul qilinsin.

Tumanlar va viloyatga boʻysunuvchi shaharlar hokimliklari Jamgʻarma mintaqaviy filiallarining mazkur hududga biriktirilgan vakillarini bepul asosda xizmat xonalari, kommunal, foydalanish xizmatlari bilan, shuningdek asosiy faoliyatni yuritish uchun aloqa xizmatlari bilan taʼminlasinlar.

3. Oʻzbekiston Respublikasi Moliya vazirligi tumanlar va viloyatga boʻysunuvchi shaharlar hokimliklari smetasiga belgilangan tartibda tegishli oʻzgartirishlar kiritsin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.

Oʻzbekiston Respublikasi Bosh vaziri Oʻ. SULTONOV

Toshkent sh.,

2003-yil 1-avgust,

335-son