Qarshi shahrida 2014-yilda ish oʻrinlari tashkil etish va aholi bandligini taʼminlash dasturi toʻgʻrisida (153/34-4-son)

20.01.2014

Qashqadaryo viloyati Xalq deputatlari Qarshi shahar Kengashining

Qarori

Shaharda aholini ish bilan taʼminlash va yangi ish oʻrinlari yaratish borasida ishlab chiqilgan aniq va manzilli dasturlar asosida 2013-yilning oʻtgan davrida shahar hokimligi, tegishli boshqarmalar, idoralar, korxona va tashkilotlar tomonidan yangi ish joylari tashkil etish va aholi bandligini taʼminlash, tadbirkorlik, kichik biznes, kasanachilikni va bandlikning boshqa samarali shakllarini rivojlantirish boʻyicha muayyan ishlar amalga oshirildi. 2013-yilda iqtisodiyot tarmoqlarida turli moliyaviy manbalar hisobidan jami 8746 ta yangi ish oʻrinlari (dasturga nisbatan 100,4 foiz) yaratildi.

Asosiy vazifalardan biri 2014-yilda aholi bandligini taʼminlash va yangi ish oʻrinlari yaratish boʻyicha barcha imkoniyatlarni inobatga olgan holda aniq va manzilli dastur ishlab chiqilishini taʼminlashdan iboratdir.

Oʻzbekiston Respublikasi Prezidenti va Hukumati tomonidan aholini ish bilan taʼminlashni yaxshilash va uning turmush farovonligini oshirish, mamlakatni ijtimoiy-iqtisodiy rivojlantirishning eng muhim ustuvor yoʻnalishlaridan biri qilib belgilab berilgan.

Ish oʻrinlari tashkil etish va aholi bandligini taʼminlash eng ustuvor masalalardan biri boʻlishini chuqur his qilgan holda hokimlik, korxona va tashkilotlar, fuqarolarning oʻzini oʻzi boshqarish organlari bilan hamkorlikda shaharda 2014-yilda ish oʻrinlari tashkil etish va aholi bandligini taʼminlash dasturining loyihasini tayyorlash boʻyicha qizgʻin ishlar olib borilmoqda.

Dastur loyihasini ishlab chiqish boʻyicha shahar hokimining iqtisodiyot va ijtimoiy rivojlantirish masalalari boʻyicha oʻrinbosari boshchiligida ishchi guruh ish olib bormoqda.

Ishchi guruh tomonidan har bir fuqarolarning oʻzini oʻzi boshqarish organlari va aholi punktlaridagi mavjud imkoniyatlar, bundan tashqari joylarda ijtimoiy-iqtisodiy rivojlantirish dasturlariga kiritilgan obyektlar hamda tadbirkorlik subyektlarining rejalarini inobatga olib fuqarolarning oʻzini oʻzi boshqarish organlari kesimida aniq va manzilli dasturlar tayyorlanmoqda.

Dasturda moliyaviy mablagʻ miqdori va manbalari aniq hisob-kitob qilinmoqda.

Ijtimoiy obyektlarni foydalanishga topshirish, “Sanoat korxonalarini kengaytirish, texnik qayta qurollantirish va modernizatsiya qilish chora-tadbirlari” dasturi va boshqa yangi ish oʻrinlari yaratish koʻzda tutilgan dasturlardagi koʻrsatkichlar aniqlanib ish oʻrinlari yaratish dasturiga kiritilmoqda.

Shuningdek, shahardagi tijorat banklari va ularning joylardagi boʻlinmalarining kredit portfelidan kelib chiqib, aholiga va tadbirkorlik subyektlariga beriladigan imtiyozli kreditlari hisobiga yaratiladigan ish oʻrinlari ham inobatga olinmoqda.

Shaharda 2013 — 2015-yillarga moʻljallangan dasturning soʻzsiz bajarilishini taʼminlash borasida amalga oshirilayotgan ishlarning samaradorligiga erishish, aholini ish bilan taʼminlash va yangi ish oʻrinlarini yaratishni taʼminlash maqsadida Kengash qaror qiladi:

1. Qarshi shahrining 2014-yilda ish oʻrinlari tashkil etish va aholi bandligini taʼminlash dasturi Ishchi guruhi 1-ilovaga, tashkil etiladigan yangi ish oʻrinlarining dastur koʻrsatkichlari 2-ilovaga, mahallalar kesimida yaratilishi 2a-ilovaga va dastur konsepsiyasi 3-ilovaga muvofiq tasdiqlansin.

2. Shahar hokimining oʻrinbosarlari mavjud tabiiy resurslar va xalq xoʻjaligida alohida ahamiyatga ega boʻlgan sohalarida ishlab chiqarilayotgan xomashyo hamda yarim tayyor mahsulotlarni qayta ishlab tayyor mahsulot chiqarishga ixtisoslashgan korxonalar barpo etish va faoliyat koʻrsatayotgan korxonalar quvvatidan toʻliq foydalanish boʻyicha chora-tadbirlarni ishlab chiqish va amalga oshirishni taʼminlasin.

3. Shahar Iqtisodiyot boʻlimi (A. Axmedov)ga ushbu dastur koʻrsatkichlari boʻyicha ikki kun muddatda korxonalar bilan kelishilgan holda 2014-yilda har bir hudud (mahallalar)da tashkil etiladigan ish oʻrinlari koʻrsatkichlari boʻyicha manzilli dasturni ishlab chiqib shahar hokimligiga taqdim etsin.

4. Shahar hokimligi, Davlat mulki boshqarmasi bilan birgalikda moliyaviy sogʻlomlashtirish choralari qoʻllanilgan sharoitda ish joylarini tiklash, ulardagi boʻsh ish joylari va ishlab chiqarish quvvatlaridan foydalanish darajasini oshirish imkoniyati boʻlgan iqtisodiy nochor korxonalar hisobiga yaratiladigan yangi ish oʻrinlariga aniqlik kiritsin.

5. Tijorat banklari rahbarlariga yangi kichik biznes subyektlari tashkil etish, xizmat koʻrsatish va servis sohasini rivojlantirish, birinchi navbatda mehnat bozorida tanglik kuzatilayotgan hududlarda, kichik hajmdagi korxonalar tashkil etishga kreditlar, shu jumladan imtiyozli kreditlar ajratish 2-ilovaga muvofiq tasdiqlangan dastur koʻrsatkichlaridan kelib chiqqan holda ishlab chiqish tavsiya etilsin.

6. Savdo-sanoat palatasi shahar boʻlimi (O. Boymurodov)ga 2014-yilda kichik biznes va xususiy tadbirkorlik subyektlari tomonidan yangi ish joylari tashkil etilishi va aholini ish bilan taʼminlashga keng jalb etish boʻyicha ishlarni faollashtirish tavsiya etilsin.

7. Shahar hokimligining majmualari real sektor korxonalarini, ishlab chiqarish va ijtimoiy infrastrukturani qoʻllab-quvvatlash, kichik biznes, xizmat koʻrsatish va servis sohasi, kasanachilikni rivojlantirish hisobiga yangi ish joylarini koʻpaytirishni 2-ilovaga muvofiq tasdiqlangan dastur koʻrsatkichlariga moslashtirsin.

8. Ishchi guruhiga:

yangi ishlab chiqarish obyektlarini ishga tushirish, mavjud korxonalarni kengaytirish va quvvatlarni yangilash yoʻnalishi boʻyicha ish joylari — shaharning 2014-yilga moʻljallangan investitsiya va tarmoq dasturlariga muvofiq;

sanoatda kichik korxonalar va mikrofirmalarni tashkil qilish hisobiga barpo etiladigan ish oʻrinlari — Oʻzbekiston Respublikasi Prezidentining 2009-yil 26-yanvardagi PQ-1047-sonli “Oziq-ovqat mahsulotlari ishlab chiqarishni kengaytirish va ichki bozorni toʻldirish yuzasidan qoʻshimcha chora-tadbirlar toʻgʻrisida”gi (Oʻzbekiston Respublikasi qonun hujjatlari toʻplami, 2009-y., 5-son, 34-modda; 2011-y., 52-son, 561-modda) qaroriga, tarmoq va hududiy dasturlariga muvofiq;

qurilish-pudrat ishlarini kengaytirish, jumladan uy-joy qurilishi va taʼmirlash yoʻnalishida tashkil qilinadigan ish joylari — Oʻzbekiston Respublikasi Prezidentining 2009-yil 29-yanvardagi PQ-1051-sonli “Uy-joy fondini foydalanishga tayyor holda topshirish shartlarida rekonstruksiya qilish va taʼmirlash boʻyicha pudrat ishlarini kengaytirishni ragʻbatlantirishga doir qoʻshimcha chora-tadbirlar toʻgʻrisida”gi (Oʻzbekiston Respublikasi qonun hujjatlari toʻplami, 2009-y., 5-son, 38-modda, 52-son, 560-modda; 2011-y., 52-son, 561-modda) qaroriga, tarmoq va hududiy dasturga muvofiq;

ishlab chiqarish va ijtimoiy infratuzilmani rivojlantirish hisobiga tashkil etiladigan ish joylari — Oʻzbekiston Respublikasi Prezidentining 2009-yil 20-yanvardagi PQ-1041-sonli “Ishlab chiqarish va ijtimoiy infratuzilmani yanada rivojlantirish yuzasidan qoʻshimcha chora-tadbirlar toʻgʻrisida”gi (Oʻzbekiston Respublikasi qonun hujjatlari toʻplami, 2009-y., 4-son, 21-modda) qaroriga, tarmoq va hududiy dasturlariga muvofiq;

kichik korxonalar va mikrofirmalarni tashkil etish, xususiy tadbirkorlikni rivojlantirish, mikrokreditlash tizimini qoʻllab-quvvatlash;

xizmat koʻrsatish va servisni rivojlantirish;

uy mehnatining barcha shakllarini, shu jumladan korxonalar bilan mehnat shartnomalariga binoan kooperatsiya asosida kasanachilikni tashkil etish, milliy hunarmandchilik va oilaviy tadbirkorlikni rivojlantirish;

norasmiy tarzda tadbirkorlik faoliyati bilan shugʻullanayotgan fuqarolarni aniqlab, ularni rasmiylashtirish va yangidan tadbirkorlik tashkil etish ishtiyoqida boʻlgan fuqarolarni har tomonlama qoʻllab-quvvatlash;

ishlamasdan turgan korxonalar faoliyatini tiklash natijasida yaratiladigan (tiklanadigan) ish oʻrinlari shahar hokimligi, Davlat mulki boshqarmasi bilan birgalikda moliyaviy sogʻlomlashtirish choralari qoʻllanilgan sharoitda ish joylarini tiklash, ulardagi boʻsh ish joylari va ishlab chiqarish quvvatlaridan foydalanish darajasini oshirish imkoniyati boʻlgan iqtisodiy nochor korxonalar hisobiga shakllantirilishi va qarorlarda belgilab berilgan vazifalarni hayotga izchil tatbiq etish orqali bandlik masalasini hal etishga alohida eʼtibor qaratsinlar.

9. Ishchi guruhiga joylarda qabul qilingan yangi ish oʻrinlari tashkil etish dasturlarini hududlarning ijtimoiy-iqtisodiy rivojlantirish boʻyicha istiqbolli dasturlari bilan mutanosibligini taʼminlash, har chorakda tahlil qilib tegishli oʻzgartirishlarni kiritish hamda muhokama qilib borish vazifasi yuklatilsin.

10. Shahar bandlikka koʻmaklashish va aholini ijtimoiy muhofaza qilish markazi (B. Xujamurodov):

Ushbu dastur koʻrsatkichlaridan kelib chiqqan holda, shahar Iqtisodiyot boʻlimi bilan birgalikda ish oʻrinlari tashkil etilishi boʻyicha hududlar, tarmoqlar va korxonalar kesimida, ish oʻrinlari tashkil etish va aholini ish bilan taʼminlash hududiy dasturlarini bajarilishining doimiy monitoringini amalga oshirsin va bu boradagi tahliliy maʼlumot hamda hisobotlarni Ishchi komissiyaga taqdim etib borish topshirilsin.

11. Mazkur qarorning ijrosini nazorat qilish shahar hokimining birinchi oʻrinbosari S. Bobayev va oʻrinbosarlari Sh. Xolmurodov, M. Murodovalar zimmasiga yuklatilsin.

12. Mazkur qaror rasman eʼlon qilingan kundan eʼtiboran kuchga kiradi.

Xalq deputatlari Qarshi shahar Kengashining raisi A. AChILOV

Qarshi sh.,

2014-yil 20-yanvar,

153/34-4-son

Xalq deputatlari Qarshi shahar Kengashining 2014-yil 20-yanvardagi 153/34-4-sonli qaroriga 1-ILOVA

Shaharda 2014-yilda ish oʻrinlari tashkil etish va aholi bandligini taʼminlash dasturining Ishchi guruhi

TARKIBI

Xalq deputatlari Qarshi shahar Kengashining 2014-yil 20-yanvardagi 153/34-4-conli qaroriga 2-ILOVA

Qarshi shahrida 2014-yilda ish oʻrinlari tashkil etish va aholi bandligini taʼminlash

DASTURI

Xalq deputatlari Qarshi shahar Kengashining 2014-yil 20-yanvardagi 153/34-4-sonli qaroriga 2a-ILOVA

Qarshi shahrida 2014-yilda mahallalar kesimida yaratiladigan yangi ish oʻrinlari

DASTURI

Xalq deputatlari Qarshi shahar Kengashining 2014-yil 20-yanvardagi 153/34-4-sonli qaroriga 3-ILOVA

2014-yilda ish oʻrinlarini tashkil etish va aholi bandligini taʼminlash shahar

DASTURI

2014-yilda ish oʻrinlarini tashkil etish va aholi bandligini taʼminlash dasturi shahar hokimligi, xoʻjalik boshqaruvi organlari hamda yirik korxonalar bilan birgalikda shahar boʻyicha, ijtimoiy-iqtisodiy va industrial rivojlanish hududiy dasturlarini, ishlab chiqarishni modernizatsiyalash, texnik va texnologik yangilash tarmoq dasturlarining ustuvor vazifalarini, mehnat bozorining talablarini hisobga olib ishlab chiqilgan.

Dastur loyihasi xalq deputatlari shahar kengashi deputatlarining faol ishtirokida ishlab chiqilgan. Dastur loyihasining asosiy yoʻnalishlari, ustuvorliklari va amalga oshirish mexanizmlari tadbirkorlik subyektlari oʻrtasida keng jamoatchilik muhokamasidan oʻtkazilgan.

Dastur hududlar boʻyicha 2014-yilda ish oʻrinlarini tashkil etish va aholini bandligini taʼminlash, taʼlim muassasalari bitiruvchilarini ishga joylashtirishning asosiy parametrlari va yoʻnalishlarini, yaratiladigan ish oʻrinlarini moliyalashtirish manbalari va hisobga olish (monitoring qilish) mexanizmlarini oʻz ichiga oladi.

Dasturni ishlab chiqish jarayonida barcha hududlarda ish bilan taʼminlash yuzasidan haqiqiy holat hamda ichki imkoniyatlar chuqur oʻrganib chiqildi va ish oʻrinlari yaratishga boʻlgan ehtiyoj aniqlandi.

Ayniqsa, ishsizlik darajasi yuqori boʻlgan hududlarda bandlik masalasini hal etishga alohida eʼtibor qaratildi.

Dasturda 2014-yil davomida barcha manbalar hisobidan 8716 ta ish joylari tashkil qilinishi belgilangan.

Jumladan, Investitsiya dasturlari asosida modernizatsiya va yangi obyektlarni ishga tushirish evaziga 910 ta yangi ish oʻrinlari yaratiladi.

“Radiant silk” QQda yiliga 120 tonna ipakni qayta ishlash hisobiga 125 ta (va boshqalar) yangi ish oʻrinlari yaratiladi.

Kichik korxona va mikrofirmalarni rivojlantirish va yangilarini barpo etish hisobiga 2160 ta yangi ish oʻrinlari barpo etiladi.

Kichik sanoat korxonalarida 190 ta, qurilish-pudrat ishlarini kengaytirish hisobiga uy-joy qurilishi va taʼmirlash sohasida 210 ta hamda xizmat koʻrsatish va umumiy ovqatlanish korxonalarida shoxobchalarni rivojlantirish hisobiga 1780 ta yangi ish oʻrinlari yaratish moʻljallangan.

Bandlikni taʼminlashning samarali shakllaridan biri boʻlgan uy mehnati va kasanachilik yoʻnalishida 2580 ta ish oʻrinlari tashkil etiladi.

Zamonaviy arxitektura talablariga mos keladigan uy-joylar, avtomobil yoʻllari, sogʻliqni saqlash va taʼlim muassalari, sport maydonchalari hamda boshqa ijtimoiy infratuzilma obyektlarini ishga tushirish, aholi punktlarini obodonlashtirish hamda kichik biznes subyektlariga xizmat koʻrsatuvchi bank, sugʻurta, lizing, huquqiy maslahatlar, konsalting markazlarini tashkil etish hisobiga — 1103 ta ish oʻrinlari tashkil etiladi.

Dasturning asosiy vazifalari quyidagilardan iborat

Birinchidan: band boʻlmagan aholini, shu jumladan ijtimoiy nochor toifalarni, birinchi navbatda, koʻp bolali ayollarni, nogironlar, taʼlim muassasalari bitiruvchilarini ishga joylashtirish, kasbiy qayta tayyorlash hamda ijtimoiy muhofaza qilish boʻyicha faol va maqsadli chora-tadbirlarni amalga oshirish;

Ikkinchidan: kichik biznes va xususiy tadbirkorlik sohasida bandlikni yanada ragʻbatlantirish, aholining tadbirkorlik faolligini oshirishga koʻmaklashish, bandlikning samarali shakllarini, ayniqsa kasanachilikni, oilaviy biznesni va hunarmandchilikni rivojlantirish;

Uchinchidan: sanoatni, xizmat koʻrsatish soxasini va iqtisodiyotning boshqa tarmoqlarini rivojlantirish, shuningdek koʻp mehnat talab etadigan ishlab chiqarishni modernizatsiyalash va texnologik yangilash natijasida boʻshab qolayotgan xodimlar ishga joylashishini taʼminlash doirasida ish oʻrinlarini tashkil etish va ilgari tashkil etilgan ish oʻrinlari barqaror amal qilishi boʻyicha hududlar va iqtisodiyot tarmoqlari salohiyatidan samarali foydalanish.

Dasturning bajarilishini monitoring qilish va ish oʻrinlarini hisobga olish

2014-yilda ish oʻrinlarini tashkil etishning tasdiqlangan parametrlari bajarilishini taʼminlash maqsadida Dasturning tarmoqlar va aniq korxonalar boʻyicha bajarilishini muntazam ravishda hamda doimiy monitoring va tahlil qilish tashkil etilib, zarur boʻlganda 2014-yilda ish oʻrinlarini tashkil etishning tasdiqlangan parametrlari bajarilishini taʼminlash boʻyicha tegishli chora-tadbirlar koʻriladi.

Dasturning bajarilishini monitoring va har oyda koʻrib chiqish natijalari boʻyicha ish oʻrinlari tashkil etishning tasdiqlangan parametrlaridan orqada qolish hollari mavjud boʻlgan korxonalar, tarmoqlar, bandlikning yoʻnalishlari, shuningdek mahalla fuqarolar yigʻinlarda aniqlanadi, Dastur parametrlari soʻzsiz taʼminlanishiga qaratilgan qoʻshimcha chora-tadbirlar ishlab chiqiladi va qabul qilinadi.

Tashkil etilayotgan ish oʻrinlarining ishonchligini taʼminlash uchun Oʻzbekiston Respublikasi Mehnat va aholini ijtimoliy muhofaza qilish vazirligi tomonidan Oʻzbekiston Respublikasi Davlat statistika qoʻmitasi bilan birgalikda ish oʻrinlarini tezkor va statistik xisobga olish tizimi joriy etilgan boʻlib, ushbu tizim tashkil etilgan ish oʻrinlarini yoʻnalishlar va hududlar boʻyicha har chorakda kelishib hisobga olishni nazarda tutadi.

Band boʻlmagan aholini ishga joylashtirishga qaratilgan chora-tadbirlar

Dasturni bajarish doirasida mehnat va aholini ijtimoiy muhofaza qilish organlari tomonidan mehnat bozorida yuzaga kelayotgan tamoyillarni va aniq mutaxassisliklar boʻyicha kadrlarga boʻlgan talabni xisobga olgan xolda quyidagilarni nazarda tutuvchi chora-tadbirlarni roʻyobga chiqarish davom ettiriladi:

Birinchidan: Yangi tashkil etiladigan, shuningdek boʻsh turgan va zaxira qilinadigan ish oʻrinlariga ishga joylashishga muhtojlardan kamida 4 ming nafardan ziyod kishini ishga joylashtiriladi;

Ikkinchidan: Band boʻlmagan aholiga va ishsizlarga, birinchi navbatda yoshlar, ayollar, imkoniyati cheklangan shaxslarga kasb-hunarga qayta tayyorlash va ishga joylashtirish boʻyicha, shuningdek, ishsizlarni moddiy qoʻllab-quvvatlash boʻyicha sifatli xizmatlar koʻrsatilishini tashkil etish, xususan band boʻlmagan aholi orasidan faol ish qidirayotgan 50 nafar ishsiz mehnat bozorida talab mavjud boʻlgan mutaxassisliklar boʻyicha qayta tayyorlanadi, 90 nafar ishsiz haq toʻlanadigan jamoat ishlariga jalb etiladi;

Uchinchidan: Dasturni roʻyobga chiqarish doirasida taʼlim muassasalari bitiruvchilarini ishga joylashtirishga alohida eʼtibor beriladi.

2014-yilda ilk bor mehnat bozoriga kiruvchi 8764 nafar shaxsni, ayniqsa 7400 dan ortiq kasb-hunar kollejlari bitiruvchilarini, ishga joylashtirishga qaratilgan faol chora-tadbirlari koʻriladi.

Toʻrtinchidan: Ish qidirishga sarflanadigan vaqtni qisqartirish maqsadida shaharda kamida 7 marotaba boʻsh ish oʻrinlari ixtisoslashtirilgan yarmarkasini oʻtkazish tashkil etiladi.

Beshinchidan: mehnat bozoridagi vaziyat yumshatilib, shaharda ishsizlikning pasayishiga erishiladi mehnat bozoriga ilk marotaba kirib keluvchi oliy va oʻrta-maxsus, kasb-hunar taʼlimi muassasalari bitiruvchilarining barqaror ish joylariga joylashtiriladi.