Xorijiy kreditlar oʻz vaqtida qaytarilishini taʼminlash chora-tadbirlari toʻgʻrisida (267-son)

14.06.2003

Oʻzbekiston Respublikasi Vazirlar Mahkamasining

qarori

Jalb etilgan xorijiy kreditlarning oʻz vaqtida va toʻliq qaytarilishini taʼminlash, korxonalarning Oʻzbekiston Respublikasi Hukumati kafolati ostida berilgan xorijiy valyutadagi kreditlar boʻyicha oʻz majburiyatlarining bajarilishi uchun javobgarligini oshirish maqsadida Vazirlar Mahkamasi qaror qiladi:

1. Tijorat banklariga qarz oluvchi korxonalar Oʻzbekiston Respublikasi Hukumati tomonidan kafolatlangan kreditlar boʻyicha qarzlarini oʻz vaqtida qaytarmagan hollarda pul mablagʻlarini qarz oluvchining hisob raqamidan akseptsiz tartibda hisobdan chiqarish va ularni kreditlar boʻyicha qarzlarni qaytarishga yoʻnaltirish huquqi berilsin.

2. Belgilab qoʻyilsinki, qarz oluvchi korxonalar tomonidan Oʻzbekiston Respublikasi Hukumati kafolati ostida berilgan muddati oʻtkazib yuborilgan xorijiy valyutadagi kreditlarni qaytarishda toʻlanayotgan summaning kamida 90 foizi majburiy tartibda asosiy qarzni qaytarishga yoʻnaltiriladi.

3. Hukumat kafolati ostida ilgari jalb qilingan kreditlar boʻyicha muddati oʻtkazib yuborilgan yoki muddati kechiktirilgan toʻlovlari boʻlgan korxonalar boʻyicha yangi investitsiya loyihalarini amalga oshirish yuzasidan takliflar kiritilishiga yoʻl qoʻyilmaydigan tartib belgilansin.

Investitsiya loyihalarini amalga oshirish va Oʻzbekiston Respublikasi Hukumati kafolati ostida olingan xorijiy valyutadagi kreditlarga oʻz vaqtida xizmat koʻrsatishga doir qonun hujjatlari talablariga rioya etilishi uchun shaxsiy javobgarlik Vazirlar Mahkamasi komplekslari, vazirliklar va idoralar, korxonalar va tashkilotlar, vakolatli banklar rahbarlari zimmasiga yuklansin.

4. Oʻzbekiston Respublikasi Moliya vazirligi va Iqtisodiyot vazirligining Hukumat kafolatini berishga oid talablarni kuchaytirish toʻgʻrisidagi taklifi qabul qilinsin, belgilab qoʻyilsinki, 2003-yil 1-iyuldan boshlab:

Oʻzbekiston Respublikasi Hukumati kafolati faqat xorijiy kreditorlarga xorijiy davlatlar, banklar yoki yuridik shaxslar bilan tashqi qarz shartnomalari boʻyicha beriladi;

tijorat banklariga Oʻzbekiston Respublikasi Hukumati kafolati istisno hollarda Hukumat kafolati ostida olingan xorijiy kreditlarni qayta moliyalashtirish yoki qaytarish manbai sifatida davlat budjeti mablagʻlari belgilangan ustuvor strategik va ijtimoiy ahamiyatga molik loyihalarni moliyalashtirishni taʼminlash uchun beriladi.

5. Oʻzbekiston Respublikasi Moliya vazirligi manfaatdor vazirliklar va idoralar bilan birgalikda bir oy muddatda Oʻzbekiston Respublikasi Hukumati kafolatini berish tartibi toʻgʻrisidagi Nizomni ishlab chiqsin va tasdiqlash uchun Vazirlar Mahkamasiga kiritsin.

6. Oʻzbekiston Respublikasi Adliya vazirligi manfaatdor vazirliklar va idoralar bilan birgalikda bir oy muddatda qonun hujjatlariga mazkur qarordan kelib chiquvchi oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov va Oʻzbekiston Respublikasi Markaziy banki raisi F.M. Mullajonov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2003-yil 14-iyun,

267-son