Oʻzbekiston Respublikasi Qurolli Kuchlarining oddiy askarlar va serjantlar tarkibida muddatli harbiy xizmatni oʻtayotgan harbiy xizmatchilarga qoʻshimcha imtiyozlar berish toʻgʻrisida (227-son)

22.05.2003

Oʻzbekiston Respublikasi Vazirlar Mahkamasining

qarori

“Umumiy harbiy majburiyat va harbiy xizmat toʻgʻrisida”gi Oʻzbekiston Respublikasi Qonuniga muvofiq, jangovar tayyorgarlik samaradorligi va qoʻshinlarning jangovar shayligini, harbiy xizmatning nufuzini oshirish, muddatli harbiy xizmatni oʻtayotgan harbiy xizmatchilarning ijtimoiy muhofazasini taʼminlash, shuningdek har tomonlama yetuk, Vatanga sadoqatli yoshlarni tarbiyalash, Qurolli Kuchlar, maxsus xizmatlar va huquqni muhofaza qilish organlarini armiya maktabini oʻtagan mard va vatanparvar kadrlar bilan toʻldirish, buning uchun puxta tayyorgarlik koʻrgan rezerv barpo etish maqsadida Vazirlar Mahkamasi qaror qiladi:

2. Oʻzbekiston Respublikasi Moliya vazirligi (M.B. Nurmurodov) Mudofaa, Ichki ishlar, Favqulodda vaziyatlar vazirliklari, Milliy xavfsizlik xizmati, Davlat chegaralarini himoya qiluvchi qoʻmitaning asoslangan hisob-kitoblariga binoan 2003-yilda “Safarbarlik chaqiruvi rezervi mablagʻlari” maxsus hisob raqamidan muddatli xizmatni oʻtayotgan harbiy xizmatchilarning taʼminotini yaxshilash, ularni zarur anjomlar bilan taʼminlash, qoʻshilmalar va qismlarni sport inventarlari hamda trenajyorlar, zamonaviy kompyuter texnikasi, oʻquv materiallari, kutubxona fondi bilan jihozlash uchun 2,0 mlrd soʻm yoʻnaltirsin.

3. Belgilab qoʻyilsinki, mamlakat oliy taʼlim muassasalariga oʻqishga kirish uchun harbiy qismlarning tavsiyanomalari jangovar va ijtimoiy-siyosiy tayyorgarlikda yuqori natijalarga erishgan muddatli harbiy xizmatchilarga qoʻshilmalar komandirlari hamda ularga tenglashtirilgan, harbiy xizmatchini tavsiflovchi maʼlumotlarning toʻgʻriligi uchun javobgar boʻlgan mansabdor shaxslar tomonidan beriladi.

Harbiy qismlar qoʻmondonligi tavsiyanomalari ular berilgan kundan boshlab uch yil mobaynida haqiqiy hisoblanadi.

4. Mudofaa vazirligi (Q.Gʻ. Gʻulomov) Oliy va oʻrta maxsus taʼlim vazirligi (S.S. Gʻulomov) bilan birgalikda muddatli harbiy xizmatni oʻtagan fuqarolarga oʻqishga kirishda ushbu qarorning 3-bandida koʻrsatilgan imtiyozlar beriladigan taʼlim yoʻnalishlari va oliy taʼlim muassasalari roʻyxatini ikki hafta muddatda ishlab chiqsin va tasdiqlasin.

5. Belgilab qoʻyilsinki, Mudofaa, Ichki ishlar, Favqulodda vaziyatlar vazirliklari, Milliy gvardiya, Milliy xavfsizlik xizmati, Davlat bojxona qoʻmitasida kontrakt boʻyicha xizmat qiladigan harbiy xizmatchilar, oddiy askarlar va serjantlar tarkibi eng avvalo:

Oʻzbekiston Respublikasi Qurolli Kuchlarida muddatli harbiy xizmatni oʻtagan;

safarbarlik chaqiruvi rezervidagi xizmatda boʻlgan va Maxsus hisob raqamiga pul badalini toʻliq miqdorda toʻlagan, bir oylik harbiy yigʻinlarda qatnashgan hamda harbiy hisobdagi ixtisoslikka turdosh mutaxassislikka ega boʻlgan shaxslar hisobidan toʻldiriladi.

6. Adliya vazirligi (A.A. Polvon-zoda) manfaatdor vazirliklar va idoralar bilan birgalikda bir oy muddatda ushbu qarordan kelib chiqqan holda amaldagi normativ hujjatlarga oʻzgartirish va qoʻshimchalar kiritish toʻgʻrisida taklif tayyorlasin.

7. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T. Sultonov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2003-yil 22-may,

227-son