Vazirlar Mahkamasining “Oʻzbekiston Respublikasida chakana savdo qoidalarini hamda Oʻzbekiston Respublikasida umumiy ovqatlanish mahsulotlarini (xizmatlarini) ishlab chiqarish va sotish qoidalarini tasdiqlash toʻgʻrisida” 2003-yil 13-fevraldagi 75-son qaroriga oʻzgartirishlar kiritish haqida (217-son)

15.05.2003

Oʻzbekiston Respublikasi Vazirlar Mahkamasining

qarori

Vazirlar Mahkamasi qaror qiladi:

Vazirlar Mahkamasining “Oʻzbekiston Respublikasida chakana savdo qoidalarini hamda Oʻzbekiston Respublikasida umumiy ovqatlanish mahsulotlarini (xizmatlarini) ishlab chiqarish va sotish qoidalarini tasdiqlash toʻgʻrisida” 2003-yil 13-fevraldagi 75-son qaroriga (Oʻzbekiston Respublikasi QT, 2003-y., 2-son, 15-modda) quyidagi oʻzgartirishlar kiritilsin:

a) Oʻzbekiston Respublikasida chakana savdo qoidalari (qarorga 1-ilova) 60-bandining oʻninchi xatboshi quyidagi tahrirda bayon qilinsin:

“maktabgacha bolalar muassasalari, diniy muassasalardan, oʻquv yurtlaridan 300 metr kam masofada joylashgan koʻchma va turgʻun savdo obyektlarida, shuningdek bevosita davolash-profilaktika va sport-sogʻlomlashtirish muassasalari hududida, oʻquv yurtlari va ishlab chiqarish korxonalari oshxonalarida — koʻrsatib oʻtilgan oʻquv yurtlari va korxonalar faoliyat koʻrsatayotgan vaqtda”;

b) Oʻzbekiston Respublikasida umumiy ovqatlanish mahsulotlarini (xizmatlarini) ishlab chiqarish va sotish qoidalarida (qarorga 2-ilova):

15-band quyidagi tahrirda bayon qilinsin:

“15. Umumiy ovqatlanish subyekti taomlar, mahsulotlar, ichimliklarning assortiment roʻyxatini sanitariya va texnologiya talablariga toʻliq rioya qilishni hisobga olgan holda mustaqil ravishda ishlab chiqadi, taomlar retsepturalarini tuzadi va tasdiqlaydi, ular tegishli tuman (shahar) davlat sanitariya nazorati xizmatlari bilan kelishib olinadi. Kalkulatsiya kartochkasi mahsulot narxini belgilash uchun asos hisoblanmaydi, u faqat savdo obyektlari egalari tomonidan ichki foydalanish uchun xizmat qiladi. Kalkulatsiya kartochkasini yuritish shart emas. Mahsulot narxi unga boʻlgan talab va taklifdan kelib chiqqan holda belgilanadi”;

17-band oʻz kuchini yoʻqotgan deb hisoblansin;

18—27-bandlar 17—26-bandlar hisoblansin.

Oʻzbekiston Respublikasining Bosh vaziri Oʻ. SULTONOV

Toshkent sh.,

2003-yil 15-may,

217-son