Aholini vatanimizda ishlab chiqarilgan un va non mahsulotlari bilan taʼminlashni yaxshilash chora-tadbirlari toʻgʻrisida (155-son)

25.03.2003

Oʻzbekiston Respublikasi Vazirlar Mahkamasining

qarori

Ulgurji va chakana savdoda sotilayotgan un va non mahsulotlariga boʻlgan isteʼmol talabini chuqur oʻrganishni tashkil etish, “Oʻzdonmahsulot” davlat-aksiyadorlik korporatsiyasi korxonalari tomonidan ishlab chiqarilayotgan mahsulot assortimentini aholi talabiga muvofiq oqilona oʻzgartirish maqsadida Vazirlar Mahkamasi qaror qiladi:

1. “Oʻzdonmahsulot” davlat-aksiyadorlik korporatsiyasining korporatsiya ijro etuvchi apparati tuzilmasida xodimlarning shtatda belgilangan soni doirasida Marketing boshqarmasini tashkil etish toʻgʻrisidagi taklifiga rozilik berilsin.

Quyidagilar “Oʻzdonmahsulot” davlat-aksiyadorlik korporatsiyasi Marketing boshqarmasining asosiy funksiyalari etib belgilansin:

ulgurji va chakana savdo tizimida unning turli navlariga va non mahsulotlari turlariga boʻlgan ichki isteʼmol talabini oʻrganish;

isteʼmol talabiga muvofiq un va non mahsulotlari assortimentini shakllantirish uchun gʻallani qayta ishlashni maqbullashtirish yuzasidan takliflar tayyorlash;

“Oʻzdonmahsulot” davlat-aksiyadorlik korporatsiyasi mahsulotlariga isteʼmol talabi prognozini ishlab chiqish va shu asosda ozuqabop bugʻdoy va un resurslaridan oqilona foydalanish yuzasidan takliflar tayyorlash;

ichki va tashqi bozorlarda, birinchi navbatda chegaradosh davlatlar bozorlarida gʻalla, un va non mahsulotlari bozori konyunkturasi monitoringini tashkil etish.

2. “Oʻzdonmahsulot” davlat-aksiyadorlik korporatsiyasiga Oʻzbekiston Respublikasi Iqtisodiyot vazirligi va Moliya vazirligi bilan kelishgan holda aholi va respublika isteʼmolchilarining unning turli navlariga va non mahsulotlari turlariga amalda vujudga kelayotgan isteʼmol talabidan kelib chiqqan holda ozuqabop bugʻdoyni sanoat asosida qayta ishlash, un va tayyor mahsulot ishlab chiqarishning belgilangan koʻrsatkichlariga har chorakda tuzatishlar kiritish huquqi berilsin.

3. Qishloq xoʻjaligi vazirligi, “Oʻzdonmahsulot” AK, Oʻzbekiston standartlashtirish, metrologiya va sertifikatlashtirish agentligi bilan birgalikda unning turli navlariga boʻlgan isteʼmol talabini hamda ishlab chiqarilayotgan unning non pishirish xususiyatlarini hisobga olgan holda har yili kelgusi qishloq xoʻjaligi yilida bugʻdoyni navlar boʻyicha joylashtirish yuzasidan belgilangan tartibda takliflar kiritsinlar.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari N.S. Yusupov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2003-yil 25-mart,

155-son