Tojikiston Respublikasi yuk avtotransport vositalari va avtobuslarining Oʻzbekiston Respublikasi bojxona hududi orqali oʻtganligi uchun yigʻimlarni birxillashtirish toʻgʻrisida (11-son)

08.01.2002

Oʻzbekiston Respublikasi Vazirlar Mahkamasining

qarori

Davlatlar boshliqlarining 2001-yil dekabr oyida Toshkent shahrida boʻlib oʻtgan uchrashuvida erishilgan kelishuvga muvofiq, yaxshi qoʻshnichilik munosabatlarini mustahkamlash, Tojikiston Respublikasi yuk avtotransport vositalari va avtobuslarining Oʻzbekiston Respublikasi bojxona hududiga kirib kelishi va tranziti uchun yigʻimlar stavkalarini birxillashtirish maqsadida Vazirlar Mahkamasi qaror qiladi:

1. 2002-yil 10-yanvardan boshlab Tojikiston Respublikasi har bir yuk avtotransport vositasi va avtobusning Oʻzbekiston Respublikasi bojxona hududiga kirib kelganligi va tranziti uchun:

bitta yuk avtotransport vositasi va avtobusdan — 130 AQSh dollariga;

Tojikiston Respublikasining yuk avtotransport vositasi va avtobuslari Oʻzbekiston Respublikasi hududida 3 sutkadan ortiq boʻlganda har bir kun uchun — 70 AQSh dollari;

Oʻzbekiston Respublikasi hududi orqali yuk avtotransport vositasi va avtobusning uchinchi mamlakatlarga (MDH mamlakatlaridan tashqari) tranziti uchun — 90 AQSh dollariga teng miqdordagi summada milliy valyuta “soʻm”da yigʻimlar belgilansin.

Bunda yigʻimlarni undirish milliy valyuta “soʻm”da naqd pulsiz shaklda yoki tijorat banklari tomonidan bevosita bojxona postlarida Oʻzbekiston Respublikasi Markaziy bankining toʻlov kunidagi kursi boʻyicha naqd pul shaklida amalga oshiriladi.

2. Belgilab qoʻyilsinki, Tojikistonning avtotransport vositalaridan yigʻimlar undirish milliy valyuta “soʻm”da naqd pulsiz shaklda yoki tijorat banklari tomonidan bevosita bojxona postlarida Oʻzbekiston Respublikasi Markaziy bankining toʻlov kunidagi kursi boʻyicha naqd pul shaklida amalga oshiriladi, olingan mablagʻlar Oʻzbekiston Respublikasi Vazirlar Mahkamasi huzuridagi Respublika yoʻl jamgʻarmasi hisob raqamiga oʻtkaziladi.

3. Quyidagilar:

Vazirlar Mahkamasining 1999-yil 15-sentabrdagi 429-son qarorining 2-bandi;

Vazirlar Mahkamasining 1999-yil 20-sentabrdagi 431-f-son farmoyishi 2-bandining Tojikiston Respublikasi yuk avtotransport vositalaridan undiriladigan yigʻimlar stavkalariga oid qismi oʻz kuchini yoʻqotgan deb hisoblansin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R. R. Yunusov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2002-yil 8-yanvar,

11-son