Turizm sohasidagi hamkorlik toʻgʻrisida

04.09.1995

Oʻzbekiston Respublikasi Hukumati bilan Gruziya Respublikasi Hukumati oʻrtasida

Memorandum

Oʻzbekiston Respublikasi Hukumati va Gruziya Respublikasi Hukumati,

iqtisodiy, ijtimoiy va madaniy taraqqiyotda turizmning muhim oʻrin tutishini eʼtiborga olib,

turizmni rivojlantirish uchun qulay sharoitlar yaratish va har ikkala davlat hayoti bilan oʻzaro tanishish maqsadida,

turizm sohasidagi hamkorlikni kengaytirish manfaatlaridan kelib chiqib,

ushbu Memorandumni kuyidagilar haqida tuzishga qaror qildilar:

Tomonlar har ikkala davlat fuqarolarini ikkala mamlakat xalqlarining iqtisodiyot, ijtimoiy rivojlanish, madaniyat sohasidagi yutuqlari, tabiati va diqqatga sazovor joylari hamda tarixiy yodgorliklari va madaniy anʼanalari bilan tanishtirish maqsadida turizm sohasidagi hamkorlikni kengaytirishga koʻmaklashadilar.

Tomonlar teng huquqlilik va oʻzaro foyda koʻrish asosida xorijiy turizmni rivojlantirish sohasida hamkorlik qiladilar hamda turistik harakatni kuchaytirish, turistlarning har ikkala davlat hududiga kirishlari va yurishlari uchun qulay sharoitlar yaratish maqsadida maʼmuriy rasmiyatchiliklarni soddalashtirishga koʻmaklashadilar.

Tomonlar xorijiy va ichki turizmning barcha sohalarida tajriba almashtirishni osonlashtiradilar, har ikkala davlatning turizm boʻyicha hukumat organlari, shuningdek turizm va uni rivojlantirish masalalari bilan shugʻullanuvchi boshqa tashkilotlari va muassasalari oʻrtasidagi hamkorlikka koʻmaklashadilar.

Tomonlar, shuningdek reklama materiallarini eʼlon qilish, axborot, bosma nashrlar, koʻrgazmalar, filmlar ayirboshlash yoʻli bilan turistlar oqimini har ikkala mamlakatga jalb etish uchun turistik axborot yoyilishiga yordam beradilar.

Tomonlar turistik majmualar xodimlarini oʻqitishda oʻzaro yordam koʻrsatadilar va turizm boʻyicha tegishli organlar mutaxassislarini ayirboshlashga koʻmaklashadilar, turizm sohasida investitsiya loyihalarini tashkil etish va amalga oshirishda manfaatdor idoralar va tashkilotlarga yordam koʻrsatadilar.

Tomonlar turistik aloqalarning ahvolini aniqlash va ushbu sohada hamkorlikni rivojlantirish uchun turistik idoralar rahbarlarining har yilgi uchrashuvlarini oʻtkazishni maqsadga muvofiq deb hisoblaydilar.

Tomonlar turizm sohasida samaraliroq hamkorlik qilish maqsadida ikki mamlakat oʻrtasida aviatsiya qatnovlari yoʻlga qoʻyilishiga, tegishlicha har ikkala mamlakatda turistik vakolatxonalar tashkil etilishiga koʻmaklashadilar va ularning faoliyatiga har tomonlama yordam koʻrsatadilar.

Ushbu Memorandum besh yil muddatga tuzilgan va imzolangan paytdan boshlab kuchga kiradi.

Basharti Tomonlardan hech biri mazkur Memorandumning yoki navbatdagi besh yillik davrning amal qilishi muddati tamom boʻlishidan kamida olti oy oldin uning amal qilishini toʻxtatish haqidagi oʻz niyati toʻgʻrisida yozma ravishda maʼlum qilmasa, Memorandumning amal qilish muddati oʻz-oʻzidan keyingi besh yillik davrlarga uzaytiriladi.

1995-yil 4-sentabrda, Toshkent shahrida, har biri oʻzbek, gruzin va rus tillarida boʻlgan ikki nusxada tuzildi, barcha matnlar bir xil kuchga egadir. Mazkur Memorandumni talqin qilish maqsadida rus tilidagi matndan foydalaniladi.

(imzolar)