Oʻzbekiston Respublikasi Xalq taʼlimi vazirligi huzuridagi Respublika oʻquvchi-yoshlar markaziga taʼtillar davrida oʻquvchilarni qabul qilish tartibi toʻgʻrisidagi nizomni tasdiqlash haqida (2597-son)

24.06.2014

OʻZBEKISTON RESPUBLIKASI XALQ TAʼLIMI VAZIRLIGI OʻZBEKISTON RESPUBLIKASI SOGʻLIQNI SAQLASH VAZIRLIGINING

Qarori

[Oʻzbekiston Respublikasi Adliya vazirligi tomonidan 2014-yil 24-iyunda roʻyxatdan oʻtkazildi, roʻyxat raqami 2597]

Oʻzbekiston Respublikasi Vazirlar Mahkamasining 2014-yil 5-maydagi 115-sonli “Oʻzbekiston Respublikasi Xalq taʼlimi vazirligi huzurida Respublika oʻquvchi-yoshlar markazini tashkil etish chora-tadbirlari toʻgʻrisida”gi qaroriga muvofiq Oʻzbekiston Respublikasi Xalq taʼlimi vazirligi va Sogʻliqni saqlash vazirligi qaror qiladi:

1. Oʻzbekiston Respublikasi Xalq taʼlimi vazirligi huzuridagi Respublika oʻquvchi-yoshlar markaziga taʼtillar davrida oʻquvchilarni qabul qilish tartibi toʻgʻrisidagi nizom ilovaga muvofiq tasdiqlansin.

2. Mazkur qaror rasmiy eʼlon qilingan kundan eʼtiboran kuchga kiradi.

Xalq taʼlimi vaziri U. INOYATOV

Toshkent sh.,

2014-yil 16-iyun,

40-son

Sogʻliqni saqlash vaziri A. ALIMOV

Toshkent sh.,

2014-yil 16-iyun,

9-son

Oʻzbekiston Respublikasi Xalq taʼlimi vazirligi, Sogʻliqni saqlash vazirligining 2014-yil 16-iyundagi 40, 9-sonli qaroriga ILOVA

Oʻzbekiston Respublikasi Xalq taʼlimi vazirligi huzuridagi Respublika oʻquvchi-yoshlar markaziga taʼtillar davrida oʻquvchilarni qabul qilish tartibi toʻgʻrisidagi

NIZOM

Mazkur Nizom Oʻzbekiston Respublikasi Vazirlar Mahkamasining 2014-yil 5-maydagi 115-sonli “Oʻzbekiston Respublikasi Xalq taʼlimi vazirligi huzurida Respublika oʻquvchi-yoshlar markazini tashkil etish chora-tadbirlari toʻgʻrisida”gi qaroriga asosan, Oʻzbekiston Respublikasi Xalq taʼlimi vazirligi huzuridagi Respublika oʻquvchi-yoshlar markaziga (bundan buyon matnda Markaz deb yuritiladi) taʼtillar davrida oʻquvchilarni qabul qilish tartibini belgilaydi.

1-bob. Umumiy qoidalar

1. Markaz taʼtillar davrida bolalar sogʻlomlashtirish oromgohi sifatida faoliyat koʻrsatadi.

2. Markazga taʼtillar davrida respublika umumtaʼlim maktablari oʻquvchilari, jumladan ijtimoiy himoyaga muhtoj oila farzandlari, ota-ona qaramogʻidan mahrum boʻlgan bolalar qabul qilinadi.

2-bob. Markazga qabul qilinadigan oʻquvchilar taqsimoti

3. Markazga kuzgi, qishki, bahorgi taʼtillar davrida va yozgi taʼtil davrining har bir qabul mavsumida yaxshi natijalarga erishgan 270 nafardan oʻquvchi qabul qilinadi.

4. Markazga kuzgi, qishki, bahorgi taʼtillar davrida Andijon, Fargʻona va Namangan viloyatlaridagi umumtaʼlim maktablarining 7 — 9-sinf oʻquvchilari qabul qilinadi. Bunda har bir viloyat boʻyicha 7, 8 va 9-sinflarning har biridan 30 nafardan oʻquvchi tanlab olinadi.

5. Markazga yozgi taʼtil davrining har bir qabul mavsumida Qoraqalpogʻiston Respublikasi, viloyatlar va Toshkent shahridagi umumtaʼlim maktablarining 7-8-sinf oʻquvchilari qabul qilinadi. Bunda har bir qabul mavsumida Qoraqalpogʻiston Respublikasi, viloyatlar va Toshkent shahri boʻyicha ularning har biridan 7-sinflardan 9 nafar, 8-sinflardan 10 nafardan, Respublika boʻysunishidagi umumtaʼlim muassasalari 7-8-sinflarining har biridan 2 nafardan oʻquvchi tanlab olinadi.

6. Kuzgi, qishki va bahorgi taʼtillar davrida Markazga qabul qilingan oʻquvchilar yozgi taʼtil davrida Markazga qabul qilinmaydi.

Yozgi taʼtil davrining bir qabul mavsumida dam olgan oʻquvchilar yozgi taʼtil davrining keyingi mavsumlariga takroran qabul qilinmaydi.

7. Kuzgi, qishki, bahorgi taʼtillar davrida hamda yozgi taʼtilning har bir qabul mavsumida oʻquvchilarning Markazda boʻlish muddatlari Oʻzbekiston Respublikasi Xalq taʼlimi vazirligi tomonidan belgilanadi. Bunda oʻquvchilarning Markazda boʻlish muddatlari yozgi taʼtilning har bir qabul mavsumida 10 kundan, kuzgi, qishki va bahorgi taʼtillar davrida 7 kundan kam boʻlmasligi lozim.

3-bob. Markazga oʻquvchilarni tanlab olish mezonlari

8. Markazga ushbu Nizomning 2-bandida nazarda tutilgan oʻquvchilar quyidagi mezonlar asosida tanlab olinadi:

fan olimpiadalari Qoraqalpogʻiston Respublikasi, viloyatlar va Toshkent shahar bosqichlarining 1 — 5-oʻrin sovrindorlari;

umumtaʼlim maktablarida chet tili, informatika va boshqa fanlarni “aʼlo” baholarga oʻzlashtirayotgan oʻquvchilar;

“Umid nihollari”, “Quvnoq startlar”, “Alpomish” va “Barchinoy” sport musobaqalarining umumtaʼlim maktablari, tuman (shahar) bosqichlari 1 — 3-oʻrin sovrindorlari;

umumtaʼlim maktablarining “Eng faol oʻquvchi” nominatsiyasi gʻoliblari;

“Konstitutsiya — erkinligimiz kafolati” respublika tanlovining tuman (shahar) bosqichi 1 — 3-oʻrin sovrindorlari;

“Faol kitobxon oʻquvchi” tanlovining respublika bosqichi 1, 2, 3-oʻrin sovrindorlari;

umumtaʼlim maktablarining iqtidorli va ijodkor (sheʼr yozadigan, rasm chizadigan va h.k.) oʻquvchilari;

xalq taʼlimi organlari va “Barkamol avlod” bolalar maktablari tomonidan tashkil etiladigan turli tadbirlar gʻoliblari va faol ishtirokchilari;

musiqa va sanʼat sohasi boʻyicha xalqaro va respublika tanlovlari gʻoliblari;

umumtaʼlim maktablari “Yoshlar ittifoqi” yoshlar ijtimoiy harakati boshlangʻich tashkilotining faol aʼzolari.

9. Mazkur Nizomning 8-bandida nazarda tutilgan mezonlardan kamida bittasiga mos kelgan oʻquvchi Markazga qabul qilish uchun tanlab olinadi. Oʻquvchilar soni belgilangan oʻrinlar sonidan koʻp boʻlganda nisbatan koʻproq mezonlarga muvofiq keladigan oʻquvchilar tanlab olinadi.

4-bob. Markazga oʻquvchilarni tanlab olish komissiyalari faoliyatini tashkil etish

10. Markazga oʻquvchilarni qabul qilish uchun tanlab olish maqsadida har bir umumtaʼlim maktabi, tuman (shahar) xalq taʼlimi boʻlimlari, Qoraqalpogʻiston Respublikasi Xalq taʼlimi vazirligi, viloyatlar xalq taʼlimi boshqarmalari va Toshkent shahar xalq taʼlimi bosh boshqarmasi hamda Oʻzbekiston Respublikasi Xalq taʼlimi vazirligida Markazga oʻquvchilarni tanlab olish komissiyalari tashkil etiladi.

11. Umumtaʼlim maktabining Markazga oʻquvchilarni tanlab olish komissiyasi (bundan buyon matnda umumtaʼlim maktabi komissiyasi deb yuritiladi) umumtaʼlim maktabi direktorining buyrugʻi bilan quyidagi tarkibda tuziladi:

direktor;

direktorning maʼnaviy-maʼrifiy ishlar boʻyicha oʻrinbosari;

direktorning oʻquv ishlari boʻyicha oʻrinbosari;

Yoshlar ittifoqining umumtaʼlim maktabidagi boshlangʻich tashkiloti yetakchisi;

1 nafar tajribali oʻqituvchi.

12. Markazga oʻquvchilarni tanlab olish boʻyicha tuman (shahar) komissiyasi (bundan buyon matnda tuman (shahar) komissiyasi deb yuritiladi) tuman (shahar) xalq taʼlimi boʻlimi mudirining buyrugʻi bilan quyidagi tarkibda tuziladi:

mudir;

mudir oʻrinbosari;

taʼlim muassasalari faoliyatini tashkil etish shuʼbasi rahbari;

maʼnaviy-axloqiy tarbiya va bolalarni ijtimoiy himoyalash shuʼbasi rahbari;

oʻquv-tarbiya jarayonini metodik taʼminlash shuʼbasi rahbari;

taʼlim sifati monitoringi boʻlimi rahbari.

13. Markazga oʻquvchilarni tanlab olish boʻyicha Qoraqalpogʻiston Respublikasi, viloyatlar va Toshkent shahar komissiyalari (bundan buyon matnda hududiy komissiya deb yuritiladi) quyidagi tarkibda tuziladi:

Qoraqalpogʻiston Respublikasida — Qoraqalpogʻiston Respublikasi xalq taʼlimi vaziri, vazir oʻrinbosari, umumiy oʻrta taʼlim muassasalari faoliyatini muvofiqlashtirish boʻlimi boshligʻi, maʼnaviy-axloqiy tarbiya va qoʻshimcha taʼlim boʻlimi boshligʻi va 1 nafar tajribali xodim;

Viloyatlarda — viloyat xalq taʼlimi boshqarmasi boshligʻi, boshliq oʻrinbosari, umumiy oʻrta taʼlim muassasalari faoliyatini muvofiqlashtirish boʻlimi boshligʻi, maʼnaviy-axloqiy tarbiya va qoʻshimcha taʼlim boʻlimi bosh mutaxassisi va 1 nafar tajribali xodim;

Toshkent shahrida — Toshkent shahar xalq taʼlimi bosh boshqarmasi boshligʻi, boshliqning birinchi oʻrinbosari, boshliqning oʻrinbosari, umumiy oʻrta taʼlim muassasalari faoliyatini muvofiqlashtirish boʻlimi boshligʻi, maʼnaviy-axloqiy tarbiya va qoʻshimcha taʼlim boʻlimi boshligʻi va 1 nafar tajribali xodim.

14. Markazga oʻquvchilarni qabul qilish uchun tanlab olish boʻyicha respublika komissiyasi (bundan buyon matnda Respublika komissiyasi deb yuritiladi) Oʻzbekiston Respublikasi xalq taʼlimi vazirining buyrugʻi bilan 7 kishidan iborat tarkibda tuziladi.

15. Umumtaʼlim maktabi komissiyasi tomonidan kuzgi, qishki, bahorgi taʼtillar davri uchun 7 — 9-sinflarning har biridan 1 nafardan, yozgi taʼtil davrining har bir qabul mavsumi uchun 7-8-sinflarning har biridan 1 nafardan oʻquvchilar mazkur Nizomning 8-bandida belgilangan mezonlar asosida tanlab olinadi va umumtaʼlim maktabi komissiyasining qarori bilan tasdiqlanadi.

16. Umumtaʼlim maktabi komissiyasi tomonidan tanlab olingan oʻquvchilar uchun quyidagi hujjatlar rasmiylashtiriladi:

yashash joyidagi fuqarolarning oʻzini oʻzi boshqarish organi tomonidan berilgan oʻquvchining ijtimoiy holati toʻgʻrisida maʼlumotnoma;

oʻquvchi mazkur Nizomning 8-bandida koʻrsatilgan mezonlarga mos kelishi haqida tegishli hujjatlar nusxalari ilova qilingan umumtaʼlim maktabi tomonidan berilgan tavsifnoma;

oʻquvchining ota-onasi yoki ularning oʻrnini bosuvchi shaxslarning rozilik xati.

17. Umumtaʼlim maktabi komissiyasi tomonidan tanlab olingan oʻquvchilarning hujjatlari va umumtaʼlim maktabi komissiyasining tegishli qarori kuzgi taʼtil davri uchun 5-oktabrgacha, qishki taʼtil davri uchun 2-dekabrgacha, bahorgi taʼtil davri uchun 15-fevralgacha, yozgi taʼtil davrining har bir qabul mavsumi uchun 10-aprelgacha tuman (shahar) komissiyasiga taqdim etiladi.

18. Respublika boʻysunishidagi umumtaʼlim muassasalarida yozgi taʼtil davrining har bir qabul mavsumi uchun tanlab olingan oʻquvchilarning hujjatlari va umumtaʼlim maktabi komissiyasining tegishli qarori 21-aprelga qadar Oʻzbekiston Respublikasi Xalq taʼlimi vazirligiga taqdim etiladi.

19. Tuman (shahar) komissiyasi tomonidan kuzgi, qishki, bahorgi taʼtillar davri uchun 7 — 9-sinflarning har biridan 5 nafardan, yozgi taʼtil davrining har bir qabul mavsumi uchun 7-8-sinflarning har biridan 2 nafardan oʻquvchilar mazkur Nizomning 8-bandida belgilangan mezonlar asosida tanlab olinadi va tuman (shahar) komissiyasining qarori bilan tasdiqlanadi.

20. Tuman (shahar) komissiyasi tomonidan tanlab olingan oʻquvchilarning hujjatlari va tuman (shahar) komissiyasining tegishli qarori kuzgi taʼtil davri uchun 9-oktabrgacha, qishki taʼtil davri uchun 6-dekabrgacha, bahorgi taʼtil davri uchun 19-fevralgacha, yozgi taʼtil davrining har bir qabul mavsumi uchun 17-aprelgacha hududiy komissiyaga taqdim etiladi.

21. Hududiy komissiya tomonidan kuzgi, qishki, bahorgi taʼtillar davri uchun 7 — 9-sinflarning har biridan 40 nafardan, yozgi taʼtil davrining har bir qabul mavsumi uchun 7-sinflardan 12 nafar, 8-sinflardan 13 nafar oʻquvchilar mazkur Nizomning 8-bandida belgilangan mezonlar asosida tanlab olinadi va hududiy komissiyaning qarori bilan tasdiqlanadi.

22. Hududiy komissiya tomonidan tanlab olingan oʻquvchilarning hujjatlari va hududiy komissiyaning tegishli qarori kuzgi taʼtil davri uchun 13-oktabrgacha, qishki taʼtil davri uchun 10-dekabrgacha, bahorgi taʼtil davri uchun 23-fevralgacha, yozgi taʼtil davrining har bir qabul mavsumi uchun 21-aprelgacha Respublika komissiyasiga taqdim etiladi.

23. Respublika komissiyasi tomonidan kuzgi, qishki, bahorgi taʼtillar davri uchun 7 — 9-sinflarning har biridan 90 nafardan, yozgi taʼtil davrining har bir qabul mavsumi uchun 7-sinflardan 128 nafar, 8-sinflardan 142 nafar oʻquvchilar mazkur Nizomning 8-bandida belgilangan mezonlar asosida tanlab olinadi va Respublika komissiyasining qarori bilan tasdiqlanadi.

24. Respublika komissiyasining qarori uch kun ichida Markazga va hududiy komissiyalarga yuboriladi.

25. Quyi turuvchi komissiya tomonidan taqdim etilgan hujjatlar mazkur Nizomda belgilangan talablarga muvofiq boʻlmagan taqdirda, yuqori turuvchi komissiya tomonidan quyi turuvchi komissiyaga mazkur kamchiliklarni bartaraf etish haqida topshiriq berilishi zarur.

5-bob. Oʻquvchilarning Markazga kelish va ketishlarini tashkil qilish

26. Oʻquvchilarning Markazga kelish va ketishlarini tashkil qilish uchun tegishlicha Qoraqalpogʻiston Respublikasi xalq taʼlimi vaziri, viloyat xalq taʼlimi boshqarmasi boshligʻi hamda Toshkent shahar xalq taʼlimi bosh boshqarmasi boshligʻining buyrugʻi bilan 2 nafardan masʼul xodimlar (kuzatuvchilar) tayinlanadi.

27. Respublika boʻysunishidagi umumtaʼlim muassasalaridan tanlab olingan oʻquvchilarning Markazga kelishlari va ketishlarini tashkil qilish Toshkent shahar xalq taʼlimi bosh boshqarmasining masʼul xodimlari (kuzatuvchilari) zimmasiga yuklatiladi.

28. Masʼul xodimlar (kuzatuvchilar) oliy pedagogik maʼlumotga hamda birlamchi shoshilinch yordam koʻrsatish koʻnikmalariga ega boʻlgan, yuzaga kelishi mumkin boʻlgan muammolarni zudlik bilan hal qila oladigan xodimlar orasidan tanlab olinadi.

29. Masʼul xodimlar (kuzatuvchilar) oʻquvchilarni Markazga quyidagi hujjatlar bilan birga olib borishi lozim:

tegishli hududdan Markazga qabul qilinadigan oʻquvchilar roʻyxati;

har bir oʻquvchi uchun sogʻlomlashtirish oromgohiga ketayotgan oʻquvchining tibbiy maʼlumotnomasi (079/x shakl).

30. Oʻquvchilarni Markazga qabul qilib olish va ularni kuzatishni tashkil qilish uchun Markaz direktori, direktor oʻrinbosari, tibbiyot xodimi va 2 nafar pedagog xodimlardan iborat tarkibda Markazning qabul va kuzatuv komissiyasi tuziladi.

31. Markazning qabul va kuzatuv komissiyasi oʻquvchilarni mazkur Nizomning 29-bandida koʻrsatilgan hujjatlar asosida qabul qiladi. Bunda masʼul xodimlar (kuzatuvchilar) tomonidan taqdim etilgan tegishli hududdan Markazga qabul qilinadigan oʻquvchilar roʻyxati Respublika komissiyasining qaroriga muvofiqligi tekshiriladi.

32. Markazga qabul qilish vaqtida har bir oʻquvchi tibbiy tekshiruvdan oʻtkazilib, har bir oʻquvchi uchun bolaning tibbiy kartasi (026/x shakl) ochiladi va mavsum davomida yuritiladi.

33. Markazdan ketayotgan oʻquvchilarga Markazda yashagan davrida ularga koʻrsatilgan tibbiy xizmatlar toʻgʻrisida maʼlumotnoma beriladi.

6-bob. Yakuniy qoidalar

34. Markazga oʻquvchilarni tanlab olish komissiyalari oʻquvchilarning mazkur Nizomda belgilangan tartibda tanlab olinishi hamda zarur hujjatlarning toʻgʻri rasmiylashtirilishi uchun javobgardir.

35. Qoraqalpogʻiston Respublikasi sogʻliqni saqlash vaziri, viloyatlar sogʻliqni saqlash boshqarmalari boshliqlari va Toshkent shahar sogʻliqni saqlash bosh boshqarmasi boshligʻi sogʻlomlashtirish oromgohiga ketayotgan oʻquvchining tibbiy maʼlumotnomasi (079/x shakl) toʻgʻri rasmiylashtirilishini nazorat qiladi.