Tuman mahalliy budjetining 2013-yilgi kutilayotgan ijrosi va 2014-yilga mahalliy budjetning belgilangan asosiy istiqbol koʻrsatkichlari toʻgʻrisida (135/25-4-son)

30.12.2013

Jizzax viloyati xalq deputatlari Gʻallaorol tumani Kengashining

Qarori

Tuman mahalliy budjetining 2013-yilgi daromadlari va xarajatlari boʻyicha asosiy koʻrsatkichlaridan kutilayotgan ijrosi hamda 2014-yilga belgilangan asosiy istiqbol koʻrsatkichlarini muhokama qilib, Oʻzbekiston Respublikasi “Mahalliy davlat hokimiyati toʻgʻrisida”gi Qonunining 24, 25-moddalariga binoan, xalq deputatlari Gʻallaorol tumani Kengashi qaror qiladi:

1. Tuman mahalliy budjetining 2013-yilgi daromadlar va xarajatlar boʻyicha asosiy koʻrsatkichlarining kutilayotgan ijrosi toʻgʻrisidagi tuman hokimining hisoboti maʼlumot uchun qabul qilinsin.

2. Tuman mahalliy budjeti 2014-yil asosiy istiqbol koʻrsatkichlarining daromadlar qismi 21 mlrd. 651 mln. soʻm, xarajatlar qismi 72 mlrd. 556 mln. soʻm, maqsadli subvensiya miqdori 50 mlrd. 905 mln. soʻm qilib belgilanganligi maʼqullansin.

3. Tuman hokimining oʻrinbosari I. Alimqulov, tuman Davlat soliq inspeksiyasi (A. Islomov) va Moliya boʻlimi (S. Xaydarov) birgalikda tuman mahalliy budjeti daromadlar qismini soliq turlari boʻyicha belgilangan rejalarini oshirib bajarishni taʼminlasin.

4. Tuman Moliya boʻlimi (S. Xaydarov)ga:

2014-yilning “Sogʻlom bola yili” deb eʼlon qilinishi munosabati bilan tuman mahalliy budjetining 2014-yil birinchi choragi, yarim yillik va toʻqqiz oylik ijrosi yakunlariga muvofiq rejadan ortiqcha tushadigan daromadlar hisobidan tuman aholisini ijtimoiy himoya qilishga qaratilgan zaruriy tuzatishlarni kiritib borish;

budjet mablagʻlaridan maqsadli foydalanilishi va ularning asossiz sarflanishini bartaraf etish yuzasidan gʻaznachilik ijrosi tizimi vositasida qatʼiy nazorat qilinishini taʼminlash vazifalari yuklatilsin.

5. Tuman hokimi oʻrinbosari I. Alimqulovga mutasaddi tashkilotlar rahbarlari bilan birgalikda budjet daromadlarining tasdiqlangan koʻrsatkichlari bajarilishini taʼminlash, mintaqalarning soliq solish bazasi kengaytirilishi va moliyaviy salohiyati mustahkamlanishi yuzasidan zaruriy chora-tadbirlar koʻrish, budjet mablagʻlaridan maqsadli foydalanilishi ustidan qatʼiy nazorat oʻrnatish vazifalari topshirilsin.

6. Ushbu qaror 2014-yil 1-yanvaridan eʼtiboran kuchga kiradi.

7. Mazkur qaror “Gʻallaorol ovozi” gazetasida eʼlon qilinsin.

8. Ushbu qarorning ijrosini nazorat qilish xalq deputatlari tuman Kengashining mahalliy budjetni shakllantirish va ijro etish, mahalliy soliqlar, yigʻimlarni belgilash, iqtisodiy islohotlarni amalga oshirish va tadbirkorlikni rivojlantirish masalalari boʻyicha doimiy komissiyasi zimmasiga yuklatilsin.

Xalq deputatlari Gʻallaorol tumani Kengashi raisi A. TILABOV

Gʻallaorol sh.,

2013-yil 30-dekabr,

135/25-4-son