Yuridik shaxslarni hisobga olish va identifikatsiya qilishni avtomatlashtirilgan axborot tizimi “Reg-System”da ishlash tartibi toʻgʻrisidagi yoʻriqnomani tasdiqlash haqida (2594-son)

12.06.2014

OʻZBEKISTON RESPUBLIKASI DAVLAT STATISTIKA QOʻMITASINING

Qarori

[Oʻzbekiston Respublikasi Adliya vazirligi tomonidan 2014-yil 12-iyunda roʻyxatdan oʻtkazildi, roʻyxat raqami 2594]

Oʻzbekiston Respublikasining “Rasmiy statistika toʻgʻrisida”gi Qonuni hamda Oʻzbekiston Respublikasi Vazirlar Mahkamasining 2022-yil 28-sentabrdagi 539-son “Korxonalar va tashkilotlarning yagona davlat registrini yuritish va uning asosida davlat xizmatini koʻrsatishga oid normativ-huquqiy hujjatlarni tasdiqlash toʻgʻrisida”gi qaroriga muvofiq buyuraman:

1. Yuridik shaxslarni hisobga olish va identifikatsiya qilishni avtomatlashtirilgan axborot tizimi “Reg-System”da ishlash tartibi toʻgʻrisidagi yoʻriqnoma ilovaga muvofiq tasdiqlansin.

2. Mazkur qaror rasmiy eʼlon qilingan kundan eʼtiboran kuchga kiradi.

Davlat statistika qoʻmitasi raisi B. TURAYEV

Toshkent sh.,

2014-yil 30-may,

3-mb-son

Oʻzbekiston Respublikasi Davlat statistika qoʻmitasining 2014-yil 30-maydagi 3-mb-son qaroriga ILOVA

Yuridik shaxslarni hisobga olish va identifikatsiya qilishni avtomatlashtirilgan axborot tizimi “Reg-System”da ishlash tartibi toʻgʻrisidagi

YOʻRIQNOMA

Mazkur Yoʻriqnoma Oʻzbekiston Respublikasi Milliy statistika qoʻmitasi (bundan buyon matnda Milliy statistika qoʻmitasi deb yuritiladi) va roʻyxatdan oʻtkazuvchi organlar tomonidan yuridik shaxslar toʻgʻrisidagi maʼlumotlarni, yuridik shaxslarni hisobga olish va identifikatsiya qilishning avtomatlashtirilgan axborot tizimi “Reg-System” asosida Korxonalar va tashkilotlarning yagona davlat registriga (bundan buyon matnda KTYADR deb yuritiladi) kiritish jarayonida oʻzaro hamkorlik qilish tartibini belgilaydi.

1-bob. Umumiy qoidalar

1. Ushbu Yoʻriqnomada quyidagi asosiy tushunchalar qoʻllaniladi:

yuridik shaxslarni hisobga olish va identifikatsiya qilishni avtomatlashtirilgan axborot tizimi “Reg-System” (bundan buyon matnda Tizim deb yuritiladi) — yuridik shaxslar toʻgʻrisidagi maʼlumotlarni hisobga olish, toʻplash, yangilash, saqlash, nazorat qilish, tahlil qilish va belgilangan tartibda taqdim etish jarayonlarini avtomatlashtirishga moʻljallangan axborot tizimi;

bildirishnoma — yuridik shaxslarning yagona davlat reyestridagi yuridik shaxs toʻgʻrisidagi maʼlumotlarning elektron shakli boʻlib, uning yordamida KTYADRda yuridik shaxs toʻgʻrisidagi maʼlumotlar yoki undagi oʻzgarishlarni kiritish amalga oshiriladi;

registrator — roʻyxatdan oʻtkazuvchi organning masʼul xodimi;

statistik — davlat statistika organlarining KTYADRni yuritish boʻyicha masʼul xodimi;

tashqi foydalanuvchilar — KTYADRdagi axborotdan manfaatdor boʻlgan yuridik va jismoniy shaxslar.

2. Quyidagilar Tizim foydalanuvchilari hisoblanadi:

Milliy statistika qoʻmitasi — Tizimni ishlashini taʼminlashda hamda unga rasmiy yoki idoraviy sayt (ixtisoslashtirilgan dasturiy modul) orqali kirish huquqini berishda;

roʻyxatdan oʻtkazuvchi organlar — yuridik shaxslarning yagona davlat reyestriga kiritilgan yuridik shaxslar toʻgʻrisidagi maʼlumotlarni taqdim etishda;

tashqi foydalanuvchilar — KTYADRdagi barchaning foydalanishi uchun ochiq boʻlgan axborotlarni olishda.

3. Tizimning kechayu-kunduz ishlashi Milliy statistika qoʻmitasi tomonidan taʼminlanadi va tizim quyidagilarni amalga oshirish imkoniyatini beradi:

davlat statistika organlariga — statistika klassifikatorlaridan foydalangan holda KTYADR axborotlarini kodlashtirishning yagona tizimini qoʻllash orqali, yuridik shaxslar va ularning taʼsis hujjatlariga kiritilgan oʻzgarishlar toʻgʻrisidagi maʼlumotlarni hisobga olish, toʻplash, yangilash, saqlash, nazorat qilish, tahlil qilish va belgilangan tartibda taqdim etish;

roʻyxatdan oʻtkazuvchi organlarga — KTYADRni yuritish uchun zarur boʻlgan maʼlumotlarni taqdim etish hamda ularning avtomatlashtirilgan hisobini olib borish;

tashqi foydalanuvchilarga — Milliy statistika qoʻmitasining rasmiy sayti orqali KTYADRdagi barchaning foydalanishi uchun ochiq boʻlgan axborotlarni olish.

2-bob. Roʻyxatdan oʻtkazuvchi organ tomonidan Tizimga kirish huquqini olish va bekor qilish

4. Roʻyxatdan oʻtkazuvchi organ tomonidan masʼul xodimlarga Tizimga kirish huquqini olish uchun, mazkur Yoʻriqnomaning 1-ilovasida koʻrsatilgan shakl boʻyicha, elektron koʻrinishda Milliy statistika qoʻmitasiga soʻrovnoma yuboriladi.

5. Milliy statistika qoʻmitasi, bir kun muddatda, registratorga yagona login va parolni roʻyxatga olinishini va uning Tizimga kirish huquqini taʼminlaydi hamda roʻyxatdan oʻtkazuvchi organni xabardor qiladi.

6. Agar registrator lavozimidan ozod etilsa yoki boshqa ishga oʻtsa, roʻyxatdan oʻtkazuvchi organ bir kun muddatda, ushbu registratorning Tizimga kirish huquqini bekor qilishni taʼminlash maqsadida, mazkur Yoʻriqnomaning 2-ilovasida koʻrsatilgan shakl boʻyicha, elektron koʻrinishda Milliy statistika qoʻmitasiga xabarnoma yuboradi.

7. Milliy statistika qoʻmitasi tegishli xabarnomani olgandan keyin, 8 ish soati mobaynida Tizimga kirish huquqini bekor qilish boʻyicha tegishli harakatlarni amalga oshiradi.

8. Roʻyxatdan oʻtkazuvchi organlar va davlat statistika organlarining masʼul xodimlari oʻzlariga maʼlum boʻlgan login va parolni uchinchi shaxslarga oshkor qilmasliklari shart.

3-bob. Yuridik shaxslar toʻgʻrisidagi maʼlumotlarni taqdim etish jarayonida roʻyxatdan oʻtkazuvchi organlar va davlat statistika organlarining oʻzaro munosabatlari

9. Registrator tomonidan KTYADRni yuritish uchun zarur boʻlgan, yuridik shaxslarning yagona davlat reyestriga kiritilgan yuridik shaxslar toʻgʻrisidagi maʼlumotlarni taqdim etish, bevosita Internet tarmogʻidagi Milliy statistika qoʻmitasining registr.stat.uz idoraviy saytida bildirishnomani toʻldirish orqali amalga oshiriladi.

10. Tizimga kirish uchun, registrator mazkur Yoʻriqnomaning 4 va 5-bandlarida oʻrnatilgan tartibda berilgan shaxsiy login va paroldan foydalanish orqali avtorizatsiyani amalga oshiradi.

11. Bildirishnomani toʻldirishda quyidagilarga rioya etish talab etiladi:

bildirishnomaning barcha satrlarini toʻldirish;

bildirishnomani toʻldirishda lotin alifbosidan foydalanish;

statistika klassifikatorlaridan foydalangan holda kodlarni biriktirish.

12. Bildirishnomani toʻldirish quyidagi holatlar va muddatlarda amalga oshiriladi:

a) yuridik shaxslarni — tadbirkorlik subyektlarini davlat roʻyxatidan oʻtkazish toʻgʻrisidagi maʼlumotlar, yuridik shaxslarning yagona davlat reyestriga kiritilgandan keyin bir kun mobaynida;

b) yuridik shaxslarni — davlat va nodavlat notijorat tashkilotlarni davlat roʻyxatidan oʻtkazish toʻgʻrisidagi maʼlumotlar, yuridik shaxslarning yagona davlat reyestriga kiritilgandan keyin ikki kun mobaynida;

v) yuridik shaxsning taʼsis hujjatlariga oʻzgartirish va qoʻshimchalar kiritilganligi, qayta tashkil etish, tugatish jarayonidaligi, tugatish jarayonining toʻxtatilganligi, tugatilishi va pochta manzili oʻzgarganligi, shuningdek moliya-xoʻjalik faoliyati amalga oshirilmayotganligi yoki harakatsiz holatga oʻtkazilganligi toʻgʻrisidagi maʼlumotlar, yuridik shaxslarning yagona davlat reyestriga kiritilgandan keyin ikki kun mobaynida;

g) yuridik shaxs yangi tashkil etilgan vaqtda asosiy faoliyat turi kodini biriktirishda yoki xodimlar soni toʻgʻrisidagi maʼlumotni toʻldirishda noaniqlikka yoʻl qoʻyilgan deb hisoblanganda, faoliyat koʻrsatmayotganda, qoʻshib olish yoʻli bilan qayta tashkil etilganda, belgilangan tartibda faoliyati tiklanganda, qayta roʻyxatdan oʻtib, taʼsis hujjatlarida ushbu faoliyat turi asosiy faoliyat turi deb belgilanganda, shuningdek maʼlum faoliyatni amalga oshirish boʻyicha litsenziya olganda yoki litsenziyasi bekor qilinganda uning asosiy faoliyat turi va unda ishlayotganlarning oʻrtacha yillik soni oʻzgarganligi toʻgʻrisidagi maʼlumotlar, yuridik shaxslarning yagona davlat reyestriga kiritilgandan keyin ikki kun mobaynida.

Registrator tomonidan taqdim etilgan maʼlumotlar davlat statistika kuzatuvini olib borish uchun zarur boʻlgan maʼlumotlar hisoblanadi.

13. Korxona va tashkilotning umumdavlat tasnifi kodi (bundan buyon matnda KTUT deb yuritiladi) — registrator tomonidan yuridik shaxsga Tizimdan foydalangan holda olingan, real vaqt rejimida bildirishnomani toʻldirish jarayonida beriladi.

14. Statistik, toʻldirilgan bildirishnoma kelib tushgan paytdan boshlab, bir ish kuni mobaynida registrator tomonidan biriktirilgan statistika kodlarini tekshiradi.

15. Statistik, tekshirish natijalariga koʻra:

a) statistika kodlarini biriktirishda nomuvofiqliklar mavjud boʻlmasa, yuridik shaxs toʻgʻrisidagi maʼlumotlarni KTYADRga kiritadi, bunda Tizim registratorga avtomatlashgan tarzda xabar yuboradi;

b) statistika kodlarini biriktirishda nomuvofiqliklar mavjud boʻlsa, uni bartaraf etish toʻgʻrisida Tizim yordamida registratorga avtomatlashgan tarzda xabar yuboradi.

16. Registrator mazkur Yoʻriqnomaning 15-bandi “b” kichik bandida koʻrsatilgan xabarni olgandan keyin, 8 ish soati mobaynida koʻrsatilgan nomuvofiqliklarni tegishli bildirishnomada bartaraf etadi.

17. Davlat statistika organlari, roʻyxatdan oʻtkazuvchi organlarning mazkur Yoʻriqnomaning 12-bandida koʻrsatilgan maʼlumotlarining soliq organlari, davlat mulkini boshqarish organlari va boshqa davlat organlarining registrlari hamda axborot bazalari, shuningdek statistika kuzatuvlarini amalga oshirishda olingan statistika maʼlumotlari bilan nomuvofiqligi aniqlanganda, roʻyxatdan oʻtkazuvchi organga elektron yoki faksimil aloqa yordamida yuridik shaxs toʻgʻrisidagi maʼlumotlarga aniqlik kiritish toʻgʻrisida soʻrov yuboradilar.

18. Roʻyxatdan oʻtkazuvchi organlar, tegishli soʻrovni olgandan keyin 10 kun mobaynida nomuvofiqlikni bartaraf etadilar, tegishli davlat reyestriga oʻzgartirishlar kiritadilar hamda soʻrovni yuborgan davlat statistika organiga elektron yoki faksimil aloqa yordamida javob yuboradilar.

19. Davlat statistika organi, roʻyxatdan oʻtkazuvchi organning javobini olgandan keyin, bir ish kuni mobaynida KTYADRga oʻzgartirish kiritadi.

4-bob. Tashqi foydalanuvchilarning KTYADRdagi barchaning foydalanishi uchun ochiq boʻlgan axborotlarni olishi

20. KTYADRdagi barchaning foydalanishi uchun ochiq boʻlgan axborotlar quyidagilar hisoblanadi:

identifikatsiyalashtirish koʻrsatkichlari — yuridik shaxsning nomi, KTUT, soliq toʻlovchining identifikatsiya raqami (bundan buyon matnda STIR deb yuritiladi);

klassifikatsiya koʻrsatkichlari — asosiy faoliyat turining xususiyati, joylashgan joyi, tashkiliy-huquqiy shakli, kichik tadbirkorlik subyektlariga mansubligi, davlat va xoʻjalik boshqaruvi organlari tuzilmasiga kirishi;

maʼlumot tusidagi koʻrsatkichlar — pochta manzillari, telefon raqamlari, yuridik shaxslarning taʼsischilari (aksiyadorlik jamiyatlari bundan mustasno), rahbari (soliq organlarining maʼlumoti asosida), davlat roʻyxatidan oʻtkazilgan tartib raqami va sanasi (ustav fondi va taʼsis hujjatlariga oʻzgartirishlar kiritish, yagona davlat reyestridan chiqarish) toʻgʻrisidagi maʼlumotlari.

21. KTYADRdagi barchaning foydalanishi uchun ochiq boʻlgan axborotlar belgilangan tartibda taqdim etiladi.

22. Tashqi foydalanuvchilar, bevosita Milliy statistika qoʻmitasining www.stat.uz rasmiy saytida real vaqt rejimida, soʻralayotgan yuridik shaxsning STIRini kiritib, mazkur yoʻriqnomaning 20-bandning uchinchi xatboshisida koʻrsatilgan axborotlarni bepul olishlari mumkin.

23. KTYADRdagi axborotlar tashqi foydalanuvchilar uchun faqat oʻqish rejimida ochiq boʻladi.

5-bob. Yakuniy qoidalar

24. Mazkur Yoʻriqnoma talablarining buzilishida aybdor boʻlgan shaxslar qonunchilik hujjatlarida belgilangan tartibda javobgarlikka tortiladilar.

25. Ushbu Yoʻriqnoma Oʻzbekiston Respublikasi Aloqa, axborotlashtirish va telekommunikatsiya texnologiyalari davlat qoʻmitasi bilan kelishilgan.

Aloqa va axborotlashtirish va telekommunikatsiya texnologiyalari davlat qoʻmitasi raisi X. MIRZAXIDOV

2014-yil 23-may

Yuridik shaxslarni hisobga olish va identifikatsiya qilishni avtomatlashtirilgan axborot tizimi “Reg-System”da ishlash tartibi toʻgʻrisidagi yoʻriqnomaga 1-ILOVA

(1-ilova Oʻzbekiston Respublikasi Milliy statistika qoʻmitasining 2025-yil 31-iyuldagi 2-mb-sonli qarori (roʻyxat raqami 3673, 26.08.2025-y.) tahririda — Qonunchilik maʼlumotlari milliy bazasi, 26.08.2025-y., 10/25/3673/0780-son)

Yuridik shaxslarni hisobga olish va identifikatsiya qilishni avtomatlashtirilgan axborot tizimi “Reg-System”da ishlash tartibi toʻgʻrisidagi yoʻriqnomaga 2- ILOVA

(2-ilova Oʻzbekiston Respublikasi Milliy statistika qoʻmitasining 2025-yil 31-iyuldagi 2-mb-sonli qarori (roʻyxat raqami 3673, 26.08.2025-y.) tahririda — Qonunchilik maʼlumotlari milliy bazasi, 26.08.2025-y., 10/25/3673/0780-son)