Tijorat banklari tomonidan bank kafolatlarini berish tartibi toʻgʻrisidagi nizomga qoʻshimchalar kiritish haqida (2364-1-son)

03.06.2014

OʻZBEKISTON RESPUBLIKASI MARKAZIY BANKI BOShQARUVINING

Qarori

[Oʻzbekiston Respublikasi Adliya vazirligi tomonidan 2014-yil 3-iyunda roʻyxatdan oʻtkazildi, roʻyxat raqami 2364-1]

Oʻzbekiston Respublikasining “Oʻzbekiston Respublikasining Markaziy banki toʻgʻrisida”gi Qonuniga muvofiq Oʻzbekiston Respublikasi Markaziy banki Boshqaruvi qaror qiladi:

1. Oʻzbekiston Respublikasi Markaziy banki Boshqaruvining 2012-yil 24-martdagi 10/1-son qarori (roʻyxat raqami 2364, 2012-yil 15-may) (Oʻzbekiston Respublikasi qonun hujjatlari toʻplami, 2012-y., 20-son, 223-modda) bilan tasdiqlangan Tijorat banklari tomonidan bank kafolatlarini berish tartibi toʻgʻrisidagi nizomga ilovaga muvofiq qoʻshimchalar kiritilsin.

2. Mazkur qaror rasmiy eʼlon qilingan kundan eʼtiboran kuchga kiradi.

Markaziy bank raisi F. MULLAJONOV

Toshkent sh.,

2014-yil 19-may,

13/1-son

Oʻzbekiston Respublikasi Markaziy banki Boshqaruvining 2014-yil 19-maydagi 13/1-son qaroriga ILOVA

Tijorat banklari tomonidan bank kafolatlarini berish tartibi toʻgʻrisidagi nizomga kiritilayotgan qoʻshimchalar

1. Quyidagi mazmundagi 41-band bilan toʻldirilsin:

“41.Mazkur nizomning 4-bandida belgilangan yigʻindidan quyida keltirilgan tartib va maqsadlarda berilgan kafolat summalari (benefitsiarga toʻlab berilgan mablagʻlar bundan mustasno) chegiriladi:

prinsipal tomonidan kafolat boʻyicha majburiyatlarning bajarilishiga taʼminot sifatida qoʻyilgan pul mablagʻlari. Mazkur pul mablagʻlari kafolat bergan tijorat bankida ochilgan alohida hisobvaraqda kafolat shartnomasi muddati tugagunga qadar saqlanishi lozim;

xorijiy va xalqaro tashkilotlarning kredit liniyalari va qarzlarini jalb qilish bilan bogʻliq boʻlgan kafolatlar;

Oʻzbekiston Respublikasining Prezidenti va Vazirlar Mahkamasi tomonidan qabul qilingan normativ-huquqiy hujjatlar asosida berilgan kafolatlar.”.

2. 9-bandning ikkinchi xatboshisi “qogʻozlar” degan soʻzdan keyin “, pul mablagʻlari” degan soʻzlar bilan toʻldirilsin.