Tumanda 2014-yil uchun ijtimoiy muhofazaga muhtoj va mehnat bozorida teng sharoitlarda raqobatlasha olmaydigan, ish topishda qiynalayotgan shaxslarni ishga joylashtirish uchun (kvota ) ish oʻrinlarini band qilib qoʻyish toʻgʻrisida (834-son)

16.12.2013

Fargʻona viloyati Buvayda tumani hokimining

Qarori

Oʻzbekiston Respublikasi “Aholini ish bilan taʼminlash toʻgʻrisida”gi Qonunning 17-moddasi hamda Oʻzbekiston Respublikasi Vazirlar Mahkamasining 2008-yil 20-avgustdagi “Ijtimoiy muhofazaga muhtoj va ish topishda qiynalayotgan shaxslarni ishga joylashtirish uchun ish oʻrinlarini band qilib qoʻyish toʻgʻrisida”gi 186-sonli qarori bilan tasdiqlangan nizom talablarini toʻliq va sifatli bajarilishini taʼminlash hamda nazorat qilish shuningdek, 2014-yil uchun mazkur ish oʻrinlari miqdorini belgilash maqsadida qaror qilaman:

1. Ijtimoiy muhofazaga muhtoj va ish topishda qiynalayotgan shaxslarni ishga joylashtirish uchun Buvayda tumanida faoliyat olib borayotgan korxona va tashkilotlarda ish oʻrinlarini band qilib qoʻyish 1-ilovaga* muvofiq tasdiqansin.

* 1-ilova berilmaydi.

1-ilovaga muvofiq xodimlarning roʻyxat boʻyicha oʻrtacha sonidan 679 nafarini tashkil etadigan 7 foiz miqdorida, shu jumladan:

oʻn toʻrt yoshgacha bolalari va nogiron bolalari boʻlgan yolgʻiz ota, yolgʻiz ona va koʻp bolali ota-onalar uchun 0,5 foiz (60 nafar);

taʼlim muassasalarini tugatgan yoshlar uchun 2,2 foiz (297 nafar);

muddatli harbiy xizmatdan boʻshatilganlar uchun 0,5 foiz (20 nafar);

nogironlar uchun 3 foiz (291 nafar yuqorida koʻrsatilgan ish oʻrinlariga tumanda 3-guruh nogironlari ishga joylashish boʻyicha talab 38 ta boʻlganligi sababli kelgusida 253 ta ish oʻrinni bitiruvchilar uchun band etib qoʻyilsin);

bandlikka koʻmaklashish va aholini ijtimoiy muhofaza qilish markazlarida ish qidiruvchi sifatida hisobda turgan pensiya yoshiga yaqinlashib qolgan shaxslar uchun 0,3 foiz (5 nafar);

jazoni oʻtash muassasalaridan ozod qilingan, jazoni oʻtayotgan yoki sud qaroriga koʻra tibbiy xarakterdagi majburiy choralar koʻrilgan shaxslar uchun 0,3 foiz (6 nafar) miqdorida ish oʻrinlari zaxirasi belgilansin.

2. Ushbu toifa shaxslar uchun ish oʻrinlari hodimlar tomonidan oʻzlarining mehnat majburiyatlarini toʻsiqlarsiz bajarishini taʼminlaydigan sanitariya-gigiyena normalari va mehnat sharoitlariga muvofiq boʻlishi kerak, shu jumladan:

Nogironlar uchun salomatligi va mehnat faoliyatiga nisbatan belgilangan koʻrsatkichlar hisobga olingan holda xodimga mehnat operatsiyalarini toʻsiqsiz bajarish imkonini beruvchi ish joylari;

Kasb-hunar taʼlimiga ega boʻlmagan yoshlar uchun ular umumtaʼlim muassasalarini tamomlaganlaridan keyin bir yil davomida shogirdlik ish joylari yoki maxsus kasb-hunar tayyorgarligini talab qilmaydigan ish joylari;

Oʻrta-maxsus va kasb-hunar taʼlim muassasalarini tamomlagan yoshlar, shuningdek Oʻzbekiston Respublikasi Qurolli kuchlaridan, Ichki ishlar vazirligi, Favkulodda vaziyatlar vazirligi va Milliy xavfsizlik xizmati qoʻshinlaridan boʻshatilgan shaxslar uchun ular oʻquv yurtlarini tamomlaganlaridan yoki boʻshatilganlaridan keyin bir yil davomida ularning kasb tayyorgarligiga muvofiq keluvchi ish joylari;

Yolgʻiz ota, yolgʻiz ona hamda koʻp bolali ota-onalarga bolalarni tarbiyalash va mehnat majburiyatlarini bajarishni birga qoʻshib, olib borish imkonini beruvchi oʻzgaruvchan jadvalli ish joylari;

Jazoni ijro etish muassasalaridan ozod qilingan yoki sud qarori bilan tibbiy yoʻsindagi majburlov choralariga tortilgan shaxslar uchun maxsus malakani talab qilmaydigan ish joylari.

Band qilib qoʻyish majburiy boʻlgan kasb va lavozimlar:

Oʻrta-maxsus va kasb-hunar taʼlim muassasalarini tamomlagan yoshlar, shuningdek Oʻzbekiston Respublikasi Qurolli kuchlaridan, Ichki ishlar vazirligi, Favqulodda vaziyatlar vazirligi va Milliy xavfsizlik xizmati qoʻshinlaridan boʻshatilgan shaxslarga, ularning kasb-hunar tayyorgarligiga muvofiq keluvchi ish joylari;

3. Tumandagi mavjud korxona, tashkilot va muassasalarning rahbarlariga:

Oʻzbekiston Respublikasi Vazirlar Mahkamasining 2008-yil 20-avgustdagi 186-sonli qarori bilan tasdiqlangan “Ijtimoiy muhofazaga muhtoj va ish topishda qiynalayotgan shaxslarni ishga joylashtirish uchun ish oʻrinlarini band qilib qoʻyish tartibi toʻgʻrisida”gi nizomga muvofiq jtimoiy muhofazaga muhtoj va ish topishda qiynalayotgan shaxslar uchun koʻrsatilgan ish oʻrinlari tashkil etilishini taʼminlash;

Yil boshlangunga qadar oʻn kundan kechikmay ijtimoiy muhofazaga muhtoj va ish qidirishda qiynalayotgan shaxslarni ishga joylashtirish uchun band qilib qoʻyilgan ish oʻrinlari umumiy sonining kamida 25 (yigirma besh) foizi hajmida ish oʻrinlari band qilib qoʻyilishini va tayyor boʻlishini taʼminlasin, ushbu toʻgʻrisida Bandlikka koʻmaklashish va aholini ijtimoiy muhofaza qilish markaziga yil boshlangunga qadar axborot berilsin;

Ijtimoiy muhofazaga muhtoj va ish qidirishda qiynalayotgan shaxslar uchun ish oʻrinlarining qolgan qismini band qilib qoʻyish tashkilot (ish beruvchi) tomonidan kalendar yilning birinchi choragi mobaynida taʼminlasin, bu toʻgʻrida Bandlikka koʻmaklashish va aholini ijtimoiy muhofaza qilish markaziga birinchi chorak tugagandan keyin oʻn kundan kechikmay axborot berish;

Tashkilotlar har chorakda Bandlikka koʻmaklashish va aholini ijtimoiy muhofaza qilish markaziga yuqorida koʻrsatilgan toifadagi shaxslarning ishga joylashtirilishi toʻgʻrisida ushbu nizomga 2-ilovaga muvofiq shakl boʻyicha axborot taqdim etishi;

band qilib qoʻyilgan ish oʻrinlarining belgilangan soni hisobiga ijtimoiy muhofazaga muxtoj va ish qidirishda qiynalayotgan shaxslarni ishga joylashtirish uchun ish oʻrinlarining tayyorligi toʻgʻrisidagi axborotni tashkilot tomonidan takdim etilmaganligiga ham va amalda ularning tayyor emasligiga ham mehnat organiga mahalliy davlat hokimiyati organi qarorining bajarilmaganligi sifatida qarashi lozimligi qayd etilsin.

4. Ushbu qaror bajarilmagan taqdirda tashkilotning mansabdor shaxslariga Ijtimoiy muhofazaga muxtoj va ish topishda qiynalayotgan shaxslarni ishga joylashtirish uchun ish oʻrinlarini band qilib qoʻyish tartibi toʻgʻrisidagi nizomning 15-bandiga muvofiq jarima solinadi.

5. Buvayda tumani Bandlikka koʻmaklashish va aholini ijtimoiy muhofaza qilish markazi (X. Isakulov) bir hafta muddatda ushbu qarorni 1-bandida koʻrsatilgan tashkilot rahbarlari eʼtiboriga yetkazsin va ushbu qarorning bajarilishi ustidan nazoratni taʼminlasin.

6. Belgilansinki, ushbu qaror rasman eʼlon qilingan kundan boshlab kuchga kiradi.

7. Mazkur qarorning bajarilishini nazorat qilish ijtimoiy iqtisodiy masalalar boʻyicha hokim oʻrinbosari A. Otaqoʻziyev zimmasiga yuklatilsin.

Hokim A. RAXMONOV

Buvayda t.,

2013-yil 16-dekabr,

834-son