Oʻzbekiston Respublikasi Tashqi iqtisodiy aloqalar vazirligini tashkil etish toʻgʻrisida (PF-350-son)
21.02.1992
Oʻzbekiston Respublikasi Prezidentining
Farmoni
Oʻzbekiston Respublikasining yagona tashqi iqtisodiy siyosatini oʻtkazish, tashqi bozorda umumdavlat manfaatlarini taʼminlash, chet mamlakatlar bilan iqtisodiy, texnikaviy va savdo hamkorligi samaradorligini oshirish, bu sohada boshqaruvni takomillashtirish va xalqaro miqyosdagi samarali ishda tashqi iqtisodiy faoliyat qatnashchilariga zarur shart-sharoit yaratish maqsadida:
1. Oʻzbekiston Respublikasi Tashqi savdo va xorijiy aloqalar davlat komiteti negizida Oʻzbekiston Respublikasi Tashqi iqtisodiy aloqalar vazirligi tashkil etilsin.
Tashqi iqtisodiy aloqalar vazirligi qoshida Oʻzbekiston Respublikasi xalq xoʻjaligi yutuqlari koʻrgazmasi negizida Tijorat-reklama markazi tashkil etilsin.
Oʻzbekiston Respublikasi Savdo-sanoat palatasining ishlab chiqarish firmalari amalga oshiradigan chetga chiqariladigan va chetdan olinadigan tovarlar ekspertizasini oʻtkazish, chet ellarda koʻrgazmalar va yarmarkalar tashkil etish, shuningdek reklama xizmatlari koʻrsatish vazifalari Oʻzbekiston Respublikasi Tashqi iqtisodiy aloqalar vazirligiga oʻtkazilsin.
2. Quyidagilar Oʻzbekiston Respublikasi Tashqi iqtisodiy aloqalar vazirligi faoliyatining asosiy vazifalari va yoʻnalishlari etib belgilansin:
xorijiy mamlakatlar bilan hamkorlikning respublika uchun ustuvor yoʻnalishlarini belgilash asosida davlat tashqi iqtisodiy siyosatini shakllantirish va oʻtkazish, tashqi savdoni ragʻbatlantirish vositalarini ishlab chiqish;
tashqi iqtisodiy faoliyatni davlat yoʻli bilan tartibga solib turish, tashqi iqtisodiy faoliyatning Oʻzbekiston hududida ish koʻrayotgan qatnashchilari ana shu faoliyatni amalga oshirishning belgilangan tartibiga qanday rioya etayotganliklarini nazorat qilish;
Oʻzbekistonda va undan tashqarida respublikaning tashqi iqtisodiy manfaatlarini ifodalash;
tashqi iqtisodiy aloqalarni rivojlantirish uchun tashkiliy huquqiy va iqtisodiy shart-sharoitlarni yaratish;
Oʻzbekistonni jahon xoʻjalik aloqalariga faol jalb etish yoʻli bilan respublika xalq xoʻjaligi va aholisining xorijiy mamlakatlar mahsulotiga boʻlgan ehtiyojini qondirish;
tashqi iqtisodiy aloqalar tarmoqlari majmuini rivojlantirish, jumladan axborot tizimlarini vujudga keltirish, transport-ekspeditorlik xizmatini taʼminlash, chetga chiqariladigan va chetdan olinadigan tovarlarga shahodatnoma berish;
respublikaning chetga mol chiqarish quvvatini oshirishga oid takliflarni ishlab chiqish;
respublika iqtisodiyotiga xorijiy sarmoyalarni jalb etish va ulardan samarali foydalanish, jumhuriyatning mablagʻlarini chet ellarda oqilona joylashtirish;
jumhuriyatda, shuningdek chet ellarda Oʻzbekiston tashqi iqtisodiy faoliyati qatnashchilarining manfaatlarini himoya qilish, Mustaqil Davlatlar Hamdoʻstligiga aʼzo boʻlgan davlatlar bilan, shuningdek boshqa xorijiy mamlakatlar bilan tashqi iqtisodiy aloqalar masalalarida hamjihatlikni taʼminlash.
3. Belgilab qoʻyilsinki, Oʻzbekiston Respublikasi Tashqi iqtisodiy aloqalar vazirligining oʻz vakolati doirasida qabul qilingan qarorlari vazirliklar, idoralar, konsernlar, uyushmalar, korxonalar va muassasalar, mahalliy hokimiyat va boshqaruv idoralari, mansabdor shaxslar va fuqarolar ijro etishi uchun majburiydir.
4. Oʻzbekiston Respublikasi Prezidenti huzuridagi Vazirlar Mahkamasi ikki hafta muddat ichida Oʻzbekiston Respublikasi Tashqi iqtisodiy aloqalar vazirligi faoliyatini tashkil etish toʻgʻrisida qaror qabul qilsin, vazirlik tuzilmasini va uning haqidagi nizomni tasdiqlasin, respublika hukumatining meʼyoriy hujjatlarini ushbu Farmonga muvofiqlashtirsin.
5. “Oʻzbekiston SSR Tashqi savdo va xorijiy aloqalar davlat komitetini tashkil etish toʻgʻrisida” 1990-yil 12-iyuldagi Farmon oʻz kuchini yoʻqotgan deb hisoblansin.
Oʻzbekiston Respublikasining Prezidenti I. KARIMOV
Toshkent sh.,
1992-yil 21-fevral,
PF-350-son