“Jinoiy jazolarning liberallashtirilishi munosabati bilan Oʻzbekiston Respublikasining Jinoyat, Jinoyat- protsessual kodekslari hamda Maʼmuriy javobgarlik toʻgʻrisidagi kodeksiga oʻzgartishlar va qoʻshimchalar kiritish haqida”gi Oʻzbekiston Respublikasi Qonunini amalga kiritish tartibi toʻgʻrisida (255-II-son)

29.08.2001

Oʻzbekiston Respublikasi Oliy Majlisining

Qarori

Oʻzbekiston Respublikasi Oliy Majlisi qaror qiladi:

1. “Jinoiy jazolarning liberallashtirilishi munosabati bilan Oʻzbekiston Respublikasining Jinoyat, Jinoyat-protsessual kodekslari hamda Maʼmuriy javobgarlik toʻgʻrisidagi kodeksiga oʻzgartishlar va koʻshimchalar kiritish haqida” Oʻzbekiston Respublikasi Qonuni (bundan buyon matnda Qonun deb yuritiladi) matbuotda eʼlon qilingan kundan eʼtiboran amalga kiritilsin.

2. Qonun amalga kiritilgunga qadar hukm qilingan, sodir etgan qilmishlari Qonunga binoan jinoiy deb topilmaydigan shaxslar jazoning barcha turidan (asosiy va qoʻshimcha jazolardan) ozod qilinsin.

3. Qonunga muvofiq jinoiy deb topilmaydigan qilmishlarga doir surishtiruv, dastlabki tergov organlari va sudlarning yuritishidagi ishlar tugatilsin.

4. Qonun amalga kiritilgunga qadar hukm qilingan, jazoni oʻtab boʻlmagan shaxslarga nisbatan tayinlangan jazo turlari va choralari, basharti Qonunning tegishli moddasida nazarda tutilganiga nisbatan ogʻirroq boʻlsa, Qonunga muvofiq holga keltirilsin. Jazo chorasi sudlar tomonidan Qonunning tegishli moddasida belgilangan eng koʻp jazo chorasiga qadar kamaytiriladi.

5. Ozodlikdan mahrum qilish tariqasidagi jazoni ijro etish muassasalarida va tarbiya koloniyalarida ozodlikdan mahrum qilish tariqasidagi jazoni oʻtayotgan shaxslarni saqlash tartibi Qonunga muvofiq holga keltirilsin.

6. Ushbu qarorning 2-moddasiga muvofiq jazodan ozod qilingan shaxslar, shuningdek Qonunga muvofiq jinoiy deb topilmaydigan qilmishlar uchun hukm qilinib, jazoni ilgari oʻtab chiqqan yoki jazoni oʻtashdan muddatidan ilgari ozod qilingan shaxslar sudlanmagan deb hisoblansin.

7. Belgilab qoʻyilsinki, qoʻshimcha jazo tariqasida mol-mulkning musodara etilishini nazarda tutuvchi, lekin Qonun amalga kiritilgan kunga qadar ijro etilmagan sud hukmlari ijro etilishi mumkin emas.

8. Ushbu qarorning ijrosi:

1) 2, 4, 5 va 7-bandlarda uqtirilgan shaxslarga nisbatan — ana shu shaxslarga nisbatan hukmlarni ijro etuvchi organlarning taqdimnomasiga binoan jazoni oʻtash joylaridagi sudlar zimmasiga;

2) 3-bandga muvofiq tugatilishi lozim boʻlgan ishlarga nisbatan — surishtiruv, dastlabki tergov organlari va sudlar zimmasiga yuklatilsin.

9. Ushbu qaror 2—8-bandlarining ijrosi Qonun amalga kiritilgan kundan eʼtiboran uch oylik muddat ichida amalga oshirilsin.

10. Oʻzbekiston Respublikasi Oliy sudi, Oʻzbekiston Respublikasi Bosh prokuraturasi va Oʻzbekiston Respublikasi Ichki ishlar vazirligi ushbu qarorning ijrosini taʼminlasinlar.

Oʻzbekiston Respublikasi Oliy Majlisining Raisi E. XALILOV

Toshkent sh.,

2001-yil 29-avgust,

255-II-son