Oʻzbekiston Respublikasi fan va texnika davlat komiteti (Oʻzbekiston Respublikasi FTDK)ni tashkil qilish toʻgʻrisida (PF-345-son)

18.02.1992

Oʻzbekiston Respublikasi Prezidentining

Farmoni

Fan va texnika sohasida davlat siyosatini amalga oshirish, ijtimoiy-iqtisodiy muammolarni hal etishda respublikaning ilmiy quvvatidan samarali foydalanish, fan va ishlab chiqarishning hamkorlik vositasini shakllantirish, patent-litsenziya va ilmiy axborot faoliyatini takomillashtirish, xalqaro ilmiy texnikaviy hamkorlikni rivojlantirish maqsadida va Oʻzbekiston fan-texnika jamoatchilikning takliflarini eʼtiborga olib:

1. Iqtisodiyot komiteti va unga qarashli ilmiy tashkilotlar negizida hamda ular soni va mablagʻlari hisobiga Oʻzbekiston Respublikasining Fan va texnika davlat komiteti (Oʻzbekiston Respublikasi FTDK) tashkil qilinsin.

FTDK huzurida respublika fan-texnika va patent-litsenziya axboroti markazi (OʻzFTPA) tashkil qilinsin.

2. Quyidagilar Oʻzbekiston Respublikasi Fan va texnika davlat komitetining bosh vazifalari va faoliyati yoʻnalishlari qilib belgilansin:

fan-texnika taraqqiyotining respublika uchun ustuvor yoʻnalishlarini belgilash, fan va texnikani ragʻbatlantirish vositalarini ishlab chiqish asosida fan-texnika sohasidagi davlat siyosatini shakllantirish va amalga oshirish;

katta ilmiy-texnikaviy dasturlarni ishlab chiqish va amalga oshirish, istiqbolli yechimlar va texnologiyalarni ishlab chiqarishga joriy etishni tashkil qilish yuzasidan ilmiy-tadqiqot hamda loyiha-konstruktorlik tashkilotlari, korxonalar, birlashmalar faoliyatining muvofiqlashtirilishini taʼminlash, fanning ishlab chiqarish bilan aloqasini mustahkamlash;

fan va texnika sohasi tarmoqlari majmuini, fan bilan ishlab chiqarishning ilgʻor hamkorlik shakllarini tashkil etish va rivojlantirish, yuqori malakali ilmiy kadrlar tayyorlashni takomillashtirish;

respublikaning xalqaro ilmiy-texnikaviy hamkorlikda qatnashishi ustuvor yoʻllari va asosiy yoʻnalishlarini ishlab chiqish, chet mamlakatlar, ilmiy va oʻquv markazlari hamda boshqa tashkilotlar bilan fan, texnika sohasida va kadrlar tayyorlashda aloqalarni muvofiqlashtirish va ularni kengaytirishga koʻmaklashish;

fan va texnikaning ustuvor yoʻnalishlari boʻyicha ilmiy-texnikaviy loyihalar va dasturlarni davlat ekspertizasidan oʻtkazishni tashkil qilish va shu ishlarni amalga oshirish, fan va texnika yutuqlari joriy etilishini, xalq xoʻjaligi tarmoqlarini ilmiy-texnikaviy darajasini nazorat qilish;

fan va texnika sohasida mualliflik huquqlari muhofaza qilinishini, kashfiyotlar, ixtirolar, sanoat namunalari va tovar belgilaridan Oʻzbekiston Respublikasida samarali foydalanishni taʼminlaydigan tizimni vujudga keltirish;

patent-litsenziya ishlarini tashkil qilish va muvofiqlashtirish, respublika patent jamgʻarmasini tuzish, patentlash masalalarida korxonalar va tashkilotlarga maslahatlar hamda uslubiy yordam berish;

axborot tizimlari va axborot bozorini shakllantirish yuzasidan respublikada oʻtkazilayotgan ishlarni muvofiqlashtirish, Vatanimizdagi va chet ellardagi ilm-fan, texnika hamda texnologiyalarning eng yaxshi yutuqlari toʻgʻrisida boshqaruv organlarini, korxonalar, ilmiy va oʻquv tashkilotlarini axborot bilan taʼminlash.

3. Belgilab qoʻyilsinki, Oʻzbekiston Respublikasining Fan va texnika davlat komiteti oʻz huquq, doirasida qabul qilgan qarorlar kimga boʻysunishdan va mulkchilik shakllaridan qatʼi nazar, vazirliklar, idoralar, konsernlar, uyushmalar, korxonalar, ilmiy tashkilotlar va muassasalar uchun majburiydir.

4. Oʻzbekiston Respublikasi Prezidenti huzuridagi Vazirlar Mahkamasi ikki hafta ichida Oʻzbekiston Respublikasi Fan va texnika davlat komitetining faoliyatini tashkil etish masalalariga doir qarorni qabul qilishi, Komitet tuzilmasini va uning haqidagi Nizomni tasdiqlashi zarur.

Oʻzbekiston Respublikasining Prezidenti I. KARIMOV

Toshkent sh.,

1992-yil 18-fevral,

PF-345-son