Arxivlarning asosiy ish turlari boʻyicha vaqt va ishlab chiqarishning namunaviy meʼyorlarini tasdiqlash haqida (100-son)

22.04.2014

Oʻzbekiston Respublikasi Vazirlar Mahkamasining

qarori

“Arxiv ishi toʻgʻrisida”gi Oʻzbekiston Respublikasining Qonuni ijrosini taʼminlash maqsadida Vazirlar Mahkamasi qaror qiladi:

1. Arxivlarning asosiy ish turlari boʻyicha vaqt va ishlab chiqarishning Namunaviy meʼyorlari ilovaga muvofiq tasdiqlansin.

2. Oʻzbekiston Respublikasi “Oʻzarxiv” agentligi:

Arxivlarning asosiy ish turlari boʻyicha vaqt va ishlab chiqarishning Namunaviy meʼyorlarining joriy etilishini doimiy nazorat qilish;

“Oʻzarxiv” agentligining rasmiy veb-saytida erkin foydalanish uchun Arxivlarning asosiy ish turlari boʻyicha vaqt va ishlab chiqarishning Namunaviy meʼyorlarini joylashtirish taʼminlasin.

3. Mazkur qarorning ijrosini nazorat qilish Oʻzbekiston Respublikasi Bosh vazirining oʻrinbosari — Axborot tizimlari va telekommunikatsiyalarini rivojlantirish kompleksi rahbari zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2014-yil 22-aprel,

100-son

Vazirlar Mahkamasining 2014-yil 22-apreldagi 100-son qaroriga ILOVA

Arxivlarning asosiy ish turlari boʻyicha vaqt va ishlab chiqarishning

NAMUNAVIY MEʼYORLARI

I. Umumiy qoidalar

1. Mazkur Arxivlarning asosiy ish turlari boʻyicha vaqt va ishlab chiqarishning Namunaviy meʼyorlari (keyingi oʻrinlarda — Namunaviy meʼyorlar) “Arxiv ishi toʻgʻrisida”gi Oʻzbekiston Respublikasining Qonuniga muvofiq arxivlarning asosiy faoliyat turlarining ishlab chiqarish va vaqt normalarini tartibga soladi.

2. Ushbu Namunaviy meʼyorlarda quyidagi asosiy tushunchalar qoʻllaniladi:

arxiv hujjatlari — fuqarolar, jamiyat va davlat uchun ahamiyati bois saqlanishi lozim boʻlgan matnli, qoʻlyozma va mashinada oʻqiladigan hujjatlar, ovozli yozuvlar, videoyozuvlar, kinolentalar, fotosuratlar, fotografiya plyonkalari, chizmalar, sxemalar, xaritalar, shuningdek boshqa moddiy jismlardagi yozuvlar;yozuvlar;

kataloglar — arxiv fondlari, saqlov birligi/hisob birligi, arxiv hujjatlari (yoki ularning qismlari) mazmuni toʻgʻrisidagi maʼlumotlar mavzu yoki soha boʻyicha belgilangan tasniflash sxemasi asosida joylashtirilgan arxivning fondlararo arxivmaʼlumotnomasi;

jamlash — arxivni arxiv hujjatlari bilan muntazam toʻldirib borish maqsadida amalga oshiriluvchi arxiv fondi doirasida arxiv hujjatlarini fondlashtirish hamda tashkil etish va jamlash manbalaridan ularni qabul qilib olish maqsadida yoʻnalishi va darajasi boʻyicha zaruriy arxiv hujjatlari bilan toʻldirib borishga doir ishlar majmui;

ilmiy-maʼlumotnoma apparati — arxiv hujjatlarining tarkibi va mazmuni toʻgʻrisidagi yagona ilmiy-uslubiy asosda tuzilgan, bir-biri bilan bogʻliq, oʻzaro toʻldiruvchi arxiv maʼlumotnomalari majmui (arxivning ilmiy-maʼlumotnoma tizimi);

yigʻma jildlar (hujjatlar) roʻyhati — saqlov birliklari/hisob birliklari tarkibi va mazmunini ochib berish, ularning fondlar ichida tizimlashtirilishi va hisobini mustahkamlash uchun moʻljallangan arxiv maʼlumotnomasi;

foydalanuvchi — arxiv hujjatlaridan zarur maʼlumotlarni olish va ulardan foydalanish uchun arxivga murojaat etuvchi yuridik yoki jismoniy shaxs;

tartibga keltirish — arxiv roʻyxatlarini tuzish, yigʻmajildlarni shakllantirish va rasmiylashtirish, hujjatlarning qimmatliligini aniqlash ekspertizasini oʻtkazishni oʻz ichiga olgan hujjatlarni ilmiy-texnikaviy ishlash va arxivlarda saqlash uchun tayyorlash, shuningdek arxiv roʻyxatlarini tuzish boʻyicha ishlar majmui;

arxiv hujjatlarining hisobi — arxivlar tomonidan arxiv hujjatlari va arxiv fondlarining muntazam ravishda kelib tushishi, mavjudligi va holatini belgilangan birliklar asosida aniqlash hamda ularni hisob hujjatlarida aks ettirish boʻyicha tizimli monitoring olib borish.

3. Ushbu Namunaviy normalarda quyidagi qisqartmalar qoʻllaniladi:

MB — maʼlumotlar bazasi;

IMA — ilmiy-maʼlumotnoma apparati;

AQ — alohida qimmatli;

SHEHM — shaxsiy elektron-hisob mashinasi;

MAF — maʼlumotnoma-axborot fondi;

SF — sugʻurta fondi;

ETK — ekspert-tekshiruv komissiyasi;

ETUK — ekspert-tekshiruv uslubiy komissiyasi;

MEK — markaziy ekspert komissiyasi.

4. Ushbu Namunaviy meʼyorlar boshqaruv, ilmiy-texnik hujjatlar, kinofotofono hujjatlar, shaxsiy kelib chiqish va shaxsiy tarkib hujjatlarini saqlaydigan davlat, shuningdek nodavlat arxivlariga (keyingi oʻrinlarda — arxiv) tatbiq etiladi.

5. Ushbu Namunaviy meʼyorlar quyidagilar:

arxiv, uning tarkibiy boʻlinmalari va aniq ijrochilari faoliyatini rejalashtirishda, asosiy xodimlarning zarur sonini hisoblash va asoslash, arxivlar va ularning tarkibiy boʻlinmalari ishi toʻgʻrisida hisobot tuzishda sarflangan ish vaqtini tahlil qilish uchun ishning murakkabligi begilanadi;

40 soatlik ish haftasida 8 soat davom etadigan ish kuni uchun oʻrnatiladi;

tayyorgarlik va yakuniy ishlarning vaqti (topshiriqni bajarishga tayyorgarlik koʻrish uchun ishlatiladigan vaqt yoki uni yakunlash bilan bogʻliq harakatlar), yordamchi ishlar (asosiy ishning bajarilishini taʼminlaydigan harakatlar uchun ishlatiladigan vaqt) va ish joyiga texnik xizmat koʻrsatishni tashkil etish (ish joyini tashkil qilish va unga gʻamxoʻrlik qilish uchun ishlatiladigan vaqt)hisobga olinadi;

roʻyhatlar, kartochkalar, axborot xatlari, maʼlumotnomalar va boshqa hujjatlarning bir tilda tuzilishini nazarda tutadi.

6. Meʼyorlarni hisoblashda ish kuni davomida 20 daqiqa davom etadigan dam olish va shaxsiy ehtiyojlar uchun vaqt hisobga olinadi (ish kuni davomida belgilangan tanaffuslar uchun vaqtni hisobga olmagan holda).

7. Mazkur Namunaviy meʼyorlar maqsadlari uchun saqlov birligi, hujjat, bosma varaq, mashinkada yoziladigan varaq, varaq, kartochka, xarita, mikrofilm, mikrofish, quti, bogʻlam, boks, rolik va boshqa asosiy oʻlchov birliklari qoʻllaniladi.

8. Hujjatlarni saqlov birligi deganda 250 varaqqacha hajmda boʻlgan 210×297 mm (A4 format) oʻlchamdagi qogʻoz asosdagi yigʻmajild, shaxsiy kelib chiqish hujjatlari uchun — xuddi shu oʻlchamdagi 50 varaq tushuniladi.

Koʻrsatilgan miqdordan koʻp yoki kam varaqlar saqlovchi yigʻmajildlar mos ravishda 250 yoki 50 varaqqacha hajm bilan bitta shartli yigʻmajildga hisoblanadi.

9. 10 (5) saqlov birligini oʻz ichiga olgan quti (bogʻlam) ish hajmini oʻlchash birligi sifatida hisoblanadi.

10. Varaqning ish hajmini oʻlchash birligi sifatida arxiv ishi varaqasi birligi olinadi (varaqning bir tomonidagi matn).

11. Bitta bosma varaqning ish hajmini oʻlchash birligi sifatida 40 ming bosma belgini oʻz ichiga olgan material olinadi, bu har biri 2450 belgidan iborat 1,5 oraliqda bosilgan 16-17 yozuvli sahifani tashkil etadi.

12. Turli xil oʻlchov birliklariga ega boʻlgan bir nechta operatsiyalardan iborat boʻlgan ishlar uchun meʼyorlarda ikkita oʻlchov birligi oʻrnatiladi, ulardan biri (hisoblagich) ishning yakuniy natijasiga yoʻnaltirilgan, ikkinchisi (maxraj) ishning borishini tezkor nazorat qilish vositasi boʻlib xizmat qiladi.

13. Mehnat unumdorligi tarixiylik davriga yoki hujjatlarning xususiyatiga bogʻliq boʻlgan ishlar uchun hujjatlarning kelib chiqishi (sovet davrigacha (tarixiy), sovet va mustaqillik davri, boshqaruv hujjatlari, shaxsiy kelib chiqishi va shaxsiy tarkibi hujjatlari) asosida tabaqalashtirilgan normalar belgilanadi.