Bolalar sogʻlomlashtirish oromgohlari toʻgʻrisidagi nizomni tasdiqlash haqida (2572-son)

07.04.2014

OʻZBEKISTON RESPUBLIKASI XALQ TAʼLIMI VAZIRLIGI OʻZBEKISTON RESPUBLIKASI SOGʻLIQNI SAQLASh VAZIRLIGINING

Qarori

[Oʻzbekiston Respublikasi Adliya vazirligi tomonidan 2014-yil 7-aprelda roʻyxatdan oʻtkazildi, roʻyxat raqami 2572]

Oʻzbekiston Respublikasi Vazirlar Mahkamasining 2012-yil 10-martdagi 67-son “Bolalarning dam olishini tashkil etish va sogʻlomlashtirish tizimini yanada takomillashtirish chora-tadbirlari toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2012-y., 11-son, 118-modda) muvofiq Oʻzbekiston Respublikasi Xalq taʼlimi vazirligi va Sogʻliqni saqlash vazirligi qaror qiladilar:

1. Bolalar sogʻlomlashtirish oromgohlari toʻgʻrisidagi nizom ilovaga muvofiq tasdiqlansin.

2. Oʻzbekiston Respublikasi Xalq taʼlimi vazirligi va Sogʻliqni saqlash vazirligining 2011-yil 18-maydagi 15, 11-son “Bolalar sogʻlomlashtirish oromgohlari haqidagi nizomni tasdiqlash toʻgʻrisida”gi qarori (roʻyxat raqami 2235, 2011-yil 10-iyun) (Oʻzbekiston Respublikasi qonun hujjatlari toʻplami, 2011-y., 24-son, 251-modda) oʻz kuchini yoʻqotgan deb hisoblansin.

3. Mazkur qaror rasmiy eʼlon qilingan kundan eʼtiboran kuchga kiradi.

Xalq taʼlimi vaziri U. INOYATOV

Toshkent sh.,

2014-yil 11-mart,

9-son

Sogʻliqni saqlash vaziri A. ALIMOV

Toshkent sh.,

2014-yil 11-mart,

3-son

Oʻzbekiston Respublikasi Xalq taʼlimi vazirligi va Sogʻliqni saqlash vazirligining 2014-yil 11-martdagi 9, 3-son qaroriga ILOVA

Bolalar sogʻlomlashtirish oromgohlari toʻgʻrisidagi

NIZOM

Mazkur Nizom Oʻzbekiston Respublikasining “Taʼlim toʻgʻrisida”gi hamda “Kasaba uyushmalari, ularning huquqlari va faoliyatining kafolatlari toʻgʻrisida”gi qonunlariga, Oʻzbekiston Respublikasi Vazirlar Mahkamasining 2012-yil 10-martdagi 67-son “Bolalarning dam olishini tashkil etish va sogʻlomlashtirish tizimini yanada takomillashtirish chora-tadbirlari toʻgʻrisida”gi qaroriga muvofiq, bolalar sogʻlomlashtirish oromgohlarining (bundan buyon matnda oromgoh deb yuritiladi) maqsadi, vazifalari va funksiyalarini hamda ularning faoliyatini tashkil etish tartibini belgilaydi.

1-bob. Umumiy qoidalar

1. Oromgoh sanitariya-gigiyena, sanitariya-epidemiologiya hamda xavfsizlik talablariga toʻliq javob beradigan va qulay sharoitda bolalarning belgilangan kundalik hayot tarziga rioya etishi, sifatli ovqatlanishi, ijodiy salohiyatining rivojlanishi, sogʻlom turmush tarzi koʻnikmalarining shakllanishi, dam oldirilishi, salomatliklarining tiklanishi va mustahkamlanishi, jismoniy tarbiya, sport va turizm bilan shugʻullanishlarini taʼminlovchi sogʻlomlashtirish muassasasi hisoblanadi.

2. Ushbu Nizom talablari kasaba uyushmalari, davlat organlari va ular tizimidagi tashkilotlar tasarrufida boʻlgan oromgohlar faoliyatiga, shuningdek kasaba uyushmalari mablagʻlari yoʻnaltiriladigan boshqa oromgohlar faoliyatiga nisbatan tatbiq etiladi.

3. Oromgoh oʻz faoliyatida Oʻzbekiston Respublikasining Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, ushbu Nizom va boshqa qonun hujjatlariga hamda oʻz ustaviga amal qiladi.

4. Oromgoh yuridik shaxs hisoblanadi, oʻz ustaviga, mustaqil balansiga, bank hisobvaragʻiga, oʻz nomi yozilgan muhrga, yuridik manzili koʻrsatilgan shtamp va blankalarga ega boʻladi.

5. Oromgoh davlat boshqaruvi va mahalliy davlat hokimiyati organlari hamda boshqa tashkilotlar (bundan buyon matnda Balansda saqlovchi deb ataladi) tomonidan tashkil etiladi.

Oromgoh bir nechta Balansda saqlovchi va kasaba uyushmalari organlarining birgalikdagi mablagʻlari asosida tashkil etilishi mumkin.

2-bob. Oromgohning maqsadi, vazifalari va funksiyalari

6. Oromgohning maqsadi — bolalarning oʻqishdan tashqari vaqtini sermazmun oʻtkazish, ularning ham jismoniy, ham ruhiy jihatdan hordiq chiqarishlarini taʼminlash, ular ongiga milliy gʻoyani, vatanparvarlik tuygʻularini hamda milliy va umuminsoniy qadriyatlarni singdirish orqali har tomonlama barkamol avlodni voyaga yetkazishdan iboratdir.

7. Quyidagilar oromgohning asosiy vazifalari hisoblanadi:

bolalarning dam olishi va sogʻlomlashtirilishini tashkil etish;

bolalarning jismoniy, intellektual, maʼnaviy va axloqiy kamol topishiga koʻmaklashish;

bolalarni oʻzbek xalqining tarixiy va milliy anʼanalari hamda maʼnaviy qadriyatlari bilan tanishtirish;

bolalarda “ommaviy madaniyat”ning turli illatlariga qarshi mafkuraviy immunitetni shakllantirish, ular ongiga umuminsoniy va milliy qadriyatlarni singdirish;

bolalarning boʻsh vaqtlarini mazmunli tashkil etish;

oromgohning moddiy-texnik taʼminotini mustahkamlash.

Oromgoh qonun hujjatlariga muvofiq boshqa vazifalarni ham amalga oshirishi mumkin.

8. Oromgoh oʻziga yuklatilgan vazifalarga muvofiq quyidagi funksiyalarni amalga oshiradi:

bolalarning har tomonlama kamol topishi, xususan, ularning shaxsi, qiziqishlari, iqtidorining rivojlanishi, mustaqil bilim olishi va ijodiy mehnat qilishi uchun zarur shart-sharoitlar yaratadi;

bolalarning ehtiyojlariga muvofiq ularning ijodiy imkoniyatlarini rivojlantirishga qaratilgan toʻgaraklar tashkil etadi;

fan asoslari boʻyicha qoʻshimcha taʼlim xizmatlari koʻrsatadi;

bolalar bilan sanʼat va hunarmandchilik yoʻnalishlari boʻyicha mashgʻulotlar oʻtkazadi;

qobiliyatli, iqtidorli bolalarni aniqlaydi, ularning shaxsini rivojlantirishga qaratilgan musobaqalar, texnik, badiiy ijodiyot, oʻlkashunoslik, ekologiya va boshqa yoʻnalishlardagi tadbirlarni tashkil etadi;

sogʻlomlashtirish mavsumidan tashqari vaqtlarda shartnoma asosida turli tashkilotlar bilan seminarlar, sport musabaqalari va boshqa tadbirlarni oʻtkazadi, shuningdek oʻz bazasida dam olish maskanlarini tashkil etadi.

Oromgoh qonun hujjatlariga muvofiq oʻz maqsad va vazifalaridan kelib chiqqan holda boshqa funksiyalarni ham amalga oshirishi mumkin.

3-bob. Oromgoh faoliyatini tashkil etish

1-§. Umumiy qoidalar

9. Vazirlar Mahkamasining 2012-yil 10-martdagi 67-son qarori bilan tasdiqlangan Respublika oromgohlarida bolalarning dam olishini tashkil etish va sogʻlomlashtirish konsepsiyasiga muvofiq, oromgohlar 2 turga ajratiladi:

1) statsionar oromgohlar — statsionar baza asosida qurilgan yoki vaqtinchalik ijaraga olingan obyektlarda tashkil etilib, unda bolalar smena davomida yashaydi. Mazkur oromgohlar statsionar oromgohlar joylashuvi, taʼminoti va kun tartibini tashkil etishning sanitariya normalari va qoidalari talablariga asosan faoliyat olib boradi;

2) kunduzgi oromgohlar — umumtaʼlim maktablari, akademik litsey va kasb-hunar kollejlari, sport, ijtimoiy xizmat koʻrsatish, sanatoriy-kurort muassasalari, klublar qoshida vaqtinchalik tashkil etilib, unda bolalar faqatgina kunduz kuni dam oldiriladi va sogʻlomlashtiriladi. Ushbu oromgohlar faoliyati taʼtil davrida bolalarning kunduz kuni dam olishlarini taʼminlash va sogʻlomlashtirish oromgohlari joylashuvi, taʼminoti va kun tartibini tashkillashtirishning gigiyena talablariga muvofiq yuritiladi.

10. Bolalar oromgohlarga yoʻllanma asosida yuboriladi. Bunda oromgohga yoʻllanmalar bolalarning ota-onalari ishlayotgan tashkilotlar, ota-onalar, homiylar, kasaba uyushmalari tashkilotlarining mablagʻlari va qonun hujjatlarida taqiqlanmagan boshqa mablagʻlar hisobidan xarid qilinadi.

11. Oromgohlarda bolalarni sogʻlomlashtirish muddatlari hududiy sogʻliqni saqlash organlarining tavsiyalari va tabiiy-iqlim sharoitlarini hisobga olgan holda Oʻzbekiston Kasaba uyushmalari Federatsiyasi Kengashi Rayosati tomonidan belgilanadi. Bunda sogʻlomlashtirish muddatlari yozgi mavsumda 10 kundan, kuzgi, qishki va bahorgi mavsumda 7 kundan kam boʻlmasligi lozim.

12. Oromgohda bolalarning yoshini hisobga olgan holda guruhlar tuziladi. Guruhlardagi bolalar soni 7 — 9 yoshdagi bolalar uchun 30 nafardan, 10 — 18 yoshdagi bolalar uchun 40 nafardan oshmasligi kerak.

13. Oromgohlarda Vazirlar Mahkamasining 2012-yil 10-martdagi 67-son qarori bilan tasdiqlangan Respublika oromgohlarida bolalarning dam olishini tashkil etish va sogʻlomlashtirish konsepsiyasida nazarda tutilgan xizmatlar koʻrsatiladi.

14. Oromgohlarda dam oluvchilar uchun ovqatlanish va boshqa maishiy sharoitlarni tashkil etishda sanitariya normalari va qoidalariga rioya qilinishi zarur.

15. Oromgohlar bolalarning yoshini eʼtiborga olgan holda tarbiyaviy ishlarning mazmuni boʻyicha quyidagi ixtisoslashgan yoʻnalishlarda tashkil etilishi mumkin:

intellektual rivojlantirish oromgohlari;

sport-sogʻlomlashtirish oromgohlari;

sanatoriy-sogʻlomlashtirish oromgohlari;

mehnat va dam oldirish oromgohlari;

harbiy-sport oromgohlari;

ekologik-biologik, oʻlkashunoslik oromgohlari;

ixtisoslashgan bolalar oromgohlari.

Tashkilotchilarning taklif va tashabbuslari bilan boshqa yoʻnalishlarda ham oromgohlar faoliyati tashkil etilishi mumkin.

2-§. Intellektual rivojlantirish oromgohlari

16. Intellektual rivojlantirish oromgohlari fan olimpiadalari, taʼlim muassasalari boʻyicha oʻtkazilgan boshqa musobaqalar gʻoliblari boʻlgan 10–14 yoshdagi bolalarni dam oldirish va sogʻlomlashtirish uchun tashkil etilgan boʻlib, unda bir yoki bir nechta fanlar yoxud tillar chuqurlashtirilgan tarzda oʻrganilishiga eʼtibor beriladi.

17. Intellektual rivojlantirish oromgohlari intellektual oʻquv mashgʻulotlari va madaniy-maʼrifiy tadbirlar dasturlari asosida faoliyat koʻrsatadi.

Intellektual oʻquv mashgʻulotlari dasturi fan yoʻnalishlari boʻyicha dars va toʻgarak mashgʻulotlari, mahorat darslari, fan kechalari, turli musobaqa, viktorina va boshqa tanlovlar shaklida amalga oshiriladi.

Madaniy-maʼrifiy tadbirlar dasturi sport musobaqalari, ijodiy uchrashuvlar, adabiy-badiiy kechalar va konsert dasturlari, insho va rasmlar tanlovlari, shuningdek oromgohlar uchun tavsiya etilgan filmlar namoyishi shaklida tashkil etiladi.

18. Intellektual oʻquv mashgʻulotlari va madaniy-maʼrifiy tadbirlar dasturlarini amalga oshirishda olimlar va oliy taʼlim muassasalarining professor-oʻqituvchilari, adabiyot va sanʼat arboblari ular bilan kelishilgan holda taklif etiladi.

3-§. Sport-sogʻlomlashtirish oromgohlari

19. Sport-sogʻlomlashtirish oromgohlari 8 — 18 yoshdagi bolalar uchun sport yoʻnalishidagi taʼlim muassasalari tarbiyalanuvchilarining oʻquv-mashq mashgʻulotlarini davom ettirishlari, ularning sport mahoratini takomillashtirish, jismoniy tayyorgarlik darajasini oshirish, sogʻligʻini mustahkamlashga yoʻnaltirilgan boʻlib, unda bolalarning yoshi va sport turining oʻziga xos xususiyatlari asosida har xil guruhlar tuzilishi mumkin.

20. Sport-sogʻlomlashtirish oromgohlaridagi oʻquv-mashq mashgʻulotlari bolalar sport maktablarida oʻtkaziladigan oʻquv jarayonining davomi boʻlib, mazkur muassasalar uchun moʻljallangan dasturlar asosida murabbiylar tomonidan olib boriladi.

21. Sport-sogʻlomlashtirish oromgohiga tarbiyachi va yetakchilar sifatida bolalar uchun sport yoʻnalishidagi taʼlim muassasalarining murabbiylari kelishuv boʻyicha jalb etiladi.

4-§. Sanatoriy-sogʻlomlashtirish oromgohlari

22. Sanatoriy-sogʻlomlashtirish oromgohlari yurak qon-tomir tizimining kasallanishi, nafas olish, ovqat hazm qilish organlari, tayanch-harakat apparatining oʻziga xos boʻlmagan xususiyatlari bilan betob boʻlib turadigan 7 — 14 yoshdagi bolalarni dam oldirish va sogʻlomlashtirish uchun tashkil etiladi.

23. Sanatoriy-sogʻlomlashtirish oromgohlari statsionar baza asosida qurilgan sogʻlomlashtirish oromgohlari, sanatoriya turidagi maktab-internatlar, sanatoriy-profilaktoriylar bazasida, shuningdek oʻrmon, daryo va boshqa suv havzalari yonida joylashgan hamda yetarli darajada koʻkalamzorlashtirilgan, zarur jihozlar bilan taʼminlangan obyektlarda tashkil etilishi mumkin. Mazkur oromgohlarda bolalarning sogʻlomlashtirilishini tashkil etish davolash-sogʻlomlashtirish rejimiga qatʼiy rioya qilgan holda chiniqish bilan birga olib boriladigan davolash badan tarbiyasi, toʻyimli ovqatlanish hamda kasallik turi va xususiyatiga mos keluvchi profilaktik muolajaga asoslanishi kerak.

24. Sanatoriy-sogʻlomlashtirish oromgohlarida bolalarning jismoniy tarbiyasi tibbiy nazorat ostida olib boriladi. Ushbu oromgohlarda sogʻlomlashtirilayotgan bolalar uchun jismoniy zoʻriqish darajasi va rejimi shifokor tomonidan belgilanadi.

25. Sanatoriy-sogʻlomlashtirish oromgohlarida olis masofaga va uzoq davom etuvchi sayohatlar, harbiy oʻyinlar va sport musobaqalarini oʻtkazish tavsiya etilmaydi, uzoqqa yoki tezroq yugurishni, chidamlilikni nazarda tutuvchi boshqa mashgʻulot turlari cheklangan holda oʻtkaziladi.

5-§. Mehnat va dam oldirish oromgohlari

26. Mehnat va dam oldirish oromgohlari umumtaʼlim maktablari, akademik litsey va kasb-hunar kollejlarining 15 — 18 yoshdagi oʻquvchilarini dam oldirish va sogʻlomlashtirishni ularning ijtimoiy foydali mehnati bilan birga olib borish maqsadida tashkil etiladi. Unda bolalar ijtimoiy foydali mehnatga tayyorlanadi, ularning mehnat koʻnikmalari shakllantiriladi. Oʻquvchilarning qiziqishlari va ehtiyojlarini moddiy jihatdan qoʻllab-quvvatlash va ragʻbatlantirish oromgohni tashkil etishning asosiy sharti hisoblanadi.

27. Mehnat va dam olish oromgohlari kunduzgi oromgoh sifatida turli tashkilotlar, shu jumladan fermer xoʻjaliklari bazasida tashkil etiladi. Mazkur oromgohlarda har bir mavsum ushbu Nizomning 11-bandida nazarda tutilgan tartibda 12 kundan koʻp boʻlmagan muddatga belgilanadi.

28. Bolalarni ijtimoiy foydali mehnatga tayyorlash va ularning mehnat koʻnikmalarini shakllantirishda bajarayotgan ishining turi va muddatlaridan qatʼi nazar, 18 yoshga yetmagan shaxslar uchun belgilangan sanitariya-epidemiologik qoidalar va mehnatni muhofaza qilish qoidalari talablariga rioya qilinishi shart. Mazkur muassasalarga qabul qilingan bolalar Oʻn sakkiz yoshdan kichik shaxslarning mehnati qoʻllanishi taqiqlanadigan noqulay mehnat sharoitlari ishlari roʻyxatida (roʻyxat raqami 1990, 2009-yil 29-iyul) nazarda tutilgan ishlarga jalb qilinmasligi lozim.

29. Mehnat va dam olish oromgohlarining kun tartibini ishlab chiqishda bolalarning mehnat faoliyatini jismoniy sogʻlomlashtirish va madaniy-ommaviy tadbirlar bilan uygʻunlashtirilgan holda olib borish nazarda tutiladi.

6-§. Harbiy-sport oromgohlari

30. Harbiy-sport oromgohlari 12 — 17 yoshdagi bolalarni harbiy-vatanparvarlik ruhida tarbiyalash, yoshlarni Vatan mudofaasiga, Oʻzbekiston Respublikasi Qurolli kuchlari saflarida xizmat qilishga tayyorlash maqsadida yozgi taʼtil mavsumida ichki ishlar organlarining profilaktik hisobida turuvchi voyaga yetmaganlar uchun 10 kundan kam boʻlmagan muddatga maxsus dastur asosida tashkil etiladi.

31. Harbiy-sport oromgohlarida voyaga yetmaganlar bilan sport mashgʻulotlari, psixologlar ishtirokida seminar-treninglar va turli madaniy-maʼrifiy tadbirlar oʻtkaziladi.

7-§. Ekologik-biologik, oʻlkashunoslik oromgohlari

32. Ekologik-biologik, oʻlkashunoslik oromgohlarida 7 — 14 yoshdagi bolalar uchun sayyohlik-oʻlkashunoslik va ekskursiya ishlarining serqirra turlari tashkil etiladi, bolalarga mamlakatimizning tabiiy, ijtimoiy-iqtisodiy va tarixiy jihatdan oʻziga xos jihatlari chuqur oʻrgatiladi.

33. Ekologik-biologik, oʻlkashunoslik oromgohlarida bolalar uchun sayyohlik, oʻlkashunoslik, tabiatshunoslik va ekologiya yoʻnalishlarida toʻgaraklar tashkil etiladi.

Mazkur toʻgaraklarda bolalarga tabiat hodisalarini kuzatish va taqqoslash, ekologik muammolarni oʻrganish va muhokama qilish, shuningdek ushbu maqsadlarda bevosita tajriba oʻtkazish uchun zarur shart-sharoitlar yaratiladi.

34. Ekologik-biologik, oʻlkashunoslik oromgohlari tomonidan ularda oʻtkaziladigan mashgʻulotlarning xususiyatini inobatga olgan holda turli yoʻnalishlar boʻyicha sayohatlar tashkil etiladi.

8-§. Ixtisoslashgan bolalar oromgohlari

35. Ixtisoslashgan bolalar oromgohlari 7 — 14 yoshdagi bolalarda yetakchilik va faollikni shakllantirish, ularning ijtimoiy moslashuv koʻnikmalarini oshirishga yoʻnaltiriladi.

36. Ixtisoslashgan bolalar oromgohlarining faoliyati, qoida tariqasida, Oʻzbekiston Respublikasi Xalq taʼlimi vazirligi tizimidagi “Mehribonlik” uylarida tarbiyalanayotgan oʻquvchilarning taʼtil paytida dam olishlari va salomatliklarini mustahkamlashni hamda ularga qoʻshimcha taʼlim-tarbiya berishni nazarda tutgan holda tashkil etiladi.

37. Ixtisoslashgan bolalar oromgohlarida tarbiyachi sifatida “Mehribonlik” uylarining xizmatchilari, toʻgarak rahbarlari sifatida esa “Barkamol avlod” bolalar markazlarining pedagog xodimlari jalb etiladi.

4-bob. Oromgohni boshqarish

38. Oromgoh faoliyatiga kasaba uyushmasi qoʻmitasi bilan kelishilgan holda Balansda saqlovchi tomonidan tayinlanadigan boshliq rahbarlik qiladi.

39. Oromgoh xodimlarining shtatlar jadvali oromgohning bolalarni qabul qilish quvvatidan kelib chiqqan holda Balansda saqlovchi va kasaba uyushmasi qoʻmitasi tomonidan ishlab chiqiladi va Balansda saqlovchi tomonidan tasdiqlanadi.

40. Oromgoh xodimlari mehnat shartnomasi asosida oromgoh boshligʻining buyrugʻi bilan ishga qabul qilinadi va lavozimidan ozod etiladi.

41. Tibbiyot xodimlari oromgohga tegishli hududiy sogʻliqni saqlash organlari bilan kelishgan holda ishga qabul qilinadi. Tibbiyot xodimlari va oromgoh rahbariyati bolalarning hayoti, sogʻligʻi va jismoniy rivojlanishi, ular bilan mavsum davomida davolash-profilaktika ishlari olib borilishi, sanitariya normalari, qoidalari va gigiyena normativlariga rioya qilinishi uchun masʼul hisoblanadi.

42. Statsionar turdagi oromgoh xodimlari uchun yashash va ovqatlanish bepul amalga oshiriladi va buning uchun sarflanadigan xarajatlar Balansda saqlovchi hisobidan qoplanadi.

5-bob. Oromgohni moliyalashtirish

43. Statsionar turdagi oromgohni doimiy saqlash boʻyicha xarajatlar Balansda saqlovchi tomonidan amalga oshiriladi.

Agar oromgoh bir nechta Balansda saqlovchi va kasaba uyushmalarining birgalikdagi mablagʻlari asosida tashkil etilgan boʻlsa, uni moddiy taʼminlash boʻyicha xarajatlar oromgohni tashkil etishda ishtirok etgan tashkilotlar tomonidan oromgohga sogʻlomlashtirish uchun joʻnatilgan bolalarning soniga mutanosib ravishda qoplanadi.

44. Kunduzgi oromgohlarni moddiy taʼminlash, bolalarni sogʻlomlashtirish, tarbiyaviy ishlarni oʻtkazish, shuningdek xodimlarning ish haqi, ovqatlanishi uchun zarur boʻlgan xarajatlar Balansda saqlovchi hamda tegishliligiga koʻra hududiy xalq taʼlimi yoki oʻrta maxsus, kasb-hunar taʼlimi organlari tomonidan kasaba uyushmasi organi bilan kelishilgan holda tuziladigan xarajatlar smetasiga muvofiq amalga oshiriladi.

45. Bolalarni oromgohlarda saqlash xarajatlari quyidagi manbalar hisobidan qoplanadi:

ijtimoiy sugʻurta mablagʻlari;

kasaba uyushmalari budjeti mablagʻlari;

sogʻlomlashtirilayotgan bolalar ota-onalarining oromgohga yoʻllanmalar uchun toʻlaydigan mablagʻlari;

Balansda saqlovchining mablagʻlari;

homiylarning mablagʻlari;

qonun hujjatlarida taqiqlanmagan boshqa mablagʻlar.

46. Bolalarni oromgohlarda dam oldirish va sogʻlomlashtirish uchun zarur boʻlgan kasaba uyushmalari budjeti mablagʻlari miqdori kasaba uyushmalari hisobidan sogʻlomlashtirilishi rejalashtirilgan bolalar sonidan kelib chiqib aniqlanadi.

47. Balansda saqlovchi oromgohning bolalarni qabul qilish quvvati doirasida oromgohga oʻz hisobidan bolalar uchun qoʻshimcha oʻrinlar tashkil qilishi mumkin. Bunda oromgohdagi bolalar sonining ortishi va ularning taʼminoti bilan bogʻliq xarajatlar, shu jumladan, bolalarning ovqatlanishi, davolanishi, oromgoh xodimlarining ish haqi uchun qoʻshimcha mablagʻlar va boshqa xarajatlar Balansda saqlovchi tomonidan qoplanadi.

48. Oromgohning buxgalteriya hisobi va hisoboti buxgalteriya hisobi toʻgʻrisidagi qonun hujjatlarida belgilangan tartibda amalga oshiriladi.

49. Oromgohning moliyaviy-xoʻjalik faoliyati muntazam ravishda, lekin dam olish mavsumi davomida kamida bir marta Balansda saqlovchi va kasaba uyushmasi qoʻmitasi tomonidan tekshiriladi.

50. Dam olish mavsumi tugagach, oromgohning moliyaviy-xoʻjalik faoliyati Balansda saqlovchi va kasaba uyushmasi qoʻmitasi tomonidan taftish qilinadi hamda oromgohning mol-mulki toʻliq xatlovdan oʻtkaziladi.

6-bob. Yakuniy qoidalar

51. Oromgohni qayta tashkil etish yoki tugatish Oʻzbekiston Respublikasining qonun hujjatlarida belgilangan tartibda amalga oshiriladi.

52. Ushbu Nizom Oʻzbekiston Respublikasi Moliya vazirligi, Mehnat va aholini ijtimoiy muhofaza qilish vazirligi, Ichki ishlar vazirligi, Madaniyat va sport ishlari vazirligi, Oʻzbekiston Kasaba uyushmalari Federatsiyasi Kengashi, Oʻzbekiston Fermyerlari kengashi hamda Oʻzbekiston Respublikasi Savdo-sanoat palatasi bilan kelishilgan.

Moliya vaziri R. AZIMOV

2014-yil 10-mart

Mehnat va aholini ijtimoiy muhofaza qilish vaziri A. XAITOV

2014-yil 6-mart

Ichki ishlar vaziri A. AXMEDBOYEV

2014-yil 6-mart

Madaniyat va sport ishlari vaziri M. XODJIMATOV

2014-yil 5-mart

Oʻzbekiston Kasaba uyushmalari Federatsiyasi Kengashi raisi T. NARBAYEVA

2014-yil 4-mart

Oʻzbekiston Fermyerlari kengashi raisi S. TURDIYEV

2014-yil 3-mart

Savdo-sanoat palatasi raisi A. ShAYXOV

2014-yil 3-mart