Tumanda 2014-yilda ijtimoiy muhofazaga muhtoj va ish topishda qiynalayotgan shaxslarni ishga joylashtirish uchun ish oʻrinlarini band qilib qoʻyish toʻgʻrisida (645-son)

30.09.2013

Buxoro viloyati Jondor tumani hokimining

Qarori

Oʻzbekiston Respublikasi “Aholini ish bilan taʼminlash toʻgʻrisida”gi Qonunining 17-moddasi hamda Oʻzbekiston Respublikasi Vazirlar Mahkamasining 2008-yil 20-avgustdagi 186-son qarori bilan tasdiqlangan “Ijtimoiy muhofazaga muhtoj va ish topishda qiynalayotgan shaxslarni ishga joylashtirish uchun ish oʻrinlarini band qilib qoʻyish tartibi toʻgʻrisida”gi (Oʻzbekiston Respublikasi qonun hujjatlari toʻplami, 2008-y., 34-son, 333-modda) nizomga asosan ijtimoiy muhofazaga muhtoj va ish topishda qiynalayotgan shaxslarni ishga joylashtirish uchun ish oʻrinlarini band qilib qoʻyish toʻgʻrisida qaror qilaman:

1. Oʻzbekiston Respublikasi Vazirlar Mahkamasining 2008-yil 20-avgustdagi 186-sonli qarori bilan tasdiqlangan “Ijtimoiy muhofazaga muhtoj va ish topishda qiynalayotgan shaxslarni ishga joylashtirish uchun ish oʻrinlarini band qilib qoʻyish tartibi toʻgʻrisida”gi nizomga asosan korxonalar kesimida ijtimoiy muhofazaga muhtoj va ish topishda qiynaladigan shaxslar uchun ish oʻrinlarining eng kam soni (kvotalangan ish oʻrinlari) ilovaga* muvofiq tasdiqlansin.

* Ilova berilmaydi.

Xodimlarning roʻyxat boʻyicha oʻrtacha sonidan 362 kishini tashkil etadigan 100 foiz miqdorida, shu jumladan:

Yolgʻiz ota, yolgʻiz ona hamda oʻn toʻrt yoshgacha va nogiron bolalari bor koʻp bolali ota-onalar uchun 10,2 foiz (37 kishi);

taʼlim muassasalarini tugatgan yoshlar uchun 70,8 foiz (256 kishi);

muddatli harbiy xizmatdan boʻshatilganlar uchun 11,6 foiz (42 kishi);

nogironlar uchun 3,0 foiz (11 kishi);

Bandlikka koʻmaklashish va aholini ijtimoiy muhofaza qilish markazida ish qidiruvchi sifatida hisobda turgan pensiya yoshiga yaqinlashib qolgan shaxslar uchun 2,2 foiz (8 kishi);

jazoni oʻtash muassasalaridan boʻshatilgan, jazoni oʻtayotgan yoki sud qaroriga koʻra tibbiy yoʻsindagi majburlov choralar koʻriladigan shaxslar uchun 2,2 foiz (8 kishi).

2. Korxona, tashkilotlar rahbarlariga Oʻzbekiston Respublikasi Vazirlar Mahkamasining 2008-yil 20-avgustdagi 186-sonli qarori bilan tasdiqlangan “Ijtimoiy muhofazaga muhtoj va ish topishda qiynalayotgan shaxslarni ishga joylashtirish uchun ish oʻrinlarini band qilib qoʻyish tartibi toʻgʻrisida”gi nizomga muvofiq ijtimoiy muhofazaga muhtoj va ish topishda qiynalayotgan shaxslar uchun ish oʻrinlari tashkil etish topshirilsin.

3. Tuman Bandlikka koʻmaklashish va aholini ijtimoiy muhofaza qilish markazi (N. Boltayev)ga bir hafta muddatda qarorni ilovada belgilangan korxonalarga yetkazsin hamda ushbu qarorning bajarilishi boʻyicha yuqori tashkilotlarga har oy maʼlumot berib borish topshirilsin.

4. Ushbu qaror bajarilmagan taqdirda korxonaning mansabdor shaxslariga “Ijtimoiy muhofazaga muhtoj va ish topishda qiynalayotgan shaxslarni ishga joylashtirish uchun ish oʻrinlarini band qilib qoʻyish tartibi toʻgʻrisida”gi nizomning 15-bandiga muvofiq jarima solinadi.

5. Ushbu qaror “Jondor ovozi” gazetasida eʼlon qilinsin.

6. Mazkur qaror rasmiy eʼlon qilingan kundan eʼtiboran kuchga kiradi.

7. Mazkur qarorning bajarilishini nazorat qilish tuman hokimining iqtisodiyot va ijtimoiy rivojlantirish masalalari boʻyicha oʻrinbosari R. Doniyev zimmasiga yuklatilsin.

Hokim Q. SALOMOV

Jondor sh.,

2013-yil 30-sentabr,

645-son