Oʻzbekiston oliy taʼlim muassasalari talabalarining “Universiada-2007” sport musobaqalarini tashkil etish toʻgʻrisida (PQ-624-son)
16.04.2007
Oʻzbekiston Respublikasi Prezidentining
Qarori
Mamlakatimiz oliy taʼlim muassasalari talabalari oʻrtasida sogʻlom turmush tarzi muhitini yanada mustahkamlash, ularning sport bilan muntazam shugʻullanishi uchun zamon talablariga mos shart-sharoitlarni yaratish, sport musobaqalari orqali yoshlarning irodasi, oʻz kuchi va imkoniyatlariga boʻlgan ishonchini, mardlik va vatanparvarlik, ona yurtga sadoqat tuygʻularini kamol toptirish, musobaqalar munosabati bilan oʻtkaziladigan madaniy-maʼrifiy tadbirlar samarasini oshirish maqsadida:
1. Oʻzbekiston Respublikasi Oliy va oʻrta maxsus taʼlim vazirligi, Madaniyat va sport ishlari vazirligi va Milliy Olimpiya qoʻmitasining “Universiada-2007” sport musobaqalarining Toshkent shahrida boʻlib oʻtadigan yakuniy bosqichini 2007-yil iyun oyining uchinchi oʻn kunligida “Yoshlik” talabalar shaharchasi, Oʻzbekiston Tashqi iqtisodiy faoliyat milliy banki hamda Toshkent temir yoʻl muhandislari instituti sport majmualarida oʻtkazish toʻgʻrisidagi taklifi qabul qilinsin.
2. “Universiada-2007” sport musobaqalarini Toshkent shahrida oʻtkazish dasturi (1-ilova*) va tashkiliy qoʻmita tarkibi (2-ilova*) tasdiqlansin.
*1 va 2-ilovalar berilmaydi.
3. Tashkiliy qoʻmita:
10 kun muddatda “Universiada-2007” sport musobaqalarini oʻtkazish uchun tegishli sarf-xarajatlar smetasini ishlab chiqib, uning moliyaviy manbalarini belgilashda mazkur musobaqalarni oʻtkazish bilan bogʻliq xarajatlar davlat budjeti, Oliy va oʻrta maxsus taʼlim vazirligi hamda Toshkent shahar hokimligi tomonidan qoplanishini nazarda tutsin;
“Universiada-2007” sport musobaqalari xarajatlarining bir qismi Oliy va oʻrta maxsus taʼlim vazirligining Oliy taʼlim muassasalarini rivojlantirish jamgʻarmasi mablagʻlari hisobidan moliyalashtirilishiga ruxsat berilsin;
korxona va tashkilotlar, yuridik va jismoniy shaxslarning “Universiada-2007” sport musobaqalarini oʻtkazishga homiylik qilish haqidagi takliflari maʼqullansin;
“Universiada-2007” sport musobaqalari uchun qurilayotgan va rekonstruksiya qilinayotgan sport inshootlaridagi qurilish-montaj ishlarini jadallashtirish maqsadida pudratchi tashkilotlarning aniq ish hajmlari va ularni bajarish muddatlarini belgilasin;
barcha tadbirlar, jumladan, musobaqalar oʻtkaziladigan sport inshootlarining xalqaro talablar darajasida tayyorlanishi va zamonaviy sport anjomlari bilan jihozlanishi hamda tadbirlar oʻtadigan joylarni obodonlashtirish ishlarini joriy yilning 15-iyuniga qadar tugatishni taʼminlasin.
4. Oʻzbekiston Respublikasi Madaniyat va sport ishlari vazirligi, Oliy va oʻrta maxsus taʼlim vazirligi, “Oʻzbeknavo” estrada birlashmasi Toshkent shahar hokimligi bilan birgalikda “Universiada-2007” sport musobaqalarining tantanali ochilish va yopilish marosimlari yuksak saviyada oʻtishini tashkil etsin.
5. Toshkent shahar hokimligiga:
sportchi talabalarni musobaqalar oʻtkaziladigan maskanlar va yashash joylariga olib boradigan yoʻnalishlarni belgilab, shu yoʻnalishlar boʻyicha taʼmirlash-obodonlashtirish ishlarini amalga oshirish;
“Toshshahartransxizmat” uyushmasi bilan birgalikda sportchi talabalarni belgilangan manzillarga yetkazish uchun texnik koʻrikdan oʻtgan transport vositalarini jalb etish;
shahar koʻchalarini “Universiada-2007” sport musobaqalarini targʻib qilishga qaratilgan koʻrgazmali vositalar bilan bezatish;
Toshkent temir yoʻl vokzalida sportchi talabalarni tantanali kutib olish va kuzatishni tashkil etish vazifalari topshirilsin.
6. Oʻzbekiston Respublikasi Sogʻliqni saqlash vazirligi musobaqalar ishtirokchilarini tibbiy koʻrikdan oʻtkazish, musobaqalar davrida tez tibbiy xizmat koʻrsatish, dam olish va ovqatlanish joylarida sanitariya-gigiyena talablariga qatʼiy rioya etilishini alohida nazoratga olsin.
7. “Oʻzbekiston temir yoʻllari” kompaniyasi, Oliy va oʻrta maxsus taʼlim vazirligi buyurtmasiga muvofiq, musobaqalar ishtirokchilari yoʻl xarajatlari uchun imtiyozli toʻlov tariflarini qoʻllashni nazarda tutsin.
8. Respublika “Vatanparvar” tashkiloti Oʻzbekiston Respublikasi Fanlar akademiyasi, Oliy va oʻrta maxsus taʼlim vazirligi, Toshkent shahar, Toshkent viloyati hokimliklari, Sogʻliqni saqlash hamda Ichki ishlar vazirliklari bilan birgalikda “Quyosh fizikasi” ilmiy-ishlab chiqarish birlashmasida universiada mashʼalasini yoqish va uni Toshkent shahriga yetkazish bilan bogʻliq barcha tashkiliy-xavfsizlik tadbirlarini amalga oshirsin.
9. Oʻzbekiston Respublikasi Ichki ishlar vazirligi, tegishli vakolatli tashkilotlar bilan birgaliqda, “Universiada-2007” musobaqalari davomida tadbirlar oʻtadigan joylarda jamoat va transport harakati xavfsizligini taʼminlasin.
10. Oʻzbekiston Milliy axborot agentligi, Oʻzbekiston Milliy teleradiokompaniyasi va boshqa ommaviy axborot vositalariga “Universiada-2007” musobaqalariga tayyorgarlik koʻrish va uni oʻtkazish jarayonini keng yoritish tavsiya etilsin.
11. Mazkur qarorning bajarilishini nazorat qilish Oʻzbekiston Respublikasining Bosh vaziri Sh. Mirziyoyev zimmasiga yuklansin.
Oʻzbekiston Respublikasining Prezidenti I. KARIMOV
Toshkent sh.,
2007-yil 16-aprel,
PQ-624-son